ʻकला निकेतन, मजोर्डाʼ हांणी आसा केल्ल्या ʻसंसकृतायेचें दायजʼ – राश्ट्रीय मट्टाच्या कोंकणी दोडें गायन स्पर्ध्याचें दुस्रें सेमी फैनल्स सप्तेंबर १५वेर सां लुवीस कोलेजिच्या फा| एरीक मथायस सभासालांत चल्लें. स्पर्ध्यांत भाग घेतʼल्ल्या ४० स्पर्धिकां पयकी १६ जणां अंतीम कणंत गोयांत अकटोबर २५ तारिकेर चलोवंक आसच्या फैनल स्पर्ध्याक विंचून आयलीं.
मंगळुरांत सेमी फैनल्स स्पर्धो सां लुवीस कोलेज आनी कला निकेतन गोंय हांच्या जोड आसऱ्याखाल मांडून हाडʼल्लो. सां लुवीस कोलेजिचो प्रिन्सिपाल दो| फा| प्रवीण मार्टीस हांणी तोणियो मार्न आनी सां लुवीस शिकपा संस्थ्यांचे रेकटर फा| मेलवीन पिंटो हांणी गुमटां बडंवचे मारिफात स्पर्द्याचें उग्तावण केलें. काऱ्याचे मुखेल सयरे जावन ʻतियात्रिसतांची संस्थाʼ हाचो अध्यक्ष अर्नोलड डीʼकोसता तशेंच ʻकला निकेतन, मजोर्डाʼ हाचो अध्यक्ष तशें स्पर्द्याचो संचालक मैकल ग्रेशियस वेदीर हाजर आसʼल्ले. हांचे संवें स्पर्ध्याचे व्हरयणार जोयेल आंटनी रेबेरो, जोर्ज गोन्सालवीस, क्सेवियर फेर्नांडीस, स्थळीय संयोजक फ्लोरा कासतेलिनो, कोंकणी संघाच्यो अध्यक्षिणीं सेवरीन पिंटो, सरिता क्रासता, रिशल नोरोन्हा वेदीर हाजर आसल्लीं.
विशेष आकरषण जावन आसा केल्ल्या गोंयच्या खाणांचें स्टोल ‘कुमिदो’, मा| बा| मेलवीन पिंटो जे.स. रेकटर हाणीं आशीर्वचन केलें. दो| फा| प्रवीण मार्टीस जे.स. हाणीं उग्तावण संदेश दिलो. अर्नालड डिकोसता हांणी समारोप संदेश दिलो. काऱ्याच्या सुर्वेर विद्यार्थी मेल्कना डीʼसोजान स्वागत केलो. जोश्व सिकेरीन धन्यवाद दिलें. स्वीडल मेंडोन्सान काऱ्यें निर्वहण केलें.
पयलें सेमी फैनल: ʻसंसकृतायेचें दायजʼ – राश्ट्रीय मट्टाच्या दोडें गायान स्पर्द्याचें पयलें सेमी फैनल सेप्तेंबर १० तारिकेर पणजेच्या इन्स्टिट्यूट मिनेजस ब्रगांजा सभा सालांत चल्लें. चवदा स्पर्धिकांनी हांतूं भाग घेतलो. वेल्मा फेर्नांडीस, दो| ग्लेनीस मेंडोन्सा आनी जोर्ज गोन्सालवीस व्हरयणार जावन हाजर आसʼल्ले.
