1799vea vorsa mollbathaun pausa ximvor suke bhumycher ximpddatana, xrirongopottnnant bondent aslelea kenora kristamvanchea kallzamni suttke vareachi dhadoskai bhogli. Bhumycher pausa thembe ximpoddlelea uprant pachveponnachem dhankonn polloitana, panch hozar disam adim kenorant aple bhumycher varoilelea rogta ghamacho, xetam-bhattancho ani bhangrallea rongachea bhata konnxeanchi zhollok tanchea dolleam muklean paxar zali.
Pausa udkachi xellvott thonddai, zollari, kanettam, ran monzatinchi bhirant ani vikall jivdallinchi kaujenni fudd korn, tanchea mulltholla teuxim paulam kaddlim. Ani atam tancheo oskot kuddi gamvam bhomvarim ximpoddleo.
Zaiteanchi bhum-i ritich asleli. Ghoram koddkim xeuttal’lim. Posleleo monzati namv nastana gel’leo. Rite bhumycher nakari zhaddam bhorlelim ani xeta bhattanchi kosolich kuru zhollkoli na. Thoddeanchi bhum-i gamvtti lokam odin asleli ani tamnni tanchich korn nettoyil’li.
Motisuktechi, riteponnachea dobavachi porigot fudd korunk, bhuke uzo attaplelea pottank thambounko tanchelagim aslelem aid fokot hat! rite hat!!
xekddeanthaun xeta bhattanchea vaurak vollsal’lem xetkaranchem ginean, hat ani bottam he porigotik thortorlimnant. Bhomvarant gorvam, paddeam, reddeam mhoxichea xennkuttam modem kirlol’li nez, randvoi rompiancho pos kelo ani pikaullik rakle.
Monxapottache bhukeche attevitte somzon ghetlelea zhaddamni dharall foll dilem. Pausa uprantlea disamni sorkari monis gamva gamvak paule tedna eksenchallis panch kuttmamni aplebhumychi vinounni kolekttor monrok pattoili ani bhum-i kristamv loka odin zali.
Uprantlea vis vorsamni follabhorit bhum-ithaun lablelem, hea gamvchea hoveak vollsal’lem ghottayebhorit noisorgik khann seun, vaddon ayil’lea noÀve pillgechea tornatteanchea vonttancher kallbann disonk lagtam, gorea odikarimni tanchea gamvant sorkari kamacho ovkas ugoddn dilo.
Heach vellar ekek tambeachem nhannem toxem kannik zomoun kolvachem pakem ubarn thoddim devallam ubarlelim. Yazokamni devall aslele bhumycher tirveachi mafi vicharn mongllurthaun modrasak vorg zaun, uprant gournor zal’lea monrok vinounni kel’li ti monzur zali.
Kristamv lokak lableli sorkari soulot polleun, xherathaun sorkari vaurak chiddkal’lo gamvcho lok khuball’llo ani xintrallea vaurak laglo. Tanchea pongddathaun sorkari khozanak pamvcho duddu oskot kelo.
Hea vorvim sorkarak, kristamv lok sorkari kamank nafavo toxem kollounni paxar zateli toxem chintlem tamnni. Tokleam tokleanthaun sorkari kamamni vollson mahet asl’le odikari gorea sorkara odin aslele, tamnni gamvam gamvamni guddacharink pattoile ani khori gozal somzon ghetli.
Kristamv tornatteank nomearlelekhatir, devallank tirvo mafi kel’lekhatir edoll sorkari kamacher gunddayechim pallam romboun ghetleleanchem nasomadan choddlem ani ghuttmoll ruta zali.
Chirputt marn hea lokak sorkari kamathaun mekllem korchi tank goreank asl’li.
Punn tanchethaun ubzal’lem riteponn bhorti kortele gamvar natlele; gamvtti lokak aplea dauleamni addchon dhorcheant te edoll jikl’le.
Kristamvanchi novi pillgi azun sorkari kamache mahetint ballponnar asl’li. 1830vea vorsa thoddo tirvo mafi korn khozanak bhoroilo.
Riteponnak utron bhorvoxea kuxik mettam kaddchea kristamvank mukli vatt kitem? gorea odikarimni chintlem, sorkari kam’? xetambhattancho vaur?
eka sokallar sorkari vaurar aslelea kristamv tornatteank eka bhattalagim gheun gelo goro odikari ani bhomvarim aslelea maddiam kuxik bott zoklem. “maddiamni pikim popllam sobtat nhoi?” tornatteamni tokli haloili. “hea maddiank aniki choddit sobounko zata. He bhumycher maddianchi ani miriachi soirik kaim don hozar vorsam adli.”
“punn az soglleamni riteo maddio?” eka tornattean kaujennen vicharlem.
“maddianchea riteponnak karonn ttippu… Ttippu sultan” sangolaglo goro odikari. Tornatteanchea pattikonnantlean kaujennecho xirxiro paxar zalo ani ghoddea gellancho avaz aikonk laglo toxem bhoglem.
“ami gore mongllurchea bhomvarim yeun pautastam, kallem bhangar mhonn ollkonchea mirianche sodner aileamv mhonn tanne chintlem ani gamvantleo sorv miriamvali tanne nas koroileo.” ghoddibhor thamblo goro odikari. “tea vorvim he matiecher borem foll diunko sokchi mirvol allvoli.”
“atam tumche mukar ek vinchounn dourtam.” tanne lagxilea chirefatran ubarlelea penttalle teuxim bott zoklem. Penttallecher gidachea pakanthaun kel’li liknni ani tint bhorlelem tinter asl’lem. Penttalle mullant kemllbe khole xera ritir bandun tantun munge ayil’le miriavaliche fantte asl’le. “kenorantlea lokachi, xetkaranche vaddaullichi survat tumchethaun zaunko zai; ovkas vinchchem kam’ tumchem.” odikarin penttalle kuxin bott zoklem. Suddsuddit mettam kaddn tornatte penttalle sorxim paule.
Tornatteanchi vinchounn polleun gorea odikarin chintlem, `hea torneatteank somajicho husko somzon ghemvcho dixttavo asl’lo tor, te veglli vinchounn korte.’ tto
