മതിന്ത് ഏക് ദിഷ്ടാവൊ ആസ്ല്യാർ
മുഖ്ലി വാട് അപാപിം ദിസ്താ
ജിയെംവ്ക് ഏക് കാരൺ ലാഭ്താ
തുംവെ മ്ഹാകാ സാണ്ഡുൻ വെതനാം
ഏക് മജ്ബൂത് കാരൺ ദിലെംയ്
‘തുജ്യാ ബാളാഞ്ചി ജതൻ’
തും ആസ്തനാം, ഖന്തിവിൺ ജിയെലിം
തും നാസ്തനാം, ഭിരാന്ത് ഭൊഗ്ലി
ഭുഗ്ര്യാങ്ക് ദെഖ്താനാം, ജിയെംവ്ക് പ്രേരൺ മെള്ളെം…
തുകാ ദെവാൻ വെല്യാ ഉപ്രാന്ത്
നെണ്ടി ആസ്ല്ലി ഹാംവ് ജാണ്ടി ജാലിം
ബാളാങ്ക് ആമ്ച്യാ സാംബാളുങ്ക് ലാഗ്ലിം…
താങ്കാം ആവയ് ബാപുയ് ഹാംവ്ച് ജാലിം
സർവ് ഖുശി താങ്കാം ദിലിം
സദാഞ്ച് താഞ്ചൊം പാടിംബൊ ജാലിം…
മുഖ്ല്യാ വാടെക് സാംഗാതി ദിതനാം ദെവാൻ
നാകാച് മ്ഹൺ സാംഗൊങ്ക് ലാഗ്ലിം
വ്ഹഡിലാംനി സമ്ജയ്ലെം; ആധാർ ജാതെലൊ ജിണ്യെക് മ്ഹൺ…
തുജെം ഉണെംപൺ ഭർൻ ദീംവ്ക് കൊണാച്യാൻയ് സാധ് നാം
താച്യാൻ ജാതാ തിത്ലെം കർതാം മ്ഹൺ തൊ മുഖാർ സർലൊ
ആമിയ് താകാ അപ്ണായ്ലൊ…
ആജ് പര്യാന്ത് ആമാം സർവാംഖാതിർ
തൊ താചെം കർതവ്യ് കരിത് ആസാ
ഹെം പളെവ്ന്, തുംയ് ഖുശ് ആസായ് മ്ഹൺ ഭർവസ്താം…
തുംവെ ദീവ്ന് ഗെല്ല്യാ ദിഷ്ടാവ്യാസംഗിം
മുഖാർസിതാ ഹെം പയ്ണ്
തുംവെ ആമ്കാ ദില്ല്യാ ബെസാംവാസവെം…
ആജ് പര്യാന്ത് മാൺകാഞ്ചിം ആമ്ച്യാ ജതൻ ഘെത്ല്യാ
തുംവെ ഗർവ് ഭൊഗ്ച്യാപരിം വാഡയ്ലാം
വോത് തുജ്യാ മൊഗാചൊ പാവ്സ് ആമ്ചെർ സദാം…!
