Zuloi 14ver sakleshpur sam. Zuje iskolachea salant akhil bharoti-i konkonni porixod hanni kotholik konkonni rakonn soncholon, chikmaglur – hasan, sakleshpur ghottokachea asreakhal 86vo sthapona dis vhodda dobajean manailo.
Gõy videapitthachi vixrant deen, malghoddi sahiti ani sonxodhoki Pro| Dr| Kiran Budkule kareak mukel soiri zaun hazor asli.
“Madav Manjunath Shanbhag ani tache uprant ayil’lea sahiti, Songhottok ani karyokortamni kadd’l’lea vamvttin konknni bhaxek sahity okaddemint ek sahitik bhas mhonn ani somvidanachea ottvea vollerint raxttr bhas mhonn manacho zago favo zala. Gõy, Karnataka, Keral rajeamni konknni okaddemi sthapon zaleat, xallemni, vixvovidealoyamni bhurgim konknnent xiktat, odhyoin – somsodh kortat. Hor monxean aplea tanki purtem kam’ konknni bhaxekhatir kelem zalear ami amchea mam-i’bhaxechi seva kel’leporim zatelem. Tornatteamni tontrogonean vaporn soit hem kam’ korumyeta.” mhonn kareakromak chalon diun Pro| Dr| Kiran Budkule mhonnali.
Kotholik konkonni rakonn soncholon, chikmaglur, hasan hacho odhyokx xri Joachim D’Souza hanni chikmaglur – hasanant liturjent konknni haddcheak kadd’l’li vamvtt ani konknni misam khatir soncholonan kel’lea vaurachi zhollok diun, atam zhuz bengllur unchlea koddti poreant paulam mholl’lli mahet diun soireank yeukar maglo. Kotholik konkonni rakonn soncholon, chikmaglur, hasan, sakleshpur ghottokacho odhyokx xri Pradeep D’Souza hanne mukel soiri Pro| Dr| Budkulek fulancho turo diun manacho yeukar maglo.
Ponnti pettoun sthapona dis ugtailo ani porixodecho sthapok Madav Manjunath Shanbhag hanchea tosvirek fulam orpun man kelo.
Aplea prastavik uloupant porixodecho kareadhyokx manest Chethan Acharya hanni “konknni uloupi lok vhodda sonkhean aschea prodexamni vochon sthapona dis achoronn korchi rivaz porixod pallun ailea. Dexachea vevegllea prodexamni vosti korun aschea konknni lokak mellon, sangata konknne khatir vavurcho porixodecho xevott asa. Soklex’pur ailea uprant hangasor konknni lok aplea mamibhaxent misam bhettomvchea mullavea hokka thaun vonchit zala tem kollon ailem. Ami konknni lok zaun tanka sangat dimvchi gorz asa” mhollem.
Kareant malghaddo kox’kar xri Suresh Borkar hankam Madav Majunath Shanbhag jivitaudhi puroskar pattoun man kelo. Xri Mangaldas Bhat hanni man potr vachlem. Nabholaikek lagon xri Borkar hankam kareak hazor zaunko sadhy zaunko na dekun, tanchea votin xri Anil Pai hanni puroskar svikar kelo. Hea vellim xri Borkar hanchea upkarachea utranchim viddio prodorxit keli.
Karyokromant okhil bharoti-i konknni porixoden porgott kel’lo, kovi Wilson Kateel hacho chiturleche ochche din kovita songroh mukel soiri Pro| Dr| Kiran Budkule hanni mokllik kelo. Sahity okaddemi, novi dil’li konkonni solohagar somiticho nimontrok kovi Melvin Rodrigues hanni hea vellim vedir sangat dilo.
Bho| Latha hichea margodorxonacher sam. Zuje iskolachea bhurgeamni opurbayecho svagot nach sador kelo. Sakleshpur, moodiger ghottokachea sandeamnim, vixes korun bhurgeamni opurbayechim konknni podam ani nach sador kele.
Samskritik karyokroma modhem “molnaddant konknni chollvoll – vortoman ani fuddar” hea vixoyacher porisomvad chol’lo. Porisomvandant xikxok xri Viviyan D’Souza Kuve, xrimoti Anitha Pais, songhottok xri Cyrilo Rebello ani xri H.M. Pernal hanne somvad choloun velo.
Chikmaglur – hasan vottharant konknne khatir vavurpi xri Stany D’Silva, xrimoti Metildan D’Silva, xri Pramod Pinto (onuposthit) J.V. Karlo, xri Laurent ani xri Joachim’ D’Souza hankam konknni rai’bhari birud diun man kelo.
Heach suvallear karyokromak sohokar dil’lea toxench konknni bhas ani sahitea khatir seva dimvchea koventachi vhoddiln bho| Ida, ghottokacho odhyokx xri Pradeep D’Soza, xri Cyril Rebello, xri Ronald Monis hasan, xri Favasthin Pereira, magunddi ani xri Prakash Gregory Fernades hanka manacho xalo ani gulob diun vedir man kelo.
Vedi karyem namnecho sutr sonchalok pradheapok Anant Agni hanni choloun vhelem tor, sonman ani samskritik karyokrom’ xri Vincent Pais ani xrimoti Saritha Menezes hanni choloun vhelem.
Sahityo okaddemi proxosti vijet Dr| Jayanthi Naik, xrimoti Maya Kharangate, Pro| Budkule, songhottok – karyokort xri Prashant Naik, Micheal D’Soza Vision konkonni yozonacho sando xri Titus Noronha, kovita ttrostt odhyokx xri Kishu, Barkur, sando xri Antony Barkur, daijiworld T.V. Nirdexok xri Stany Bela, karyokrom’ somyozok xri Sanjay John Rodrigues, karyem nirvahok xri Manoj Fernandes, inglix lekhok xri Wiliam Pais, potrika protinidhi Alphons Pangla ani zaite manest kareak uposthit asle.
Sogllea karyokromacho somyozok xri Sylvestor Saldanha hanne soireanchom toxem hazor zal’lea somestanchom upkar bhavuddlo.
Sokallim novo vhorancher kapi-follharasovem arombh zal’lem karyem, loudato gain ani sohobhozonasovem don vhorancher sompon’n zalem.
Chikmaglur, moodigere, hasan, manglur, benglur ani gõyam thaun tinxim konknni lok kareak hazor aslo.
