ʻʻಆಮಿ ಶೀದಾ ಸಾಂಗುಂಕ್ ಜಾಯ್ನಾತ್‌ಲ್ಲೆಂ ಸಾಹಿತ್ಯದ್ವಾರಿಂ ಸಾಂಗೊನ್‌ ಆಮ್ಚೆಂಚ್‌ ಪ್ರತಿಭಟನ್‌ ಕರ್ಯೆತ್‌ʼʼ ಅಶೆಂ ಮ್ಹಣಾಲೊ ನಾಮ್ಣೆಚೊ ಮಟ್ವ್ಯೊ ಕಾಣ್ಯೆಂಗಾರ್‌ ಮೆಲ್ವಿನ್‌ ಪಿಂಟೊ ನೀರುಡೆ. ತೊ ಸಪ್ತೆಂಬರ್‌ 7ವೆರ್ ಸಾಂ ಲುವಿಸ್‌ ಕೊಲೆಜ್‌ ಕೊಂಕಣಿ ಸಂಸ್ಥ್ಯಾಚ್ಯಾ ʻಬೊಲ್ಕಾಂವ್ʼ ಮ್ಹಯ್ನ್ಯಾಳ್ಯಾ ಬಸ್ಕೆಚ್ಯಾ ಪಯ್ಲ್ಯಾ ಬಸ್ಕೆರ್‌ಥಾವ್ನ್‌ ʻಮಟ್ವ್ಯೊ ಕಾಣಿಯೊ ಆನಿ ಹಾಂವ್‌ʼ ಮ್ಹಳ್ಳ್ಯಾ ವಿಷಯಾಚೆರ್‌ ಉಲಯ್ತಾಲೊ.
ʻಆರುಂಧತಿ ರೋಯ್‌ ಹಿಚಿ ದುಸ್ರಿ ಕಾದಂಬರಿ The ministry of utmost happniess ಹಾಂತುಂ ತಿ ಗೋಧ್ರಾ ವಿಶಿಂ ಉಲಯ್ತಾ, ಪ್ರಸ್ತುತ್ ರಾಜಕೀಯ್ ಪರಿಗತೆ ವಿಶಿಂ ಉಲಯ್ತಾ, ಕಾಶ್ಮೀರಾ ವಿಶಿಂ ಉಲಯ್ತಾ… ಪುಣ್ ಹೆಂ ಸರ್ವ್ ಸಾಹಿತ್ಯಾಚ್ಯಾ ವರ್ತುಲಾಂತ್ ಯೆತಾ. ಚಾಫ್ರಾನಿಯ್ ಹೆಂ ಪ್ರೇತನ್ ತಾಚ್ಯಾ ನಾಟಕಾಂನಿ, ಕವಿತೆಂನಿ, ಬರ್ಪೂರ್ ಕೆಲಾಂ. ದಲಿತ್ ಸಾಹಿತ್ಯಾಂತಿಯ್ ಆಮಿ ಹೆಂ ಪಳೆತಾಂವ್, ಬ್ಲ್ಯಾಕ್ ಲಿಟರೇಚರಾಂತಿಯ್ ಆಮಿ ಹೆಂ ಪಳೆತಾಂವ್. ಆಯ್ಚ್ಯಾ ಸಂದರ್ಭಾರ್ ಸಾಹಿತ್ಯ್ ಬೋವ್ ಗರ್ಜೆಚೆಂ ಮ್ಹಣ್ ಮ್ಹಾಕಾ ಭಗ್ತಾ. ಕಿತ್ಯಾಕ್ ಆಜ್ ವ್ಯಕ್ತಿ ಚಡ್ ಆನಿ ಚಡ್ ಸಂಕೀರ್ಣ್ ಜಾಲ್ಯಾತ್ ದೆಕುನ್ ವ್ಯಕ್ತಿ ಸ್ಪೂರ್ತಿ ಜಾಂವ್ಚೆಂ ಉಣೆಂ ಜಾವ್ನ್‍ಂಚ್ ಯೆತಾ. ತ್ಯಾ ಸ್ಥಿತೆಂತ್ ಬಹುಶಾ ಸಾಹಿತ್ಯಾಕ್ ತಿ ಜವಾಬ್ದಾರಿ ಚಡ್ ಆಸಾ. ಕಿತೆಂ ಆಮಿ ಶೀದಾ ಸಾಂಗುಂಕ್ ಅಸಾದ್ಯ್ ಗೀ, ತೆಂ ಆಮಿ ಸಾಹಿತ್ಯಾ ದ್ವಾರಿಂ ಇನ್‍ಡೈರೆಕ್ಟ್ ಜಾವ್ನ್ ಸಾಂಗ್ಯೆತ್ ಕೊಣ್ಣಾ…ʼ ಅಶೆಂ ಮ್ಹಣಾಲೊ. ತೊ ಆಪ್ಲ್ಯೊ ಮಟ್ವ್ಯೊ ಕಾಣಿಯೊ ತೀನ್‌ ಕಾಲೆತಿಚ್ಯೊ ಜಾವ್ನಾಸೊನ್‌ ಪಯ್ಲೆಂ ಆಪ್ಣಾಚೊ ಸ್ವಅನ್ಭೋಗ್‌ಚ್‌ ಕಾಣ್ಯೊ ಜಾಲ್ಯಾತ್ ತರ್‌, ದುಸ್ರೆಂ ಹೆರಾಂಚ್ಯಾ ಜಿಣ್ಯೆಂತ್‌ ಆಪ್ಣೆಂ ಪಳೆಲ್ಲೆಂ ಆನಿ ತಿಸ್ರೆಂ ಆಪ್ಣೆಂ ಆಪ್ಲ್ಯಾಚ್ ಭೆಸಾಕ್ ವಿಮರ್ಶಾತ್ಮಕ್ ರಿತಿಂ ಪಳೆವ್ನ್ ಲಿಕ್‍ಲ್ಲ್ಯೊ ಕಾಣಿಯೊ- ಮ್ಹಣ್ ವಾಂಟೆ ಕರ್ನ್‌ ಲಗ್ಬಗ್ 40 ಮಿನುಟಾಂ ಆಪ್ಲ್ಯಾ ಸಾಹಿತ್ಯಾವಿಶಿಂ ಉಲಯ್ಲೊ. ತ್ಯಾ ಉಪ್ರಾಂತ್‌ ಲಗ್ಬಗ್ 40 ಮಿನುಟಾಂ ಸಂವಾದ್‌ ಚಲ್ಲೊ. ಸುಮಾರ್‌ 35 ಸಾಹಿತಿಂನಿ ಹಾಂತುಂ ವಾಂಟೊ ಘೆತ್ಲೊ.
ಕಾರ್ಯಾಚ್ಯಾ ಸುರ್ವೆರ್‌ ಸಾಂ ಲುವಿಸ್‌ ಪರಿಗಣಿತ್‌ ವಿಶ್ವ್‌ವಿದ್ಯಾಲಯಾಚೊ ವೈಸ್‌ ಚಾನ್ಸಲರ್‌ ದೊ. ಫಾ. ಪ್ರವೀಣ್‌ ಮಾರ್ಟಿಸ್‌ ಹಾಂಣಿ ಆಬೊಲ್ಯಾಚ್ಯಾ ಝಡಾ ಮುಳಾಕ್‌ ಉದಾಕ್‌ ವೊತ್ಚೆ ಮಾರಿಫಾತ್‌ ʻಬೊಲ್ಕಾಂವ್ʼ ಮ್ಹಯ್ನ್ಯಾಳ್ಯಾ ಬಸ್ಕೆಚೆಂ ಉಗ್ತಾವಣ್‌ ಕೆಲೆಂ. ಹ್ಯಾ ವೆಳಾರ್‌ ಕೊಂಕಣಿ ಸಂಸ್ಥ್ಯಾಚೊ ನಿರ್ದೇಶಕ್‌ ದೊ. ಫಾ. ಮೆಲ್ವಿನ್‌ ಪಿಂಟೊ, ಸಾಂ ಲುವಿಸ್‌ ಕೊಲೆಜ್‌ (ಸ್ವಾಯತ್ತ್) ಹಾಚೊ ಕುಲಪತಿ ದೊ. ಆಲ್ವಿನ್‌ ಡೆʼಸಾ, ʻಬೊಲ್ಕಾಂವ್ʼ ಬಸ್ಕೆಚೊ ಸಂಚಾಲಕ್‌, ಕಿಟಾಳ್‌ ಜಾಳಿಜಾಗ್ಯಾಚೊ ಸಂಪಾದಕ್‌ ಹೆಚ್.ಎಮ್. ಪೆರ್ನಾಲ್‌ ಆನಿ ಸಾಂ ಲುವಿಸ್‌ ಪರಿಗಣಿತ್‌ ವಿಶ್ವ್‌ವಿದ್ಯಾಲಯ್‌ ಕೊಂಕಣಿ ಸಂಸ್ಥ್ಯಾಚೊ ಕಾರ್ಯೆಂ ಸಂಯೋಜಕ್‌ ಜೋಕಿಮ್‌ ಪಿಂಟೊ ವೆದಿರ್‌ ಆಸ್‌ಲ್ಲೆ.
ʻಬೊಲ್ಕಾಂವ್ʼ ಉಗ್ತಾವಣ್‌ ಕರ್ನ್‌ ಆಪ್ಲೊ ಸಂದೇಶ್ ದಿಲ್ಲ್ಯಾ ದೊ. ಫಾ. ಪ್ರವೀಣ್‌ ಮಾರ್ಟಿಸ್‌ ಹಾಂಣಿ ʻ 144 ವರ್ಸಾಂ ಆದಿಂ ಸಾಂ ಲುವಿಸ್‌ ಕೊಲೆಜಿಚ್ಯಾ ಸುರ್ವಾತೆಥಾವ್ನ್‌ ಕೊಂಕಣಿ ಭಾಶೆಕ್‌ ಆನಿ ಭಾಶೆಚ್ಯಾ ವಿವಿಧ್‌ ಚಟುವಟಿಕೆಂಕ್ ಪ್ರೇರಣ್-ಪ್ರೋತ್ಸಾಹ್‌ ದಿಲ್ಲೆ ಜೆಜ್ವಿತ್‌ ಯಾಜಕ್‌ ಅಜೂನ್‌ ಕೊಂಕಣಿ ಭಾಶೆಕ್‌ ತ್ಯೆಚ್‌ ಮಾಪಾನ್‌ ಪ್ರೋತ್ಸಾಹ್‌ ದಿತೆ ಆಸಾತ್. ʻಬೊಲ್ಕಾಂವ್ʼ ಮ್ಹಯ್ನ್ಯಾಳ್ಯಾ ಬಸ್ಕೆ ಮಾರಿಫಾತ್‌ ಸಾಹಿತಿಂಕ್‌ ಆನಿ ತಾಂಚ್ಯಾ ಸಾಹಿತ್ಯಾಕ್ ಲಾಗ್ಶಿಲ್ಯಾನ್‌ ಒಳ್ಕೊಂಕ್‌, ಭೊಗುಂಕ್‌ ಏಕ್ ಆವ್ಕಾಸ್‌ ಮೆಳ್ತಾ. ಹಾಂಗಾಸರ್‌ ಚಲ್ಚೊ ಸಂವಾದ್‌ ಕೊಂಕಣಿ ಭಾಶೆಚ್ಯಾ ಉದರ್ಗತೆಕ್ ಪ್ರೇರಕ್‌ ಜಾಂವ್ದಿʼ ಅಶೆಂ ಮ್ಹಣಾಲೊ.
ಕಾರ್ಯಾಚ್ಯಾ ಸುರ್ವೆರ್‌ ʻಬೊಲ್ಕಾಂವ್ʼ ಮ್ಹಯ್ನ್ಯಾಳ್ಯಾ ಬಸ್ಕೆಚೊ ಸಂಚಾಲಕ್‌ ಹೆಚ್. ಎಮ್. ಪೆರ್ನಾಳಾನ್‌ ಕಾರ್ಯಾಚ್ಯಾ ಕಾರ್ಯ್‌ ವಿದಾನಾವಿಶಿಂ ಸವಿಸ್ತಾರ್‌ ಮಾಹೆತ್‌ ದಿಲಿ.
ದುಸ್ರಿ ʻಬೊಲ್ಕಾಂವ್ ಬಸ್ಕಾ ಅಕ್ತೋಬರಾಚೆ 12 ತಾರಿಕೆರ್‌ ಸಕಾಳಿಂ ಧಾ ವರಾರ್‌ ಚಲ್ತಲಿ. ಹ್ಯಾ ಕಾರ್ಯಾಂತ್‌ ಸಾಂ ಲುವಿಸ್‌ ಕೊಲೆಜ್‌ (ಸ್ವಾಯತ್ತ್) ಹಾಚೊ ಕುಲಪತಿ ದೊ. ಆಲ್ವಿನ್‌ ಡೆʼಸಾ ʻಸಾಹಿತ್ಯ್ ಆನಿ ವಿಮಾರ್ಸೊʼ ವಿಶಿಂ ಉಲಯ್ತಲೊ.
