ಕೊಂಕ್ಣಿ ಭಾಶೆ ಕುಶಿನ್- ಲಿಪಿ ಆನಿ ವ್ಯಾಕರಣಾ ಲಗ್ತಿ ಏಕ್ ದೀಶ್ಟ್

ಫಾ| ದೇವದತ್ತ ಕಾಮತ್

ತರ್ಜಣ್: ಜೋಕಿಮ್ ಪಿಂಟೊ

ಸಾರಾಂಶ್

ಭಾಸ್ ರಚ್ಣುಕೆಂತ್ ವ್ಯಾಕರಣಾಚೊ ಪಾತ್ರ್ ಭೋವ್ ಮಹತ್ವಾಚೊ. ಬರ್ಕಾಯೆನ್ ಪಳೆಯ್ಲ್ಯಾರ್ ಕೊಂಕ್ಣೆಂತ್, ತಾಂತ್ಲ್ಯಾ ತಾಂತುಂ ಮಂಗ್ಳುರಿ ಕೊಂಕ್ಣೆಂತ್ ಸರ್ವ್ ಸಂಪಾದಕಾಂನಿ/ಬರವ್ಪ್ಯಾಂನಿ ಮಾಂದುನ್ ಘೆತ್‍ಲ್ಲಿ ಸಾಮಾನ್ಯ್ ಬರ್ಪಾ ರೀತ್ ನಾ. ತಶೆಂ ಮ್ಹಣ್ತಚ್ ಚಡ್ತಾವ್ ಭಾರತೀಯ್ ಭಾಶೆಂಕ್ ಆಸ್ಚೆಪರಿ ಏಕ್ ಸಾಮಾನ್ಯ್ ವ್ಯಾಕರಣ್‍ಯಿ ಮಂಗ್ಳುರಿ ಕೊಂಕ್ಣೆಕ್ ಯೆದೊಳ್ ನಾ ಮ್ಹಣ್ ಜಾಲೆಂ. ಸಾಮಾನ್ಯ್ ಬರ್ಪಾ ರೀತ್ ಎಕಾ ಭಾಶೆಂತ್ಲ್ಯಾ ವಿವಿಧ್ ಬೋಲಿಂಕ್ ಘೆವ್ನ್, ಹಾಂಚೆ ಮದೆಂ ಉಲವ್ಪಾಂತ್ ಆಸ್ಚೊ ಅಗಾಧ್ ಫರಕ್ ಉಣೊ ಕರ್ನ್, ಸರ್ವಾಂನಿ ಮಾಂಧುನ್ ಘೆಂವ್ಚಿ ಏಕ್ ಸಂಪಿ, ಸಲೀಸ್ ಆನಿ ಸಹಜ್ ಬರ್ಪಾ ರೀತ್ ಆಸಾ ಕರ್ತಾ. ಕೊಂಕ್ಣೆಚ್ಯಾ ವಾಡಾವಳೆಚ್ಯಾ ಪಾಟ್‍ಥಳಾರ್ ಹಾಚಿ ಆಜ್ ವರ್ತಿ ಆನಿ ಜರೂರ್ ಗರ್ಜ್ ಆಸಾ. `ಅಮರ್ ಕೊಂಕಣಿ’ ಮಂಗ್ಳುರಿ ಕೊಂಕ್ಣೆಂತ್ಲ್ಯಾ ಸರ್ವ್ ವ್ಯಾಕರಣ್ ತಜ್ಞಾಲಾಗಿಂ ತಾಂಚ್ಯಾ ತಾಂಚ್ಯಾ ಪ್ರತಿಪಾದಾನಾಂನಿ ಎಕೇಕ್ ಲೇಖಾನಾವಳ್ ವಿಚಾರ್ನ್ ಘೆವ್ನ್ ಫಾಯ್ಸ್ ಕರ್ನ್ ಆಸಾ. ಹ್ಯಾ ಶಿಂಕ್ಳೆಂತ್ಲೆಂ ತಿಸ್ರೆಂ ಲೇಕನ್ ಫಾ| ದೇವದತ್ತಾ ಕಾಮತ್ ಹಾಂಚೆಂ, ಹಾಂಗಾಸರ್ ದಿಲಾಂ. ಹ್ಯಾ ಆದಿಂ ವ್ಯಾಕರಣ್‍ಕಾರ್ ಪ್ರೊ| ವಿಲಿಯಮ್ ಡಿಸಿಲ್ವಾ ಆನಿ ಫಾ| ವಲೇರಿಯನ್ ಫೆರ್ನಾಂದ್ ಹಾಂಚಿಂ ಲೇಕನಾಂ ಫಾಯ್ಸ್ ಕೆಲ್ಯಾಂತ್.