२७-०८-२०२३ तारिकेर आयतारा स्टेफन वास केलराय, हांच्या घरा पोयेटिका पंगडा थावन २० वी कविगोषठी सादर जाली.
केलरायचो विगार मा| बा| जोसेफ मसकरेन्हस, फिर्गजेचो उपाध्यक्ष संतोष ‘डी’कोसता, गुर्कार्न वीणा वास, पोयेटिका पंगडाचो मुखेली नवीन पिरेरा सुरत्कल, स्टेफन वास आनी ताची आवय तेरेसा वास वेदिचेर उपस्थीत आसलीं.
कशें दूद अम्रत, नितळ आनी वाडावळिचो संकेतʼगी तशेंच कवितेचीं भोगणां परिशुद्ध. पोयेटिका अशेंच वाडोंदी म्हणोन कुट्टेंबर दूद चेंबाक ओतून विशिषट रितीन उदघाटन केल्ल्या मानाधीक बाप जोसेफ मसकरेन्हस हाणीं सर्वांक आपलो संदेश दिलो.
स्टेफन वास हाका १९ वर्सां प्रायेर अवघड जावन पाटिच्याखण्याक मार जाल्लो. पाटल्या १८ वर्सां थावन तो वील चेराचेर आसा. तो एक बरो कवी. सुंदर कविता तो रचता. तोटाच्यो, कृषेच्यो गजाली तो कर्ता. मांय भाषेचो हुसको ताका आसा. ताच्या आत्मʼविश्वासान ताका जीवंत दवरला. ताच्ये थंय आसʼल्लो सकारात्मक मनोभाव पळेवन पोयेटिका पंगडाच्या मुखेल्पणाखाल कवी कवयत्री आनी रसिकां थावन ऐवाज संग्रह कर्न रुपय १,५०,००० ह्या काऱ्यावेळार ताका हतांतर केले.
ʻपर्गांवांतल्या कवितेंʼत डा. आसटीन प्रभू चिकागो हांची कविता, डा. दीपा रेबेल्लोन वाचन केली. २० कवी कवयत्रिंनी बोव आपुरबायेन कविता वाचन केलें.
कलासंपत मुखेली डा. आसटीन प्रभून काऱ्याचें संपूर्ण पोषकपण घेतʼल्लें. काऱ्यक्रमाक कुटमांचीं, वाड्याचो लोक तशेंच अभिमानी हाजर आसʼल्लीं.
क्रीस बेन म्यूसीक हाणीं दिंवचें ‘लोकाक मेचवाल्ली अत्त्युत्तम कविता’ क्याश प्रैज आनी ट्रोफी माय भाषे विश्यांत कविता बरयिल्ल्या स्टीफन वासाक फावो जाली.
कविगोषठिचें सुंकाण रोनी क्रासत केलराय आनी एडी काडदोस, ताकोडे हाणी हातीं धरʼल्लें.
मरलीन मसकरेन्हस, देरेबैल हिणे काऱ्यें निर्वाहण केलें.
पोयेटिका पंगडाचो मुखेली नवीन पिरेरा सुरत्कल हांच्या मुखेल्पणार पाटल्या वीस महिन्यांनी वीस कविगोषट्यो पयशिल्या बेंगळुरांत तशें विवीद जाग्यांनी चलयल्यात.
वर्दी: मरलीन मसकरेन्हस, देरेबैल.
तस्वीऱ्यो: जुल्येट मोरस, देरेबयल.
