ലാംപ്യാംവാചൊ അർസൊ ഫുട്താനാ

ത്യാ സാഞ്ജെർ ധാംവ്ച്യാ ജർല്യാക് ധരുങ്ക് മാജാർ മെജാക് ഉഡ്താനാ ലാംപ്യാംവ്

By

ത്യാ സാഞ്ജെർ

ധാംവ്ച്യാ ജർല്യാക് ധരുങ്ക്

മാജാർ മെജാക് ഉഡ്താനാ

ലാംപ്യാംവ് ലകൊൻ അർസൊ ഫുടല്ലൊ

 

ത്യാ രാതിം

ലാംപ്യാവാചൊ ഉജ്വാഡ്

എക്ദം മുക്ത് ജാവ്ന്  വ്ഹാൾതാനാ

അൽതാരി കുഡാന്ത് ഭരുൻ വൊമ്തൊഞ്ചൊ പ്രകാസ്!

ൽഹാൻ ൽഹാൻ പിസൊള്യാങ്ക് പിശെം കർചൊ ഉല്ലാസ്!!

 

ത്യാ പർജളാന്ത്…

മജ്യാ പൊക്രിപണാചാ ഖെളാൻ, കൊപൊ ഉസ്ളൊൻ ഘായെല്ല്യാ

വൊണൊദിചെ മാതിയെ കൺ മൊതിയാം പരിം ഹാസ്ചെ ദിസ്താനാ…

ജെജുചാ പവിത്ര് കാൾജാചാ പായ്നെലാ പാട്ല്യാൻ

കൊവയില്ല്യാ രാമാ ചുഡെതിചാ ഖുർസാ ഭൊംവ്തിം

ഫെസ്താചാ തൊർണാം പരിം സുംർഗാരുൻ രാവല്ലൊ

ഗയ്ര് ഉജ്വാഡാക് ദിസാനാതല്ലൊ ഗയ്രെം

മുക്ത് പ്രകാസാന്ത് ധലൊൻ ഹാസ്താനാ…

 

തെർസാ വെളാർ ഹാംവ് ഹാസ്ലൊം

കെദ്നാംയ് ഹാസനാതല്ലി ഗംഭീർ മ്ഹജി മാംയ് സയ്ത്

തഡ്വാനാസ്താം കുസ്ക് കർൻ ഹാസ്താനാ

ബാബ് ഹാസ്ലൊ

മാഗ്ണ്യാവെളിംയ് ബിഡിയൊ ബാന്ദുൻ ആസല്ലെം

ബായ് വ്ഹഡ്ല്യാൻ ഹാസ്ലെം

ദട്ടുയ് ഹാസ്ലൊ

മാമാചാ വർസാചാ മിസാക്

ആപംവ്ക് ആയില്ലി മാമിയ് ഹാസ്ലി

മസ്ക് പ്രകാസാന്ത് കുസ്കാല്ലിം മുസ്കരാം

ആജ് ഫുലല്ലിം, ഹാസ്താലിം.

ഖുർസാർ ഉമ്കാൾചൊ ക്രീസ്ത്

ആനി ബഗ്ലെന്ത് ദുഖി മാതെചാ മുഖമളാർ

ഹാസ്യാചൊ പ്രകാസ് പർജൾതാനാ

വാഞ്ജെലാന്ത്ലെ സബ്ദ് സയ്ത്

ഉഗ്തെ ജാവ്ന് ഹാസ്ചെപരിം ദിസ്ലെ!

ഹ്യാ ഹാസ്യാൻ വ്ഹഡ്ല്യാൻ ഗായ്ലെലി കന്തിഗ്

അഞ്ജാങ്ക് ജാഗംവ്ന് ഹാസംവ്ക് ലാഗ്ലി!

 

സക്ഡാം ഹാസ്ലിം ബെശ്ടെം ബെശ്ടെം

വിചിത്ര് സന്തൊസാൻ

മുക്ത് ഉജ്വാഡാന്ത്  പർജൾച്യാ ത്യാ  കൂഡാന്ത്

മെന്ദു മന്ദ് കർചിം ധാംപ്ണിം

തുടൊൻ ഫുടൊൻ ഗെല്ല്യെപരിം!

Leave a Comment

Your email address will not be published.

You may also like

Latest Posts