കലാ നികെതൻ ഗൊംയ്, മാജൊർഡാ ആനി ഫാദർ ആഗ്നെൽ കൊലെജ് എഫ് ആർട്സ് അണ്ഡ് കൊമർസ് ഹാഞ്ച്യാ ഫുഡാർപണാഖാൽ ʻ കലാ, സംസ്കൃതി ആനി സാഹിത്യാന്ത്ല്യാൻ കൊങ്ക്ണി സമാജാചൊ എക്വട്ʼ മ്ഹള്ള്യാ വിഷയാചെർ ദോൻ ദിസാഞ്ചൊ രാഷ്ട്രീയ് മട്ടാചൊ പരിസംവാദ് ഗൊംയ്ച്യാ ആനി ഫാദർ ആഗ്നെൽ കൊലെജിന്ത് അഗോസ്ത് 19 ആനി 20വെർ ചല്ലൊ.
ഹ്യാ രാഷ്ട്രീയ് പരിസംവാദാചി സുർവാത് പാരംപാരിക് പ്രാർഥൻ ഗീത് ആനി നാചാധ്വാരിം ജാലി. ഹ്യാ ഗിതാന്ത് ഗൊംയ്ച്യാ സമുദായാഞ്ച്യാ സംബന്ധാച്യാ സമ്മിലനാചൊ സാർ ആസ്ല്ലൊ. ഗൊംയ്ച്യാ മായ്കൽ ഗ്രാസിയാസാൻ രച്ʼല്ലെം ഹെം ഗീത്, സാം. ലുവിസ് കൊലെജ് (സ്വായത്ത്) മംഗ്ളുർ ഹാംഗാച്യാ വിദ്യാർഥിംനി ഗായ്ലെം. ഹ്യാച് കൊലെജിചി വിദ്യാർഥിൻ കു| രെമൊനാ പിരേരാ ഹിണെ ഹ്യാ ഗീതാക് ഭരതനാട്യം നാചാചെം പ്രദർശൻ ദിലെം.
രാജ്യാന്ത്, ഗൊംയാ ഭായ്ര്, ആനി വിദെശാംനി കൊങ്ക്ണി മളാർ വാവുർപി നാമ്നെച്യാ കൊങ്ക്ണി വ്യക്തിങ്ക് കാര്യാവെളാർ കൊങ്ക്ണി പുരസ്കാർ ഭെടയ്ലെ. ʻകൊങ്ക്ണി രത്ന്ʼ പുരസ്കാർ ഫാദർ മെന്യുഎൽ പാസ്കൊൽ ഗൊമ്സ് ആനി സന്ദേശ് പ്രഭുദെസായ് ഹാങ്കാം ഫാവൊ ജാലൊ. ʻകൊങ്ക്ണി ഭൂഷൺʼ പുരസ്കാർ മംഗ്ളുർʼച്യാ ശ്രീമതി ഫ്ലോരാ കാസ്തെലിനൊ ആനി ദ ഗൊംയ് ഔട്ʼരീച് അസൊസിയേശൻ മുംബയ് ഹാങ്കാം ഭെടയ്ലെ. ദുബയ്ച്യാ ജെമ്സ് മെണ്ഡൊൻസാ ആനി കുവൈട്ʼച്യാ ഡൊമിംഗൊസ് അരൌജൊ ഹാങ്കാം കൊങ്ക്ണി വിഭൂഷൺ പുരസ്കാർ ദിലൊ.
മുഖെൽ സയ്രൊ ജാവ്ന് ഹാജർ ആസ്ʼല്ലെ ഗൊംയ്ചെ ആദ്ലെ മുഖ്യമന്ത്രി ദിഗംബർ കാമത് ഹാംണി ആപ്ല്യാ ഉലവ്പാന്ത് ʻആമ്ചി ആവയ് ഭാസ് സാംബാൾപാചി ആനി പ്രചാർ കർപാചി ഗരജ് ആസാ ആനി ഫകത് ആമ്ചി ആവയ് ഭാസ് കൊങ്ക്ണിച് ആമ്കാം ഗൊംയ്കാരാഞ്ചി വളഖ് ദിവങ്ക് ശക്താʼ അശെം സാംഗ്ലെം. മംഗ്ളുരി കൊങ്ക്ണി സമാജാക്, ഗൊംയ്ചൊ പ്രാമാണീക് മാണ്ഡൊ ശികൊവ്ന് ഗൊംയ്ചി സംസ്കൃതായ് ഗൊംയ്ച്യാ ഗഡി ഭായ്ര് വ്ഹർപാ ഖാതീർ ആനി ഫാദർ അഗ്നെൽ കൊലെജി വാംഗ്ഡാ ഹാത് മെളൊവ്ന് ഗൊംയ്, മഹാരാഷ്ട്ര്, കർനാടക്, ചണ്ഡീഗഢ് ആനി കേരളാച്യാ ലഗ്ബഗ് 200 യുവജണാങ്ക് എകാ മാന്താഖാൽ സാംഗാതാ ഹാഡുങ്ക് കെല്ല്യാ പ്രേതനാക് കലാനികെതൻ ഗൊംയ് ഹാകാ ഉല്ലാസ് പാടവ്ന്, ഫുഡാരാച്യാ താഞ്ച്യാ വാവ്രാന്ത് സഗ്ള്യാങ്ക് മജത് ആനി ആദാർ ദിവ്പാചി ആശ്വാസൻ താംണി ദിലി.
ഉഗ്താവൺ കാര്യാച്യാ നിമാണെ വെവെഗ്ള്യാ മ്ഹാവിദ്യാലയാന്ത്ല്യാ വിദ്യാർഥ്യാങ്ക് പോസ്ടർ ആനി കവിതാ വാചൻ സ്പർദൊ മാണ്ഡുൻ ഹാഡ്ʼല്ലൊ. നിമാണെ സയ്ര്യാംനി കൊങ്ക്ണി കവിതാ വാചൻ കെലെം. കവിതാ സ്പർദ്യാച്യാ വ്ഹരയ്ണാരാം തർഫെൻ ഫാമാദ് ലേഖക്, നാടകിസ്ത്, സീരിയാലാഞ്ചൊ ദിരെക്തൊർ തശെം ദായ്ജിവർൽഡ് ഡൊട് കൊം ഹാചൊ മുഖെൽ സഹ-സംപാദക് മാനെസ്ത് സ്ട്യാനി ബെളാ ഹാണെ കവിതെവിശിം മാർഗ്ദർശക് ഉലവ്പ് ദിലെം.
ദുസ്ര്യാ ദിസാ പയ്ല്യാ സർതാന്ത് ʻകൊങ്കണി മനിസ്ʼ മ്ഹള്ള്യാ അസ്മിതായെഖാൽ കൊങ്കണി സമുദായാചൊ എക്വട് (ഫാ| ഒനാസിസ് ഡിക്രുജ്), കവിതെ മാരിഫാത് കൊങ്കണി സമുദായാചൊ എക്വട് (സ്ടേനി ബേളാ, മംഗ്ളുർ), തിയാത്രാ മാരിഫാത് കൊങ്ക്ണി സമുദായാചൊ എക്വട് (ഡൊ| ഗ്ല്യാനിശ് മെണ്ഡൊൻസാ), ദുസ്ര്യാ സർതാന്ത് കലാ ആനി സംസ്കൃതി മാരിഫാത് കൊങ്ക്ണി സമുദായാചൊ എക്വട് (ദൊ| പാണ്ഡുരംഗ ഫൽദേസായ്) സാഹിത്യാ മാരിഫാത് കൊങ്ക്ണി സമുദായാചൊ എക്വട് (ഫാ| ജേസൻ പിണ്ടൊ), നിമാണ്യാ സർതാന്ത് ʻഎക്വട് വാഡംവ്ച്യാന്ത് പ്രായോഗികതാʼ മ്ഹള്ള്യാ വിഷയാചെർ കൊങ്കണി ഭാശാ മണ്ഡളാചി അധ്യക്ഷിൺ അന്വേശാ സിംഗ്ബാൽ, ദൽഗാദൊ കൊങ്കണി അകാഡെമിചൊ അധ്യക്ഷ് സെൽഷൊ ഫെർനാണ്ഡിസ് ആനി മംഗ്ളുർച്യാ സാം ആഗ്നെസ് കൊലെജിചൊ പ്രാധ്യാപക് പ്രൊ| എൽസൻ ഡിʼസോജാ ഹാംണി പ്രബന്ധ് മണ്ഡൻ കെലെ. ഹെ പരിസംവാദ് ,ദൊ| (ഫാ.) ലൂയിസ് ഗോമ്സ്, ദൊ| (പൂർണാനന്ദ്ʼചാരി, പ്രൊ| രാമരാവ് വാഘ് ഹാംണി ചലവ്ന് വ്ഹെല്യൊ.
കാര്യാച്യാ ആഖേരിക് തന്വി ബാംബൊലകാർ, വ്ഹിൻസി ക്വാഡ്രൊസ്, ഫാദർ മായ്രൻ ബാരെട്ടൊ (ഗൊംയ്) ആനി രെമൊനാ ഇവ്ഹെട് പരെരാ (മംഗ്ളുരു) ഹാങ്കാം രാഷ്ട്രീയ് പാംവ്ഡ്യാർ മാന്യതായ് മെളില്ല്യാ സന്ദർഭിം ഹാഞ്ച്യാ കൊങ്ക്ണെന്ത്ല്യാ യൊഗ്ദാനാ ഖാതീർ മാൻ കെലൊ.
