Sam Louis Porigonnit Vixvvidealoyant hangasor Karnataka konkonni Sahity akademi, konknni lekhokincho ektar, mongllur ani konknni songh Sam. Louis Porigonnit Vixvvidealoi hanchea zodd asrea khal ‘ontoraxttri-i striyancho divos-2024′ achoronn kelo.
Sam Louis kolez videarthimni konknni dhyey git gailem. Flavia Albuquerk, Puttur hinnem yeukar magon, char vorsam purvim konknni lekhokincho ektar kitea pasot survatlo mhunn prastovik uloupant vivorilem. Manestinn Basti Shobha Shenoy hiche sovem her mukel soireamni gumott vhazoun, konknni lekhokinchea ektaracho novo logo ugtaun kelo. Salomi Mogornad hichea odhyokxponnakhal kovigoxtti choloili. Chandrika Malya, Kritika Kamat, Flavia Albuquerk Puttur, Joisy Kinnigolli, Marlin Mascarenhas hannim kovita vachon kelem. Striyanchea disa sondorbhi asa kel’lelea lekhon spordheant jikleleanchi namvam Dr. Dimple’an zahir kelim. Spordheak ailelea sumar pant’tisam voir lekhona poiki poilem inam’: Irin Rebello Kulshekar, dusrem inam’: Concepta Fernandes ani tisrem inam’: Felcy Lobo Derebail hankam favo zalem.
Kareadhyokx Rev. Fr. Melvin J. Pinto hannim “hangasor kouyotrimni vachl’lea kovite thaun mhaka preronn mell’llem toxench tumchea kovite ani borpam thaun vachpeank preronn labhondi…” – oso sondex dilo. Vedir hazor asl’lea sorvank xrimoti Mary D’Silva hinne ugddasachi kannik dili. Amchea somajichea talentank vedi dimvchea manestinn Mary D’Silva hika konknni lekhokinchea ektara torfen man kelo. Sonman potr manestinn Preeta Mirandan vachon kelem. Sr. Dr. Mebel Clara D’mello B.S. Hinnem ʻBholaikebhorit somaz rochchant adhunik kallacha striyecho patrʼ hea vixim uloup dilo. Lavi Ganjimatan Sr. Dr. Mebel Clara hicho porichoi dilo.
Manestinn Irin Rebello, Sapna Saldanha ani Flavia Saldanha hannim svo rochit ani vinchnnar podam gailim. Hankam R. Manohar Kamath hannim ugddasachi kannik dili. Irin Mendonca hinnem zomlelea khatir khell manddun haddle. Hantun Sapna Saldanha vijet zali. Xrimoti Flora Castelino hinnem sorvancho upkar attoilo.
Felcy Derebail hinnem bhovo ut’tim’ ritin karyem choloilem. Kafi- follhar ani videarthinchea baila nacha sovem karyem somplem.
