ദോത് ദെണെം

ലിയാ മ്ഹാകാ സുമാർ വീസ് വർസാം ഥാവ്ന് വൾകിചൊ, ബരൊ ഇഷ്ട്. മ്ഹാകാ വളക് ജാല്ലി പയ്ല്യെ പാവ്ടിം ഇംഗ്രെജികട്ടെ ഹൊടെലാക് ചാ പിയെംവ്ക് ഗെല്ല്യാ തവൾ. എക്ദം മുഗ്ദ് വ്യക്തി. ഇല്ലിശി കുമെർ ബെസായ്, കസ്രിവാൽ സൊഡ്ല്യാർ ദുസ്രി പർഗാംവ്ചി ജോഡ് താകാ നാത്ല്ലി.

സന്വാരാ സാന്തെക് ഥൊഡിം കസ്രി പാനാം, കാജു ബി, കൺഗി, വ്ഹാൾചി ബാജി, അബൊലിം, മാത്യാ വൊജ്യാൻ വ്ഹർൻ ഗെലൊ തർ എകാ ഹഫ്ത്യാക് ജായ് തിത്ലി ഘർചി ആനി ഹൊടെലാചി വൊർവി ഹാഡ്ന് ഹൊടെലാന്ത് വ്യാർ കർചെം താചെം സദാഞ്ചെം. ഫിർഗജെന്ത് മർൺ ജാല്യാർ സിമെസ്ത്രിന്ത് ഫൊണ്ഡ്യി കാഡ്താലൊ. സാദ്യാ ഉത്രാംനി, തമാഷ്യാംനി ഹെരാങ്ക് ലാഗിം വൊഡ്താലൊ. കസലിയ് വായ്ട് സവയ് താകാ നാത്ല്ലി. അസല്യാ ശെഗുണാങ്ക് ലാഗുൻ മ്ഹാകാ തൊ ചഡ് ചിഡ്കല്ലൊ. താച്യാ ഹൊടെലാന്ത് ഏക് ഹുൻ ചാ പിയെലി തർ മ്ഹാകാ സന്തൊസ്.

‘ഇംഗ്രെജികട്ടെ’ ഹൊടെൽ കാംയ് വ്ഹഡ്ലെം ൻഹയ്, ദോൻ ബാങ്ക്, ദോൻ മെജാം തിത്ലെഞ്ച്. താചി പതിൺ സിസിൽ താകാ കുമക് കർൻ മാന്ദ്രി ആസ്ല്ല്യാ തിത്ലെച് പാംയ് സൊഡൊവ്ന് മാര്യാദിൻ ദേവ് ഭിരാന്തിൻ ദീസ് സാർതാലി.

“ചായെചൊ ഗ്ലാസ് തൊണ്ഡാക് ദവർതാനാഞ്ച് ഹാംവെം താചെം മുഖമൾ ബാവ്ല്ലെം പളയില്ലെം. ആജ് ലിയാ സദാഞ്ച്യെ ബരിം നാത്ല്ലൊ! കിതെംഗി ഖന്തിൻ ആസാ! “ലിയാ കിതെം ഖന്തിഷ്ട് ആസായ്? ആജ് കാംയ് വ്യാർ നാംഗി?” മ്ഹളെം.

പൂൺ തൊ വൊഗെ രാവ്ലൊ ആനി ഭായ്ര് തിളുങ്ക് ലാഗ്ലൊ.

“കിതെം ലിയാ ഭലായ്കി ബരി നാംഗി?” മ്ഹളെം. പൂൺ തൊ വൊഗെ രാവ്ലൊ.

“തുജ്യെ ഥാവ്ന് മ്ഹാകാ ഏക് ഉപ്കാർ ജായ്ജെനെ അലെസാ!” പിംർഗുൻ ലിയാ മ്ഹണാലൊ.

“മ്ഹജ്യെ ഥാവ്ന് ജാംവ്ച്യെ തസലെം ജാല്യാർ ഖണ്ഡിത് കർതാം. കിതെം സാംഗ്!” മ്ഹളെം ഹാംവെം.

“കാൽച്യാ ദിസാ മ്ഹജ്യാ വ്ഹഡ്ല്യെ ധുവെക് ഗ്രേസിക് സയ്രിക് പളെംവ്ക് ചെഡ്യാ ഘർചിം ആയില്ലിം.  പൂൺ…?”

“പൂൺ കിതെം ജാലെം, ലിയാ?”

“കിതെം സാംഗ്ചെം അലെസാ “ദോത് ദെണെം” മ്ഹൺ 25 പാംവ്ഡാം ഭാംഗാർ വിചാർലാം, ദിസാക് കാംയ് 300 രുപയ് ജൊഡ്ച്യാ ഹാംവെം ഖംയ് ഥാവ്ന് 25 പാംവ്ഡാം ഹാഡ്ചിം?  “മ്ഹാകാ തുജ്യെ ഥാവ്ന് 50 ഹജാർ രുപയ് ദിംവ്ക് ജായ്ത്ഗി അലെസാ? ആനി ഥൊഡെ ഖംയ് ഥാവ്ന് തരി തലാസ് കർതാം.”

മ്ഹാകാ ആലൊചൻ സുരു ജാലി. മ്ഹജ്യെ ഥാവ്ന് സാധ്യ് ജാല്യാർ ഖണ്ഡിത് ഉപ്കാർ കർതാം മ്ഹൺ താകാ ഹാംവെം ഉതർ ദിലാം. പന്നാസ് ഹജാർ ദിംവ്ചെം കാംയ് മ്ഹാകാ കഷ്ടാഞ്ചെം ൻഹയ്. ബാബാൻ കെല്ലി ഥൊഡി ആസ്ത് ആസാ. തെം ൻഹയ് ആസ്താനാ മ്ഹജെം രിയൽ എസ്ടേട് ബിസ്നെസ് ബരെം ചൽതാ. ഖംയ്സര്യി ഏക് ജാഗൊ ഹെരാഞ്ച്യാ മാത്യാർ ഘാലൊ തർ പന്നാസ് ഹജാർ മെൾതാത്. പയ്ശെ ദിംവ്ചെം കാംയ് വ്ഹഡ്ലെം ൻഹയ്? പാടിം മെൾതലെ മ്ഹള്ളൊ ഭർവസൊ മ്ഹാകാ നാത്ല്ലൊ, ജാല്യാര്യി ഇഷ്ടാക് ദില്ലെം ഉതർ പാളിജെനെ? തെം ൻഹയ് ആസ്താം സമാജെന്ത് നാംവ്, പ്രതിഷ്ടാ ചഡൊംവ്ക് ഹൊ ഏക് ഭാംഗ്രാളൊ അവ്കാസ്! ഹെം ചിന്തുൻ, മുക്ലി ദീഷ്ട് ദവർൻ, “ജായ്ത് ലിയാ ഫാല്യാഞ്ച് ദിതാം തും മുകാർ സർ…!”   ലിയാച്യാ തൊണ്ഡാർ സബാർ ദിസാംനി പയ്ലൊ ഹാസൊ ത്യാ ദിസാ ഉദെല്ലൊ.

രാതിം നിദ്ല്ല്യാ മ്ഹാകാ   ഉജ്വാഡ്ലലെം ഗൊത്തുച് നാ.

“ചാ പിയെവ്ന് ജാതാനാ വരാം നവ്. ഫാല്യാം ദുസ്രൊ സന്വാർ ബ്യാങ്ക് രജാ ആസാ മ്ഹൺ ചിന്തുൻ ബ്യാങ്കാ ഥാവ്ന് പയ്ശെ ഹാഡ്ലെ ആനി കുമെർ ഹൊട്ലാക് ഗെലൊം ആനി പയ്ശെ ലിയാക് ദിലെ.

“തും വർതൊ അലെസാ! തുജൊ വ്ഹഡ് ഉപ്കാർ ജാലൊ. തുജെ ഹെ പയ്ശെ ‘രീൺ ൻഹയ് ഖുൺച്’ മ്ഹൺ ചിന്ത്താം. മെല്യാർ ഗെലൊം, മ്ഹജി കുമെർ ആസാ. വാഞ്ച്ല്യാർ മ്ഹജൊ ജീവ് ആഡൊവ് ദവർൻ തരി തുജെ പയ്ശെ ഫാരിക് കർതാം അലെസാ!”

ഹാച്യാ ഉപ്രാന്ത് 3 മഹിന്യാംനി ഗ്രേസിചെം രൊനി ലാഗിം കാജാർ ജാല്ലെം. ലിയാച്യാ ദൊള്യാംനി നെകെത്രാഞ്ചൊ പർജൾ ദിസ്താലൊ. ധുവെച്യാ കാജാരാന്ത് ലിയാൻ ആനി സിസിലാൻ സന്തൊസ് ദെഖ്ല്ലൊ.

തീൻ മഹിനെ ഉതർലലെ തിത്ലെച്, സദാഞ്ച്യെ ബരിം ഹാംവ് ഘരാ പാവ്താനാ, മ്ഹജി യെജ്മാൻ കാത്രിൻ മ്ഹജ്യാ യെണ്യാക് രാകുൻ രാവ്ല്ല്യെ ബരിഞ്ച് ആക്ലാസാൻ ഉലൊംവ്ക് സുരു കെലെം. “അളെനെ, ലിയാബാചി ധുവ് ത്യാ ദീസ് കാജാർ ജാലെനെ? താചൊ നവ്രൊ രൊനി സർലൊ ഖംയ്! താകാ പയ്ലെഞ്ച് ബ്ലഡ് ക്യാൻസർ ആസ്ല്ലെം ഖംയ്! പിഡാ ലിപൊവ്ന് ദവർൻ ആവയ് ബാപായ്ചെം ആയ്കുൻ കാജാർ ജാല്ലൊ ഖംയ്!” മ്ഹണാലെം കാത്രി.

“ബ്ലഡ് ക്യാൻസർ!” ലിയാച്യാ കുട്മാക് വാടെർ ഘാലൊ താണിം,  ഗ്രേസി ആതാം ഗുർവാർ സയ്ത്. താകാ കൊൺ ഗത് ബാവ്ഡ്യാക്? ആനി താച്യാ ബാൾശ്യാചി ഗത് കിതെം?” അശെം ചിന്തുൻ ധാംവ് ധാംവിം താഞ്ച്യാ ഘരാ പാവ്ലൊം.

“സുനെൻ കെദാളാ ഘരാ ഭിതർ പാംയ് ദവർലൊ! തവൾച് ഘരാചൊ ഖാംബൊ കൊസള്ളൊ!…” മ്ഹള്ളി കൊഡു ഖബർ ഥംയ്ച് മ്ഹജ്യാ കാനാക് പഡ്ലി. “പിഡെൻ മരൺ പാവ്ല്ല്യാക് ആനി സുനെൻ ഘരാ ഭിതർ രിഗ്ല്ല്യാക് കിതെം സംബന്ധ്?” മ്ഹള്ളെം മ്ഹാകാ അർഥ് ജാലൊനാ.

ഹെം ഘഡുൻ ഏക് മഹിനൊ ജാല്ലൊ മാത്ര്. ലിയാ ചഡ് അസ്കത് ജാലൊ. താചെം ഫാപ്സല്ലെം മുഖമൾ പളെവ്ന് മ്ഹാകാ താകാ ദില്ലെം രീൺ പാടിം വിചാരുങ്ക് മൻ ആയ്ലെം നാ.

ഏക് ദീസ് ലിയാ മ്ഹാകാ പളെവ്ന് “അലെസാ, തുവെം ദില്ലെം ദൊതിചെം രീൺ ഹാംവ് സവ്കാസ് ഫാരിക് കർതാം. ബെജാർ കരിനാകാ” മ്ഹണാലാഗ്ലൊ.

എകാ മഹിന്യാ ഉപ്രാന്ത്   മില്ലാചൊ സന്നി മ്ഹണാലൊ. “അലെസാ, തുകാ ഹി ഖബർ കളിത്നാംഗി? ഇംഗ്രെജികട്ടെ ഹൊട്ലാചൊ ലിയാ സർലൊ നെ? ഥൊഡിം സാംഗ്താത് താകാ കിഡ്നി സമസ്സെ ആസ്ല്ലെ ആനി തൊ താകാ വകത് കർതാലൊ ഖംയ്! ആനി ഥൊഡിം സാംഗ്താത് ധുവെച്യാ കാജാരാച്യാ രിണാ ഖാതിർ കിഡ്നി വിക്ലി അശെം ഗുരു ഗുരു ഉലയ്താത്. ഖംയ്ചെം സത്, ഖംയ്ചെം ഫട് രച്ല്ലൊ ദേവ്ച് ജാണാ അലെസാ!”

“ഹാകാ കിതെം ജാലെംഗായ്” മ്ഹൺ ചിന്തുങ്ക് പഡ്ലൊം. അനാഥ് ജാല്ലിം താചി ബായ്ല് ഭുർഗിം. താഞ്ചെം തൊണ്ഡ് പളെംവ്ക് മ്ഹാകാ കഷ്ട് ജാലെ.

ലിയാച്യാ മർണാ ഉപ്രാന്ത് ഥൊഡെ ദീസ് മ്ഹാകായ് സമാധാൻ നാത്ലെം. ലിയാചിം തിം ഉത്രാം, താചെം ഹാസ്തെം തൊണ്ഡ്, താണെം ദിംവ്ചി ചാ, ഹെം സഗ്ളെം മ്ഹജെം മാതെം ബൊകുർൻ ആസ്ല്ലെം. എകെക് പാവ്ടിം ലിയാ മതി പഡ്ദ്യാർ ധൊസ്ച്യെ ബരിം മ്ഹാകാ ഭൊഗ്താലെം ആനി താകാ ദില്ലെ തെ പന്നാസ് ഹജാർ രുപയ് സയ്ത് മ്ഹാകാ വൊഗെ ബസുങ്ക് സൊഡിനാത്ലെ.

ദീസ് തൊ നിമാണൊ സുക്രാർ.  കംപൌണ്ഡാചി ഗേട് ആവാജ് കരിലാഗ്ലി. പളയ്താനാ ലിയാചി പതിൺ സിസിൽ ബായ്! തിച്യാ തൊണ്ഡാർ ആജുൻ ബെജാരായ് മാജ്വൊങ്ക് നാത്ലി. തികാ പളെംവ്ക് മ്ഹാകാ ജാലെം നാ. തരി “കിതെം സിസിൽ ബായെ? സക്കഡ് ദെവാചി മാണ്ഡാവൾ. ആമി കിതെം കരുങ്ക് ജാതാ മ്ഹൺതാനാ…”

“മ്ഹജ്യാ യെജ്മാന്യാൻ തുകാ പന്നാസ് ഹജാർ രുപയ് ദിംവ്ക് ആസ്ല്ലെനെ… തെ പാടിം തുകാ ദിംവ്ക് ഹാംവ് ആയ്ലിം അലെസാബാ…”

“ൻഹയ് ബായെ ഇത്ലൊ വ്ഹഡ് ഐവജ് തുകാ ഖംയ് ഥാവ്ന് ആയ്ലൊ?” മ്ഹൺതാനാ, ശെരാന്ത്ല്യാ ആസ്പത്രെച്യാംനി മ്ഹാകാ ധാഡ്ന് ദില്ലെ അലെസാബാ… ഹെ പയ്ശെ മ്ഹജ്യാ പതിൻ തുകാ ദിംവ്ക് സാംഗ്ല്ലെ” മ്ഹൺ ആപ്ലൊ പാലൊംവ് ദൊള്യാങ്ക് ഘസ്ടുൻ ചല്ല്ലി.

“മ്ഹജൊ ജീവ് ആഡൊവ് ദവർൻ തരി തുജെം രീൺ ഫാരിക് കർതാം അലെസാ, ബെജാർ കരിനാകാ!” ലിയാചിം തിം ഉത്രാം മ്ഹാകാ ആനികി ചഡ് ഖഞ്ചുങ്ക് ലാഗ്ലിം.

“ഹാം! ത്യാ ദീസ് മ്ഹജൊ മാംവ് ജിവ്ഘാത് കരുൻ മെല്ലൊ ഹിച് ഗജാൽ ജായ്ജെ. ഹാംവെംയ് മ്ഹജ്യാ ബാബാചെം ആയ്കുൻ കാത്രിച്യാ പപ്പാ ലാഗ്ചെം 30 പാംവ്ഡാം ഭാംഗാർ “ദോത് ദെണെം” മ്ഹൺ ഘെത്ലെം. സാർകൊ ഉഗ്ഡാസ് ആസാ. ത്യാ ലക്ഷ്മണ ആചാരി കഡെൻ ജൊകൊവ്ന് ഘെത്ലെം. ആജ് മ്ഹാകാ സമ്ജലെം. ഹാംവെംയ് ദോത് ഘെവ്ന് കാത്രിനാച്യാ കുട്മാക് വ്ഹഡ് അന്ന്യായ് കെലാ! ഹെം ചിന്തപ് മ്ഹജ്യെ മതിക് ജഗ്ലാണ്യാ പരിം മാർലെം!

കാത്രി മ്ഹണ്മുണുങ്ക് ലാഗ്ലെം. “തും ആനി തുജൊ ബാബ് കാംയ് ഭാഗെവന്ത് ൻഹയ്! തുമി ഘെവ്നാംയെ? 30 പാംവ്ഡാം മ്ഹജ്യാ കുളാരാ ഥാവ്ന്, മ്ഹജ്യാ ബാബാൻ കൊസ്ചെം ജോത് വികുൻ തുകാ ദോത് ദില്ലി. നാ തർ ആജ് തൊ ജിവന്ത് ആസ്തൊ, ആനി തുംയ് ഇത്ലൊ വ്ഹഡ് ജാതൊനാംയ്…!”

മ്ഹജ്യെ ലാഗിം താകാ പാടിം ദിംവ്ക് ജാപ് നാത്ലി. “അളെ കാത്രി, ഹാംവെംയ് വ്ഹഡ് ചൂക് ആധാർല്യാ. തുജൊ പപ്പാ ജിവ്ഘാത് കരുങ്ക്യി ഹാംവ്ച് കാരൺ. മ്ഹാകാ മാഫ് കർ ആനി മുകാർ അശെം കരുങ്ക് നജൊ. “ദോത് ദെണെം” മ്ഹള്ള്യെ പിഡെ ഥാവ്ന് ആമ്ചി സമാജ് മുക്ത് ജായ്ജെ.

“ആതാം മ്ഹജൊ പപ്പാ കിതെം ജിവന്ത് ജാതാലൊ?” മ്ഹൺ കാത്രി സുസ്കാർലെം.

“കാത്രി ഹാകാ എക്ച് പ്രാചിതാചി വാട് ആസാ. ഹെ മ്ഹജ്യെ ലാഗിം പന്നാസ് ഹജാർ രുപയ് ആസാത്. സിസിലാൻ ധുവെച്യാ കാജാരാക് ഘെത്ല്ലെം രീൺ പാടിം ഹാഡ്ന് ദില്യാത്. ആനി ഥൊഡെ ഹാകാ ഘാലുൻ 30 പാംവ്ഡാം ഭാംഗാർ ഹാഡ്യാം. ലിയാച്യെ ധാക്ട്യെ ധുവെക് ആനി ആമ്ച്യാ പുതാക് മാർകുക് കാജാർ കര്യാം. കാജാരാചൊ ഖർച് ആമിച് പളെവ്യാം,  കിതെം മ്ഹൺതായ് കാത്രി….?”

“ഹും…” മ്ഹൺ കാത്രിനാൻ തക്ലി ഹാലയ്ലി!