साहित्य अकाडेमी, न्यू डेल्ली हांणी कविता ट्रसटाच्या सहयोगान ह्याच २०२३ आगोसताचे ६ तारिकेर मंगळुर्च्या विश्व कोंकणी केंद्रांत ’लोक: विवीध स्वर’ म्हळ्ळी काऱ्यावळ मांडून हाडल्ली. उत्तर कन्नडाच्या कोंकणी सिद्दी लोकांच्या लोकवेदाची झळक दिल्ली ही काऱ्यावळ जमल्ल्या लोकाचें मनां वोडुंक पावली.
कलाकार तशें सिनेमा नट सुनील सिद्दिच्या मुकेल्पणाखाल नव सिद्दी कला पंगडान ही काऱ्यावळ प्रसतूत केली. सुनील सिद्दीन आपल्या व्याख्यानांत कोंकणी सिद्दी लोकाचो मटवो इतिहास; हिंदू, क्रिसतांव, मुसलीम तांचो धर्म आसल्यारी सिद्दी नांवान आनी कोंकणी भाशेवर्वीं ते कशें एक उरल्यात; तांच्या लोकʼवेदांत आसचे पांच नमुन्यांचे खेळ – डमाम, फुगडी, जाकय, शिगमो आनी मांड; तांची दुबळिकाय आनी आधुनीक संवसारांत नास जावन येंवचें तांचें लोकवेद – इत्यादी गजालिंचेर उज्वाड फांकयलो.
बारा जणांच्या पंगडांत सुनील आंतोन सिद्दी, लोरेन्स बोसत्यांव सिद्दी, मरियानी मोन्वेल सिद्दी, दुमिंग रुजाय सिद्दी, गुसतीन सालू सिद्दी, मेरी आंतोनी सिद्दी, रूपा सान्या सिद्दी, रूपा नवीन सिद्दी, प्रेसिल्ला पेद्रू सिद्दी, शांता सुरेश सिद्दी, शशिकला दुमिंग सिद्दी आनी चेतन सुरेश सिद्दी – हीं कलाकरां आसल्लीं. कांय थोड्यांनी गाणीं गायलीं, थोड्यांनी व्हाजंत्रां व्हाजयलीं आनी कांय थोड्यांनी नाच केलो.
काऱ्याचे सुर्वेर साहित्य अकाडेमिच्या कोंकणी सलहा समितिचो सांदो एच्चेम पेर्नाळान स्वागत केलो आनी साहित्य अकाडेमिच्या काऱ्यावळिंविशीं माहेत दिली. साहित्य अकाडेमिच्या कोंकणी सलहा समितिचो निमंत्रक तशें काऱ्यकारी मंडळाचो सांदो मेलवीन रोड्रिगसान सर्वय कलाकरांक कविता ट्रसटा तर्फेन उडासाची काणीक दीवन मान केलो. सलहा समितिचो आन्येक सांदो स्टेनी बेळान उपकार आटयले.
ह्या काऱ्याक कोंकणी भास आनी संसकृती प्रतिषठानाचो मुकेल अधिकारी गुरू बाळिगा, उपाध्यक्ष गिलबर्ट डिसोजा, कविता ट्रसटाचे ट्रसटी विलियम पायस, वितोरी कार्कळ, आंडऱ्यू डिकुन्हा हाजर आसल्ले तशें कोंकणी मोगी हाजर आसल्ले.
तस्वीऱ्यो: kavitaa.com
