पाटीं घुंवोन पळयताना म्हज्या जिवितांत म्हज्या वांट्याक आयिल्ले अवकास हांवे बऱ्यान वापारल्यात म्हणची व्हड तृप्ती म्हाका आसा” म्हणालो दो| ज्यो लोबो, कुलशेकर.
दो| लोबो, मंगळारा, १४ वेर, सां. लुवीस परिगणीत विश्वविद्यालयाच्या कोंकणी संस्थ्याच्या मयन्याळ्या बोल्कांव काऱ्यावळिंत उलयतालो.
“हांव मटवो देकून ल्हान आसताना म्हाका शासत्री म्हण चिडायताले. जै जवान – जै किसान नारो दिल्ल्या शासत्रिचेर म्हाका वर्तो अभिमान आसलो. ताच्या अकालीक मर्णाच्या मिसतेरान खंतीसट जाल्यां पयकीं हांव्यी एकलों. आनी ह्याच कारणाक लागोन, विदेशांग खात्यांत देशाभायल्या सेवेचो अवकास म्हज्या वांट्याक येताना, लंडन तसलो जागो सोडन हांवे ताश्केंट विंचलो. २००४ व्या वर्सा शासत्रिची जल्माशताब्दी आसा म्हण म्हाका खबर आसली आनी हो अवकास ताश्केंटांत आसताना हांवे बऱ्यान वापारलो. शासत्रिच्या नांवार एक वसतुसंग्रहालय, उद्यान आनी तो मरण पावलेल्या ताश्केंटांत भारतीय सांसकृतीक केंद्र ताच्या नांवार बदलिलें. हें म्हज्या जिवितांतलें व्हड साधन म्हण हांव लेक्तां”
“व्हडले मनीस अशेच व्हडले जायनांत, तांचेथंय थोडे विशेस गूण आसतात” म्हण राजीव गांदिचो उडास काडून लोबोन – तीन मूर्ती भवनांत एका काऱ्यक्रमांत विदेशी विद्यार्थीं लागीं उलयिल्ल्या, तवळ देशाचो प्रदानी जावनासलेल्या राजीव गांदीन, काऱ्यक्रमांत विदेशी विद्यार्थिंनी दिल्लें तोंडपाशी दूर आयकोन, तांच्या कल्याणा खातीर कशें क्रम घेतलें म्हळ्ळे विश्यांत संक्षिप्त विवर दिलो. सांगाताच मोरिशियस मेयर डी क्रूज म्हण कळ्ळ्या उपरांत प्लाजा थियेटरांत काऱ्यक्रम मांडून हाडुंक ताचें ‘नां’ कशें ‘हां’ जावन बदलिलें, पिट्टासी आनी विदेशी द्वेशी म्हण समाजेंत जेराल अभिपराय आसलेल्या गोद्रेज कंपणेच्या म्हालका थावन सांसकृतीक काऱ्यक्रमांक मात नय, विदेशी विद्यार्थिंच्या शिकपाक सयत कशी कुमक मेळचेपरीं केलें – हे विश्यांत मार्मीक गजालिंचीं दृश्टांतां दीवन लगबग एक वोर दो| लोबोन, बोल्कांव अर्ध्या वोराच्या उलवपाचो संपरदाय मोडून, कोणाकच उबगोण येनाशें आपुरबायेचें उलवप सादर केलें.
‘बोल्कांव’ काऱ्यावळिचें परिकल्पन आनी सुंकाण सांबाळून आसच्या एच्चेम, पेर्नाल हाच्या कोंकणी काव्यें : रुपां आनी रूपकां बुकाक २०२५ व्या वर्साचो राषट्रीय पांवड्याच्यो प्रतिषठीत साहित्य अकादेमी पुरसकार फावो जाल्ल्या सुवाळ्यार बोल्कांव पंगड, कोंकणी संस्थो, सां. लुवीस परिगणीत विश्वविद्यालय तर्फेन मालघडो सांदो श्री आलन सी. ए. पिरेरा आनी उलवपी ज्यो लोबो हाणी शोल आनी फुलां झेलो दीवन मान केलो. ह्या वेळीं अभिनंदनाचीं उत्रां उलयिल्ल्या श्री आलन सी. ए. पिरेरा हाणी “…कोंकणी साहित्याचे चरित्रेंत साहित्य विमर्शाक राश्ट्रीय मट्टार प्रशसती मेळल्ली हीच पयले पावटीं. ती कीर्त विमर्शक एच्चेम पेर्नालाक फावो जाता. पेर्नाल तसल्या ल्हान गांवांत उबजाल्लें हें किटाळ कर्नाटकांत उज्वाड फांकवन आसा-तें देश तशें अंतराश्ट्रीय मट्टार उज्वाड फांकवची दिवटी जावन पर्जळोंदी…” म्हण बरें मागलें. ह्या वेळीं आपल्या कोंकणी सर्कस बुकाक कर्नाटक कोंकणी साहित्य अकाडेमी थावन लेखनां विभागांत उत्तीम पुसतक पुरसकार आपणायिल्ल्या बोल्कांव सांदो रोशू, बजपे हाका फुलां तुरो दीवन दो| ज्यो लोबोन बोल्कांव पंगडा तर्फेन मान केलो.
बोल्कांव काऱ्यावळिचो मुकेल सलहादार दो| आलवीन डेसा हाणी अडियो संदेशा मुकांत्र बोल्कांव रूवारी एच्चेमाक बरें मागलें.
सां. लुवीस परिगणीत विश्वविद्यालयाचो प्राध्यापक मनोज फेर्नांद हाणे काऱ्यें चलवन वेलें आनी एच्चेमाच्या साहित्याची संक्षिप्त ओळक दिली.
कोंकणी संस्थ्याचो काऱ्यक्रम संचालक पिंटो वामंजूर हाणी ज्यो लोबोक येवकार मागलो, सहायकी वनिता हिणे सहकार दिलो.
काऱ्यवळ सुर्वातचे पयलें पाटल्या दिसांनी संसारी पयण संपवन सर्गीं राजाक गेल्ल्या सां. लुवीस शिकपा संस्थ्यांचों रेकटर बा| मेलवीन जोसेफ पिंटो हांचो उडास काडून, मिनुटाचें मावन सांबाळून, तांका बोल्कांव पंगडा तर्फेन शांती मागली.
बोल्कांव काऱ्यावळीक हाजर जाल्ल्या सर्व सांद्यांक मोगाची काणीक जावन ज्यो लोबो हाणी कर्नाटक कोंकणी साहित्य अकाडेमीन फायस केल्लो तांच्या आत्मकथनाचो बूक ” एक जिवीत: अवकास अपरिमीत” हसताक्षर करून दिलो.
काऱ्यावळीक प्यालेसतीनी कवी, पत्र्कर्त नज्वान डार्वीश आनी बेंगळुरांत एफ.के.सी.ए. तशें हेर संघटनांचों रूवारी आनी प्रमूक समाजीक मुकेली श्री चारल्स गोम्स, शिर्वां, रोनालड ओलिवेरा पडुकोणे आनी हेर मानेसत हाजर आसले.
