സാഹിത്യ് വാച്ചെ ആനി അധ്യയൻ കർചെഞ്ച് ഏകാ സാഹിതിക് ദിംവ്ചെം ഖരിം ശൃദ്ധാഞ്ജലി – ദൊ| ഫാ| പ്രവീൺ മാർടിസ്.
“കൊങ്കണി സാഹിത്യാക് 33ച്യാകീ ചഡ് കാദംബരി, 100 വയ്ര് മട്വ്യൊ കാണിയൊ ദില്ല്യാ എഡ്വിൻ ജെ. എഫ്. ഡി’സോജാചിം ദെൺഗിം ആമി ഉഗ്ഡാസ് കരുൻ ആനി താഞ്ചെം വിസ്താർ സാഹിത്യ് വാചുൻ, അധ്യയൻ കർചെ മാരിഫാത് എഡ്വിൻ ജെ.എഫ്. ഡി’സോജാക് അമർ ദവരുംയാം” മ്ഹണാലൊ സാം ലുവിസ് കൊലെജിചൊ പ്രാംശുപാൽ ദൊ| ഫാ| പ്രവീൺ മാർടിസ് ജെ.സ. ആയ്ലെവാർ അന്തർലെല്ല്യാ കേന്ദ്ര് സാഹിത്യ് പ്രശസ്തി വിജേത് കൊങ്കണിചൊ മ്ഹാൽഗഡൊ സാഹിതി എഡ്വിൻ ജെ. എഫ്. ഡി’സോജാച്യാ `ഉത്രാം-നമൻ’ കാര്യാന്ത് ജമ്ലെല്യാ എഡ്വിനാച്യാ അഭിമാനിങ്ക് ഉദ്ധേസുൻ ഉലയ്ലൊ.
‘സുമാർ 11 വർസാം കൊങ്കണി സംസ്ഥ്യാചൊ കാര്യകാരി നിർദേശക് ജാവ്ന് സെവാ ദില്ല്യാ എഡ്വിൻ ജെ. എഫ്. ഡി’സോജാൻ, പാട്ല്യാ 40 വർസാം ഥാവ്ന് പായ്സ് ജാംവ്ച്യാ ‘അമർ കൊങ്കണി’ സംസൊധ് ഷണ്മാസികാഞ്ച്യാ 35 അങ്ക്യാചെം സംപാദക്പൺ സാംബാൾ‍ല്ലെം. സാം ലുവിസ് കൊലെജിക് താണെ ദില്ലി ഹി സെവാ ഹ്യാ വെളാർ ഭോവ് അഭിമാനാൻ ഉഗ്ഡാസ് കർതാം’ മ്ഹണാലൊ ദൊ| ഫാ| പ്രവീൺ മാർടിസ്.
ഹ്യാ കാര്യാന്ത് ദെ| എഡ്വിൻ ഡി’സോജാചെം സമഗ്ര് സാഹിത്യാചെം ഡിജിടലീകരൺ, കന്നഡ ലിപിന്ത് ആസ്ചെം ഥൊഡെം ജൊക്തെം സാഹിത്യ് ദേവാനഗരി ലിപിക് ലിപ്യാന്തർ കർചെം, താഞ്ച്യൊ ഫാമാദ് സാഹിത്യ് കൃതിയൊ ഇതർ ഭാരതീയ് ഭാസാങ്ക് തർജൺ കർചെം ആനി താഞ്ച്യാ ജൊക്ത്യാ മട്വ്യാ കാണ്യാഞ്ച്യൊ ‘കഥാരംഗ്’ തസല്യാ മാഞ്ച്യെ പ്രകാരാന്ത് രുപാന്തർ കർചെം- ഹെ ചാർ ഠാരാവ് മാണ്ഡ്ലെം.
ഹെം കാര്യെം സാം ലുവിസ് കൊലെജ് (സ്വായത്ത്ത്) കൊങ്കണി സംസ്ഥ്യാച്യാ മുഖെൽപണാർ, സാഹിത്യ് അകാഡെമി, ദില്ലി, വിശ്വ കൊങ്കണി കേന്ദ്ർർ, ശക്തിനഗര, മൈകൽ ഡിസോജാ വിഷൻ കൊങ്കണി ആനി രാക്ണൊ ഹപ്താള്യാച്യാ സഹയോഗാന്ത് സാം ലുവിസ് കൊലെജിച്യാ ‘സഹോദയ’ സഭാംഗണാന്ത് ചല്ലെം.
എഡ്വിൻ ജെ. എഫ്. ഡി’സോജാച്യാ സാഹിത്യാചെം അധ്യയൻ കർചെ മാരിഫാത് താകാ കശെം ആമ്ചെ മധെം ജീവന്ത് ദവര്യെത് മ്ഹള്ള്യെ വിശിം ഉലയില്ലൊ കൊങ്കണി സാഹിതി കിശൂ ബാർകൂർ-
ജിയെവ്ന് ആസ്ല്ല്യാങ്ക് ശൃദ്ധാഞ്ജലി ദീനാന്ത്. സാഹിതിക് സംസാരാക്, പ്രതേക് ജാവ്ന് കൊങ്ക്ണി സംസാരാക് ദില്ല്യാ, ഹ്യാ ഥളാച്യാ സാംസ്കൃതിക് ആനി ബൌധിക് ശെതാഞ്ചി നക്ശ്യാബദൽപി ഗിരേസ്ത് ദേൺഗ്യാനിം സാസ്ണാക് ജിയെംവ്ച്യാ എഡ്വിനാക് കൊണെംയ് കസലി ശൃദ്ധാഞ്ജലി ദിവ്യെത്? എഡ്വിനാക് താചി ഗരജ്യ് ബിൽകുൽ നാം.
ഹാംവെ ഹാചെ ആദീംയ് സാംഗ്ലാം. എഡ്വിനാച്യാ ബർപാനിം ആപ്ല്യാ വാച്പ്യാങ്ക് വിഞ്ചുൻ കാഡ്ലാം. താച്യൊ കൃതിയൊ കൊങ്ക്ണെന്ത്ല്യാ ചഡ്താവ് ജണാംനിം വാചുൻ ആസുങ്ക് പുരൊ. പൂൺ താങ്കാം സർവാങ്ക് താച്യാ ബർപാംനിം വിഞ്ച്ലാം, അശെം ആസുങ്ക് ഫാവൊ നാ.
ഹ്യാ സന്ദർബാർ, വാസ്ചെം മ്ഹള്യാർ കിതെം? എഡ്വിനാൻ കൊങ്ക്ണെന്ത് ബരംവ്ക് സുരു കർതാനാം മംഗ്ളൂരി കൊങ്ക്ണിന്ത് നെമാള്യാഞ്ചൊ സുഗ്ഗെ കാൾ. രാക്ണൊ, പയ്ണാരി, മിത്ര്, ഝെലൊ തസലിം പത്രാം ആനിം താന്തു ഫായ്സ് ജാംവ്ച്യൊ മട്വ്യൊ കാണിയൊ ആനി വ്ഹാൾത്യൊ കാദംബര്യൊ കൊങ്ക്ണി സംസാരാർ രാജ് കരുൻ ആസ്ല്ലിം. ഹ്യാ നെമാള്യാം പാസത് ലോക് രാകുൻ രാവ്താലൊ. അശെം ആസ്താം ആപ്ലി കൃതി അസല്യാ നെമാള്യാംനിം ഫായ്സ് കർപാക് പാവ്ല്ലൊ ഹര്യെക് ബരവ്പി വാച്പ്യാങ്ക് ഒൾകിചൊ ജാതലൊ. സക്കഡീ സക്ഡാങ്ക് വാച്തലെ മ്ഹണ്യെത്.
ആതാം പരത്, വാസ്ചെം മ്ഹള്യാർ?
ഏക് ബരവ്പി ആനി വാച്പ്യാമധ്ലെം നാതെം, കൽപൻ ആനി വ്യാഖ്യാനാം മധ്ലൊ ഖേൾ. ബൌധിക് പാംവ്ഡ്യാർ വാസ്ചെം മ്ഹള്യാർ ഛാപ്ത്യാഉത്രാഞ്ച്യാ ഉതളായെഥാവ്ന് ഉത്രൊൻ താഞ്ച്യാ സങ്കീർണതെന്ത്, വയ്ചാരീക് സൂക്ശ്മികായെന്ത് ആനി നാദിസ്ത്യാ അർഥാംസംഗി ജുളുൻ ഘെംവ്ചെം. ബരവ്പ്യാച്യാ കുശെലായെക് സമ്ജൊൻ, വാപാർല്ലിം ഖുണാം പാർകുൻ, കൃതിയെചൊ വിസ്താർ സാംസ്കൃതിക് ആനി താത്വഗ്യാനിക് സന്ദർഭ് സമ്ജൊൻ ഘേവ്ന്, ലേഖകാച്യാ മനാസ്ഥിതെ സംഗി മിസ്ളൊഞ്ചെം.
ആനി എഡ്വിനാക് കൊങ്ക്ണെന്ത്ല്യാ ചഡ്താവ് ജണാംനിം വാചുൻ ആസ്ല്യാരീ മനാസ്ഥിതെപാംവ്ഡ്യാർ താചെം സവെം മിസ്ളാല്ലെ കാംയ് ഥൊഡെച്.
ആമിം ആദിം ഥാവ്ന് കൊങ്ക്ണെക് ‘ടേകൻ ഫോർ ഗ്രാണ്ടെഡ്’. ആമ്ചെം സാഹിത്, നാടക് ആനിം സിനെമാം സക്കഡീ തശെഞ്ച്. കൊങ്ക്ണെന്ത് ബരംവ്ചേയ്, വാസ്ചെംയ് കൊണാക്ഗീ, കൊണാക് കാലെം, കൊങ്ക്ണെക് ഉപ്കാർ കെല്ലെബരിം ആമിം കാൺഘെലാം ആനി ഹാകാ കൊങ്ക്ണെചി സെവാ മ്ഹണൊനീ നാംവ് ദിലാം. ആമ്ച്യാ ഉതൾ ബർപാങ്ക്, ആമിം സാധ്യാ വാച്പ്യാംഖാതിർ ബരയ്താംവ് മ്ഹൺ, വാച്പ്യാനിം ആമിം സാധെ വാച്പി മ്ഹണൊൻ, ഹ്യാ ബർപാന്തിത്ലീഞ്ച് ഉതൾ നീബാം ദീവ്ന്, ആദിം ഥാവ്ന് ഏക് വൊദ്ദു വൊരാണ്ട് ചലൊവ്ന്ഞ്ച്, ഫകത് പ്രായെൻ മാത് വ്ഹഡ് ജാല്യാംവ്.
അസല്യാ പരിഗതെന്ത്, എഡ്വിൻ സുർവെഥാവ്ന് സർവാംപരാസ് മെക്ളൊ ഉർലൊ. ആപ്ല്യാ പയില്ല്യാ കൃതിയെഥാവ്ന്, ഹെരാം പരാസ് കാംയ് വെഗ്ളെം കൊങ്ക്ണി ലൊകാക് ദീജെ മ്ഹള്ള്യാ എകീൻ ദിശ്ടാവ്യാസവെം താണെം ആപ്ല്യാ സാഹിതിക് പയ്ണാചി സുർവാത് കെല്ലി. സാദ്യാ വാച്പ്യാങ്ക് തർബേത് കരിജെ ആനി ആയ്തെ കരിജെ മ്ഹള്ള്യാ എകീൻ മിസാംവാൻ ഹെം പയ്ണ് താണെം മുകാരൊൻ വെലെം. ഹി ഏക് കൊൻശിയസ് വിഞ്ചവ്ണ് യാ ഹാചെ വിശിം ഖുദ് എഡ്വിൻ ജാണാസ്ല്ലൊഗി നാം മ്ഹൺ മ്ഹാകാ ഖബർ നാം. പൂൺ ഹ്യാ പയ്ണാന്ത് എഡ്വിനീ ബരവ്പി ജാവ്ന് ആപുൺ ഖുദ് വൊഡാരുകാബരിം വാഡ്ലൊ ആനി ഫുല്ലൊ.
ആതാം ഏക് ബരവ്പി കസൊ വാഡൊൻ യെതാ?
ഏക് ബരവ്പ്യാൻ ഫകത് ആപ്ല്യാ നിരന്തർ വാച്പാവർവിം, ഹെരാങ്ക് വാചുൻ, സാഹിതിക് തശെം ഭൌതിക് സംസാരാന്ത് ജാംവ്ചിം ബദ്ലാപാം പാർകുൻ ആനി സമ്ജുൻ ഏക് നിരന്തർ ശിക്പാച്യാ പ്രക്രിയെന്ത് സ്വതാക് ഒൾസുൻ ഘെതല്ല്യാൻ മാത് വാഡുൻ യെവ്യെതാ. സാഹിത്യാചെ വെവെഗ്ളെ പ്രാകാർ ആനി ശയ്ലെഞ്ചെം അധ്യയൻ എകാ ബരവ്പ്യാക് വെവെഗ്ള്യാ ദിശ്ടികോണാഞ്ചി ഒളക് ദിതാ ആനി ആപ്ലി കാണ്യൊസാംഗ്ചി കുശെലായ് പാജുങ്ക് അവ്കാസ് ദിതാ. അസല്യാ വെവെഗ്ള്യാ താള്യാംനിം ആപ്ണാക്ച് ബുഡുവ്ന് ഘെത്ല്ല്യാൻ, നവ്യൊ താന്ത്രികതാ ചിംവുൻ ഘേവ്ന്, നാനാന്ത്യാ നാദാങ്ക് ഒൾസുൻ ഘേവ്ന്, ആപ്ലി നിരൂപണാഞ്ചിം ആയ്ദാം വിസ്താരാവ്യെതാ. പ്രസ്തുത് സാഹിതിക് പരിഗതെസവെം ജുളുൻ ഘെത്ല്ല്യാൻ മാത് നംയ്, ബദ്ലാത്യൊ പ്രവൃത്യൊ, സാമാജിക് പാംവ്ഡ്യാന്തർ ആനി ബദ്ലാപാഞ്ചി സാർകി ഒളൊക് ആസ്ല്ലി ജാല്ല്യാൻ എഡ്വിനാക് ആപ്ല്യാ കൃതിയാഞ്ച്യാ ശിരാംശിരാംനി പ്രസ്തുത് കാളാചിം ഒക്താം തൊപുങ്ക് സാധ് ജാലെം. അസലെ പ്രഭാവ് ചിംവുൻ ഘേവ്ന്, ഏക് ബരവ്പി ജാവ്ന് വാഡുൻ യെതാനാ, തൊ ഒൾസാലൊ ആനി ഫുല്ലൊ. ആനി അശെം ആപ്ല്യാ വയുക്തിക് ദുവിദായെംസാംഗാതാചെം താചെം ഝുജ്, ആനി സദാം ബദ്ല്യാത്യാ സാഹിതാച്യാ വ്ഹാൾത്യാരൂപാം മധെം ഏക് ക്രിയാത്മക് നാതെം രചുങ്ക് എഡ്വിനാക് സാധ് ജാലെം.
അസലി ഏക് അലഗ് സുർവാത് കെല്ല്യാ എഡ്വിനാക് തൊ ഇംഗ്ലിശ് വാചുൻ കൊങ്ക്ണെന്ത് നകൽ കർതാ, താച്യാ ബർപാംനിം മാത്യെചി മൂർ നാം മ്ഹള്ളെം ദുർസൊണെം ആസ്ല്ലെം. പൂൺ താച്യൊ കൃതിയൊ വാചുങ്ക് തർബെതി ആസ്ലെല്യാങ്ക്, താച്യാ കൃതിയാഞ്ചെം വിരചൻ കരുങ്ക് ശാതി ആസ്ലെല്യാങ്ക് താഞ്ചിം മുളാം ഹ്യാച് മാതിയെന്ത് ഗൂണ്ഡ് രൊംബുൻ ആസൊൻ ഭുംയ്ഗോളിക് പാംവ്ഡ്യാർ പാവുങ്ക് സക്താലിം മ്ഹൺ കൾതാ. താച്യൊ കൃതിയൊ വാചുങ്ക്, താച്യാ മനാസ്ഥിതെസവെം ജുളുൻ ഘെംവ്ക് ഖണ്ഡിത് തർബെതിചി ഗരജ് ആസ്ല്ലി. ട്രേയ്ൻഡ് രീഡർ മ്ഹൺ മ്ഹൺതാനാം ഇസ്കാലാച്യാ ക്ലാസ്രൂം തർബെതിവിശിം ഹാംവ് ഉലയ്നാം മ്ഹൺ പ്രതേക് സാംഗാജെ മ്ഹൺ നാം. ഡികൻസ്ട്രക്ട് കർചി താങ്ക് ആസ്ചെ അസല്യാ അപ്രൂപ് ജമ്യാന്ത് ആപ്ണാക് ഒൾകുൻ ഘെതാത്.
ആപ്ല്യാ ഥൊഡ്യാ കൃതിയാംവിശിം എഡ്വിനാക് സമാധാൻ നാത്ല്ലെം. ആമിം ജായ്തെപാവ്ടിം ഹ്യാ വിശിം വൊരാം വൊരാം ഉലയില്ലെം ആസാ. ഹാചൊ മത്ലബ് സീദാ ആനി സൊംപൊ. തൊ അഖേർ പര്യാന്ത് സാഹിതാചൊ വിദ്യാർഥി ജാവ്ന്ഞ്ച് ഉർലൊ ആനിം നിരന്തരീ ആപ്ണാക് അപ്ഗ്രേഡ് കരീത് ആയ്ലൊ. പാടിം ഘുംവൊൻ പളെതാനാ ആപുൺ ഖംയ്സർ ചുക്ലാം മ്ഹൺ ഒൾകുൻ ത്യൊ ചുകി മുക്ല്യാ കൃതിയാംനിം സുധാർസുൻ വർചി ഖാൽതി ജാണ്ടികായ് താകാ ഉഞ്ചായെക് ഉക്ലൊങ്ക് പാവ്ലി.
ഹ്യാ താച്യാ നിരന്തർ അധ്യയനാച്യാ താനെൻ ആനി ഖൾമിത് നാച്ല്ല്യാ വാച്പാൻ, നവ്യാ സംഗ്തിക് പട്ലുൻ ധർച്യാ ഉഗ്തെപണാന്ത്, കൊങ്ക്ണെന്ത് ദുസ്ര്യാനിം ചിന്തുങ്ക് സയ്ത് നാത്ല്ല്യാ ഗജാലിങ്ക് ആനി കൻസെപ്ടാങ്ക് തൊ ഘേവ്ന് ആയ്ലൊ. സാഹിതിക് ശെതാന്ത്ലെ ബദ്ലാപ് ആനി സാംസാരിക് ഗിന്യാനാംവിശിം താണെം ആപ്ണായില്ല്യാ അഗണിത് ജാണ്വായെദ്വാരിം, ഫുഡാരാന്ത് കിതെം ജായ്ത് മ്ഹള്ള്യാവിശ്യാന്ത്ലൊ സ്വശ്ട് ദിശ്ടാവൊ താകാ ആസ്ല്ലൊ. താച്യാ തെവീസ് കാദംബരി ആനി ശെംബരാവയ്ര് കാണ്യാംനി താണെം ആപഡ്നാത്ല്ല്യൊ സംഗ്തി നാന്ത് മാത് നംയ്, ഥൊഡ്യൊ ഗജാലി താണെം സൊഡ്ല്യാർ ഹെർ കൊണെംയ് കൊങ്ക്ണെച്യാ സന്ദർബാർ പരത് ആപ്ഡുങ്ക് ആജ് പര്യാന്ത് ധയ്ര് ഘെത്ല്ലെം നാം.
എഡ്വിനാൻ ഭാസ് ഫകത് സംവഹനാഞ്ചൊ മാജൊ മ്ഹൺ മാത് ലെക്ലെം. ദെകുൻ ഇംഗ്ലിശാന്ത് ബോവ്ശ്യാ കൊങ്ക്ണെപരാസ് ചഡിത് പ്രബുദ്ധായെൻ ബരംവ്ക് സക്ചൊ തൊ, ആപ്ല്യാ കൃതിയാംപാസത് കൊങ്ക്ണിപരിദെഭിതർച് ഫിച്യാർ ഉർലൊ. ഹ്യാ സംഗ്തെചെരീ ഹാംവെ ആനി എഡ്വിനാൻ ജായ്തി ഭാസാഭാസ് കെല്ലി ആനി ഹാംവെ ജായ്തെപാവ്ടിം താണെം ഇംഗ്ലിശാന്ത് ബരയ്നാത്ല്ല്യാക് ശിൺ ഉചാർല്ലോയ് ആസാ. ‘വിഞ്ചുൻ കാഡ്ല്ലി പർജാ’, ‘ഉണ്യാ ഭാവാഡ്താചെ’ തസല്യൊ താച്യൊ കൃതിയൊ സാർകെ രിതിർ ഇംഗ്ലിശ് ആനി ഹെർ ഭാശെങ്ക് തർജൺ ജാവ്ന്, സാർക്യാ ഹാതാങ്ക് പാവ്ല്യൊ തർ, സംസാരാന്ത്ലെ ഉഞ്ച്ലെ സാഹിതിക് പുരസ്കാർ താങ്കാ ലാഭാജേച്. പുരസ്കാർ പ്രാപ്ത് ജാല്ലെ ജായിത്തെ ഹെർ ഭാസാന്ത്ലെ ബൂക് വാച്ല്ല്യാ ബദ്ധതായെൻ ഹാംവ് ഹെം സാംഗുങ്ക് സക്താം. അസലെ പുരസ്കാർ ആപ്ല്യാ തർജണിത് കൃതിയാങ്ക് ആപ്ണായില്ലെ ജയന്ത് കായ്കിണി, ദാമോദർ മാവുജൊ തസലെ മ്ഹജ്യാ ചിന്ത്പാക് ബള്വന്ത് തെങ്കൊ ദിതാത്.
എഡ്വിനാസവെം സളാവൾ നാത്ല്ല്യാ സബാരാങ്ക് തൊ ഗംഭീർ, സങ്കീർൺ ആനി സംഘർശാഞ്ചൊ മ്ഹനിസ് മ്ഹൺ ഭൊഗ്ലാസുങ്ക് പുരൊ. താകാ ഭെട്താപര്യാന്ത് ഫകത് താച്യാ കൃതിയാന്ദ്വാരിം താകാ വൾകുൻ ആസ്ല്ല്യാ മ്ഹാകായ് തശെം ഭൊഗ്ല്ലെം ആസാ. രാക്ണ്യാർ ഫായ്സ് ജാല്ലി മ്ഹജി പയില്ലി കാണി വാചുൻ താചെ വിശിം ഏക് ലേഖൻ ബരയില്ല്യാ എഡ്വിനാൻ ഖുദ് മ്ഹജൊ സംപർക് കർതാനാം ഹാംവ് സാത്വ്യാ സർഗാക് ചഡ്ല്ലൊം ആസാ. താചെ ഉപ്രാന്ത് പാട്ല്യാ കിത്ലെശ്യാ വർസാന്ഥാവ്ന്, പ്രായെൻ ആമ്കാം ജായ്തൊ ഫരക് ആസ്ല്ലൊ തരീ, കുട്മാംസമേത് ആമി സളാവളെർ ആസ്ല്ല്യാംവ്. ഏക് പാവ്ടിം കട്ടിഭെതുൻ കാൾജാക് ലാഗ്ശിലെ ജാല്ല്യാങ്ക് എഡ്വിനാചെം കട്ടെഭിതർലെം മൊവാൾ കാളിജ്, താചൊ മയ്പാശി മോഗ് ആനി വയുക്തിക് ജാവ്ന് തൊ കിത്ലൊ കംപ്യാശനേട്, കിത്ലൊ ഹ്യൂമരസ് മ്ഹനിസ് മ്ഹൺ കൾതാ. ആനി തൊ അൻഭോഗ് ലാഭ്ല്ലൊം ഹാംവ് മ്ഹാകാച് സദെംവ് മ്ഹൺ ലെക്താം.
ഹാംവ് കാംയ് ഹായ്സ്കൂലാന്ത് ആസ്താനാഞ്ച് ഹാംവെ ‘ഹാംവ് ജിയെതാം’ വാചുൻ കാഡ്ല്ലൊ. വാഞ്ജെൽ ആനി ദതർനിം ബൂകാം ഉപ്രാന്ത് ഹാഞ്ചെ വാച്ല്ലൊ പയില്ലൊ കൊങ്കണി ബൂക് എഡ്വിനാചൊച്, ‘രാജ്ധ്രോഹി’. ‘ഹാംവ് ജിയെതാം’ ത്യാ പ്രായെർച് ഹെർ കൊങ്ക്ണി ബുകാംപ്രാസ് കിത്ലൊ വെഗ്ളൊ തൊ ഹാംവെ പാർകില്ലൊ. മ്ഹജി ചിന്ത്പാതാങ്ക് ജി ഹാംവെ എദൊൾ പര്യാന്ത് ആപ്ണായ്ല്യാ താചി മുളാവി സുർവാത് ഹാംഗാസർ ജാല്ലി മ്ഹണൊൻ ഹാംവെം ലെക്ലാം. ഹാതാക് മെൾല്ലെ എഡ്വിനാചെ സർവ് ബൂക് ചുകാനാസ്താം വാച്ലെ ആനി പരത് പരത് വാച്ല്ലെ, താച്യൊ കാണിയൊ, ലേഖനാം കാദംബര്യൊ തൊണ്ഡ്പാട്ശെം ജാല്ല്യൊ. ആനി ഉപ്രാന്ത് ആയ്ലി
‘വിഞ്ചുൻ കാഡ്ലെലി പർജാ’.
ഹ്യാ കാദംബരെചെ എകേക് കിർദാർ മ്ഹജെ സാംഗാതി കശെം ഹാംവ് താങ്കാ ഒൾകാതാം. ജ്യൊ സില്വെസ്ടർ ഡി’സോജാ, ക്രിസ്ടിൻ എനാബെൽ ഡിമെല്ലൊ, കെനെത് മായ്കൽ സുവാരിസ് യാനെ ഭാട് മിംഗെൽ. ഇമെൽഡാ ഡിമെല്ലൊ, ലിണ്ഡാ.. തിം കാംയ് വാടെർ മെളാത് തർ ആമ്ചെം ഉലവ്ണെം കശെം ആസാത്ഗായ് മ്ഹൺ സയ്ത് ഹാംവെ ആനി എഡ്വിനാൻ ഫകണാം കെല്ലിം ആസാത്. മംഗ്ളൂരി കൊങ്കണി സാഹിതാന്ത് തസലി ഏക് കൃതി ദുസ്രി നാം മ്ഹൺ ഹാംവ് ധയ്രാൻ സാംഗ്താം. തി വാചുൻ ഭൊഗ്ലെല്യാങ്ക് മാത് ഹാംവ് കിതെം സാംഗ്താ തെം സമ്ജാതാ. ഉപ്രാന്ത് ഉമാളൊ മ്ഹയ്നാള്യാർ സുരു ജാവ്ന്, മധെഞ്ച് അഡ്ചൊൻ, വാച്പ്യാങ്ക് അസ്വസ്ഥ് കർൻ, പരത് കിടാളാർ പെടൊൻ ശെംബർ കിസ്താംനിം അഖേർ ജാല്ലി ‘രെംവെന്ത്ലെ ഫാതർ’. ജെരോം ലാഝ്രാ, മ്യാഥ്യൂ ലീയൊ. രിചർഡ് ക്ലെമെണ്ട്, രമോനാ, ഈവാ ലാഝ്രാ, ഹെലീനാ, ലിലിയൻ ആനി കൊങ്ക്ണെന്ത് കൊണെംയ് ധയ്ര് കരിനാത്ല്ലിം താന്ത്ലിം പ്രകരണാം…
ഏക് സങ്കീർൺ കാണ്യെഞ്ജാൾ, ഇത്ലെ രുന്ദായെക് ഉഡവ്ന്, ൻഹംയ്ത് ബൾപു വൊഡ്ന് യെണ്ഡ്യെതെവ്ശിം മാസ്ളി ആംബുഡ്ല്ലെപരിം, വിശിശ്ട് ഥരാൻ ഝീരൊ ഇൻ ജാവ്ന് എകാമെകാ ഗാഞ്ച് ജൊഡ്ചെ കിർദാർ, ശെംബർ ആങ്ക്ഡ്യാനിം പരിപികായെക് പാവ്ല്ലി തി ശ്യാഥി… കംപ്യൂടരാൻ വർഡ് കാംവ്ട് ദിംവ്ചെ പ്രാസ് കിത്ല്യാകീ പയില്ലെഞ്ച് ഥാവ്ന് ഹര്യേക് കിസ്താക് ഇത്ല്യാച് സബ്ദാഞ്ചി തി ശിസ്ത്.. ഹൌ ഇസ് ദ്യാട് ഈവൻ പോസിബൽ? ആപ്ലെ സമകാളാചെ ഥൊഡെ രെഡൊ മുത്ല്ലെപരിം ബരവ്ന് വെതാനാം, സ്വസാമർഥെൻ ആപ്ണാസ്തകി സാണ്യാക് ധർല്ലെം കസലെം ഏക് താലെന്ത്?
ഹ്യാ സർവാക് കുരൊവ് ബസയില്ല്യാബരിം, 1008 പാനാഞ്ചൊ, തീൻ വാണ്ട്യാഞ്ചൊ, ‘ഉണ്യാ ഭാവാഡ്താചെ’ ഗ്രന്ഥ്. തീൻ ആവൃത്ത്യാനിം വെഗ്ള്യാച് സരായെൻ ധാംവ്ചി തി കാണി, താന്ത്ലി ഭാസ്, തെ കിർദാർ, തി ഇജ്ജാകയ്, എഡി, ഭട്ടു, ജാകു.. മംഗ്ളൂരി ക്രിസ്താംവ് സമുദായാചൊ ചാരിത്രിക് ആർസൊ. ഏക് സാഹിതിക് മാസ്ടർ പീസ്. കന്നഡാന്ത് മേരുകൃതി. താച്യാ കൃതിയാംനിം മാത്യെചൊ വാസ് നാം മ്ഹണ്ലെല്യാങ്ക് ‘ഏക് മാർ ദൊ തുക്ഡാ’ ജാപ്.
മ്ഹാകാ ജായ്തെപാവ്ടിം ദുബാവ് ജാംവ്ചൊ ആസ്താ. ഹെ പാത്ര്, ഹിം പ്രകരണാം, താന്ത്ലി ഭാസ് ആനി ഗുപിത് വ്ഹാൾപിം തെം വ്യംഗ്യ്, ആനി മന്ദ് ഹാസ്യാംനിഞ്ച് ഇത്ല്യാ തീവൃതായെൻ ഹാംവ് മാത് ഭൊഗ്താം ആനി സന്തോസ്താംഗി യാ ഹെരാങ്കീ അസലോച് അൻഭോഗ് ജാതാ? കിത്ലെശെ ദീസ് വാച്ല്ല്യാ എകച് ബുകാച്യാ ജോപാർ യാ കവിതെചെർ ഹാംവ് മാത് ലൊളുൻ ഉർതാം യാ ഹെരാങ്കീ തശെഞ്ച് ജാതാ? ഉപ്രാന്ത് മ്ഹാകാ ഭൊഗ്താ, വാച്പ്യാക് അസലി തീവൃതാ ഭൊഗുങ്ക് കർചൊ, ആപ്ല്യാ മനാസ്ഥിതെസവെം ജുളുൻ ഘെംവ്ക് സക്ചൊ എഡ്വിനാ തസലൊ സഹൃദയി മാത് ഖരൊ ബരവ്പി. ഫകത് ഥൊഡെച് ബരവ്പി അസല്യാ പാംവ്ഡ്യാക് പാവ്താത് ആനി താങ്കാ തസലെ വാച്പീയ് അപ്രൂപച് ആസ്താത്.
എഡ്വിനാചിം ‘ഹാംവ് ആനി മിസെസ് പിണ്ടൊ’ തസലിം അങ്കണാം, ‘മ്ഹൊംവ് ആനി രഗത്’, ‘ബ്ലോണ്ഡി’, താചെം ഒക്കാണെം ആനി ഉഡംവ്ചെം മുക്കാൽ, താചെം സെൻസ് ഒഫ് ഹ്യൂമർ, താചി ഏക് കപ് ഹുൻഹുനി കൊഫി, താച്യൊ ബണ്ണകഡ്ഡ്യൊ, താചിം ചൊക്ലെടാം, തൊ ബെജ്മി, ജ്യോ, ഇമെൽഡാ, ഭാട് മിംഗെൽ, സായ്മൻ, എഡി, ഭട്ടു, ആരൻ ആനി ഇജ്ജാകയ് ഹാണിം കൊങ്ക്ണി സംസാർ ഗിരേസ്ത് കെലാ. ഹ്യാ താച്യാ കിർദാരാനിം എഡ്വിനാൻ ആപ്ലിം സംഘർശാം വെവെഗ്ള്യാ സ്ഥരാംനിം ലിപയ്ല്യാന്ത്. താച്യാ കിർദാംരാഞ്ചി സർലാം സുടയ്താനാം സംസാരാച്യാ ചാരിത്രിക്, സാമാജിക്, രാജകീ ആനി ധാർമിക് ജാണ്വായെസവെം, ആപ്ല്യാ സർവ് ദുവിദായെസവെം, താങ്കി ആനി അസ്കത്കായെംസവെം ആമ്കാം എഡ്വിൻ ദിസുങ്ക് സക്താ. ആനി ഹ്യാ താച്യാ താക്തെൻ കൊങ്ക്ണി സാഹിത്യാക് ഏക് നവെം ആയാം ദിലാം, വജൻ ദിലാം ആനി ഭരം വാഡയ്ലാ. തഡവ് കരുൻ താകാ മെൾല്ല്യാ സാഹിത്യ അകാഡെമിച്യാ പുരസ്കാരാക് ധരുൻ താകാ മെൾല്ല്യാ ഹെർ സർവ് പുരസ്കാരാഞ്ചൊ മാൻ താഞ്ചെസ്തകി വാഡ്ലാ.
ഹാംവെ മ്ഹളെം എഡ്വിൻ ആപ്ല്യാ ദേൺഗെദ്വാരിം ആമ്ച്യാ കാൾജാനിം സാസ്ണാക് ജിയെവ്ന്ഞ്ച് ഉർതലൊ. പൂൺ ആമിം സാസ്ണാക് ജിയെനാംവ്. താചി സാഹിതിക് ദെൺഗി മുക്ല്യാ പിൾഗെക് പാവാജെ തർ, ആജ് ഹൊ സന്ദർബ് യെവ്ജില്ല്യാ സംസ്ഥ്യാനിം എഡ്വിനാചെം സാഹിത്യാചെം ഖജാൻ ജഗവ്ന് ദവർചെം തെവ്ശിം ചിന്തിജെ മാത് നംയ് അസലി ഏക് യെവ്ജൺ പൊന്താക് പാവാശെം കരിജെ. താച്യാ സമഗ്ര് കൃതിയാഞ്ചെ സാർക്യാ വെവെസ്ഥിത് ഥരാൻ ‘ഡിജിടലീകരൺ’ കർചെ തെവ്ശിം ആനിം തെം സംസാരാന്ത്ല്യാ ഖംയ്ച്യായ് മുല്യാ ഥാവ്ന്, കൊങ്ക്ണെപാസത് വാപാർച്യാ ഹര്യേക് ലിപിയെന്ത് ‘ഒൻ ഡിമാണ്ഡ്’ മെൾചെതെവ്ശിം മെടാം കാഡിജെ. ആനി താച്യൊ പ്രമുഖ് കൃതിയൊ ഇംഗ്ലിശ്, ഹിന്ദി ആനി ഹെർ ഭാസാങ്ക് തർജണി കർചെതെവ്ശിംയ് ഗുമാൻ വ്ഹരിജെ. തീച് എഡ്വിനാക് ദിംവ്ചി ഖരി ശൃദ്ധാഞ്ജലി മ്ഹൺ ഹാംവ് ഥിർ പാത്യെതാം.
ആനി എഡ്വിൻ ജെ. എഫ്. ഡി’സോജാചി കേന്ദ്ര സാഹിത്യ പ്രശസ്തി വിജേത് കൃതി ‘കാളെം ഭാംഗാർ’ ആനി അസ്തിത്വവാദാചി ‘ഹാംവ് ജിയെതാം’ കാദംബരി വിശിം ഗോവാ വിശ്വവിദ്യാലയച്യാ കൊങ്കണി വിഭാഗാചി വിശ്രാന്ത് മുഖ്യസ്തിൺ ഡാ| ചന്ദ്രലേഖാ ഡി’സോജാ ഉലയ്ലി.സാഹിത്യ അകാഡെമിചൊ കാര്യകാരി സമിതിചൊ സാന്ദൊ ആനി കൊങ്കണി സലഹാ സമിതിചൊ മുഖ്യസ്ഥ് ശ്രീ മെല്വിൻ രൊഡ്രിഗസ്, വിശ്വ കൊങ്കണി കേന്ദ്ർരാചൊ ദൊ| ബി. ദേവദാസ് പൈ., ‘സാകാ’ചൊ അധ്യക്ഷ് ശ്രീ സുനിൽ കുന്ദർ, സാം ലുവിസ് കൊലെജിചൊ രെജിസ്ട്രാർ ദൊ| ആല്വിൻ ഡെ’സാ, കൊങ്കണി സാഹിതി ആനി കലാകാർ സംഘാചൊ അധ്യക്ഷ് ശ്രീ രൊനാൽഡ് സിക്വേരാ, കൊങ്കണി സംസ്ഥ്യാചൊ കാര്യെം സംയോജക് ശ്രീ ജോകിം പിണ്ടൊ ഹാജർ ആസൊൻ, ഫുലാം നമൻ അർപിലെ.
കൊങ്കണി സംസ്ഥ്യാചൊ നിർദേശക് ദൊ| ഫാ| മെല്വിൻ പിണ്ടൊ ജെ.സ. ഹാണിം ധന്യവാദ് അർപിലെ. കൊങ്കണി സാഹിതി, പത്ർകർത് എച്. എം. പെർനാൽ ഹാണിം കാര്യെം ചലയ്ലെം.
