“സംസാരാച്യാ ഭോവ് ചഡ് യശസ്വീ സമുദായാം പയ്കി കൊങ്കണി സമുദായ് ഏക് മ്ഹള്ളി മ്ഹജി പാത്യെണി. തരീ ഹ്യാ സമുദായാചി മാംയ്ഭാസ് കൊങ്കണിചൊ ഫുഡാർ ഘട് ആസാ മ്ഹണൊങ്ക് ധയ്ര് പാവാനാ. ഭാശെച്യാ ഉദർഗതെക് സംഘടനാത്മക് ചള്വൾ, സർകാരാചൊ പാടിംബൊ ആനി ശാസ്ത്രീയ് ശികപ് ഹ്യൊ തീൻ സംഗ്തി ഭോവ് ഗർജെച്യൊ. തശെഞ്ച് ഹ്യാ തിന്യി സംഗ്തിം മധെം താൾ-മേള്യി തിത്ലൊച് ചഡ് ഗർചെചൊ. കൊങ്ക്ണെചൊ മനിസ് ജാവ്ന് കൊങ്കണി സുത്തുരാ ഭായ്ര് രാവൊൻ പളെതാനാ മ്ഹജ്യാ ഗുമാനാക് ഗെല്ലെ പർമാണെം കൊങ്കണിന്ത് സംഘടനാത്മക് വാവ്ര് ചല്ലാ ആനി ചൽതെച് ആസാ; കൊങ്കണിക് രാജാശ്രയ് വാ സർകാരി ആശ്രയ് മെള്ളാ; ഇസ്കൊൽ-കൊലെജിംനി കൊങ്കണി ശിക്പാക് ആവ്കാസ്, മംഗ്ളുർ വിശ്വവിദ്യാലയാന്ത് കൊങ്കണി അധ്യയൻ പീഠാചെം സ്ഥാപൻ – അശെം കൊങ്കണിന്ത് ശാസ്ത്രീയ് ശിക്പാക് ആവ്കാസ്യി ലാബ്ലാ. പുൺ ഹ്യാ തീന്യി ഘടകാം മധെം സാർകൊ താൾ-മേൾ നാ. ഭാരതീയ് ഭാശെംനി സംഘടക്, സർകാരി സംസ്ഥെ ആനി ശാസ്ത്രീയ് ശിക്പാ മധെം താൾ-മേൾ ചുക്ല്യാർ ഭാശെചി വാഡാവൾ കുർവൊങ്ക് ലാഗ്താ. ഹൊ സാർകൊ ജായ്നാസ്താം ഭാശെചി ഉദർഗത് കശ്ടാഞ്ചി.” ആശെം മ്ഹണാലൊ കർനാടക പബ്ലിക് സർവീസ് കമിഷൻ ബെംഗളൂർ ഹാചൊ സാന്ദൊ മാനെസ്ത് രൊനാൽഡ് ഫെർനാണ്ഡീസ്. തൊ മംഗ്ളുർ കുദ്മുൽ രംഗരാവ് പുരഭവനാന്ത് കൊങ്കണി ഭാശാ മണ്ഡൾ കർനാടക് ഹാച്യാ ഭാംഗാരോത്സവ് സംഭ്രമാച്യാ സമാരോപ് കാര്യാചൊ മുഖെൽ സയ്രൊ ജാവ്ന് ഉലയ്താലൊ. മുകാരുൻ താണെ “കിടാൾ ജാളിജാഗൊ ഏക് സൊഡ്ന് ഹെർ ഖഞ്ച്യായ് കൊങ്കണിന്ത്ല്യാ പത്രാംനിം ബള്വന്ത് ധോരൺ ആപ്ണായില്ലെം പളെംവ്ക് മെളാനാ. കൊങ്കണി ഖാതിർ വാവുർച്യാ സംഘടനാംനി, സംസ്ഥ്യാംനി സാംഗാതാ യേവ്ന് സർകാരി സവ്ലാതായൊ സമ്ജികായെൻ വാണ്ടുൻ ഘെവ്ന്, സർകാരി സംസ്ഥ്യാം കഡെൻ സംഘടനാം-സാഹിതിംനി തശെഞ്ച് ഖാസ്ഗി സംസ്ഥ്യാംനി എക്വടിത് ഥരാൻ കൊങ്കണി ശിക്പാക് ആനി അഭ്യാസാക് പാടിംബൊ ദില്യാർ കൊങ്കണിക് ബരെ ദീസ് ഉദെതലെ.” മ്ഹളെം.
ഹ്യാച് സന്ദർഭാർ കൊങ്കണി ഭാഷാ മണ്ഡൾ കർനാടക് ഹാംണി വർസാവാർ ദിംവ്ചെ പാസത് പയ്ലെ പാവ്ടിം സുർവാതില്ല്യൊ പാഞ്ച് പ്രശസ്ത്യൊ പ്രധാൻ കെല്യൊ. മാനെസ്ത് രാമദാസ് ഗുല്വാഡിക് ജീവമാൻ സാധക് പുരസ്കാർ, മാനെസ്തിൺ കല്യാണിബായി നീർകെരെക് ജാനപദ് പുരസ്കാർ, മാനെസ്ത് അപ്പുരായ പൈക് കാര്യകർത് പുരസ്കാർ, മാനെസ്ത് ക്ലാന്വിൻ ഫെർനാണ്ഡിസാക് യുവ പുരസ്കാർ ആനി മാനെസ്തിൺ കൃതികാ കാമത് ഹാഞ്ച്യാ ‘ദിവോചോ ഉജ്വാഡു’ പുസ്തകാക് 2022വ്യാ വർസാചൊ പുസ്തക് പുരസ്കാർ ഫാവൊ ജാലൊ.
ത്യാ ഉപ്രാന്ത് കൊങ്കണി ഭാശാ മണ്ഡൾ കർനാടക ഹാച്യാ ഭാംഗാരോത്സവാച്യാ ഉഗ്ഡാസാക് കൊങ്കണി മാംയ് ഭാസ് ഉലയ്തല്യാ വിവിധ് ധർമച്യാ ആനി സമുദായച്യാ പ്രതിഷ്ടിത് പന്നാസ് ജണാങ്ക് സന്മാൻ കെലൊ.
സ്ഥാപക് അധ്യക്ഷ് ദെവാധിൻ ചാപ്രാ ദെകൊസ്താ തശെഞ്ച് താച്യാ ഉപ്രാന്ത് കെബിഎം കെ ചലയില്ല്യാ സർവ് ബാരാ അധ്യക്ഷാഞ്ചൊ ഉഡാസ് കാഡ്ന് താങ്കാം വാ താഞ്ച്യാ കുട്മച്യാ സാന്ദ്യാങ്ക് മാൻ കെലൊ.
മാനാചെ സയ്രെ ജാവ്നാസ്ലല്യാ കൊങ്കണി അകാഡെമിചൊ രിജിസ്ട്രാർ മനോഹർ കാമത് ഉലൊവ്ന് സഗ്ള്യാ സമുദായച്യാ കൊങ്കണി മാംയ് ഭാസ് ഉലംവ്ച്യാ ലോകാക് സാംഗാതാ ഹാഡ്ലല്യാ ഹുദ്ദെദാരാങ്ക് ശാഭാസ്കി ഫാവൊ മ്ഹളെം.
വേദിർ ആസ്ലല്യാ സ്ഥാപക് ഖജാന്ദാർ ഫാ| മാർക് വാൽഡർ ഹാണിം ആശീർവചൻ കെലെം.
സംസ്ഥ്യാചൊ കാര്യകാരി സലഹദാർ തശെഞ്ച് സയ്രൊ ജാവ്നസ്ലല്യാ പ്രശാന്ത് ശേട് ഹാണെം ഉലൊവ്ന് കൊങ്കണി മാംയ് ഭാശെചി സെവാ കർചെം ആമ്ചെം ഭാഗ് മ്ഹണാലെ.
കാര്യാചൊ അധ്യക്ഷ് സ്ഥാൻ കെബിഎം കെ ചൊ അധ്യക്ഷ് വസന്ത് രാവ് ഹാണെ ഘെത്ല്ലെം. കാര്യാച്യാ സുർവെർ കാര്യാചൊ സഞ്ചാലക് തശെഞ്ച് കെബിഎം കെ ചൊ കാര്യദർശി രേമണ്ഡ് ഡികൂൻഹാ താകൊഡെൻ സ്വാഗത് കെലൊ തശെഞ്ച് കെബിഎം കെ സംസ്ഥൊ ചലൊൻ ആയില്ലി വാട് മട്വ്യാൻ വിവരിലി. ഫെൽസി ലോബൊ ആനി രിയാനാ ഡികൂൻഹാ ഹാണിം കാര്യെ നിരൂപൺ കെലെം. കാര്യകാരി സാന്ദൊ രൊബർട് മിനെജസ് ഹാണിം ആദ്ല്യാ അധ്യക്ഷാഞ്ചി വളക് സാംഗ്ലി. പ്രശസ്തി തശെഞ്ച് ഗൌരവ് സഞ്ചാലക് ജാവ്നാസ്ച്യാ അരവിന്ദ ശാനഭാഗ ഹാണിം പ്രശസ്തി ആനി ഗൌരവ് സ്വീകർ കെല്ല്യാ മാനാച്യാ സയ്രാഞ്ചി ഒളൊക് സാംഗ്ലി. ഗൌരവ് സ്വീകാർ കെല്ല്യാ സംസ്ഥ്യാചി ഒളൊക് ജൊസ്സി പിണ്ടൊ ഹാണിം കെലി.
കൊങ്കണി ഭാസ് ആനി സംസ്കൃതി ഉരംവ്ച്യാ ഉദ്ദേശാൻ സകാളിം ഥാവ്ന് ദൊൻപാരാ പര്യാന്ത് വിവിധ് ഇസ്കൊലാച്യാ ആനി കൊലെജിച്യാ 200 വിദ്യാർഥിംനി, സാംസ്കൃതിക് സ്പർധ്യാന്ത് ഭാഗ് ഘെവ്ന് ജിക്പ്യാംനി നഗ്ദി ബഹുമാൻ ആനി ഭാഗ് ഘെത്ലല്യാംനി പ്രമാൺ പത്രാം ഘെത്ലിം. ഹൊ സ്പർധൊ ഉപാധ്യക്ഷ് രത്നാകര കുഡ്വാ ഹാണിം മാണ്ഡുൻ ഹാഡ്ല്ലൊ. കാര്യകാരി സാന്ദെ ജാവ്നാസ്ച്യാ മീനാക്ഷി പൈ, ഗീതാ സി കിണി, ലാരെൻസ് പിണ്ടൊ, നവീന നായക്, വെങ്കടേശ ബാളിഗ ഹാണിം ആപ്ലൊ സഹകാർ ദിലൊ. സഹകാര്യദർശി ജൂലിയെട് ഫെർനാണ്ഡീസ് ഹാണിം ധന്യവാദ് പാടയ്ലെം. ഖജാന്ദാർ സുരേശ് ശെണൈ, വേദിർ ആസ് ല്ലെ.
ദൻപാരാം കർനാടകാച്യാ 31 ജില്ല്യാങ്ക് പ്രതിനിധിത്വ് കർൻ, കൊങ്കണി ഘോഷണാ സംഗിം, അലോശിയസ് ഹൈസ്കൂൽച്യാ വിദ്യാർഥിഞ്ച്യാ ബ്യാണ്ഡാ സാംഗാതാ ഏക് ആകർഷക് പുർശാംവ് ചല്ലൊ. ആക്രേക് സാം ലുവിസ് കൊലെജിച്യാ വിദ്യാർഥിംനി രേമണ്ഡ് ഡികൂൻഹാ താകൊഡെ ഹാണെ ബരവ്ന് സാം ലുവിസ് കൊങ്കണി സംഘാചി സംയോജകി പ്ലൊരാ കാസ്തെലിനൊ ഹിണെ നിർദെശൻ കെല്ലൊ ʻ മുംഗൈതലെʼനാട്കുളൊ ഖെളൊൻ ദാകയ്ലൊ.
