ജുലൈ 14വെർ സക്ലേശ്’പുർ സാം. ജുജെ ഇസ്കൊലാച്യാ സാലാന്ത് അഖിൽ ഭാരതീയ് കൊങ്കണി പരിശദ് ഹാണി കഥൊലിക് കൊങ്കണി രാകൺ സഞ്ചലൻ, ചിക്’മഗ്ളുർ – ഹാസൻ, സക്ലേശ്’പുർ ഘടകാച്യാ ആസ്ര്യാഖാൽ 86വൊ സ്ഥാപനാ ദീസ് വ്ഹഡാ ദബാജ്യാൻ മാനായ്ലൊ.
ഗൊംയ് വിദ്യാപീഠാചി വിശ്രാന്ത് ഡീൻ, മാൽഘഡി സാഹിതി ആനി സംശോധകി പ്രൊ| ഡൊ| കിരൺ ബുഡ്കുലെ കാര്യാക് മുകെൽ സയ്രി ജാവ്ന് ഹാജർ ആസ്ലി.
“മാദവ് മഞ്ജുനാഥ് ശാനഭാഗ് ആനി താചെ ഉപ്രാന്ത് ആയില്ല്യാ സാഹിതി. സംഘടക് ആനി കാര്യകർതാംനി കാഡ്’ല്ല്യാ വാംവ്ടിൻ കൊങ്ക്ണി ഭാശെക് സാഹിത്യ് അകാഡെമിന്ത് ഏക് സാഹിതിക് ഭാസ് മ്ഹൺ ആനി സംവിദാനാച്യാ അട്വ്യാ വളെരിന്ത് രാഷ്ട്ര് ഭാസ് മ്ഹൺ മാനാചൊ ജാഗൊ ഫാവൊ ജാലാ. ഗൊംയ്, കർനാടക, കേരൾ രാജ്യാംനി കൊങ്ക്ണി അകാഡെമി സ്ഥാപൻ ജാല്യാത്, ശാളെംനി, വിശ്വവിദ്യാലയാംനി ഭുർഗിം കൊങ്ക്ണെന്ത് ശിക്താത്, അധ്യയൻ – സംസോധ് കർതാത്. ഹർ മൻശ്യാൻ ആപ്ല്യാ താങ്കി പുർതെം കാം കൊങ്ക്ണി ഭാശെഖാതിർ കെലെം ജാല്യാർ ആമി ആമ്ച്യാ മാംയ്’ഭാശെചി സെവാ കെല്ലെപരിം ജാതെലെം. തർനാട്യാംനി തന്ത്രജ്ഞാൻ വാപർൻ സയ്ത് ഹെം കാം കരുംയെതാ.” മ്ഹൺ കാര്യാക്രമാക് ചാലൻ ദീവ്ന് പ്രൊ| ഡൊ| കിരൺ ബുഡ്കുലെ മ്ഹണാലി.
കഥൊലിക് കൊങ്കണി രാകൺ സഞ്ചലൻ, ചിക്’മഗ്ളുർ, ഹാസൻ ഹാചൊ അധ്യക്ഷ് ശ്രീ ജോകിം ഡി’സോജാ ഹാണി ചിക്’മഗ്ളുർ – ഹാസനാന്ത് ലിതുർജെന്ത് കൊങ്ക്ണി ഹാഡ്ച്യാക് കാഡ്’ല്ലി വാംവ്ട് ആനി കൊങ്ക്ണി മിസാം ഖാതിർ സഞ്ചലനാൻ കെല്ല്യാ വാവ്രാചി ഝളക് ദീവ്ന്, ആതാം ഝുജ് ബെംഗ്ളുർ ഉഞ്ച്ല്യാ കൊഡ്തി പര്യാന്ത് പാവ്ലാം മ്ഹള്ളി മാഹെത് ദീവ്ന് സയ്ര്യാങ്ക് യെവ്കാർ മാഗ്ലൊ. കഥൊലിക് കൊങ്കണി രാകൺ സഞ്ചലൻ, ചിക്’മഗ്ളുർ – ഹാസൻ, സക്ലേശ്’പുർ ഘടകാചൊ അധ്യക്ഷ് ശ്രീ പ്രദീപ് ഡി’സൊജാ ഹാണെ മുകെൽ സയ്രി പ്രൊ| ഡൊ| ബുഡ്കുലെക് ഫുലാഞ്ചൊ തുരൊ ദീവ്ന് മാനാചൊ യെവ്കാർ മാഗ്ലൊ.
പൺതി പെടവ്ന് സ്ഥാപനാ ദീസ് ഉഗ്തായ്ലൊ ആനി പരിഷദെചൊ സ്ഥാപക് മാദവ് മഞ്ജുനാഥ് ശാനഭാഗ് ഹാഞ്ച്യാ തസ്വിരെക് ഫുലാം അർപുൻ മാൻ കെലൊ.
ആപ്ല്യാ പ്രാസ്താവിക് ഉലവ്പാന്ത് പരിശദെചൊ കാര്യാധ്യക്ഷ് മാനെസ്ത് ചേതൻ ആചാര്യാ ഹാണി “കൊങ്ക്ണി ഉലവ്പി ലോക് വ്ഹഡാ സംഖ്യാൻ ആസ്ച്യാ പ്രദേശാംനി വചൊൻ സ്ഥാപനാ ദീസ് ആചരൺ കർചി രിവാജ് പരിഷദ് പാളുൻ ആയ്ല്യാ. ദെശാച്യാ വെവെഗ്ള്യാ പ്രദേശാംനി വസ്തി കരുൻ ആസ്ച്യാ കൊങ്ക്ണി ലൊകാക് മെളൊൻ, സാംഗാതാ കൊങ്ക്ണെ ഖാതിർ വാവുർചൊ പരിഷദെചൊ ശെവൊട് ആസാ. സക്ലേശ്’പുർ ആയ്ല്യാ ഉപ്രാന്ത് ഹാംഗാസർ കൊങ്ക്ണി ലോക് ആപ്ല്യാ മാംയ്’ഭാശെന്ത് മിസാം ഭെടംവ്ച്യാ മുള്ആവ്യാ ഹക്കാ ഥാവ്ന് വഞ്ചിത് ജാലാ തെം കളൊൻ ആയ്ലെം. ആമി കൊങ്ക്ണി ലോക് ജാവ്ന് താങ്കാ സാംഗാത് ദിംവ്ചി ഗർജ് ആസാ” മ്ഹളെം.
കാര്യാന്ത് മാൽഘാഡൊ കോശ്’കാർ ശ്രീ സുരേശ് ബൊർകാർ ഹാങ്കാം മാദവ് മഞ്ജുനാഥ് ശാനഭാഗ് ജിവിതാവ്ധി പുരസ്കാർ പാടവ്ന് മാൻ കെലൊ. ശ്രീ മംഗൽ’ദാസ് ഭട് ഹാണി മാൻ പത്ര് വാച്ലെം. നാഭലായ്കെക് ലാഗൊൻ ശ്രീ ബൊർകാർ ഹാങ്കാം കാര്യാക് ഹാജർ ജാംവ്ക് സാധ്യ് ജാംവ്ക് നാ ദെകുൻ, താഞ്ച്യാ വതീൻ ശ്രീ അനിൽ പൈ ഹാണി പുരസ്കാർ സ്വീകാർ കെലൊ. ഹ്യാ വെളിം ശ്രീ ബൊർകാർ ഹാഞ്ച്യാ ഉപ്കാരാച്യാ ഉത്രാഞ്ചിം വിഡിയൊ പ്രദർശിത് കെലി.
കാര്യക്രമാന്ത് അഖിൽ ഭാരതീയ് കൊങ്ക്ണി പരിശദെൻ പർഗട് കെല്ലൊ, കവി വിൽസൻ കടീൽ ഹാചൊ ചിതുർലെചെ അച്ചേ ദിൻ കവിതാ സംഗ്രഹ് മുകെൽ സയ്രി പ്രൊ| ഡൊ| കിരൺ ബുഡ്കുലെ ഹാണി മൊക്ളിക് കെലൊ. സാഹിത്യ് അകാഡെമി, നവി ദില്ലി കൊങ്കണി സലഹാഗാർ സമിതിചൊ നിമന്ത്രക് കവി മെല്വിൻ രൊഡ്രിഗസ് ഹാണി ഹ്യാ വെളിം വെദിർ സാംഗാത് ദിലൊ.
ഭ| ലതാ ഹിച്യാ മാർഗദർശനാചെർ സാം. ജുജെ ഇസ്കൊലാച്യാ ഭുർഗ്യാംനി അപുർബായെചൊ സ്വാഗത് നാച് സാദർ കെലൊ. സക്ലേശ്’പുർ, മൂഡിഗെർ ഘടകാച്യാ സാന്ദ്യാംനിം, വിശേസ് കരുൻ ഭുർഗ്യാംനി അപുർബായെചിം കൊങ്ക്ണി പദാം ആനി നാച് സാദർ കെലെ.
സാംസ്കൃതിക് കാര്യക്രമാ മധെം “മൽനാഡാന്ത് കൊങ്ക്ണി ചള്വൾ – വർതമാൻ ആനി ഫുഡാർ” ഹ്യാ വിശയാചെർ പരിസംവാദ് ചല്ലൊ. പരിസംവാന്ദാന്ത് ശിക്ഷക് ശ്രീ വിവിയൻ ഡി’സൊജാ കൂവെ, ശ്രീമതി അനിതാ പായ്സ്, സംഘടക് ശ്രീ സിരിലൊ രെബെല്ലൊ ആനി ശ്രീ എച്ചെം, പെർനാൽ ഹാണെ സംവാദ് ചലവ്ന് വെലൊ.
ചിക്’മഗ്ളുർ – ഹാസൻ വഠാരാന്ത് കൊങ്ക്ണെ ഖാതിർ വാവുർപി ശ്രീ സ്ടേനി ഡി’സില്വ, ശ്രീമതി മെടിൽഡാൻ ഡി’സില്വ, ശ്രീ പ്രമോദ് പിണ്ടൊ (അനുപസ്ഥിത്) ജെ.വി. കാർലൊ, ശ്രീ ലവ്രെന്ത് ആനി ശ്രീ ജോകിം ഡി’സോജാ ഹാങ്കാം കൊങ്ക്ണി രായ്’ഭാരി ബിരുദ് ദീവ്ന് മാൻ കെലൊ.
ഹ്യാച് സുവാള്യാർ കാര്യക്രമാക് സഹകാർ ദില്ല്യാ തശെഞ്ച് കൊങ്ക്ണി ഭാസ് ആനി സാഹിത്യാ ഖാതിർ സെവാ ദിംവ്ച്യാ കൊവെന്താചി വ്ഹഡിൽൻ ഭ| ഐഡാ, ഘടകാചൊ അധ്യക്ഷ് ശ്രീ പ്രദീപ് ഡി’സൊജാ, ശ്രീ സിരിൽ രെബെല്ലൊ, ശ്രീ രൊനാൽഡ് മൊനിസ് ഹാസൻ, ശ്രീ ഫാവൊസ്തിൻ പിരേരാ, മാഗുണ്ഡി ആനി ശ്രീ പ്രകാശ് ഗ്രെഗൊരി ഫെർനാഡിസ് ഹാങ്കാ മാനാചൊ ശാലൊ ആനി ഗുലൊബ് ദീവ്ന് വെദിർ മാൻ കെലൊ.
വെദി കാര്യെം നാമ്നെചൊ സൂത്ര് സഞ്ചാലക് പ്രാധ്യാപക് അനന്ത് അഗ്നി ഹാണി ചലവ്ന് വ്ഹെലെം തർ, സന്മാൻ ആനി സാംസ്കൃതിക് കാര്യക്രം ശ്രീ വിൻസെണ്ട് ഫായ്സ് ആനി ശ്രീമതി സരിതാ മിനേജസ് ഹാണി ചലവ്ന് വ്ഹെലെം.
സാഹിത്യ അകാഡെമി പ്രശസ്തി വിജേത് ഡൊ| ജയന്തി നായ്ക്, ശ്രീമതി മായാ ഖരംഗടെ, പ്രൊ| ബുഡ്കുലെ, സംഘടക് – കാര്യകർത് ശ്രീ പ്രശാന്ത് നായ്ക്, മൈകൽ ഡി’സൊജാ വിശൻ കൊങ്കണി യോജനാചൊ സാന്ദൊ ശ്രീ ടൈടസ് നൊരൊൻഹാ, കവിതാ ട്രസ്ട് അധ്യക്ഷ് ശ്രീ കിശൂ, ബാർകൂർ, സാന്ദൊ ശ്രീ ആണ്ടനി ബാർകൂർ, ദായ്ജിവൽഡ് ടി.വി. നിർദേശക് ശ്രീ സ്ട്യാനി ബെളാ, കാര്യക്രം സംയോജക് ശ്രീ സഞ്ജയ് ജോൻ രൊഡ്രിഗസ്, കാര്യെം നിർവാഹക് ശ്രീ മനോജ് ഫെർനാണ്ഡിസ്, ഇംഗ്ലിശ് ലേഖക് ശ്രീ വിലിയം ഫായ്സ്, പത്രികാ പ്രതിനിധി അൽഫോൻസ് പാംഗ്ളാ ആനി ജായ്തെ മാനെസ്ത് കാര്യാക് ഉപസ്ഥിത് ആസ്ലെ.
സഗ്ള്യാ കാര്യക്രമാചൊ സംയോജക് ശ്രീ സില്വെസ്ടർ സൽഡാൻഹാ ഹാണെ സയ്ര്യാഞ്ചൊം തശെം ഹാജർ ജാല്ല്യാ സമെസ്താഞ്ചൊം ഉപ്കാർ ഭാവുഡ്ലൊ.
സകാളിം നോവ് വ്ഹരാഞ്ചെർ കാപി-ഫൾഹാരാസവെം ആരംഭ് ജാല്ലെം കാര്യെം, ലവ്ദാതൊ ഗായൻ ആനി സഹഭോജനാസവെം ദോൻ വ്ഹരാഞ്ചെർ സംപന്ന് ജാലെം.
ചിക്’മഗ്ളുർ, മൂഡിഗെരെ, ഹാസൻ, മംഗ്ളുർ, ബെംഗ്ളുർ ആനി ഗൊംയാം ഥാവ്ന് തിൻശിം കൊങ്ക്ണി ലോക് കാര്യാക് ഹാജർ ആസ്ലൊ.
