“ആദിം വൊവിയൊ ഘഡ്ച്യൊ ആനി ഗാംവ്ച്യൊ ആസ്‍ല്ല്യൊ ബായ്ലാംനി ദെകുൻ വൊവിയാഞ്ചെർ മാണ്ഡുൻ ഹാഡ്‍ല്ലെം ഹെം വിചാർ സാതെം മാംയ്‍പണാചെം ആചരൺ. ഹ്യാ വിചാർ സാത്യാ മാരിഫാത് സാം ലുവിസ് കൊലെജ് കൊങ്കണി സംസ്ഥൊ ആമ്ച്യാ ചലിയാങ്ക്, ആമ്ച്യാ സ്ത്രിയാങ്ക്, ആമ്ച്യാ മാംയാങ്ക് മാൻ കർതാ അശെം മ്ഹാകാ ഭൊഗ്താ” മ്ഹണാലൊ കേന്ദ്ര് സാഹിത്യ് അകാഡെമി കൊങ്കണി സലഹാഗാർ സമിതിചൊ നിമന്ത്രക് ശ്രീ മെല്വിൻ രൊഡ്രിഗസ്. എപ്രിൽ 20 താരികെർ എരിക് മഥായസ് സഭാംഗണാന്ത് സാം ലുവിസ് കൊലെജ് (സ്വായത്ത്) കൊങ്കണി സംസ്ഥ്യാൻ യുജിസി സ്ട്രൈഡ് സ്കീമാ ഖാൽ കൊങ്കണി ലഗ്നാ സാഹിത്യാചെർ മാണ്ഡുൻ ഹാഡ്‍ല്ലെം എകാ ദിസാചെം രാശ്ട്ര് മട്ടാചെം വിചാർ സാതെം ഉഗ്താവൺ കർൻ തൊ ഉലയ്താലൊ.
‘ആമ്ച്യാ ബായ്ലാംനി കാജാരാ സൊഭാണാം വെളാർ, ദാന്ത്യാംനി താന്ദുൾ ദൊൾടാനാ, കുജ്നാന്ത്ലൊ വാവ്ര് കർതാനാ, മാത്ര് ൻഹയ് ഭുർഗ്യാങ്ക് പാൾന്യാന്ത് ധലയ്താനാ, ലാട്യാചെം ഉദക് വൊഡ്താനാ ആനി പ്രത്യേക് കരുൻ മാഗ് വൊൾതാനാ വൊവിയൊ ഘഡ്ച്യൊ ആസ്‍ല്ല്യൊ. അശെം ഘഡ്ലെല്യാ വൊവിയാംനി ഭെസൊരാച്യാ കാമാവിശിം, അസുഖി ലഗ്നാവിശിം, കാമുകി തശെം അത്ത്യാചാരി ഘൊവാവിശിം ദുരാം ആസ്താലിം. എകെ കുശിൻ ഭക്തിചൊ ഗിരൊപ് ആസ്‍ല്ലൊ തർ അന്യേക് കുശിൻ പുരുഷ് പ്രധാൻ സമാജിചെർ വ്യംഗ് ആസ്താലെം. സ്ത്രീയാങ്ക് ആപ്ലെ സ്ത്രീപണാചെ വിവിദ് വിചാർ വ്യക്ത് കരുങ്ക് തവൾച്യാ കാളാർ വൊവിയൊച് പരിണാം‍കാരി ഹാതെർ ജാംവ്ക് പാവ്‍ല്ല്യൊ. അസല്യെ ജാൻ‍പദ് സാഹിത്യാചെർ ചഡ് ആനി ചഡ് സംസൊദ് ചലാജെ. വൊവിയാംനി ഉണ്യാർ ഉണെം ഹജരാച്യാകീ ചഡ് വിശിഷ്ഠ് സബ്ദ് ആസാത്. താചൊച് ഏക് സബ്ദ്-കോശ് ഫായ്സ് കരിജെ’ അശെം മ്ഹണാലൊ തൊ.
ഹ്യാ വിചാർ സാത്യാചെ പ്രായോജക് യുജിസി-സ്ട്രൈഡ് സ്കീം ഹാചൊ സഞ്ചാലക് ദൊ| ആല്വിൻ ഡെ’സാ ഉലവ്ന് – യുജിസി സ്ട്രൈഡ് സ്കീമാ മാരിഫാത് സ്ഥളീയ് സംസ്കøതിചെം അധ്യയൻ ചൽതാ. സാം ലുവിസ് കൊലെജിൻ യെദൊൾ അസലിം 14 സംസൊദ് യെവ്ജണാം ഹാതിം ഘെത്ല്യാന്ത്. അസലിം അധ്യയനാം നിജായ്കി ഭോവ് ഗർജെചിം’ അശെം മ്ഹണാലൊ.
ഉഗ്താവൺ കാര്യാചൊ അധ്യക്ഷ് ജാവ്ന് ഹാജർ ആസ്ലലൊ സാം ലുവിസ് കൊലെജിചൊ പ്രാംശുപാൽ ദൊ| (ഫാ|) പ്രവീൺ മാർടിസ് ജെ.സ. ഉലവ്ന് ‘എകാ കാളാർ സമുദായാക് ലാഗിം ഹാഡ്ലലെം, സമുദായ് ബാദുൻ ഹാഡ്ലെലെം ഹെം തൊണ്ഡി സാഹിത്യ്, ഹ്യൊ വൊവിയൊ വാ ഗാണിം കൊങ്കണി ലൊകാച്യാ സംസ്കøതെചൊ ഏക് വാണ്ടൊ ജാവ്നാസ്താം, താചിം നക്ലാം കരിനായെ, ബഗാർ ഹെം സാഹിത്യ് താചൊ മൂൾ ഉദ്ദേശ് ഹൊഗ്ഡായ്നാസ്താം ആമ്ച്യാ സംസ്കøതിചൊ ഏക് വാണ്ടൊ ജാവ്ന് കശെം ഉരവ്ന് ഘെവ്യെത് ആനി തിത്ല്യാച് വൈഭവിക് രിതിൻ മുക്ല്യാ പിൾഗെക് കശെം ഹതാന്തർ കര്യെത് മ്ഹള്ളെവിശിം ആയ്ച്യാ യുവജണാംനി പ്രായോഗിക് രിതിൻ ചിന്തിജെ ആനി തെ ദിശെൻ വാവ്രാക് ലാഗാജെ’ മ്ഹൺ ഉലൊ ദിലൊ.
കാര്യാച്യാ സുർവെർ കൊങ്കണി സംഘച്യാ വിദ്യാർഥിംനി കൊങ്ക്ണി ധ്യേയ് ഗീത് ഗായ്ലെം. കൊങ്കണി സംസ്ഥ്യാചൊ ദിരെക്തൊർ ദൊ| (ഫാ|) മെല്വിൻ പിണ്ടൊ ജെ.സ. ഹാണെ സ്വാഗത് കെലൊ. സാം ലുവിസ് കൊലെജ് വിദ്യാർഥിൻ കു| ദിയാ മസ്കരേൻഹസ് ഹിണെ കാര്യെ ചലയ്ലെം. കൊങ്കണി വിഭാഗാചി മുകെലി ശ്രീമതി ഫ്ലോരാ കാസ്തെലിനൊൻ ധന്യവാദ് സമർപിലെ. സാഹിത്യ് അകാഡെമി ഡെല്ലി ഹാച്യാ കൊങ്കണി സലഹാഗാർ സമിതിചൊ നിമന്ത്രക് ജാവ്ന് നേമക് ജാല്ലൊ പയ്ലൊ മംഗ്ളുർ‍ഗാർ ശ്രീ മെല്വിൻ രൊഡ്രിഗസാക് ഹ്യാ കാര്യാവെളാർ ശാൽ പാംഗുർൻ സന്മാൻ കെലൊ.
ഉഗ്താവൺ കാര്യെം സംപ്തച് മംഗ്ളുർച്യാ തെഗാം ആനി ഗൊംയ്ച്യാ എകാ സംപന്മൂൾ വെക്തിൻ കൊങ്കണി കഥൊലിക്, ജിഎസ്‍ബി തശെഞ്ച് കുഡ്മി സമുദായാന്ത്ല്യാ ലഗ്നാ ഗിതാഞ്ചെർ പ്രബന്ദ് മണ്ഡൻ കെലെ. ഗൊംയ് നവേലിം ഹാംഗാച്യാ രോജരി കൊലെജ് ആഫ് കൊമർസ് ആനി ആട്ർസ് ഹാചൊ പ്രാദ്യാപക് ഫാ| രോമൻ രൊഡ്രിഗസ് ഹാണിം ‘പുർവജാഞ്ച്യാ ഗാംവാന്ത് പർകി ജാല്ല്യൊ വൊവിയൊ’ മ്ഹള്ള്യാ വിഷയാചെർ പ്രബന്ദ് മണ്ഡൻ കെലൊ. മംഗ്ളുർച്യാ നളന്ദാ ശാളെചി നിവൃത്ത് ശിക്ഷകി ശ്രീമതി ചന്ദ്രികാ മല്യ ഹിണെ ‘ജിഎസ്‍ബി ഹൊവ്യാഞ്ചി ചരിത്രാ ആനി താഞ്ചി പ്രാമുഖ്യതാ’ മ്ഹള്ള്യാ വിഷയാചെർ, പുത്തൂർ സാം ഫിലൊമിനാ കൊലെജിന്ത്ല്യാ സമാജ് ശാസ്ത്ര് വിഭാഗാചൊ നിവൃത്ത് മുകെലി ഫ്രൊ| ജെ. ബി. സിക്വേരാ ഹാണെം ‘മംഗ്ളുരി കൊങ്കണി ക്രിസ്താംവാഞ്ച്യാ കാജാരാംനി വൊവിയൊ – ആദിം ആനി ആതാം’ ആനി മംഗ്ളുരാന്ത്ലി വകീൽ ശ്രീമതി പ്രതിമാ എസ്.ആർ. ഹിണെ ‘കുഡ്മി കാജാരാംനി ആള്വൊൻ യെംവ്ചിം ലഗ്നാ-ഗാണിം’ മ്ഹള്ള്യാ വിശിം പ്രബന്ദ് മണ്ഡൻ കെലെ.
ദൊൻപരാ ഉപ്രാന്ത്ല്യാ കാര്യാക്രമാന്ത് ശ്രീമതി ഫിലൊമിനാ ഡി’സോജാ ആനി പംഗഡ് കുമ്ടാ ഹാണിം ഉത്തർ കന്നഡാചിം കഥൊലിക് ലഗ്നാഗിതാം സാദർ കെലിം. കുത്താർ കൃഷ്ണകോഡി ഹാംഗാച്യാ ശ്രീമതി കല്യാണി ആനി സാംഗാത്യാംനി കുഡ്മി ലഗ്നാ ഗാണിം, ശ്രീമതി ഹിൽഡാ മൊരസ് ആനി സാംഗാതി ബൊന്ദെൽ ഹാണിം മംഗ്ളുരി കഥൊലിക് കാജാരാന്ത്ല്യൊ വൊവിയൊ ആനി വേർസ് തശെഞ്ച് ശ്രീമതി ചന്ദ്രികാ മല്യ ആനി സാംഗാതി മംഗ്ളുർ ഹാണിം ജിഎസ്‍ബി സമുദായാന്ത്ല്യൊ വൊവ്യൊ പ്രസ്തുത് കെല്യൊ.
കാര്യക്രമാച്യാ നിമാണെ ദൊ| (ഫാ|) മെല്വിൻ പിണ്ടൊ ജെ.സ. ഹാണെ സംപ്ണെചെ ശ്ഹരെ ദിലെ. കാര്യെം സംയോജക് ശ്രീ ജോകിം പിണ്ടൊ ഹാണെ ധന്യവാദ് സമർപൺ കെലെം.
ഹ്യാ വിചാർ സാത്യാന്ത് മംഗ്ളുരാന്ത്ല്യാ വിവിദ് കൊലെജിഥാവ്ന് 130ച്യാകീ ചഡിത് വിദ്യാർഥിംനി, ഥൊഡ്യാ വിഞ്ച്ണാർ സാഹിതിംനി ആനി ഭാസ് ആനി സംസ്കøതിച്യാ സംസൊദകാംനി വാണ്ടൊ ഘെത്ലൊ.
