Kendr Sahity Akademi ani sam Louis porigonnit videapitthocho konkonni somstho hanchea zodd asreakhal konkonni kovi Louis Mascarenhas hachea sahiteacher ʻsahity monchʼ karyem 16 febhrer 2024 ver sam Louis porigonnit videapitth hachea rabortt sikvera solant manddun haddl’lem.
Sam Luvis porigonnit videapitthacho rejisttrar do. Alwyn Dʼsa, namnnecho konkonni kovi, Sahity Akademichea konkonni soloha somiticho nimontrok manest Melvyn Rodrigues, Sahity Akademi konkonni solohagar somiticho vangddi xri Henry Mendonca (H. M. Pernal), konkonni somstheacho direktor do. Fa. Melvyn Pinto ani konkonni somstheacho karyem somyozok xri Joachim Pinto vedir asl’lle.
Do. Alvin D’sa hannim zoml’leank boro yeukar magon kareacho disttavo dilo. Sahity monchache mukhel dhyey kitem mholl’llevixim-i tanni mahet dili.
Xri Henry Mendonca hannim yedollch Sahity Akademin ayojit kel’lea kareavixim ani muklea disamni cholounko aschea karea vixim-i mahet dili.
Hea kareavellar xri Louis Mascarenhas hachem jivit ani sahity kritiancher char propotram monddon zalim. Famad lekhok toxench kornattoko konkonni Sahity Akademi proxosti vijet xri Dolfi Kassia hannim `Louis Mascarenhas hachem jivit ani kritio’ xri Melvyn Rodrigues hannim `Louis Mascarenhas hachea kovitemni chhond’, `Raknno’ hoptealleacho adlo sompadok fa. Francis Rodrigues hannim ‘sompadok zaun Louis Mascarenhas’ toxench famad nattokkar do. Fa. Alwyn Serao hamnni `nattokkar zaun Louis Mascarenhas’ mholl’llea vixoyancher probondh monddon kele. Do. Fa. Melwyn S. Pinto sobha choloinnar zaunasl’le.
Xri Marvin Sequeira hanne karyem choloilem. Xri Franklin Castelino ani pongddan dhyey git gailem. Ku| Delvito Veigas hinne sobha choloinnarachi porichoi vachli. Xri Joachim Pinto hanne dhonyovad pattoile
.
