27-08-2023 താരികെർ ആയ്താരാ സ്ടേഫൻ വാസ് കെലരായ്, ഹാഞ്ച്യാ ഘരാ പൊയെടികാ പംഗ്ഡാ ഥാവ്ന് 20 വീ കവിഗോഷ്ഠി സാദർ ജാലി.
കെലരായ്ചൊ വിഗാർ മാ| ബാ| ജോസെഫ് മസ്കരേൻഹസ്, ഫിർഗജെചൊ ഉപാധ്യക്ഷ് സന്തോഷ് ‘ഡി’കോസ്താ, ഗുർകാർൻ വീണാ വാസ്, പൊയെടികാ പംഗ്ഡാചൊ മുഖേലി നവീൻ പിരേരാ സുരത്കൽ, സ്ടേഫൻ വാസ് ആനി താചി ആവയ് തെരെസാ വാസ് വെദിചെർ ഉപസ്ഥിത് ആസ്ലിം.
കശെം ദൂദ് അമ്രത്, നിതൾ ആനി വാഡാവളിചൊ സങ്കേത്ʼഗീ തശെഞ്ച് കവിതെചിം ഭൊഗ്ണാം പരിശുദ്ധ്. പൊയെടികാ അശെഞ്ച് വാഡൊന്ദി മ്ഹണൊൻ കുട്ടെംബർ ദൂദ് ചെംബാക് ഒതുൻ വിശിഷ്ട് രിതിൻ ഉദ്ഘാടൻ കെല്ല്യാ മാനാധീക് ബാപ് ജോസെഫ് മസ്കരേൻഹസ് ഹാണിം സർവാങ്ക് ആപ്ലൊ സന്ദേശ് ദിലൊ.
സ്ടേഫൻ വാസ് ഹാകാ 19 വർസാം പ്രായെർ അവ്ഘഡ് ജാവ്ന് പാടിച്യാഖണ്യാക് മാർ ജാല്ലൊ. പാട്ല്യാ 18 വർസാം ഥാവ്ന് തൊ വീൽ ചെരാചെർ ആസാ. തൊ എക് ബരൊ കവി. സുന്ദർ കവിതാ തൊ രച്താ. തൊടാച്യൊ, കൃഷെച്യൊ ഗജാലി തൊ കർതാ. മാംയ് ഭാഷെചൊ ഹുസ്കൊ താകാ ആസാ. താച്യാ ആത്ംʼവിശ്വാസാൻ താകാ ജീവന്ത് ദവർലാ. താച്യെ ഥംയ് ആസ്ʼല്ലൊ സകാരാത്മക് മനോഭാവ് പളെവ്ന് പൊയെടികാ പംഗ്ഡാച്യാ മുഖേൽപണാഖാൽ കവി കവയത്രി ആനി രസികാം ഥാവ്ന് ഐവാജ് സംഗ്രഹ് കർൻ രുപയ് 1,50,000 ഹ്യാ കാര്യാവെളാർ താകാ ഹതാന്തർ കെലെ.
ʻപർഗാംവാന്ത്ല്യാ കവിതെംʼത് ഡാ. ആസ്ടിൻ പ്രഭു ചികാഗൊ ഹാഞ്ചി കവിതാ, ഡാ. ദീപാ രെബെല്ലൊൻ വാചൻ കെലി. 20 കവി കവയത്രിംനി ബോവ് ആപുർബായെൻ കവിതാ വാചൻ കെലെം.
കലാസംപത് മുഖെലി ഡാ. ആസ്ടിൻ പ്രഭുൻ കാര്യാചെം സംപൂർൺ പോഷക്പൺ ഘെത്ʼല്ലെം. കാര്യക്രമാക് കുട്മാഞ്ചിം, വാഡ്യാചൊ ലോക് തശെഞ്ച് അഭിമാനി ഹാജർ ആസ്ʼല്ലിം.
ക്രിസ് ബെൻ മ്യൂസിക് ഹാണിം ദിംവ്ചെം ‘ലൊകാക് മെച്വാല്ലി അത്ത്യുത്തം കവിതാ’ ക്യാശ് പ്രൈജ് ആനി ട്രോഫി മായ് ഭാഷെ വിശ്യാന്ത് കവിതാ ബരയില്ല്യാ സ്ടീഫൻ വാസാക് ഫാവൊ ജാലി.
കവിഗോഷ്ഠിചെം സുങ്കാൺ രോനി ക്രാസ്ത കെലരായ് ആനി എഡി കാഡ്ദൊസ്, താകൊഡെ ഹാണി ഹാതിം ധർʼല്ലെം.
മർലിൻ മസ്കരേൻഹസ്, ദെരെബൈൽ ഹിണെ കാര്യെം നിർവാഹൺ കെലെം.
പൊയെടികാ പംഗ്ഡാചൊ മുഖെലി നവീൻ പിരേരാ സുരത്കൽ ഹാഞ്ച്യാ മുഖേൽപണാർ പാട്ല്യാ വീസ് മഹിന്യാംനി വീസ് കവിഗോഷ്ട്യൊ പയ്ശില്യാ ബെംഗ്ളുരാന്ത് തശെം വിവിദ് ജാഗ്യാംനി ചലയ്ല്യാത്.
വർദി: മർലിൻ മസ്കരേൻഹസ്, ദെരെബൈൽ.
തസ്വിര്യൊ: ജുല്യെട് മൊരസ്, ദെരെബയ്ല്.
