सां लुवीस कोलेज कोंकणी संस्थ्याथावन पाटल्या ४१वर्साथावन खळानासतां पर्गटचें कोंकणी संसोध षणमासीक `अमर कोंकणी’ पर्ताक २०२१व्या वर्साची कोंकणी साहित्य प्रशसती मेळ’ल्ल्या संदर्भीं अमर कोंकणी वाचपी-बर्प्यांचें सहमिलन ह्याच मार्च १३ तारिकेर कोलेजिच्या सानिध्य सभासालांत आसा केल्लें. सकाळीं ९.३०क सुर्वातून दनपरां १.००वोरार जेवणासंगीं अकेर जाल्ल्या ह्या काऱ्याक अमर कोंकणिचे वाचपी तशेंच बरवपी हाजर आस’ल्ले.
कर्नाटक कोंकणी शिकपा संस्थ्यांचो संघ, मंगळूर हाचो अध्यक्ष डो| कसतूरी मोहन पै काऱ्याचो मुखेल सयरो जावन हाजर आस’ल्लो. सां लुवीस कोलेजिचो प्रिन्सिपाल दो| फा| प्रवीण मार्टीस जे.स. आनी कोंकणी संस्थ्याचो आदलो काऱ्यकारी दिरेक्तोर मानेसत एडवीन जे. एफ. डिसोजा मानाचे सयरे जावन हाजर आस’ल्ले. सां लुवीस शिकपा संस्थ्यांचो रेकटर मा| फा| मेलवीन जोसेफ पिंटो जे.स. काऱ्याचे अध्यक्ष जावन हाजर आस’ल्ले.
काऱ्याच्या सुर्वेर कोंकणी संघाचो सांदो कू| वियोल आनी पंगडान प्रार्थन गीत गायलें. उपरांत `अमर कोंकणी’ षणमासिकाच्या संपादकीय मंडळेचो सांदो श्रीमती फ्लोरा क्यासतेलिनो हिणे सयऱ्यांक स्वागत केलो. काऱ्याच्या सुर्वातेर कोंकणी संस्थ्याचो दिरेक्तोर तशेंच अमर कोंकणी षणमासिकाचो संपादक दो| फा| मेलवीन एस. पिंटो हांणी अमर कोंकणी षणमासीक चलोन आयिल्ल्या वाटेचेर सुकण्या नदर चरयली.
उदघाटन कर्न उलयिल्ल्या डो| कसतूरी मोहन पै हांणी आपणें सां लुवीस कोलेजिंत शिक्ताना आपणायिल्ली शिसत आनी धर’ल्लो वावर पोंताक पावंवचें हट- हें दोनी गूण आजून आपूण पाळन आयलां म्हणालो. त्या उपरांत उलयिल्लो `अमर कोंकणी’ षणमासिकाचो प्रकाशक, सां लुवीस कोलेजिचो दो| फा| प्रवीण मार्टीस जे.स. – कोंकणी समुदायांत संसोदाक मसत आवकास आसा. जायत्यो आमच्ये रितिरिवाजी म्हाल्गाड्यां थावन देंवोन आयिल्ल्यो म्हण आज आमीं दोळे धांपून त्यो पाळतांव. तरी ताचो नीज आर्थ वा उद्देश कळीत आमकां कळीत आसाना. रोसाक बसयिल्ल्या होकलेक मावळ्यान्ंच कित्या हात दर्न न्हावंक उटयजे? सन्नांक पीट पुगात दवर्ताना मोडकेचेर खुर्सा गूर्त कित्याक काडतात? वा GSB समुदायांतल्या काजारांनी `उडिदा मुहूर्त’ म्हळ्ळो संपरदाय कित्या पासत पाळतात? – हे विशीं आयच्या युवजणांक मात्र न्हंय जाणत्यांक’यी सार्की माहेत ना. हें आचरणांविशीं जाल्यार, संसकृती, भास, मनशाशासतीर अशें विवीद शेतांनी संसोदाक आवकास आसा.
संसोद लेखनांची सुर्वात युरोपांत सुर्वातून आज संसार’भर विश्व’विद्यालयांनी जाण्वाय तयार कर्ची वाट जाल्या. संसोद (Research) आनी अध्ययन (Studies) हाचे मदें फरक आसा. संसोद नवी जाण्वाय, गिन्यान सृषठी कर्ता. तें नवो विचार वा माहेत भायर घाल्ता. सां लुवीस कोलेज न्हंय फकत ज्ञान वांटता बगार ज्ञान उदपादन कर्चे दिशेन’यी खळनासतां वावुर्ता. देकून कोंकणेंत संसोद बरवपी रचिजे म्हळ्ळ्या उद्देशान कोंकणी संस्थ्या मारिफात संसोद लेकनां बरंवचेविशीं पांच हप्त्यांचें ONLINE तरबेती शिबीर’यी चल्चें आसा. अमर कोंकणी संपादक तशेंच खद्द एक संसोद मार्गदर्शक जावनासचो दो| फा| मेलवीन पिंटो ही तरबेती चलवन व्हर्तलो.
संसोद लेखनां शिकपा शेतांत, तंत्र गिन्यानाच्या अभिवृद्धेंत आनी देशाच्या अभिवृद्धेंत महत्वचो पात्र खेळतात. देकून संसोद लेखनां पर्गट जांवचे आदीं त्या त्या विषयांच्या तज्ञांथावन तीं लेखन तज्वीज करवन पर्गट कर्तात जाल्ल्यान, आमकां असल्या एका तज्ञांच्या मंडळेचीय गर्ज आसा. हे दिशेन’यी चिंतप आटयतेल्यांव’ म्हळें.
भोव चड अंके घेवन कोंकणी उत्तीर्ण जाल्ली कोंकणी डिपलोमाच्या २३व्या ब्याचाची विद्यार्थीन श्रीमती मरीय फुर्टाडो हिका प्रमाण पर्त दीवन मान केलो. उपरांत तिणें आपलो दोन वर्सांचो शिकपा अनबोग जम्लेल्यां मुकार दवरलो.
कोंकणी डिपलोमाच्या २४व्या ब्याचाचें उग्तावण विद्यार्थिनी श्रीमती चंद्रकला हिका कीट दिंवचे मारिफात मा| फा| मेलवीन जोसेफ पिंटो हांणी केलें. त्या उपरांत श्रीमती चंद्रकला हिणें आपलीं भोगणां उचारलीं.
`अमर कोंकणी’च्या ७६ अंक्यां पयकी ३५ अंक्यांचें संपादकपण चलयिल्लो साहित्य अकाडेमी प्रशसती विजेत मानेसत एडवीन जे.एफ. डिसोजा उलवन `संस्थ्यान काड’ल्ल्या सर्व पत्रां पयकी अमर कोंकणी सर्व श्रेश्ट पत्र’ म्हणालो.
कोंकणी संस्थ्याचो काऱ्यें संयोजक श्री जोकीम पिंटो हाणें “अमर कोंकणी’ वेब’सैटी विशीं माहेत दिली.
`अमर कोंकणी’ षणमासिकाच्या संपादकीय मंडळिचो सांदो कू| डेलविटा वेगस हांणी धन्यवाद पाटयले.
उपरांत लगबग एक घंटो, गोंयची ख्यात लेखकी, विमर्शकी श्रीमती चंद्रलेखा दे सोजा ही कोंकणेंत संसोद लेखनांची गर्ज आनी अवकास म्हळ्ळ्या विषयाचेर उलयली. जेवणासंगीं काऱ्यक्रम संपलें.
