lia mhaka sumar vis vorsam thaun vollkicho, boro ixtt. Mhaka vollok zal’li poilye pauttim ingrejikott’tte hottelak cha pieunko gel’lea toull. Ekdom’ mugd vyokti. Il’lixi kumer besai, kosrival soddlear dusri porgamvchi zodd taka natl’li.
Sonvara santek thoddim kosri panam, kazu bi, konngi, vhallchi baji, obolim, matea vojean vhorn gelo tor eka hofteak zai titli ghorchi ani hottelachi vorvi haddn hottelant vear korchem tachem sodanchem. Firgojent mornn zalear simestrint fonddyi kaddtalo. Sadea utramni, tomaxeamni herank lagim voddtalo. Kosoliy vaitt souy taka natl’li. Osolea xegunnank lagun mhaka to chodd chiddkol’lo. Tachea hottelant ek hun cha pieli tor mhaka sontos.
‘ingrejikott’tte’ hottel kaim vhoddlem nhoi, don bank, don mezam titlench. Tachi potinn sisil taka kumok korn mandri asl’lea titlech pam-i soddoun mareadin devo bhirantin dis sartali.
“chayecho glas tonddak dourtananch hamvem tachem mukhomoll baul’lem polloyil’lem. Az lia sodanchye borim natl’lo! kitengi khontin asa! “lia kitem khontixtt asai? az kaim vear nangi?” mhollem.
Punn to voge raulo ani bhair tillunk laglo.
“kitem lia bholaiki bori nangi?” mhollem. Punn to voge raulo.
“tujye thaun mhaka ek upkar zaijene olesa!” pimrgun lia mhonnalo.
“mhojye thaun zamvchye tosolem zalear khonddit kortam. Kitem sang!” mhollem hamvem.
“kalchea disa mhojea vhoddlye dhuvek gresik soirik polleunko cheddea ghorchim ayil’lim. Punn…?”
“punn kitem zalem, lia?”
“kitem sangchem olesa “dot dennem” mhonn 25 pamvddam bhangar vicharlam, disak kaim 300 rupoi zoddchea hamvem khoim thaun 25 pamvddam haddchim? “mhaka tujye thaun 50 hozar rupoi divonko zaitgi olesa? ani thodde khoim thaun tori tolas kortam.”
mhaka alochon suru zali. Mhojye thaun sadhy zalear khonddit upkar kortam mhonn taka hamvem utor dilam. Pon’nas hozar dimvchem kaim mhaka koxttanchem nhoi. Baban kel’li thoddi ast asa. Tem nhoi astana mhojem riyol esttett bisnes borem cholta. Khoimsoryi ek zago heranchea matear ghalo tor pon’nas hozar melltat. Poixe dimvchem kaim vhoddlem nhoi? pattim melltole mholl’llo bhorvoso mhaka natl’lo, zalearyi ixttak dil’lem utor pallijene? tem nhoi astam somajent namv, protixtta choddounko ho ek bhangrallo ovkas! hem chintun, mukli dixtt dourn, “zait lia faleanch ditam tum mukar sor…!” liachea tonddar sobar disamni poilo haso tea disa udel’lo.
Ratim nidl’lea mhaka ujvaddlolem got’tuch na.
“cha pieun zatana voram nou. Faleam dusro sonvar beank roza asa mhonn chintun beanka thaun poixe haddle ani kumer hottlak gelom ani poixe liak dile.
“tum vorto olesa! tuzo vhodd upkar zalo. Tuje he poixe ‘rinn nhoi khunnch’ mhonn chint’tam. Melear gelom, mhoji kumer asa. Vanchlear mhozo jivo addovo dourn tori tuje poixe farik kortam olesa!”
hachea uprant 3 mohineamni gresichem roni lagim kazar zal’lem. Liachea dolleamni neketrancho porzoll distalo. Dhuvechea kazarant lian ani sisilan sontos dekhl’lo.
Tin mohine utorlole titlech, sodanchye borim hamv ghora pautana, mhoji yejman katrin mhojea yenneak rakun raul’lye borinch aklasan ulounko suru kelem. “ollene, liabachi dhuv tea dis kazar zalene? tacho nouro roni sorlo khoim! taka poilench blodd keansor asl’lem khoim! pidda lipoun dourn auy bapaichem aikun kazar zal’lo khoim!” mhonnalem katri.
“blodd keansor!” liachea kuttmak vatter ghalo tannim, gresi atam gurvar soit. Taka konn got bauddeak? ani tachea ballxeachi got kitem?” oxem chintun dhamv dhamvim tanchea ghora paulom.
“sunen kedalla ghora bhitor pam-i dourlo! toullch ghoracho khambo kosoll’llo!…” mholl’lli koddu khobor thoinch mhojea kanak poddli. “pidden moronn paul’leak ani sunen ghora bhitor rigl’leak kitem sombondh?” mholl’llem mhaka orth zalona.
Hem ghoddun ek mohino zal’lo matr. Lia chodd oskot zalo. Tachem fapsol’lem mukhomoll polleun mhaka taka dil’lem rinn pattim vicharunk mon ailem na.
Ek dis lia mhaka polleun “olesa, tuvem dil’lem dotichem rinn hamv soukas farik kortam. Bezar korinaka” mhonnalaglo.
Eka mohinea uprant mil’lacho son’ni mhonnalo. “olesa, tuka hi khobor kollitnangi? ingrejikott’tte hottlacho lia sorlo ne? thoddim sangtat taka kiddni somosse asl’le ani to taka vokot kortalo khoim! ani thoddim sangtat dhuvechea kazarachea rinna khatir kiddni vikli oxem guru guru uloitat. Khoinchem sot, khoinchem fott rochl’lo deuch zanna olesa!”
“haka kitem zalengai” mhonn chintunk poddlom. Onath zal’lim tachi bail bhurgim. Tanchem tondd polleunko mhaka koxtt zale.
Liachea mornna uprant thodde dis mhakai somadhan natlem. Liachim tim utram, tachem hastem tondd, tannem dimvchi cha, hem sogllem mhojem matem bokurn asl’lem. Ekek pauttim lia moti podd’dear dhoschye borim mhaka bhogtalem ani taka dil’le te pon’nas hozar rupoi soit mhaka voge bosunk soddinatle.
Dis to nimanno sukrar. Kompounddachi gett avaz korilagli. Polloitana liachi potinn sisil bai! tichea tonddar azun bezarai majvonk natli. Tika polleunko mhaka zalem na. Tori “kitem sisil baye? sokkodd devachi manddaull. Ami kitem korunk zata mhonntana…”
“mhojea yejmanean tuka pon’nas hozar rupoi divonko asl’lene… Te pattim tuka divonko hamv ailim olesaba…”
“nhoi baye itlo vhodd oivoz tuka khoim thaun ailo?” mhonntana, xerantlea aspotrecheamni mhaka dhaddn dil’le olesaba… He poixe mhojea potin tuka divonko sangl’le” mhonn aplo palomv dolleank ghosttun chol’lli.
“mhozo jivo addovo dourn tori tujem rinn farik kortam olesa, bezar korinaka!” liachim tim utram mhaka aniki chodd khonchunk laglim.
“ham! tea dis mhozo mamv jivghat korun mel’lo hich gozal zaije. Hamvem-i mhojea babachem aikun katrichea poppa lagchem 30 pamvddam bhangar “dot dennem” mhonn ghetlem. Sarko ugddas asa. Tea lokxmonno achari kodden zokoun ghetlem. Az mhaka somzolem. Hamvem-i dot gheun katrinachea kuttmak vhodd on’nyai kela! hem chintop mhojye motik zoglannea porim marlem!
katri mhonnmunnunk laglem. “tum ani tuzo bab kaim bhageunt nhoi! tumi gheunamye? 30 pamvddam mhojea kullara thaun, mhojea baban koschem zot vikun tuka dot dil’li. Na tor az to jivont asto, ani tum-i itlo vhodd zatonam-i…!”
mhojye lagim taka pattim divonko zap natli. “olle katri, hamvem-i vhodd chuk adharlea. Tuzo poppa jivghat korunkyi hamvch karonn. Mhaka maf kor ani mukar oxem korunk nozo. “dot dennem” mholl’llye pidde thaun amchi somaz mukt zaije.
“atam mhozo poppa kitem jivont zatalo?” mhonn katri suskarlem.
“katri haka ekch prachitachi vatt asa. He mhojye lagim pon’nas hozar rupoi asat. Sisilan dhuvechea kazarak ghetl’lem rinn pattim haddn dileat. Ani thodde haka ghalun 30 pamvddam bhangar haddeam. Liachye dhakttye dhuvek ani amchea putak markuk kazar koream. Kazaracho khorch amich polleveam, kitem mhonntai katri….?”
“hum…” mhonn katrinan tokli haloili!
