സാം ലുവിസ് കൊലെജ് കൊങ്കണി സംസ്ഥ്യാഥാവ്ന് പാട്ല്യാ 41വർസാഥാവ്ന് ഖളാനാസ്താം പർഗട്ചെം കൊങ്കണി സംസൊധ് ഷണ്മാസിക് `അമർ കൊങ്കണി’ പർതാക് 2021വ്യാ വർസാചി കൊങ്കണി സാഹിത്യ് പ്രശസ്തി മെൾ’ല്ല്യാ സന്ദർഭിം അമർ കൊങ്കണി വാച്പി-ബർപ്യാഞ്ചെം സഹമിലൻ ഹ്യാച് മാർച് 13 താരികെർ കൊലെജിച്യാ സാനിധ്യ സഭാസാലാന്ത് ആസാ കെല്ലെം. സകാളിം 9.30ക് സുർവാതുൻ ദൻപരാം 1.00വൊരാർ ജെവ്ണാസംഗിം അകേർ ജാല്ല്യാ ഹ്യാ കാര്യാക് അമർ കൊങ്കണിചെ വാച്പി തശെഞ്ച് ബരവ്പി ഹാജർ ആസ്’ല്ലെ.
കർനാടക് കൊങ്കണി ശിക്പാ സംസ്ഥ്യാഞ്ചൊ സംഘ്, മംഗ്ളുർ ഹാചൊ അധ്യക്ഷ് ഡൊ| കസ്തൂരി മോഹൻ പൈ കാര്യാചൊ മുഖെൽ സയ്രൊ ജാവ്ന് ഹാജർ ആസ്’ല്ലൊ. സാം ലുവിസ് കൊലെജിചൊ പ്രിൻസിപാൽ ദൊ| ഫാ| പ്രവീൺ മാർടിസ് ജെ.സ. ആനി കൊങ്കണി സംസ്ഥ്യാചൊ ആദ്ലൊ കാര്യകാരി ദിരെക്തൊർ മാനെസ്ത് എഡ്വിൻ ജെ. എഫ്. ഡിസോജാ മാനാചെ സയ്രെ ജാവ്ന് ഹാജർ ആസ്’ല്ലെ. സാം ലുവിസ് ശിക്പാ സംസ്ഥ്യാഞ്ചൊ രെക്ടർ മാ| ഫാ| മെല്വിൻ ജോസെഫ് പിണ്ടൊ ജെ.സ. കാര്യാചെ അധ്യക്ഷ് ജാവ്ന് ഹാജർ ആസ്’ല്ലെ.
കാര്യാച്യാ സുർവെർ കൊങ്കണി സംഘാചൊ സാന്ദൊ കു| വിയൊല ആനി പംഗ്ഡാൻ പ്രാർഥൻ ഗീത് ഗായ്ലെം. ഉപ്രാന്ത് `അമർ കൊങ്കണി’ ഷണ്മാസികാച്യാ സംപാദകീയ് മണ്ഡളെചൊ സാന്ദൊ ശ്രീമതി ഫ്ലോരാ ക്യാസ്തെലിനൊ ഹിണെ സയ്ര്യാങ്ക് സ്വാഗത് കെലൊ. കാര്യാച്യാ സുർവാതെർ കൊങ്കണി സംസ്ഥ്യാചൊ ദിരെക്തൊർ തശെഞ്ച് അമർ കൊങ്കണി ഷണ്മാസികാചൊ സംപാദക് ദൊ| ഫാ| മെല്വിൻ എസ്. പിണ്ടൊ ഹാംണി അമർ കൊങ്കണി ഷണ്മാസിക് ചലൊൻ ആയില്ല്യാ വാടെചെർ സുക്ണ്യാ നദർ ചരയ്ലി.
ഉദ്ഘാടൻ കർൻ ഉലയില്ല്യാ ഡൊ| കസ്തൂരി മോഹൻ പൈ ഹാംണി ആപ്ണെം സാം ലുവിസ് കൊലെജിന്ത് ശിക്താനാ ആപ്ണായില്ലി ശിസ്ത് ആനി ധർ’ല്ലൊ വാവ്ര് പൊന്താക് പാവംവ്ചെം ഹട്- ഹെം ദൊനീ ഗൂൺ ആജൂൻ ആപുൺ പാൾൻ ആയ്ലാം മ്ഹണാലൊ. ത്യാ ഉപ്രാന്ത് ഉലയില്ലൊ `അമർ കൊങ്കണി’ ഷണ്മാസികാചൊ പ്രകാശക്, സാം ലുവിസ് കൊലെജിചൊ ദൊ| ഫാ| പ്രവീൺ മാർടിസ് ജെ.സ. – കൊങ്ക്ണി സമുദായാന്ത് സംസൊദാക് മസ്ത് ആവ്കാസ് ആസാ. ജായ്ത്യൊ ആമ്ച്യെ രിതിരിവാജി മ്ഹാൽഗാഡ്യാം ഥാവ്ന് ദെംവൊൻ ആയില്ല്യൊ മ്ഹൺ ആജ് ആമിം ദൊളെ ധാംപുൻ ത്യൊ പാൾതാംവ്. തരീ താചൊ നീജ് ആർഥ് വാ ഉദ്ദേശ് കളിത് ആമ്കാം കളിത് ആസാനാ. രൊസാക് ബസയില്ല്യാ ഹൊക്ലെക് മാവ്ള്യാന്ഞ്ച് കിത്യാ ഹാത് ദർൻ ൻഹാംവ്ക് ഉടയ്ജെ? സന്നാങ്ക് പീട് പുഗാത് ദവർതാനാ മൊഡ്കെചെർ ഖുർസാ ഗുർത് കിത്യാക് കാഡ്താത്? വാ GSB സമുദായാന്ത്ല്യാ കാജാരാംനി `ഉഡിദാ മുഹൂർത്’ മ്ഹള്ളൊ സംപ്രദായ് കിത്യാ പാസത് പാൾതാത്? – ഹെ വിശിം ആയ്ച്യാ യുവജണാങ്ക് മാത്ര് ൻഹംയ് ജാൺത്യാങ്ക്’യി സാർകി മാഹെത് നാ. ഹെം ആചരണാംവിശിം ജാല്യാർ, സംസ്കൃതി, ഭാസ്, മൻശാശാസ്തിർ അശെം വിവിദ് ശെതാംനി സംസൊദാക് ആവ്കാസ് ആസാ.
സംസൊദ് ലേഖനാഞ്ചി സുർവാത് യുരൊപാന്ത് സുർവാതുൻ ആജ് സംസാർ’ഭർ വിശ്വ്’വിദ്യാലയാംനി ജാണ്വായ് തയാർ കർചി വാട് ജാല്യാ. സംസൊദ് (Research) ആനി അധ്യയൻ (Studies) ഹാചെ മദെം ഫരക് ആസാ. സംസൊദ് നവി ജാണ്വായ്, ഗിന്യാൻ സൃഷ്ഠി കർതാ. തെം നവൊ വിചാർ വാ മാഹെത് ഭായ്ര് ഘാൽതാ. സാം ലുവിസ് കൊലെജ് ൻഹംയ് ഫകത് ജ്ഞാൻ വാണ്ട്താ ബഗാർ ജ്ഞാൻ ഉദ്പാദൻ കർചെ ദിശെൻ’യി ഖളനാസ്താം വാവുർതാ. ദെകുൻ കൊങ്ക്ണെന്ത് സംസൊദ് ബരവ്പി രചിജെ മ്ഹള്ള്യാ ഉദ്ദേശാൻ കൊങ്ക്ണി സംസ്ഥ്യാ മാരിഫാത് സംസൊദ് ലേകനാം ബരംവ്ചെവിശിം പാഞ്ച് ഹപ്ത്യാഞ്ചെം ONLINE തർബെതി ശിബിർ’യി ചൽചെം ആസാ. അമർ കൊങ്കണി സംപാദക് തശെഞ്ച് ഖദ്ദ് ഏക് സംസൊദ് മാർഗദർശക് ജാവ്നാസ്ചൊ ദൊ| ഫാ| മെല്വിൻ പിണ്ടൊ ഹി തർബെതി ചലവ്ന് വ്ഹർതലൊ.
സംസൊദ് ലേഖനാം ശിക്പാ ശെതാന്ത്, തന്ത്ര് ഗിന്യാനാച്യാ അഭിവൃദ്ധെന്ത് ആനി ദേശാച്യാ അഭിവൃദ്ധെന്ത് മഹത്വചൊ പാത്ര് ഖെൾതാത്. ദെകുൻ സംസൊദ് ലേഖനാം പർഗട് ജാംവ്ചെ ആദിം ത്യാ ത്യാ വിഷയാഞ്ച്യാ തജ്ഞാന്ഥാവ്ന് തിം ലേഖൻ തജ്വീജ് കരവ്ന് പർഗട് കർതാത് ജാല്ല്യാൻ, ആമ്കാം അസല്യാ ഏകാ തജ്ഞാഞ്ച്യാ മണ്ഡളെചിയ് ഗർജ് ആസാ. ഹെ ദിശെൻ’യി ചിന്തപ് ആടയ്തെല്യാംവ്’ മ്ഹളെം.
ഭോവ് ചഡ് അങ്കെ ഘെവ്ന് കൊങ്കണി ഉത്തീർൺ ജാല്ലി കൊങ്കണി ഡിപ്ലൊമാച്യാ 23വ്യാ ബ്യാചാചി വിദ്യാർഥിൻ ശ്രീമതി മരിയ ഫുർടാഡൊ ഹികാ പ്രമാൺ പർത് ദീവ്ന് മാൻ കെലൊ. ഉപ്രാന്ത് തിണെം ആപ്ലൊ ദോൻ വർസാഞ്ചൊ ശിക്പാ അൻബൊഗ് ജമ്ലെല്യാം മുകാർ ദവർലൊ.
കൊങ്കണി ഡിപ്ലൊമാച്യാ 24വ്യാ ബ്യാചാചെം ഉഗ്താവൺ വിദ്യാർഥിനി ശ്രീമതി ചന്ദ്രകലാ ഹികാ കിട് ദിംവ്ചെ മാരിഫാത് മാ| ഫാ| മെല്വിൻ ജോസെഫ് പിണ്ടൊ ഹാംണി കെലെം. ത്യാ ഉപ്രാന്ത് ശ്രീമതി ചന്ദ്രകലാ ഹിണെം ആപ്ലിം ഭൊഗ്ണാം ഉചാർലിം.
`അമർ കൊങ്കണി’ച്യാ 76 അങ്ക്യാം പയ്കി 35 അങ്ക്യാഞ്ചെം സംപാദക്പൺ ചലയില്ലൊ സാഹിത്യ് അകാഡെമി പ്രശസ്തി വിജേത് മാനെസ്ത് എഡ്വിൻ ജെ.എഫ്. ഡിസോജാ ഉലവ്ന് `സംസ്ഥ്യാൻ കാഡ്’ല്ല്യാ സർവ് പത്രാം പയ്കി അമർ കൊങ്കണി സർവ് ശ്രേശ്ട് പത്ര്’ മ്ഹണാലൊ.
കൊങ്കണി സംസ്ഥ്യാചൊ കാര്യെം സംയോജക് ശ്രീ ജോകിം പിണ്ടൊ ഹാണെം “അമർ കൊങ്കണി’ വെബ്’സൈടി വിശിം മാഹെത് ദിലി.
`അമർ കൊങ്കണി’ ഷണ്മാസികാച്യാ സംപാദകീയ് മണ്ഡളിചൊ സാന്ദൊ കു| ഡെല്വിടാ വേഗസ് ഹാംണി ധന്യവാദ് പാടയ്ലെ.
ഉപ്രാന്ത് ലഗ്ബഗ് ഏക് ഘണ്ടൊ, ഗൊംയ്ചി ഖ്യാത് ലേഖകി, വിമർശകി ശ്രീമതി ചന്ദ്രലേഖാ ദെ സോജാ ഹി കൊങ്ക്ണെന്ത് സംസൊദ് ലേഖനാഞ്ചി ഗർജ് ആനി അവ്കാസ് മ്ഹള്ള്യാ വിഷയാചെർ ഉലയ്ലി. ജെവ്ണാസംഗിം കാര്യക്രം സംപ്ലെം.
