ʻʻആമി ശീദാ സാംഗുങ്ക് ജായ്നാത്‌ല്ലെം സാഹിത്യദ്വാരിം സാംഗൊൻ ആമ്ചെഞ്ച്‌ പ്രതിഭടൻ കര്യെത്ʼʼ അശെം മ്ഹണാലൊ നാമ്ണെചൊ മട്വ്യൊ കാണ്യെംഗാർ മെല്വിൻ പിണ്ടൊ നീരുഡെ. തൊ സപ്തെംബർ 7വെർ സാം ലുവിസ് കൊലെജ് കൊങ്കണി സംസ്ഥ്യാച്യാ ʻബൊൽകാംവ്ʼ മ്ഹയ്ന്യാള്യാ ബസ്കെച്യാ പയ്ല്യാ ബസ്കെർ‌ഥാവ്ന്‌ ʻമട്വ്യൊ കാണിയൊ ആനി ഹാംവ്‌ʼ മ്ഹള്ള്യാ വിഷയാചെർ ഉലയ്താലൊ.
ʻആരുന്ധതി രോയ്‌ ഹിചി ദുസ്രി കാദംബരി The ministry of utmost happniess ഹാന്തും തി ഗോധ്രാ വിശിം ഉലയ്താ, പ്രസ്തുത് രാജകീയ് പരിഗതെ വിശിം ഉലയ്താ, കാശ്മീരാ വിശിം ഉലയ്താ… പുൺ ഹെം സർവ് സാഹിത്യാച്യാ വർതുലാന്ത് യെതാ. ചാഫ്രാനിയ് ഹെം പ്രേതൻ താച്യാ നാടകാംനി, കവിതെംനി, ബർപൂർ കെലാം. ദലിത് സാഹിത്യാന്തിയ് ആമി ഹെം പളെതാംവ്, ബ്ല്യാക് ലിടരേചരാന്തിയ് ആമി ഹെം പളെതാംവ്. ആയ്ച്യാ സന്ദർഭാർ സാഹിത്യ് ബോവ് ഗർജെചെം മ്ഹൺ മ്ഹാകാ ഭഗ്താ. കിത്യാക് ആജ് വ്യക്തി ചഡ് ആനി ചഡ് സങ്കീർൺ ജാല്യാത് ദെകുൻ വ്യക്തി സ്പൂർതി ജാംവ്ചെം ഉണെം ജാവ്ന്ം്ച് യെതാ. ത്യാ സ്ഥിതെന്ത് ബഹുശാ സാഹിത്യാക് തി ജവാബ്ദാരി ചഡ് ആസാ. കിതെം ആമി ശീദാ സാംഗുങ്ക് അസാദ്യ് ഗീ, തെം ആമി സാഹിത്യാ ദ്വാരിം ഇൻഡൈ്രെക്ട് ജാവ്ന് സാംഗ്യെത് കൊണ്ണാ…ʼ അശെം മ്ഹണാലൊ. തൊ ആപ്ല്യൊ മട്വ്യൊ കാണിയൊ തീൻ കാലെതിച്യൊ ജാവ്നാസൊൻ പയ്ലെം ആപ്ണാചൊ സ്വഅൻഭോഗ്‌ച്‌ കാണ്യൊ ജാല്യാത് തർ, ദുസ്രെം ഹെരാഞ്ച്യാ ജിണ്യെന്ത്‌ ആപ്ണെം പളെല്ലെം ആനി തിസ്രെം ആപ്ണെം ആപ്ല്യാച് ഭെസാക് വിമർശാത്മക് രിതിം പളെവ്ന് ലിക്ല്ല്യൊ കാണിയൊ- മ്ഹൺ വാണ്ടെ കർൻ ലഗ്ബഗ് 40 മിനുടാം ആപ്ല്യാ സാഹിത്യാവിശിം ഉലയ്ലൊ. ത്യാ ഉപ്രാന്ത്‌ ലഗ്ബഗ് 40 മിനുടാം സംവാദ്‌ ചല്ലൊ. സുമാർ 35 സാഹിതിംനി ഹാന്തും വാണ്ടൊ ഘെത്ലൊ.
കാര്യാച്യാ സുർവെർ സാം ലുവിസ് പരിഗണിത്‌ വിശ്വ്‌വിദ്യാലയാചൊ വൈസ്‌ ചാൻസലർ ദൊ. ഫാ. പ്രവീൺ മാർടിസ്‌ ഹാംണി ആബൊല്യാച്യാ ഝഡാ മുളാക്‌ ഉദാക്‌ വൊത്ചെ മാരിഫാത്‌ ʻബൊൽകാംവ്ʼ മ്ഹയ്ന്യാള്യാ ബസ്കെചെം ഉഗ്താവൺ കെലെം. ഹ്യാ വെളാർ കൊങ്കണി സംസ്ഥ്യാചൊ നിർദേശക്‌ ദൊ. ഫാ. മെല്വിൻ പിണ്ടൊ, സാം ലുവിസ് കൊലെജ് (സ്വായത്ത്) ഹാചൊ കുലപതി ദൊ. ആല്വിൻ ഡെʼസാ, ʻബൊൽകാംവ്ʼ ബസ്കെചൊ സഞ്ചാലക്‌, കിടാൾ ജാളിജാഗ്യാചൊ സംപാദക്‌ ഹെച്.എം. പെർനാൽ ആനി സാം ലുവിസ് പരിഗണിത്‌ വിശ്വ്‌വിദ്യാലയ്‌ കൊങ്കണി സംസ്ഥ്യാചൊ കാര്യെം സംയോജക്‌ ജോകിം പിണ്ടൊ വെദിർ ആസ്‌ല്ലെ.
ʻബൊൽകാംവ്ʼ ഉഗ്താവൺ കർൻ ആപ്ലൊ സന്ദേശ്‌ ദില്ല്യാ ദൊ. ഫാ. പ്രവീൺ മാർടിസ്‌ ഹാംണി ʻ 144 വർസാം ആദിം സാം ലുവിസ് കൊലെജിച്യാ സുർവാതെഥാവ്ന്‌ കൊങ്കണി ഭാശെക് ആനി ഭാശെച്യാ വിവിധ് ചടുവടികെങ്ക് പ്രേരൺ-പ്രോത്സാഹ്‌ ദില്ലെ ജെജ്വിത്‌ യാജക്‌ അജൂൻ കൊങ്കണി ഭാശെക് ത്യെച്‌ മാപാൻ പ്രോത്സാഹ്‌ ദിതെ ആസാത്. ʻബൊൽകാംവ്ʼ മ്ഹയ്ന്യാള്യാ ബസ്കെ മാരിഫാത്‌ സാഹിതിങ്ക്‌ ആനി താഞ്ച്യാ സാഹിത്യാക് ലാഗ്ശില്യാൻ ഒൾകൊങ്ക്‌, ഭൊഗുങ്ക്‌ ഏക്‌ ആവ്കാസ്‌ മെൾതാ. ഹാംഗാസർ ചൽചൊ സംവാദ്‌ കൊങ്കണി ഭാശെച്യാ ഉദർഗതെക്‌ പ്രേരക്‌ ജാംവ്ദിʼ അശെം മ്ഹണാലൊ.
കാര്യാച്യാ സുർവെർ ʻബൊൽകാംവ്ʼ മ്ഹയ്ന്യാള്യാ ബസ്കെചൊ സഞ്ചാലക്‌ ഹെച്. എം. പെർനാളാൻ കാര്യാച്യാ കാര്യ്‌ വിദാനാവിശിം സവിസ്താർ മാഹെത്‌ ദിലി.
ദുസ്രി ʻബൊൽകാംവ് ബസ്കാ അക്തോബരാചെ 12 താരികെർ സകാളിം ധാ വരാർ ചൽതലി. ഹ്യാ കാര്യാന്ത്‌ സാം ലുവിസ് കൊലെജ് (സ്വായത്ത്) ഹാചൊ കുലപതി ദൊ. ആല്വിൻ ഡെʼസാ ʻസാഹിത്യ് ആനി വിമാർസൊʼ വിശിം ഉലയ്തലൊ.
