मांड सोभाण प्रकाशनाचें २२ वें आनी रोनी अरूण हाणें लिखललें पुसतक ʻरिक्षा डैरीʼ ०९.०५.२४ वेर उल्लाळ सोमेश्वर आसच्या पश्चीम ट्रसटाच्या सालांत लोकार्पण जालें. म्हाल्गडी साहिती आनी प्रकाशकी ग्लेडीस रेगोन हें पुसतक लोकार्पण केलें. काऱ्याचो मुखेल सयरो पश्चीम ट्रसटाचो दिरेक्तोर रोहीत सांक्तूस हाणें बरें मागून कोंकणी कला आनी साहित्याक मांड सोभाणाची वर्ती देणगी आसा. रोनी अरुणा तसले समाजिच्या थळाव्या गजालिंचेर बरोवंक सक्तात आनी ताचीं बर्पां काळजाक आंवडतात म्हण संतोस उचारलो.
वेदीर मांड सोभाण गुर्कार एरीक ओझेरियो, अध्यक्ष लुवी पिंटो, तेलोका संस्थ्यांची निर्देशकी क्लारा डिकुन्हा हाजर आसललीं. बरोवपी रोनी अरुणान प्रसतावीक उलोवप दिलें तर वितोरी कार्कळान काऱ्यें सांबाळ्ळें.
रिक्षा डैरी दिर्वें नेमाळ्यार पर्गट जाल्ल्या ४४ लेकनांचो फुंजो. हांतूं लेखकान रिक्षा ड्रैवर जावन आसताना पळेयिल्ल्यो आनी भोगुल्ल्यो गजाली सुरस शैलेन पिंत्रायल्यात. कलाकार विल्सन कय्यारान सोभीत फोर सोडयला आनी कवी टैटस नोरोन्हान सुर्विलीं उत्रां बरयल्यांत. हें पुसतक ग्लेडीस रेगो अनुदानाखाल छापचें पांचवें पुसतक. रोनी अरुणान हाचे आदीं बिडार (सृजना प्रकाशन) आनी थकानातललो झुजारी (मांड सोभाण प्रकाशन) दोन पुसतकां बरयिल्लीं आसात. थकानातललो झुजारी पुसतकाक कर्नाटक कोंकणी साहित्य अकाडेमी पुसतक पुरसकार (२०१५) फावो जाला.
१२४ पानांच्या ह्या पुसतकाचें मोल रू १२०/- तरी मांड सोभाण दफ्तरांत आनी रोनी अरुणालागीं (मो: ९४४९२४३९४१) १००/- रुप्यांक मेळतलें.
