മാണ്ഡ് സൊഭാൺ പ്രകാശനാചെം 22 വെം ആനി രൊനി അരുൺ ഹാണെം ലിഖ്ലലെം പുസ്തക് ʻരിക്ഷാ ഡൈരിʼ 09.05.24 വെർ ഉല്ലാൾ സോമേശ്വർ ആസ്ച്യാ പശ്ചിം ട്രസ്ടാച്യാ സാലാന്ത് ലൊകാർപൺ ജാലെം. മ്ഹാൽഗഡി സാഹിതി ആനി പ്രകാശകി ഗ്ലേഡിസ് രേഗൊൻ ഹെം പുസ്തക് ലൊകാർപൺ കെലെം. കാര്യാചൊ മുഖെൽ സയ്രൊ പശ്ചിം ട്രസ്ടാചൊ ദിരെക്തൊർ രോഹിത് സാങ്ക്തുസ് ഹാണെം ബരെം മാഗുൻ കൊങ്ക്ണി കലാ ആനി സാഹിത്യാക് മാണ്ഡ് സൊഭാണാചി വർതി ദേൺഗി ആസാ. രൊനി അരുണാ തസലെ സമാജിച്യാ ഥളാവ്യാ ഗജാലിഞ്ചെർ ബരൊംവ്ക് സക്താത് ആനി താചിം ബർപാം കാൾജാക് ആംവഡ്താത് മ്ഹൺ സന്തൊസ് ഉചാർലൊ.
വെദിർ മാണ്ഡ് സൊഭാൺ ഗുർകാർ എരിക് ഒഝേരിയൊ, അധ്യക്ഷ് ലുവി പിണ്ടൊ, തെലൊകാ സംസ്ഥ്യാഞ്ചി നിർദേശകി ക്ലാരാ ഡികുൻഹാ ഹാജർ ആസ്ലലിം. ബരൊവ്പി രൊനി അരുണാൻ പ്രസ്താവിക് ഉലൊവ്പ് ദിലെം തർ വിതൊരി കാർകളാൻ കാര്യെം സാംബാള്ളെം.
രിക്ഷാ ഡൈരി ദിർവെം നെമാള്യാർ പർഗട് ജാല്ല്യാ 44 ലേകനാഞ്ചൊ ഫുഞ്ജൊ. ഹാന്തും ലേഖകാൻ രിക്ഷാ ഡ്രൈവർ ജാവ്ന് ആസ്താനാ പളെയില്ല്യൊ ആനി ഭൊഗുല്ല്യൊ ഗജാലി സുരസ് ശൈലെൻ പിന്ത്രായ്ല്യാത്. കലാകാർ വിൽസൻ കയ്യാരാൻ സൊഭിത് ഫൊർ സൊഡയ്ലാ ആനി കവി ടൈടസ് നൊരൊൻഹാൻ സുർവിലിം ഉത്രാം ബരയ്ല്യാന്ത്. ഹെം പുസ്തക് ഗ്ലേഡിസ് രേഗൊ അനുദാനാഖാൽ ഛാപ്ചെം പാഞ്ച്വെം പുസ്തക്. രൊനി അരുണാൻ ഹാചെ ആദിം ബിഡാർ (സൃജനാ പ്രകാശൻ) ആനി ഥകാനാത്ലലൊ ഝുജാരി (മാണ്ഡ് സൊഭാൺ പ്രകാശൻ) ദോൻ പുസ്തകാം ബരയില്ലിം ആസാത്. ഥകാനാത്ലലൊ ഝുജാരി പുസ്തകാക് കർനാടക കൊങ്ക്ണി സാഹിത്യ് അകാഡെമി പുസ്തക് പുരസ്കാർ (2015) ഫാവൊ ജാലാ.
124 പാനാഞ്ച്യാ ഹ്യാ പുസ്തകാചെം മോൽ രു 120/- തരീ മാണ്ഡ് സൊഭാൺ ദഫ്തരാന്ത് ആനി രൊനി അരുണാലാഗിം (മോ: 9449243941) 100/- രുപ്യാങ്ക് മെൾതലെം.
