ಆಪ್ಲ್ಯಾ 34 ವರ್ಸಾಂಚೆ ಪ್ರಾಯೆರ್‌ ಮಂಗ್ಳುರಾಕ್‌ ಯೇವ್ನ್‌ ಫಕತ್‌ 21ವರ್ಸಾಂ ಹ್ಯಾ ಪ್ರದೇಶಾಂತ್‌ ಜಿಯೆವ್ನ್‌ ಆಪ್ಲ್ಯಾ 55ವ್ಯಾ ವರ್ಸಾಂಚೆ ಪ್ರಾಯೆರ್‌ ದೆವಾದೀನ್‌ ಜಾಲ್ಲೊ ಫಾ| ಎ.ಎಫ್. ಎಕ್ಸ್. ಮಾಫೆಯಿನ್‌ ಕೊಂಕ್ಣಿ ಭಾಶೆಕ್‌ ದಿಲ್ಲಿಂ ದೋನ್‌ ಅಮೊಲಿಕ್‌ ದಿರ್ವೆಂ ಜಾವ್ನಾಸಾತ್ ಇಂಗ್ಲೀಶ್‌-ಕೊಂಕಣಿ ಸಬ್ದ್ʼಕೋಶ್ ಆನಿ ಕೊಂಕಣಿ ವ್ಯಾಕರಣ್ ಪುಸ್ತಕ್. ಹ್ಯಾ ದೋನ್‌ ಪುಸ್ತಕಾಂ ವರ್ವಿಂ ಕಾನಾಡಿ ಲಿಪ್ಯೆಂತ್ಲ್ಯಾ ಕೊಂಕ್ಣೆಂತ್‌ ಲಾಯಿಕಾಂಚೆಂ ಸಾಹಿತ್ಯ್ ತರ್ಜಣ್ ಜಾಂವ್ಕ್‌ ಕ್ರಮೇಣ್‌ ನೆಮಾಳ್ಯಾಂಚಿ ಸುರ್ವಾತ್, ಹಾಕಾ ಲಾಗೊನ್ ಕಥಾ, ಕಾದಂಬರಿ, ಕವಿತಾ, ನಾಟಕ್‌ –ಅಶೆಂ ಸಾಹಿತ್ಯಾಚ್ಯೆ ಉದರ್ಗತೆಕ್‌ ವಾಟ್‌ ತಯಾರ್‌ ಕರ್ನ್‌ ದಿಲ್ಲ್ಯಾ ಇಟಾಲಿಯನ್ ಜೆಜ್ವಿತ್‌ ಯಾಜಕ್‌ ಫಾ| ಎ.ಎಫ್. ಎಕ್ಸ್. ಮಾಫೆಯಿಚ್ಯಾ ಜಿಣ್ಯೆ-ವಾವ್ರಾಚೆರ್‌ ಸಾಹಿತ್ಯ್ ಅಕಾಡೆಮಿ ಡೆಲ್ಲಿ ಹಾಣಿಂ ಮಾಂಡುನ್ ಹಾಡ್‌ಲ್ಲೆಂ ರಾಷ್ಟ್ರ್ ಮಟ್ಟಾಚೆಂ ವಿಚಾರ್ ಸಾತೆಂ ‘ಸಾಹಿತ್ಯ್ ಮಂಚ್’ ಕಾರ್ಯೆಂ ಅಗೊಸ್ತ್ 30 ತಾರಿಕೆರ್ ಸುಕ್ರಾರಾ ದೊನ್ಪರಾಂ 2.30 ವರಾರ್ ಸಾಂ ಲುವಿಸ್ ಪರಿಗಣಿತ್ ವಿಶ್ವ್’ವಿದ್ಯಾಲಯಚ್ಯಾ ಸಹೋದಯ ಸಭಾಸಲಾಂತ್ ಚಲ್ಲೆಂ.
ಸಾಹಿತ್ಯ್ ಅಕಾಡೆಮಿ ನ್ಯೂ ಡೆಲ್ಲಿ ಆನಿ ಸಾಂ ಲುವಿಸ್ ಪರಿಗಣಿತ್ ವಿಶ್ವ್ ವಿದ್ಯಾಲಯ್ ಕೊಂಕಣಿ ಸಂಸ್ಥೊ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಚಲ್ಲೆಲ್ಯಾ ಹ್ಯಾ ವಿಚಾರ್ ಸಾತ್ಯಾಚೆಂ ಉಗ್ತಾವಣ್ ಇಟಾಲಿಯನ್, ಸ್ಪ್ಯಾನಿಶ್, ಫ್ರೆಂಚ್, ಜರ್ಮನ್, ಕನ್ನಡ ಆನಿ ಕೊಂಕ್ಣಿ ಭಾಶೆ ಪಂಡಿತ್ ದೊ| ಫಾ| ಜೆರೋಮ್ ಡಿ’ಸೋಜಾ ಹಾಣಿಂ ಕೆಲೆ.
ಕಾರ್ಯಾಚ್ಯಾ ಸುರ್ವೆರ್ ಸಾಂ ಲುವಿಸ್ ಕೊಲೆಜ್ (ಸ್ವಾಯತ್ತ್) ಹಾಚೊ ರೆಜಿಸ್ಟಾರ್ ದೊ| ಆಲ್ವಿನ್ ಡೆ’ಸಾ ಹಾಣಿಂ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ಸಾಹಿತ್ಯ್ ಅಕಾಡೆಮಿ ಕೊಂಕಣಿ ಸಲಹಾ ಸಮಿತಿಚೊ ನಿಮಂತ್ರಕ್, ಮೆಲ್ವಿನ್ ರೊಡ್ರಿಗಸ್ ಹಾಣೆಂ ಪ್ರಾಸ್ತವಿಕ್ ಉಲವ್ಪ್ ದಿಲೆಂ. ಉಪ್ರಾಂತ್ ಚಲ್ಲೆಲ್ಯಾ ವಿಚಾರ್ ಸಾತ್ಯಾಚೆಂ ಸುಂಕಾಣ್ ಹಾತಿಂ ಘೆತ್’ಲ್ಲ್ಯಾ ದೊ| ಫಾ| ಮೆಲ್ವಿನ್ ಪಿಂಟೊ ಹಾಣಿಂ ಫಾ| ಎ. ಎಫ್. ಎಕ್ಸ್. ಮಾಫೆಯಿಚಿ ಮಟ್ವಿ ಒಳೊಕ್ ದೀವ್ನ್‌ ತಾಚ್ಯಾ ವಾವ್ರಾಚಿ ಝಳಕ್ ದಿಲಿ. ಮಾಫೆಯಿಚೆಂ ಜಿವಿತ್ ಆನಿ ವಾವ್ರ್ ಹ್ಯಾ ವಿಶಿಂ ಫಾ| ಒಲ್ವಿನ್ ವೇಗಸ್ ಜೆ.ಸ., ಕೋಶ್’ಕಾರ್ ಜಾವ್ನ್ ಮಾಫೆಯಿ ಮ್ಹಳ್ಳ್ಯಾ ವಿಶಯಚೆರ್ ದೊ| ಫಾ| ಜೆರೊಮ್ ಡಿ’ಸೋಜಾ ಆನಿ ವ್ಯಾಕರಣ್’ಕಾರ್ ಜಾವ್ನ್ ಮಾಫೆಯಿ ವಿಶಯಾಚೆರ್ ಫಾ| ಜೆಸನ್ ಪಿಂಟೊ ಎಸ್.ಡಿ.ಬಿ. ಹಾಣಿಂ ಪ್ರಬಂಧ್ ಮಂಡನ್ ಕೆಲೆಂ.
ಕಾರ್ಯಾಚ್ಯಾ ಸುರ್ವೆರ್ ಕೊಂಕ್ಣಿ ಸಂಘಚ್ಯಾ ಸಾಂದ್ಯಾಂನಿ ಪ್ರಾರ್ಥನ್ ಗೀತ್ ಗಾಯ್ಲೆಂ. ಕೊಂಕಣಿ ಸಂಸ್ಥ್ಯಾಚಿ ಸಹಾಯಕಿ ಕು| ಡೆಲ್ವಿಟಾ ವೇಗಸಾನ್ ಕಾರ್ಯೆಂ ಚಲಯ್ಲೆಂ. ಸಾಂ ಲುವಿಸ್ ಪರಿಗಣಿತ್ ವಿಶ್ವ್’ವಿದ್ಯಾಲಯಾಚ್ಯಾ ಕೊಂಕ್ಣಿ ವಿಭಾಗಾಚಿ ಮುಖ್ಯಸ್ತಿಣ್ ಶ್ರೀಮತಿ ಫ್ಲೋರಾ ಕ್ಯಾಸ್ತೆಲಿನೊ ಹಿಣೆ ಧನ್ಯವಾದ್ ಪಾಟಯ್ಲೆಂ. ವಿವಿಧ್ ಕೊಲೆಜ್ ವಿದ್ಯಾರ್ಥಿ ತಶೆಂಚ್ ವಿಂಚ್ಣಾರ್ ಬರವ್ಪ್ಯಾಂನಿ ಹ್ಯಾ ವಿಚಾರ್ ಸಾತ್ಯಾಂತ್ ವಾಂಟೊ ಘೆತ್ಲೊ.
