मंगळूर विश्व विद्यालय अध्ययन पीठ, बेसेंट विमन्स कोलेज जान’पद सांसकृतीक संघ हांच्या जोड आसऱ्याखाल ‘युनायटिंग वोयसस’ म्हळ्ळें कोंकणी, तुळू, मलयालम आनी ब्यारी भाशेचेर एका दिसाचें विचार’सातें मार्च २१वेर चल्लें. हें विचार सातें मंगळूर विश्व’विद्यालाच्या वाणिज्य विभागाचो डीन प्रो| ईश्वर हाणें दिवो पेटवन उग्तायलें. तो आपल्या उलवपांत – ‘आयच्या ह्या काळार भोव चड गर्जेच्या तशेंच प्रसतूत जावनासच्या ‘युनायटिंग वोयसस’ म्हणजे ‘एकवट हाडचे ताळे’ विषयाचेर हो परिसंवाद मांडून हाड’ल्ल्याक तुमकां परबीं पाटयतां. कोंकणी अध्ययन पीठ असलीं काऱ्यक्रमां मांडून हाडते आसा. मंगळूर विश्व विद्यालयाखाल आसच्या विवीध भाशेंच्या पीठां पयकी कोंकणी अध्ययन पीठ भोव’च बलीषट. हांगासर दोन कोरोड रुप्यांचो कोर्पस फंड आसा. वर्साक लगबग १४लाक वाड मेळच्या ह्या फंडाथावन कितलिंय काऱ्यीं मांडून हाड्येता. फकत सूक्त दृषटिकोन आनी इच्छासक्तिची गर्ज आसा. दो| जयवंत नायक ह्या दिशेन उत्तीम रितिचो वावर कर्ता’ म्हणालो. मुकारून ताणें ‘कोंकणी समुदायाच्या सामाजीक अर्थीक परिगते विशीं अध्ययन चलयजे. त्या वर्वीं सर्काराक ह्या समुदायाक गर्जेक पडचीं येवजणां मांडून हाडुंक सलीस जाता. कोंकणी भाशेंत उंचल्या संसोधाक उत्तेजन दीजे. ह्या मारिफात कोंकणी भास बळवंत जाता” म्हणालो.
दिक्सूची भाषण दिल्लो विश्व कोंकणी केंद्राचो अध्यक्ष सी. ए. नंदगोपाल उलवन -‘प्रादेशीक भाशेंच्या उरवण्याक त्या भाशेंतल्या तज्ञांनी सांगाता मेळोन भाशेच्या वाडावळिविशीं क्रम घेंवचें गर्जेचें’ म्हणालो. ह्या वेळार ताणें विश्व कोंकणी केंद्रान कोंकणेच्या वाडावळेक हातीं घेत’ल्ल्या कामांविशीं सविसतार माहेत दिली.
काऱ्या वेळीं मुकेल सयरो जावन WNES हाचो अध्यक्ष मणेल अण्णप्प नायक, संस्थ्याची संचालकी तशेंच WNES हाची उपाध्यक्षीण दो| मंजुळा के. टी., बेसेंट संस्थ्याचो आडळतेदार दो| राज’शेखर हेब्बार, प्रिन्सिपाल दो| प्रवीण कुमार के. सी. वेदीर हाजर आस’ल्ले.
बाहुभाशी विचार सात्यांत संपन्मूळ वेक्ती जावन हाजर आस’ल्ले पय्यन्नूर रमेश पै हाणीं मलयालम भाशेविशीं, श्री गोकूल’दास प्रभू कोंकणी भाशेविशीं, अबूबक्कर सिद्धीक ब्यारी भाशेविशीं आनी दो| माधव एम. के. तुळुभाशेविशीं विद्यार्थीं संगीं संवाद चलयलो. दो| देवदास पै बी हाणीं हें विचार सातें चलवन व्हेलें कोंकणी अध्ययन पीठाचे अधिकारी, सांदे, विवीध कोलेजिचे शिक्षक तशेंच विद्यार्थी ह्या विचार सात्याक हाजर आस’ल्लीं.
काऱ्यें संयोजक दो| जयवंत नायक हाणीं प्रासतावीक उलवप दिलें. विद्यार्थीन प्रणम्य हिणें काऱ्यें चलयलें. कोंकणी संघच्या विद्यार्थिंनी प्रार्थन गीत गायलें. जान’पद सांसकृतीक संघाची संचालकी प्रो. ज्ञानेश्वरी हिणे धन्यवाद पाटयलें. सहसंचालक दो| परशुराम माळगे, प्रो| अनुपमा बाळिगे आनी प्रो माया कुडवा हाणी सहकार दिलो.
