“84 vorsanchi choritra aschea okhil bharotiyo konkonni porixodechea bot’tis porixode thaun 24 som’mell zalea uprant 25vem som’mell mongllurant zata. Sahiteachi voividhyota sombhrom’mchem hem sahity som’mellon loka meren pavoyam, tanchea uskear khelloyam mhonn chintun itlem vhodd zum amim amchea khondar ghetlam. Tumi ani ami songim mellon hem som’mellon yoxosvi koroeam. 2023 novembor 4 ani 5tariker mongllurochea xoktinogorantlea vixv konkonni kendrant cholcha hea som’mellanak dex-videxantle sumar 800 protinidhi vantto ghemvchi nirikxa ason, videarthink vixes riyait dilea. Protinidhink raupachi ani khanna jeunnachi veustha kelea. Onloin marifat nondonni surovatlam” oxem mhonnalo 25vea okhilo bharoti-i konkonni sahity som’mellon svagot somiticho prodhan kareadorxi konkonni kovi, chintok, rahul eddvottoisors hacho mhalok manest Titus Noronha. 25vea okhil bharoti-i konkonni sahity som’mellonachem nam’ chin’n ugtaunn kareavellim som’mellanachi mahet diun to uloitalo. St Aloysius College (Autonomous) Institute of Konkanicho karyem somyozok, famad kolakar Pinto Vamanjoor hannem ho nam’ chin’n vineas kela.
Raknno potracho adlo sompadok, 1947vea vorsa kornattokant konkonni bhaxa monddoll sthapunk vavurl’lo, ʻxrimoti vimala V. Pai jiun sid’dhi proxostiʼ puroskrit Rev. Fr. Mark Walder hannem som’mellanachem nam’ chin’n mokllik kelem. Vixv konkonni kendracho odhyokx Nandagopal Shenoy hannem som’mellanachem maheti pustok lokarponn kelem. Sahity okaddemi proxosti vijet sahiti Gokuldas Prabhun nondonni pustok mokllik kelem. Kotholik sobha mongllur prodex(no) odhyokx Alwyn Dsouza Panir hanne kyu ar kodd skean koron onloin nondonnek chalon dilem. Okhilo bharoti-i konkonni porixod hacho odhyokx Arunn Ubaikar vedir hazor asl’lo.
Svagot somiticho kareadhyokx, potrkort manest H. M. Pernal hannem yeukar maglo ani zoml’lea manachea soireanchi ollok koron dili. Sahity okaddemi nyu ddel’li hachea kareakari somiticho nimontrok manest Melvyn Rodriguesan karyem choloilem. Vixv konkonni kendracho mukel karyonirvohonn odhikari manest Gurudath Baligan dhonyovad orpile.
