“കൊണാക് ആവ്ഡും വാ നാ ആവ്ഡും, ആയ്ജ് ബാജാർവാദി വെവസ്ഥാ ദേശാചിം സർകാരാം ചലയ്താ. ഹ്യാ ജാഗതീകരണാച്യാ ആവാഠാന്ത് ജൊ സശക്ത് ആസാ തൊച് തഗ് മാർതാലൊ. ആനി ജാച്യാ ഭിതർ ക്ഷമതാ ആസാ തൊച് തിഗ്തലൊ. ഹ്യാ ബദൽത്യാ സമീകരണാം ഭിതർ കൊങ്ക്ണീചി ഹസ്തക്ഷെപകാരി താകദ് ആമ്കാം വാഡൊവങ്ക് ജായ്. ആനി ആശില്ല്യാ സംസാധാനാചെം യൊഗ്യ് നിയൊജൻ ആമ്കാം കർപാക് ജായ്.” അശെം മ്ഹണാലി ഗൊംയ്ചി ഫാമാദ് കൊങ്കണി ലേഖകി, സമീക്ഷക്, അനുവാദകി തശെഞ്ച് കൊങ്കണിച്യാ വിവിധ് ആന്ധോലനാംനി സക്രീയ് സഹഭാഗ് ഘെത്ല്ലി കൊങ്ക്ണി കാര്യ്കർത് ശ്രീമതി ഹേമാ നായക് നവെംബർ 4 താരികെർ മംഗ്ളുർച്യാ ശക്തിനഗരാന്ത്ല്യാ വിശ്വ് കൊങ്കണി വഠാരാന്ത്ല്യാ ബസ്തി വാമൻ ശെണയ് വെദിഥാവ്ന് ഉലവ്ന്. തി 25വെം അഖിൽ ഭാരതീയ് കൊങ്കണി സാഹിത്യ് സമ്മേൾ ഉഗ്താവൺ കർൻ ഉലയ്താലി. മുകാരുൻ തിണെ- “കൊങ്ക്ണിചൊ പ്രസാർ ആനി വ്യാപ്തി ഹി പ്രസ്ഥാപീത് ചള്വളെച്യാ ആംവാഠാ ഭായ്ര് പാവ്ല്യാ. ഗരജ് ആസാ താചി ദാഖൽ ഘെവ്പാചി. ജർ ചള്വൾ ഹാചി ദാഖൽ ഘെനാ ജാല്യാർ ചള്വളിചൊ സന്ദർഭ് ഭൊവ്സാക് ലാഗ്ചൊ നാ. മ്ഹാൽഘഡ്യാംനി ഹാത്ളില്ലെം പ്രസ്ന് ആയ്ജ് തർണാട്യാ പിൾഗെകഡെ സൊംപവ്പാചൊ വെൾ ആയ്ലാ” മ്ഹളെം ആനി കൊങ്കണി ഭാശെച്യാ ഉദർഗതെ പാസത് വെഗിഞ്ച് കൊങ്ക്ണെചെം ഫുഡാർപൺ യുവസക്തെകഡെൻ ദിംവ്ചെം ഭോവ് ചഡ് ഗർജെചെം, ദെകുൻ, അഖിൽ ഭാരത് മട്ടാർ ʻആൽ ഇണ്ഡിയാ കൊങ്കണി യൂഥ് ലീഗ്ʼ ഹാച്യാ സ്ഥാപനാചി ഗർജ് ഉചാർലി. കൊങ്കണി സാഹിത്യാചൊ പ്രഭാവ് രാശ്ട്ര് ആനി അന്തരാശ്ട്രീയ് മട്ടാർ പഡാജെ തർ കൊങ്ക്ണെന്ത്ലെം ഉഞ്ച്ലെം സാഹിത്യ് ഹെർ ഭാസാങ്ക് തർജൺ ജായ്ജെ. ലിപിചൊ വാദ് ഘെവ്ന് കുദ്രെ ബാന്ദ്ച്യാകീ എക്വടാൻ മാത്ര് കൊങ്കണി ഭാശെചി ഗ്രേസ്ത്കായ് ഉരവ്ന് ഘെവ്യെത് മ്ഹൺ തിണെ ലിപി വിശ്യാന്ത് ചൂക് സമ്ജണി ആസ്ലെല്യാ മ്ഹാൽഘഡ്യാങ്ക് എക്വടാചൊ ഉലൊ ദിലൊ.
ഉഗ്താവൺ കാര്യാചൊ മുകെൽ സയ്രൊ, ഹിന്ദിന്ത്ലൊ ഫാമാദ് കവി തശെം വിമർശക് മാനെസ്ത് ഉദയൻ വാജപേയി ഹാണെ ആപ്ല്യാ ഉലവ്പാന്ത് ʻസാഹിത്യ് ആനി ജിവിത്ʼ ഹ്യാ വിഷയാചെർ ഉലവ്ന് “ദേശാച്യാ പ്രസ്തുത് പരിഗതെന്ത് ചിന്ത്പി തശെം ബരവ്പി ʻസമാജ് വിരോദിʼ ജാല്യാത്. സത് ഉലംവ്ക് ആഡ്വാർലാം. ബദ്ലെക്, ആപ്ലെം ദിശ്ടികോൺ ബദ്ലുൻ ബണ്ഡ്വൾശാഹി വെവസ്ഥെസംഗിം രാജി ജാംവ്ക് ദബാവ് ഘാൽതാത്. ബരവ്പ്യാൻ ഹാചൊ വിരോദ് കർൻ ദൺസാല്ല്യാഞ്ചൊ ആവാജ് ജാംവ്ചെം ചഡ് ഗർജെചെം. വിഗ്യാൻ യാന്ത്രിക് ജിണി ശികയ്താ. ഫകത് സാഹിത്യ് ആനി കലാ മാത്ര് മൻശാ ജിവിത്, സമാജ് ജിവിത്, പ്രകൃതി തശെം മൻജാതിഞ്ചെം ജിവിത് പ്രതിഫലിത് കർതാ” മ്ഹണാലൊ.
കാര്യാച്യാ സുർവെർ യെവ്കാർ സമിതിചൊ അധ്യക്ഷ് ശ്രീ മൈകൽ ഡിസോജാ ഹാംണി ജമ്ലെല്യാങ്ക് സ്വാഗത് കെലൊ. വെദിചെർ ആയോജൻ സമിതിചൊ ഉപാധ്യക്ഷ് ശ്രീ നന്ദ്ഗോപാൽ ശെണൈ, ഗോകുൽദാസ് പ്രഭു, കാര്യാധ്യക്ഷ് ശ്രീ ഹെച് എം പെർനാൽ, പരിഷദെചൊ അധ്യക്ഷ് ശ്രീ അരുൺ ഉഭയ്കർ, പരിഷദെചൊ സചിവ് ശ്രീ ഗൌരീശ് വർണേകർ വെദിർ ഹാജർ ആസ്ല്ലെ. ഹ്യാ കാര്യാവെളിം വിവിധ് ലേഖകാഞ്ചിം ഇക്രാ പുസ്തകാം മൊക്ളിക് ജാലിം. പാട്ല്യാ വർസാംനി സാഹിത്യ് അകാഡെമിഥാവ്ന് പുരസ്കാർ ജൊഡ്ല്ല്യാങ്ക് ഹ്യാച് വെദിർ മാൻ കെലൊ. ശ്രീ അനന്ത് അഗ്നി ഹാണെ കാര്യെം ചലയ്ലെം. സചിവ് ശ്രീ ഗൌരീശ് വർണേകർ ഹാണെം ധന്യവാദ് പാടയ്ലെ.
കൊങ്കണി സാഹിത്യ് സമ്മേളനാച്യാ പയ്ല്യാ ദിസാചൊ പയ്ലൊ പരിസംവാദ് ദൊ| നാരായൺ ദേസായി ഹാഞ്ച്യാ മുഖെൽപണാർ ചല്ലൊ. ʻകൊങ്കണി സാഹിത്യ് ചള്വൾ ആനി പ്രോത്സാഹനാ ഖാതീർ പാവ്ലാംʼ ഹൊ പയ്ല്യാ പരിസംവാദാചൊ വിശയ് ജാവ്നാസ്ല്ലൊ. പയ്യന്നൂർ രമേശ് പൈ, ഫാ| ജേസൻ പിണ്ടൊ, ദൊ| പ്രകാശ് വഝ്രീകാർ, ശ്രീ ആൽഫി മൊന്തേരൊ ഹ്യാ പരിസംവാദാചെ വാണ്ടെകാർ ജാവ്നാസ്ല്ലെ ആനി താണിം താഞ്ചൊ വിചാർ മാണ്ഡ്ലൊ. ദൊ| സുനീതാ കാണേകാർ ആനി ദൊ| അരവിന്ദ ശാൻഭാ്ഗ് ഹാണിം ചാർ പ്രാപാത്രാഞ്ചെർ നിരീക്ഷൺ കെലെം.
ദൊൻപാരാം ഉപ്രാന്ത് സമ്മേളാനാചൊ പയ്ലൊ സാഹിത്യ് സാദരീകരൺ ചല്ലൊ. ദൊ| രാജയ് പവാർ ഹാണിം ഗദ്യ് സാദർ കെലൊ. ആണ്ഡ്ര്യൂ എൽ. ഡികുൻഹാ, കൃഷ്ണകുമാർ കാമത്, സയ്യദ് സമീഉല്ല്, രൊജാരിയൊ പിണ്ടൊ, നവീൻ ഭക്ത, ഫെൽസി ലോബൊ, ഹാണിം ആപാപ്ല്യൊ കവിതാ സാദർ കെല്യൊ. മായാ ഖരംഗടെ, ദിനേശ് മർണേർകാർ, ആണ്ടനി ബാർകൂർ, ഹാണിം കഥാ സാദർ കെല്യൊ, വിൻസി പിണ്ടൊ ഹാണിം ന്യാനൊ കാണ്യൊ സാദർ കെല്യൊ. സന്ദേശ് ബാന്ദേകാർ ഹാണിം ഏക് ലേഖൻ സാദർ കെലെം. രേമണ്ഡ് ഡികുൻഹാ ഹാണിം ആപ്ലി ചിക്ണി കഥാ ആനി ചാരോളി സാദർ കെലിം.
ദുസ്രൊ പരിസംവാദ് ʻബാൾസാദഹിത്യ് ആനി യുവ ലേഖകാഞ്ചെം സാഹിത്യ്ʼ ഹ്യാ വിശയാചെർ ചല്ലൊ. ഹ്യാ പരിസംവാദാക് ദൊ| പ്രകാശ് പരിയെങ്കാർ അധ്യക്ഷ് ജാവ്നാസ്ലൊ. ബാലകൃഷ്ണ മല്യ, രോശു ബജ്പെ, രത്നമാല ദിവ്കർ, അന്വേഷനാ സിംഗ്ബാൽ ഹ്യാ പരിസംവാദാചെ വാണ്ടെകാർ ജാവ്നാസ്ല്ലെ ആനി താണിം താഞ്ചൊ വിചാർ മാണ്ഡ്ലൊ. ദൊ| പ്രശാന്തി തൽപൺകർ ഹാണിം നിരീക്ഷൺ കെലെം.
ഉപ്രാന്ത് ʻസമകാലീൻ ലേഖകാം മുഖ്ലിം സവാലാംʼ ഹ്യാ വിഷയാചെർ ചല്ലെല്ല്യാ പരിചർചെന്ത് ഉദയൻ വാജപേയി ആനി മമതാ സാഗർ ഹാംണി വാണ്ടൊ ഘെത്ലൊ. പുരുഷോത്തം ബിളിമലെ ഹ്യാ പരിചർചെചൊ അധ്യക്ഷ് ജാവ്നാസ്ല്ലൊ.
പരിചർചാ ഉപ്രാന്ത് സാഞ്ജെർ മനോരെഞ്ജ്വനാചിം സാംസ്കøതിക് കാര്യിം സാദർ ജാലിം. കലാ ആനി സംസ്കൃതി ഖാതെം ഗോംയ് സർകാർ ഹാഞ്ച്യാ ആദാരാൻ ചൽചൊ സാതേരി ഖെൾബായി ലോക്മാംൾ പാരൊഡേശ്വർ കേരി സത്തേരി പംഗഡ് ഗൊംയ്, ഹാണി ഗൊംയ്ചി പാരംപരിക് ലോക്നാ ച് ഫുഗ്ഡി, ദെഖ്ണി, ദൊവ്ലി മാണ്ഡ്, ദിവ്ലി നാച്, കൾശി ഫുഗ്ഡി നാച് സാദർ കെലൊ. നിമാണെം, മംഗ്ളുർച്യാ ʻഅസ്തിത്വʼ പംഗ്ഡാൻ ʻജുഗാരിʼ നാടക് പ്രസ്തുത് കെലൊ.
അഖില ഭാരതീയ് കൊങ്കണി സാഹിത്യ് സമ്മേളൻ ഹാച്യാ ദുസ്ര്യാ ദിസാച്യാ പയ്ലെ പരിസംവാദാചെ വിഷയ് ʻകൊങ്കണി രംഗ്മാംവചിയെചി ദശാ ആനി ദിശാʼ- ഹെം ബസ്തി വാമൻ ശെണൈ വെദിർ ചല്ലെം. ഹ്യാ പരിസംവാദാചെ അധ്യക്ഷ് ജാവ്ന് ദൊ| ഹനുമന്ത് ചൊപ്ഡേകർ, സഹ പ്രാധ്യപക്, കൊങ്കണി വിഭാഗ്, ഗൊംയ് വിശ്വവിദ്യാനിലയ്, തശെഞ്ച് ഹാന്തു വാണ്ടെകാർ ജാവ്നാസ്ചെ എൽ. കൃഷ്ണ ഭട്, എഡ്ഡി സിക്വേരാ, ദീപ്രായജ് സാതൊർഡെകാർ ഹാണിം ആപ്ലൊ വിചാർ മാണ്ഡ്ലൊ. ഹ്യാ തീനി വിചാരാഞ്ചെർ ദൊ| തന്വി കാമത് ബാംബോൾകർ ആനി പ്രകാശ് ശെണൈ ഹാണിം നിരീക്ഷൺ കെലെം. പരിസംവാദാചെ ആക്രേക് അധ്യക്ഷ് ദൊ| ഹനുമന്ത് ചൊപ്ഡേകർ ഹാണിം ആപ്ലിം ഭൊഗ്ണാം ഉചാർൻ ഹൊ പരിസംവാദ് സമരോപ് കെലൊ.
അഖില ഭാരതീയ് കൊങ്കണി സാഹിത്യ് സമ്മേളൻ ഹാച്യാ ദുസ്ര്യാ ദിസാചെം ദുസ്രെം പരിസംവാദ് അനന്ത് പ്രഭു ഹാഞ്ചാ അധ്യക്ഷപണാർ ʻകൊങ്കണി സാഹിത്യാചെ ഉദർഗതിന്ത് നെമാളിം ആനി സമാജ് മാധ്യമാഞ്ചെം യോഗദാൻʼ ഹ്യാ വിശയചെർ പരിസംവാദ് ചല്ലൊ. ദൊ| ഹരീന്ദ്ര ശർമ കെരളാച്യാ കൊങ്കണി സാഹിത്യാചെ ഉദർഗതിന്ത് നെമാളിം ആനി സമാജ് മാധ്യമാഞ്ചെം യോഗദാൻ ഹ്യാ വിശയചെർ പ്രപാത്ര് മാണ്ഡ്ലൊ, തശെഞ്ച് മംഗ്ളുരി കൊങ്കണി സാഹിത്യാച്യാ നെമാളിം ആനി സമാജ് മാധ്യമാവിശിം വിൽസൻ കടീൽ ഹാണിം ആപ്ലൊ വിചാർ മാണ്ഡ്ലൊ. ഗൊംയ്ച്യാ കൊങ്കണി സാഹിത്യാച്യാ നെമാളിം ആനി സമാജ് മാധ്യമാവിശിം ദൊ| ജയന്തി നായ്ക് ഹാണിം ആപ്ലൊ പ്രപാത്ര് മാണ്ഡ്ലൊ. മഹാരാശ്ട്രാച്യാ കൊങ്കണി സാഹിത്യാച്യാ മളാർ നെമാളിം ആനി സമാജ് മാധ്യമാംവിശിം വല്ലി ക്വാഡ്രസ് ഹാണിം ആപ്ലൊ വിചാർ മാണ്ഡ്ലൊ. ഹ്യാ ചാർ വിചാരാഞ്ചെർ മാനസി ധാഉസ്കാർ ഹാണിം നിരീക്ഷൺ കെലെം. ആക്രേക് പരിസംവാദാചൊ അധ്യക്ഷ് അനന്ത് പ്രഭു ഹാണിം ആപ്ലെ വിചാർ ഉചാർൻ ഹൊ പരിസംവാദ് സമരോപ് കെലൊ.
ദോൻ പരിസംവാദാ ഉപ്രാന്ത് വിവിധ് കൊങ്കണി സാഹിത്യാചെം സാദരീകരൺ ചല്ലെം. സ്ടേനി ബെളാ, കവീന്ദ്ര് ഫൾദേലസായി, ജൊഫാ ഗൊൻസാല്വിസ്, ഹാണിം ആപ്ല്യൊ കഥാ സാദർ കെല്യൊ. ഗ്ല്യാനിശ് മാർടിസ്, മമതാ വെർലെകാർ, സാരികാ നായ്ക്, സാഗർ വെളീപ്, വിസ്വപ്രതാപ് പവാർ, മഹാദേവ് ഗാംവ്കാർ, ഗോവിന്ദ് മോപ്കാർ മംഗേശ് ഹരിജൻ, ആകാശ് ഗാംവ്കാർ, ഹാണിം ആപ്ല്യൊ കവിതാ സാദർ കെല്യൊ. ഹേമന്ത് അയ്യ ഹാണിം ലലിത് ലേഖൻ സാദർ കെലെം. അദ്വൈത് സാൾഗാംവ്കാർ ഹാണിം ൽഹാൻ ലേഖൻ സാദർ കെലെം.
അഖില ഭാരതീയ് കൊങ്കണി സാഹിത്യ് സമ്മേളനാൻ ഥാരാവ് മാണ്ഡുങ്ക് വിനൊവ്ണി കെല്ലി ആനി തെ ഥാരാവ് സമാരോപ് കാര്യാ പയ്ലെം മാണ്ഡ്ലെ. 25വ്യാ അഖില ഭാരതീയ് കൊങ്കണി സാഹിത്യ് സമ്മേളനാചെ കാര്യധ്യക്ഷ് എച്. എം. പെർനാൽ ഹാണിം ഥാരാവ് വാചുൻ സാംഗ്ലെ. ʻകൊങ്കണിചെം ഉഞ്ച്ലെം സാഹിത്യ് സഗ്ള്യാങ്കി വാചുങ്ക് ആനി അധ്യയൻ കരുങ്ക് സൊംപെ ജാംവ്ചെ ഖാതിർ ലിപ്യാന്തർ കർചെം മിശൻ കൊങ്കണിചൊ ഏക് വാണ്ടൊ ജാംവ്ക് ജായ് ആനി ഹെം കാര്യരുപാക് ഹാഡ്ചി ഗർജ് ആസാ. ഹ്യാ വർവിം കൊങ്ക്ണെന്ത്ലെ യെദൊൾചെം ആനി ഫുഡരാന്ത്ലെം സാഹിത്യ് ലിപിഞ്ചൊ ദൊരൊ ഉത്രൊൻ വാൾചി ഗർജ് ആസാ. ഹൊ പയ്ലൊ ഥാരാവ് ജാവ്നാസ്ലൊ ആണ്ഡ്യ്രൂ എൽ. ഡികുൻഹാ ഹാഞ്ചൊ. ഹാചി ഗർജ് സമ്ജൊൻ ഹൊ ഥാരാവ് അഖില ഭാരതീയ് കൊങ്കണി പരിശദെചൊ അധ്യക്ഷ് ചേതൻ ആചാര്യ ഹാണിം മഞ്ജൂർ കെലൊ. ദുസ്രെം സൂചൻ ഫാ| ജെസൻ പിണ്ടൊ എസ്.ഡി.ബി. ഹാംണി ദില്ലെം- ʻഅഖില ഭാരതീയ് കൊങ്കണി പരിശദെ ഥാവ്ന് വിവിധ് ലിപിംനി ബരൊംവ്ച്യാ ബരവ്പ്യാ മധെം കസൊ സങ്കൊ ബാന്ദ്ചൊ ആനി അഖിൽ ഭാരതീയ് കൊങ്കണി പരിശദെൻ കൊങ്കണി മൻശാംനി ചലൊംവ്ച്യാ ശാളാംനി കൊങ്കണി ശികൊംവ്ചെ വിശി കശെം സുർവാത് കാൺഘെവ്യെത്ʼ. തശെഞ്ച് സമ്മേളനാച്യാ പയ്ല്യാ ദിസാ ദൊ| പുരുശോത്തം ബിളിമലെ ഹാണിം താഞ്ച്യാ പരിചർചാവെളാർ ʻസഗ്ള്യാ ഭാസാങ്ക് രാഷ്ട്രീയ് മാന്യതായ് മെളംവ്ക് വാവ്ര് ചലാജയ്ʼ മ്ഹൺ സൂചൻ ദില്ലെം. ഹെ തീൻ ഥാരാവ് 25വ്യാ അഖില ഭാരതീയ് കൊങ്കണി സാഹിത്യ് സമ്മേളനാചി അധ്യക്ഷ് ഹെ. മാ. നായക് ഹാങ്കാം ഹതാന്തർ കെലെ. ഉപ്രാന്ത് ഹെ. മാ. നായക് ഹാണിം തെ ഥാരാവ് ഘെത്ലെ ആനി തെ കാര്യരുപാക് ഹാഡുങ്ക് സർകാരാ സാംഗാതാ ഉലയ്താം മ്ഹൺ ഭാസാവ്ന് ഹെ കാര്യെം സമരോപ് കെലെം.
സമാരോപ് കാര്യെം:
25വ്യാ അഖില ഭാരതീയ് കൊങ്കണി സാഹിത്യ് സമ്മേളനാച്യാ സമരോപ് കാര്യാന്ത് അധ്യക്ഷ് ഹെ. മാ. നായക്, ഹാണിം ദോൻ ദിസാംനി ജാല്ല്യാ സർവ് കാര്യാചി ഝളക് ദിലി. മമതാ ജി. സാഗാർ സമരോപ് കാര്യാചി മുഖെൽ സയ്രി ജാവ്ന് ഹാജർ ആസ്ല്ലി. ഹ്യാ കാര്യാവെളിം, കൊങ്കണി മായെചി സെവാ കർൻ വിവിധ് ശെതാന്ത് വാവ്ര് ദില്ല്യാ തെഗാം മാനെസ്താങ്ക് സന്മാൻ കെലൊ. കൊങ്കണി ശിക്ഷൺ ശെതാന്ത് കെല്ല്യാ സാധനാ ഖാതിർ ദൊ| കസ്തൂരി മോഹൻ പൈ, കൊങ്കണി സാഹിത്യ് ശെതാന്ത് ദില്ല്യാ സെവെ ഖാതിർ രൊൻ രോച് കാസ്സിയാ, ആനി കൊങ്കണി സാഹിത്യ് ചള്വളെ ഖാതിർ സെവാ ദില്ല്യാ ദൊ| ശിവരാം കാമത് കുമ്ടാ ഹാങ്കാം സന്മാൻ ചല്ലൊ.
അഖിൽ ഭാരതീയ് കൊങ്കണി സാഹിത്യ് പരിഷദ് ഹാചൊ കാര്യാധ്യക്ഷ് ചേതൻ ആചാര്യാ ഹാംണി സ്വാഗത് കെലൊ, കാര്യാച്യാ ആക്രേക് ആയോജൻ സമിതിചൊ സചിവ് ശ്രീ ടൈടസ് നൊരൊൻഹാ ഹാണിം സമ്മേളനാച്യാ യശസ്വെക് കാരൺ ജാല്ല്യാ സമെസ്താഞ്ചൊ ഉപ്കാർ ഭാവുഡ്ലൊ. ഉപ്രാന്ത് ഉലയില്ലൊ യെവ്കാർ സമിതിചൊ അധ്യക്ഷ് ശ്രീ മൈകൽ ഡിസോജാ ഹാംണി വിശ്വ് കൊങ്കണി കേന്ദ്രാക് ഭെട് ദിംവ്ച്യാ മ്ഹാൽഘഡ്യാങ്ക് സലീസായെൻ ചഡൊങ്ക് ജാംവ്ചെ ഖാതിർ എസ്കലേടരാചി വ്യവസ്ഥാ കർൻ ദിതാം മ്ഹൺ ഭാസായ്ലെം. മനോജ് ഫെർനാണ്ഡിസ് കിരെം ഹാണിം കാര്യെം ചലയ്ലെം.
