സാഹിത്യ് അകാദെമി ന്യൂ ഡെല്ലി ആനി കൊങ്ക്ണി ലേഖക് ആനി കലാകാർ സംഘ്, മംഗ്ളുർ ഹാഞ്ച്യാ ജോഡ് ആസ്ര്യാഖാൽ സപ്ടെംബർ 2വെർ മംഗ്ളുർ സാം ലുവിസ് കൊലെജിച്യാ ഗെൽഗെ ഹൊലാന്ത് ‘ഥ്രു മായ് വിണ്ഡൊ’ നാംവാചെം കാര്യെം ആയൊജിത് കെല്ലെം. ʻകൊങ്ക്ണി ദിർവെംʼ സ്ഥാപക് സർദാർ ലുവിസ് കണ്ണപ്പ ഹാച്യാ ജിണ്യെചെർ നദർ മാർʼല്ല്യാ ഹ്യാ കാര്യാക് നാമ്ണെചി ലെഖികാ, സർദാർ ലുവിസ് കണ്ണപ്പച്യാ ഭാവാചി നാത് ശ്യാമലാ മാദവ് മുഖെൽ സയ്രി ജാവ്ന് ഹാജർ ആസ്ʼല്ലി. ജമ്ലെല്യാ സര്യ്യാംനി കാര്യാച്യാ സുർവെർ ലുവിസ് കണ്ണപ്പാച്യാ തസ്വിരെക് ഫുലാഞ്ചൊ മാൻ ഭെടയ്ലൊ. ഉപ്രാന്ത് ശ്യാമലാ മാദവ് ഹിണെ സർദാർ ലുവിസ് കണ്ണപ്പാ ഹാച്യാ ജിവിതാ വിശിം ഉലവ്പ് ദിലെം.
ശ്യാമലാ മാദവ് ഹിച്യാ ഉലവ്പാ ഉപ്രാന്ത് സംവാദ് കാര്യെം ചല്ലെം. ഹാന്തും ശ്യാമലാ ഹിചൊ ഭാവ് ശ്രീ എൻ. ജി. മൊഹനാൻ ജമ്ലെല്യാഞ്ച്യാ സവാലാങ്ക് ജാപി ദില്യൊ. “ലൂയിസ് കണ്ണപ്പാക് ധർമാവിശിം വിശാൽ മനോഭാവ് ആസ്ല്ലൊ. ഉഞ്ച്ലെം ശികപ് ആനി ആപ്ല്യാ വാവ്രാക് ലാഗൊൻ ലൊകാസംഗിം ഭർസൊൻ ആസ്ʼല്ലെഞ്ച് ഹാകാ കാരൺ. സർവാങ്ക്ʼയി സമാൻ രിതിൻ പളെവ്ന് ആസ്ലെല്യാ താണെ ജിണ്യെന്ത് ജായ്തെ കശ്ട് സൊസ്ലെ. ഇംഗ്ലിശ് ഭാശെചെർ ചഡ് വോഡ് ആസ്ലെല്യാ താണെ ഇംഗ്ലിശ് അധ്യയനാചൊ വിഷയ് ജാവ്ന് ബൈബൽ വിഞ്ച്ലൊ. നിമാണെ ബൈബലാഥാവ്ന് പ്രേരിത് ജാവ്ന് താണെ ക്രീസ്തീ ധർം ആപ്ണായ്ലൊʼʼ അശെം മ്ഹണാലൊ. മുകാരുൻ, “താണെ മതാന്തർ ജാല്ലെവെളിം മംഗ്ളുരാന്ത് ൽഹാൻ മട്ടാചൊ ഗലാടൊച് ജാലൊ. ഹാകാ ലാഗൊൻ താണെ മട്വ്യാ ആവ്ദെക് ഗാംവ് സൊഡിജെ പഡ്ലൊ. ക്രിസ്താംവ് ധർം ആപ്ലായ്ലെല്യാ കണ്ണപ്പാൻ ക്രിസ്താംവ് ആൽകുഞ്ജ് ഘെജെ മ്ഹൺ യാജകാൻ ദാബാവ് ഘാല്ലെ വെളിം താണെ ആപ്ലൊ ഈശ്ട് ലുവിസ് മസ്കരേൻഹസ് ഹാചെം നാംവ്ʼച് ആപ്ലെം ആൽകുഞ്ജ് ജാവ്ന് ഘെത്ലെം ആനി അശെം തൊ സർദാർ ലുവിസ് കണ്ണപ്പ ജാലൊ. തരീ ആപ്ല്യാ നിമാണ്യാ ദിസാംനി താണെ ആപ്ല്യാ കുട്മാച്യാ സാന്ദ്യാങ്ക് ധർം ബദ്ലിനാകാത് മ്ഹള്ളി സലഹാ ദില്ലി” മ്ഹണാലൊ മാനെസ്ത് മോഹൻ.
ഇംഗ്ലിശ് ഭാശെചെർ താകാ മോഗ് ആസ്ʼല്ലൊ. ഹാകാ ലാഗൊൻ താണെ ʻമ്യാംഗലൊർʼ മ്ഹള്ളെം ഇംഗ്ലിശ് നെമാളെം സുർവാത്ലെം. പുൺ തെം വെഗിഞ്ച് ബന്ദ് പഡ്ലെം. ഉപ്രാന്ത താണെ താചൊ ഈശ്ട് ലുവിസ് മസ്കരേൻഹസ് ഹാച്യാ കൊങ്ക്ണി ദിർവെം പത്രാക് പാടിംബൊ ദിലൊ ആനി ഹാകാ ലാഗൊൻ കൊങ്ക്ണി പത്രികോധ്യമാക് ബുന്യാദ് പഡ്ലി.
സുർവെർ, സാഹിത്യ് അകാഡെമിചൊ വാംഗ്ഡി ഹെന്രി എം. മസ്കാരെൻഹാസാൻ സാഹിത്യ് അകാദെമിച്യാ കാര്യ്വിദാനാചെർ ഉജ്വാഡ് ഘാലൊ ആനി കാര്യാച്യാ നിമാണെ ധന്യവാദ് പാടയ്ലെ. സാഹിത്യ അകാഡെമിച്യാ കൊങ്കണി സലഹാ സമിതിചൊ നിമന്ത്രക് തശെം കാര്യകാരി മണ്ഡളാചൊ സാന്ദൊ മെല്വിൻ രൊഡ്രിഗസാൻ സർവയ് കലാകരാങ്ക് ഫുലാം തുരെ ദീവ്ന്‌ സ്വാഗത്‌ കെലൊ. നിമാണെ സർദാർ ലുവിസ് കണ്ണപ്പാചെം പിന്തുർ സാം ലുവിസ് കൊലെജിച്യാ കൊങ്കണി സംസ്ഥ്യാചൊ ദിരെക്തൊർ ദൊ| ഫാ| മെല്വിൻ പിണ്ടൊക് ഹതാന്തർ കെലെം.
കാര്യാവെളാർ സാഹിത്യ് അകാഡെമിചൊ വാംഗ്ഡി സ്ടേനി ബേളാ, കൊങ്കണി സംസ്ഥ്യാചൊ ദിരെക്തൊർ ദൊ| ഫാ| മെല്വിൻ പിണ്ടൊ, ദാനി മാനെസ്ത് വിലിയം ഡിʼസോജാ, കാനഡി ഭാശെചി ലേഖകി ബി.എം. രോഹിണി, കൊങ്കണി ഭാശാ മണ്ഡൾ, കർനാടക് ഹാചൊ അധ്യക്ഷ് ശ്രീ വസന്ത് രാവ്, കവി , സാഹിതി, ലുവിസ് കണ്ണപ്പാച്യാ കുട്മാചെ സാന്ദെ, തശെം സാം ലുവിസ് കൊലെജിചെ കൊങ്കണി വിദ്യാർഥി, വിദ്യാർഥിംനി ഹാജർ ആസ്ʼല്ലിം.
