जुलै १४वेर सकलेश’पूर सां. जुजे इसकोलाच्या सालांत अखील भारतीय कोंकणी परिशद हाणी कथोलीक कोंकणी राकण संचलन, चीक’मगळूर – हासन, सकलेश’पूर घटकाच्या आसऱ्याखाल ८६वो स्थापना दीस व्हडा दबाज्यान मानायलो.
गोंय विद्यापीठाची विश्रांत डीन, मालघडी साहिती आनी संशोधकी प्रो| डो| किरण बुडकुले काऱ्याक मुकेल सयरी जावन हाजर आसली.
“मादव मंजुनाथ शानभाग आनी ताचे उपरांत आयिल्ल्या साहिती. संघटक आनी काऱ्यकर्तांनी काड’ल्ल्या वांवटीन कोंकणी भाशेक साहित्य अकाडेमिंत एक साहितीक भास म्हण आनी संविदानाच्या अटव्या वळेरिंत राषट्र भास म्हण मानाचो जागो फावो जाला. गोंय, कर्नाटक, केरळ राज्यांनी कोंकणी अकाडेमी स्थापन जाल्यात, शाळेंनी, विश्वविद्यालयांनी भुर्गीं कोंकणेंत शिक्तात, अध्ययन – संसोध कर्तात. हर मनश्यान आपल्या तांकी पुर्तें काम कोंकणी भाशेखातीर केलें जाल्यार आमी आमच्या मांय’भाशेची सेवा केल्लेपरीं जातेलें. तर्नाट्यांनी तंत्रज्ञान वापर्न सयत हें काम करुंयेता.” म्हण काऱ्याक्रमाक चालन दीवन प्रो| डो| किरण बुडकुले म्हणाली.
कथोलीक कोंकणी राकण संचलन, चीक’मगळूर, हासन हाचो अध्यक्ष श्री जोकीम डी’सोजा हाणी चीक’मगळूर – हासनांत लितुर्जेंत कोंकणी हाडच्याक काड’ल्ली वांवट आनी कोंकणी मिसां खातीर संचलनान केल्ल्या वावराची झळक दीवन, आतां झूज बेंगळूर उंचल्या कोडती पऱ्यांत पावलां म्हळ्ळी माहेत दीवन सयऱ्यांक येवकार मागलो. कथोलीक कोंकणी राकण संचलन, चीक’मगळूर – हासन, सकलेश’पूर घटकाचो अध्यक्ष श्री प्रदीप डी’सोजा हाणे मुकेल सयरी प्रो| डो| बुडकुलेक फुलांचो तुरो दीवन मानाचो येवकार मागलो.
पणती पेटवन स्थापना दीस उग्तायलो आनी परिषदेचो स्थापक मादव मंजुनाथ शानभाग हांच्या तस्विरेक फुलां अर्पून मान केलो.
आपल्या प्रासतावीक उलवपांत परिशदेचो काऱ्याध्यक्ष मानेसत चेतन आचाऱ्या हाणी “कोंकणी उलवपी लोक व्हडा संख्यान आसच्या प्रदेशांनी वचोन स्थापना दीस आचरण कर्ची रिवाज परिषद पाळून आयल्या. देशाच्या वेवेगळ्या प्रदेशांनी वसती करून आसच्या कोंकणी लोकाक मेळोन, सांगाता कोंकणे खातीर वावुर्चो परिषदेचो शेवोट आसा. सकलेश’पूर आयल्या उपरांत हांगासर कोंकणी लोक आपल्या मांय’भाशेंत मिसां भेटंवच्या मुळ्आव्या हक्का थावन वंचीत जाला तें कळोन आयलें. आमी कोंकणी लोक जावन तांका सांगात दिंवची गर्ज आसा” म्हळें.
काऱ्यांत मालघाडो कोश’कार श्री सुरेश बोर्कार हांकां मादव मंजुनाथ शानभाग जिवितावधी पुरसकार पाटवन मान केलो. श्री मंगल’दास भट हाणी मान पत्र वाचलें. नाभलायकेक लागोन श्री बोर्कार हांकां काऱ्याक हाजर जावंक साध्य जावंक ना देकून, तांच्या वतीन श्री अनील पै हाणी पुरसकार स्वीकार केलो. ह्या वेळीं श्री बोर्कार हांच्या उपकाराच्या उत्रांचीं विडियो प्रदर्शीत केली.
काऱ्यक्रमांत अखील भारतीय कोंकणी परिशदेन पर्गट केल्लो, कवी विल्सन कटील हाचो चितुरलेचे अच्चे दीन कविता संग्रह मुकेल सयरी प्रो| डो| किरण बुडकुले हाणी मोकळीक केलो. साहित्य अकाडेमी, नवी दिल्ली कोंकणी सलहागार समितिचो निमंत्रक कवी मेलवीन रोड्रिगस हाणी ह्या वेळीं वेदीर सांगात दिलो.
भ| लता हिच्या मार्गदर्शनाचेर सां. जुजे इसकोलाच्या भुर्ग्यांनी अपुरबायेचो स्वागत नाच सादर केलो. सकलेश’पूर, मूडिगेर घटकाच्या सांद्यांनीं, विशेस करून भुर्ग्यांनी अपुरबायेचीं कोंकणी पदां आनी नाच सादर केले.
सांसकृतीक काऱ्यक्रमा मधें “मलनाडांत कोंकणी चळवळ – वर्तमान आनी फुडार” ह्या विशयाचेर परिसंवाद चल्लो. परिसंवांदांत शिक्षक श्री विवियन डी’सोजा कूवे, श्रीमती अनिता पायस, संघटक श्री सिरिलो रेबेल्लो आनी श्री एच्चेम, पेर्नाल हाणे संवाद चलवन वेलो.
चीक’मगळूर – हासन वठारांत कोंकणे खातीर वावुर्पी श्री स्टेनी डी’सिलव, श्रीमती मेटिलडान डी’सिलव, श्री प्रमोद पिंटो (अनुपस्थीत) जे.वी. कारलो, श्री लवरेंत आनी श्री जोकीम डी’सोजा हांकां कोंकणी राय’भारी बिरूद दीवन मान केलो.
ह्याच सुवाळ्यार काऱ्यक्रमाक सहकार दिल्ल्या तशेंच कोंकणी भास आनी साहित्या खातीर सेवा दिंवच्या कोवेंताची व्हडिलन भ| ऐडा, घटकाचो अध्यक्ष श्री प्रदीप डी’सोजा, श्री सिरील रेबेल्लो, श्री रोनालड मोनीस हासन, श्री फावोसतीन पिरेरा, मागुंडी आनी श्री प्रकाश ग्रेगोरी फेर्नाडीस हांका मानाचो शालो आनी गुलोब दीवन वेदीर मान केलो.
वेदी काऱ्यें नाम्नेचो सूत्र संचालक प्राध्यापक अनंत अग्नी हाणी चलवन व्हेलें तर, सन्मान आनी सांसकृतीक काऱ्यक्रम श्री विन्सेंट फायस आनी श्रीमती सरिता मिनेजस हाणी चलवन व्हेलें.
साहित्य अकाडेमी प्रशसती विजेत डो| जयंती नायक, श्रीमती माया खरंगटे, प्रो| बुडकुले, संघटक – काऱ्यकर्त श्री प्रशांत नायक, मैकल डी’सोजा विशन कोंकणी योजनाचो सांदो श्री टैटस नोरोन्हा, कविता ट्रसट अध्यक्ष श्री किशू, बार्कूर, सांदो श्री आंटनी बार्कूर, दायजिवलड टी.वी. निर्देशक श्री स्ट्यानी बेळा, काऱ्यक्रम संयोजक श्री संजय जोन रोड्रिगस, काऱ्यें निर्वाहक श्री मनोज फेर्नांडीस, इंगलीश लेखक श्री विलियम फायस, पत्रिका प्रतिनिधी अलफोन्स पांगळा आनी जायते मानेसत काऱ्याक उपस्थीत आसले.
सगळ्या काऱ्यक्रमाचो संयोजक श्री सिलवेसटर सलडान्हा हाणे सयऱ्यांचों तशें हाजर जाल्ल्या समेसतांचों उपकार भावुडलो.
सकाळीं नोव व्हरांचेर कापी-फळहारासवें आरंभ जाल्लें काऱ्यें, लवदातो गायन आनी सहभोजनासवें दोन व्हरांचेर संपन्न जालें.
चीक’मगळूर, मूडिगेरे, हासन, मंगळूर, बेंगळूर आनी गोंयां थावन तिनशीं कोंकणी लोक काऱ्याक हाजर आसलो.
