आपल्या ३४ वर्सांचे प्रायेर मंगळुराक येवन फकत २१वर्सां ह्या प्रदेशांत जियेवन आपल्या ५५व्या वर्सांचे प्रायेर देवादीन जाल्लो फा| ए.एफ. एक्स. माफेयीन कोंकणी भाशेक दिल्लीं दोन अमोलीक दिर्वें जावनासात इंगलीश-कोंकणी सब्दʼकोश आनी कोंकणी व्याकरण पुसतक. ह्या दोन पुसतकां वर्वीं कानाडी लिप्येंतल्या कोंकणेंत लायिकांचें साहित्य तर्जण जावंक क्रमेण नेमाळ्यांची सुर्वात, हाका लागोन कथा, कादंबरी, कविता, नाटक –अशें साहित्याच्ये उदर्गतेक वाट तयार कर्न दिल्ल्या इटालियन जेज्वीत याजक फा| ए.एफ. एक्स. माफेयिच्या जिण्ये-वावराचेर साहित्य अकाडेमी डेल्ली हाणीं मांडून हाडल्लें राषट्र मट्टाचें विचार सातें ‘साहित्य मंच’ काऱ्यें अगोसत ३० तारिकेर सुक्रारा दोनपरां २.३० वरार सां लुवीस परिगणीत विश्व’विद्यालयच्या सहोदय सभासलांत चल्लें.
साहित्य अकाडेमी न्यू डेल्ली आनी सां लुवीस परिगणीत विश्व विद्यालय कोंकणी संस्थो हांच्या जोड आसऱ्याखाल चल्लेल्या ह्या विचार सात्याचें उग्तावण इटालियन, स्प्यानीश, फ्रेंच, जर्मन, कन्नड आनी कोंकणी भाशे पंडीत दो| फा| जेरोम डी’सोजा हाणीं केले.
काऱ्याच्या सुर्वेर सां लुवीस कोलेज (स्वायत्त) हाचो रेजिसटार दो| आलवीन डे’सा हाणीं सर्वांक बरो येवकार मागलो. साहित्य अकाडेमी कोंकणी सलहा समितिचो निमंत्रक, मेलवीन रोड्रिगस हाणें प्रासतवीक उलवप दिलें. उपरांत चल्लेल्या विचार सात्याचें सुंकाण हातीं घेत’ल्ल्या दो| फा| मेलवीन पिंटो हाणीं फा| ए. एफ. एक्स. माफेयिची मटवी ओळोक दीवन ताच्या वावराची झळक दिली. माफेयिचें जिवीत आनी वावर ह्या विशीं फा| ओलवीन वेगस जे.स., कोश’कार जावन माफेयी म्हळ्ळ्या विशयचेर दो| फा| जेरोम डी’सोजा आनी व्याकरण’कार जावन माफेयी विशयाचेर फा| जेसन पिंटो एस.डी.बी. हाणीं प्रबंध मंडन केलें.
काऱ्याच्या सुर्वेर कोंकणी संघच्या सांद्यांनी प्रार्थन गीत गायलें. कोंकणी संस्थ्याची सहायकी कू| डेलविटा वेगसान काऱ्यें चलयलें. सां लुवीस परिगणीत विश्व’विद्यालयाच्या कोंकणी विभागाची मुख्यसतीण श्रीमती फ्लोरा क्यासतेलिनो हिणे धन्यवाद पाटयलें. विवीध कोलेज विद्यार्थी तशेंच विंचणार बरवप्यांनी ह्या विचार सात्यांत वांटो घेतलो.
