Sam luvis kolez (svait’t) mongllur hachea choudavea podve sombhroma vellar konkonni podouyut’tor Diplomant poilem rank apnnayil’lea 24vea beachachea Chandrakala K. Hika promann potr, bhangara podok ani nogden inam’ diun man kelo. Choutem sthan apnnayil’lea xrimoti Preetha Linet Pereira hika proman potr diun man kelo. Dusrem sthan Aurthur Roshan Pereira, Omzur ani tisrem sthan Floyd Kiran Moras Nirkann hannim apnnayil’lem.
Chandrakala K. Hinne ʻdokxinno kon’noddo jil’leche bhalaulikar/razapuro sarosvot somudai anni tonche procholit somskarʼ, Aurthur Roshan Pereira omzur hanne ʻmandd sobhann, konkonni bhas ani somskritiʼ Floyd Kiran Moras Nirkann hanne ʻkanniangar vol’li voggochea vinchnnar kanniamni prokritiʼ ani Preetha Linet Pereira hinne ʻkonknni kotholik kazaram adim ani atam – ek charitrik odhyoinʼ mholl’llea vixoyancher somsodh probondh boroyil’le.
2024, zulai 13 ver kolejichea loyola sobhasalant chol’lelea hea podve sombhromant podvi, podouyut’tor toxench podouyut’tor ddiplomachea ott’ttu 1725 videarthink promann potram vanttlim. Hantlea 79 videarthink reankam ani 20 videarthink vixes inamam diun man kelo.
Podve sombhromacho mukhel soiro zaun hazor asl’lo All India Counsil for Technical Education (AICTE) hache odhyokx Pro| T. G. Sitharam’ hamnni aplea uloupant ʻkritrim’ va kritok budvontkayechea (AI) hea kallar zoit zoddije tor videarthimni nirontor xikchi ani kuxelai apnnamvchi goroz asa. Ho ek porivortonxil somvsar. Xikpa veusta bodlot asa. Videartheamni hea veusthek ollson ghemvchi goroz asa. Haka lagon videarthimni nirontor sovalam vicharnch asaje. Softt skils, tontrogineanachem ekikoronn, voiktik xikop hancher bhor dije. Xikop kednanch sompana. Videarthimni kuxelai vaddoun ghemvchi dexachea yoxosvek dimvcho pattimbo zosoʼ mhonn mhollem.
Sombhromavellar Karnatak prant jesuit vhoddil (provincial) Fr| Dionysius Vaz esje, mongllur jesuit educational society (MJES) hacho rector Fr| Melwin Joseph Pinto SJ hazor asl’le. Sam luvis porigonnit vixvvidealoyacho upo kulopoti Dr| Fr. Praveen Vijaya Martis hamnni boro yeukar maglo tor kulosochiv Dr| Alwyn DʼSa hamnni reank ghetl’leanchim namvam vachun sanglim. Addolltea monddolliche sande, vivid vibhagache deen, xikxokam, xikxoketor xibbondi hazor asl’lim. Podve sombhromacho somyozok Dr| Reji John hanne dhonyovado pattoile. Dr| Mona Mendonca, Monoj Fernandes ani Alita DʼSa hamnni karyem choloilem.
Podouyut’tor konkonni ddiplomacho mottvean vivor:
korsachi audi : don vorsam. (horyeka vorsachea epril mhoineathaun novem beach survat’ta)
xikpa vixoi : poilea vorsa : konkonni bhaxecho itihas, konkonni gody, konkonni konkonni nattok, konkonni kovita, konkonni konkonni potrgaurika
dusrea vorsa : konkonni lokvEod, konkonni veakoronn, ddijittol madyomant konkonni bhas. Dusrea vorsachea akherik videarthimni somsodh probond borounko astolo. Songim panch disancheo sompork / onlAiyn klasi: (noisorgik bhas somskoronn (NLP) ani moxin lorningant konkonnicho vapar, konkonni drixy (sinema, ttivi) madhyomamvixim mahet toxench somajik sompork madyomamni konkonnicho vapar-hacher onbogdakoram thaun mahet.
Provex ani xulk: 18 vorsam voilea ani konixtt piyusi pas zal’lea konnem-i hea ddiplomak bhorti zauyet. Ddiplomak bhorti zaunko axetelea orh videarthimni konkonni somstheachea 9481527394 va 0824-2007394 nombrank sompork korcho. Korsacho xulk : ru. 4,700/- (GST sovem) pavit korije. Ya konkonni somstheachea doftorak bhett diun orji ghalyeta.
Videarthiveton: konkonni xikonk mon aschea dubllea videarthink videarthiveton soulatai asa. He vixim choddit vivorak konkonni somstheachea doptoracho sompork korcho.
26vea beachak provex gheunko nimanni tarik 30, zulai 2024.
