‘कोंकणी भाशेक बरो फुडार आसा, देकून कोंकणी बरवप्यांनी चिंत्नान आनी बर्पान फुडें सराजे, ‘निस्रोन पडल्ल्याक लोटून घाल्चो’ मनोभाव सांडून, भाशेच्या फुडाराचे दिश्टीन एकवटान फुडें सराजे. आतां परिगत बदल्ल्या – कोंकणिच्या सेवेक बरोच पाटिंबो लाबता. एका काळार कोंकणेची सेवा केल्ल्या मालघड्यांनी कांय जोडच्या बदलाक होगडायिल्लेंच चड. तरी, ताणी आपल्या मांयभाशेक सांबाळन हाडलां तें विस्रानाये…” अशें म्हणालो नांवाडदीक कोंकणी बरवपी, पत्रकर्त श्री हेमाचाऱ्य एपरील ३० तारिकेर नंतूर्च्या संदेशा मिनी सभा सालांत चलल्ल्या ‘मुक्त मुलाखत’ काऱ्यावेळीं. कोंकणी लेखक संघ, कर्नाटक हाणीं हें काऱ्यें मांडून हाडल्लें. श्री लोयड रेगो ताकोडे हाणें श्री हेमाचाऱ्य संगीं मुलखात चलयली.
मुलाखते वेळार हेमाचाऱ्यान आपल्या बाळपणाविशीं, पत्रिकोध्यमाविशीं, साहीत वावराविशीं तशेंच नाटक आनी टिवी माध्यमाविशीं आपलो अनबोग जमल्ल्या ताच्या अभिमानीं संगीं वांटून घेतलो.
ह्या काऱ्याच्या भागांत श्री रिच्ची मिरांद हाणे बरयिल्लो ‘गुलोबाच्यो पाकळ्यो’ म्हळ्ळो बूक श्री एच. आर. आळवा हाणें मोकळीक केलो. बूक मोकळीक कर्न उलयिल्लो श्री एच.आर. आळव- बूकांत बरयिल्लें शाश्वीत. देकून कोंकेंत चड आनी चड बूक येजे, न्हय फकत कवितांचे, अपरूब काणियांचे, बगार हर नमून्याचे बूक येजे. एका भाशेच्या उदर्गतेक त्या भाशेंत येंवचें विवीद प्रकाराचें साहित्य कारण जाता. देकून कोंकणिंत विवीद प्रकाराचें साहित्ययी बुका रुपीं उज्वाडाक येंवदी म्हण आंवडेतां’ अशें म्हणालो.
काऱ्याच्या सुर्वेर कोंकणी लेखक संघ हाच्या सुंकाण समितिच्या मानेसत रिचर्ड मोरास हाणे प्रासतावीक उलवप दीवन सर्वांक स्वागत मागलो. मानेसत अनील डी’कुन्हा हाणे काऱ्यें चलयलें. श्रीमती फेल्सी लोबो हिणें धन्यवाद अर्पिले.
