September 15 ver aitara sokallim 10 vorancher konkonni lekhok songh kornattoko hachi varxik jeral sobha sondexo sobhasolant zomli. Milagris kolejicho prinsipal Fr. Michel Santumayor hannim odhyokxponn ghetl’lem. Karnataka konkonni Sahityo Akademi odhyokx xri stteani olvaris mukhel soire zaun hazor asl’le. Sovem K.L.S. Sunkann somiticho sonchalok manest Richard Moras, sunkann somitiche sande xri Dolfi Lobo, Dr. Edward Nazreth, xri Henri Mascarenhas vedir asl’le. Xri Richard Moras hannim varxik lekpak (audit kel’lem) monddon kelem. Tea nontor konknni sahiti xrimoti Flavia Albuquerk hicho, somaliachea varis dairy hinnem boroiloli apli jiun choritra “The Desert Flower” hachem konkonni torzonn pustok “registhanantlem ful” xrimoti Flavia Albuquerkachi auy xrimoti Rita Thoros hinnem vedir asl’lea manachea soireamsovem ugtaunn kelem. Lekhokiche put Kelvin ani Vian vedir asl’le. Sahiti dotor Joyer Noronhan pustokachi porichoi dili. Kareavellim xri Stany Alvaris hanka sonman kelo. Toxench akademi sande xri Roni Crasta, xri Novin Lobo, xrimoti Sapna Crasta hankam gourou orpilo. St Aloysius kolejithaun konkonni P.G. Diplomant choutem rank apnnailelea K.L.S. Sando xrimoti Preetha Mirandak man kelo. Xri Stany Alvarisan sorvam sangata mellun konknnecho vaur koream mhonn ulo dilo.
Karyokromacho fuddlo vantto zaun, Dr Edward Nazrethan sahity poinnachim pon’nas vorsam sompomvchea vogta, taka sonman asakel’lo. Malghoddo sahiti xri Dolfi Cassian Dr Edwarddachi vyoktigot porichoi dili. Toxench Lavi Ganjimata hinnem tachea pon’nas vorsanchea sahiteachea pattbhumycher ” Dr Edwardthacheo mottveo kannio ani somajik sthityontorachem chitronn” hea vixoyacher uloup choloilem. Axem sovistarayen Dr Nazrethachea sahit denngechi zhollok ani vollok dili.
K.L.S. Sunkann somiti sandeamsovem vedir asl’lea manachea soireamni Dr Nozrethak xelo, fulam, follam, jhelo orpun man kelo. Tachi potinn Dr Nel’li Nazreth toxench kuttmadaram hea vogta vedir hazor asl’lim. Sonman svikar kel’lea Dr Nazrethan, aplea sahit sevek tenko dil’lea sorv potranchea sompadokancho, sahitincho, yazokancho, kuttmadarancho toxench vachpeancho upkar attoilo. Odhyokx sthan ghetl’lea Fr Michael Santumayor hannim pon’nas vorsanchea sahit sevek Dr Edward Nazrethak borem magchyesovem konknnechea sevent K.L.S.N korchea vaurak xabhaski pattoili. K.L.S. Soloha somiticho sando xri Edmond Noronhan dhonyovad pattoile. Sunkann somiti sando xri Henri Mascarenhasan karyem choloilem. Konkonni sahiti, potranche sompadok, hitoixi ani konknneche ani Dr Nazrethache obhimani hazor asl’le. Sohobhozonasovem karyokrom’ somplem.
