“८४ वर्सांची चरित्रा आसच्या अखील भारतीय कोंकणी परिषदेच्या बत्तीस परिषदे थावन २४ सम्मेळ जाल्या उपरांत २५वें सम्मेळ मंगळुरांत जाता. साहित्याची वैविध्यता संभ्रंमचें हें साहित्य सम्मेळन लोका मेरेन पावोयां, तांच्या उसक्यार खेळयां म्हण चिंतून इतलें व्हड जूं आमीं आमच्या खंदार घेतलां. तुमी आनी आमी संगीं मेळोन हें सम्मेळन यशस्वी कर्यां. २०२३ नवेंबर ४ आनी ५तारिकेर मंगळूर्च्या शक्तिनगरांतल्या विश्व कोंकणी केंद्रांत चल्चा ह्या सम्मेळानाक देश-विदेशांतले सुमार ८०० प्रतिनिधी वांटो घेंवची निरीक्षा आसोन, विद्यार्थिंक विशेस रियायत दिल्या. प्रतिनिधिंक रावपाची आनी खाणा जेवणाची वेवस्था केल्या. ओनलैन मारिफात नोंदणी सूर्वातलां” अशें म्हणालो २५व्या अखील भारतीय कोंकणी साहित्य सम्मेळन स्वागत समितिचो प्रधान काऱ्यादर्शी कोंकणी कवी, चिंतक, राहूल एडवटैसर्स हाचो म्हालक मानेसत टैटस नोरोन्हा. २५व्या अखील भारतीय कोंकणी साहित्य सम्मेळनाचें नाम चिन्न उग्तावण काऱ्यावेळीं सम्मेळानाची माहेत दीवन तो उलयतालो. सां लुवीस कोलेज कोंकणी संस्थ्याचो काऱ्यें संयोजक, फामाद कलाकार पिंटो वामंजूर हाणें हो नाम चिन्न विन्यास केला.
राकणो पत्राचो आदलो संपादक, १९४७व्या वर्सा कर्नाटकांत कोंकणी भाषा मंडळ स्थापुंक वावुरल्लो, ʻश्रीमती विमला वी. पै जीवन सिद्धी प्रशसतीʼ पुरसकृत मा| बा| मार्क वालडर हाणें सम्मेळानाचें नाम चिन्न मोकळीक केलें. विश्व कोंकणी केंद्राचो अध्यक्ष नंदगोपाल शेणै हाणें सम्मेळानाचें माहेती पुसतक लोकार्पण केलें. साहित्य अकाडेमी प्रशसती विजेत साहिती गोकुल्दास प्रभून नोंदणी पुसतक मोकळीक केलें. कथोलीक सभा मंगळूर प्रदेश(नो) अध्यक्ष आलवीन डीʼसोजा पानीर हाणे क्यू आर कोड स्क्यान कर्न ओनलैन नोंदणेक चालन दिलें. अखील भारतीय कोंकणी परिषद हाचो अध्यक्ष अरूण उभयकर वेदीर हाजर आसल्लो.
स्वागत समितिचो काऱ्याध्यक्ष, पत्र्कर्त मानेसत एच. एम. पेर्नाल हाणें येवकार मागलो आनी जम्ल्ल्या मानाच्या सयऱ्यांची ओळोक कर्न दिली. साहित्य अकाडेमी न्यू डेल्ली हाच्या काऱ्याकारी समितिचो निमंत्रक मानेसत मेलवीन रोड्रिगसान काऱ्यें चलयलें. विश्व कोंकणी केंद्राचो मुकेल काऱ्यनिर्वहण अधिकारी मानेसत गुरुदत्त बाळिगान धन्यवाद अर्पिले.
