Kuxllottai tigoun douroya

By

disan dis monis aplea veapan itlo ghuspun vochot asa taka matpunn visou gheunk fursot na mhonnpachem tachea vagnnea voilean konney parkhum yeta. Ken’na-ken’na ghora bhair kitem chol’lam tacho odmas amkam yena. Ami bhair vochun tacho odmas gheucho yotn korinat. Adim monis zagrit astalo aplea oys-pois kitem chol’lam hachi vaspus kortalo. Hacho orth adlea tempar monis bekar axil’lo oso matuy nhoi am. Monis adim’ kalla saun aplea kamant guthil’loch punn tea vellar apleak favo toso vell to ditalo ani apleo gorzo simit dourun to choltalo. Atam amcheo gorzo vaddleat amche modim sorti korpi vaddil’lea karnnan aple kam’-dhondo samballopak kosrot korchi poddtta hem veglle sangpachi goroz poddna. Apli disoptt’tti kamam, bhurgeanche xikxonn tanchea fuddaracheo yeujnneo ankhta mhonnsor monxak nakapuro zata, ani oxa vellar ek gozal bhouch zannouta ti mhonnlear amche zanntte oxe poristhitintlean koxe gele astole kai ? tamnni koxe toren youjnneo akhil’leo kai ? halimsoram choddxe gõykar ‘hom’ do homare do’ ghoxvakea promann simit ghorabo dourota tori legit amchea koplar sodanch atteo. Amchea zanntteank so te atth bhurgim astali, atam sarkeo sukh soyi tor bilkul naxil’leo punn tannim aplea bhurgeank kainch unne poddunk divonk naxil’lem aple oipti promann vaddoil’le. Oxe onek prosn vortoman kallant jietlea tuje mhoje sarkea samany monxak poddum yeta. Bhovo thodde monis asat je aplea disoptt’ttea vaurachi ankhnni korun chintna viroit vavurotat. He babtit bail monxechi tokhnnai korchich poddttoli ti dadlea poros chodd sonxik zal’lean kosli-i addkholl poisaupachem samrthy tiche lagi asa. Zonn eka dadleachea zoita fattlean bailen dil’lo palou ani tinne kel’lo teag asta mhonnlear otitai zauchi nhoi.

Monxan sodanch vellache bondhon pallunk zai hi gozal khori punn payank rodam bandun nhoi am. Fattlim kaim vorsam hamv polloita ami monis dhamv-dhamv kortat. Sogle ekech mallyeche monni zal’le vori vagtat, sogleancheo oddchonni legit ek sarkeoch. Amchi dhamvpolli jinn polloitokoch ‘fursot’ hem utor monxachea xobdokoxantlean gollun poddlam oso mhozo tori somoz zal’lo asa. Hacher upai konne sodop ? amich nhoi ? punn toso upai sodunk amkam opes aile mhunn ghoddye ochkit brek lagil’le vori jinn thambli, usont gheunk soiman amkam vell dilo, dhamvpi monis ghorant bosun raule. Monxachea hatun chuko zataleo ani tachi dokhol gheuchi mhunn soiman aplo ingllo dakhoilo kai kitem? oxey vichar tumchyai monant aile bogor rauche nat. Zaite zonnanchea monant ailyai asot. ‘jivo aslear bhik magun khain’ he mhonnicho sarko boro orth amkam hea dhami vellar koll’llo hatunt dubavo na. Bholaikechi zotnai gheup, thoddo vell svota khatir kaddop kitlo gorjecho hem ami aiz zannam zaunk paule. Fursot apsuk mellna ti zonneklean aplem disaptrok samballun kaddchich poddttoli apnnale kuxllottayen he sadhy zaumyeta oxem mhaka tori dista.

Soimant jeo boreon vaitt ghoddnnuko ghoddttat tankam addaupi oso konn ozun meren zolmak yeunk na. Ailem zalear te soimuch astole oxem hamv manta. Raz dorbar na zaun lokanche sorkar aile sogle kitem neayan zauchem oxi ast ballgun monis vaurak lagle khore, punn neayan sogli kam’mam zatat vhoi ? vochot thoim oneayachem samrajy patllil’lem dixtti poddtta hatunt dhyeyvadi ani sonxik monis legit bhorddun vota. Kaideachi porva na korpi monis zoitiunt zaun mirvonk lagta, tanche lagi poiso yeta ani te vhoddle duddvakar zaunk pauta zalear gorib fattim poddot rauta hi vastoutai zaun asa, girest ani gorib hanche modli kholli ken’nach bhorun yena. Zonhitanche kary korpi fattim poddunk lagle mhonnttokoch somazant osthirota vaddunk lagta, monxam-monxam modim dusvas toyar zata ani ek poklli nirmann zata tantut fafxil’le monis marg bhottkotat ani tanche bhitor toxench bhair vaitt vrit’ti vaddpak lagta zacho porinnam’ onyai, soxonn, luttpatt, oteachara sarkeo gozali fofaupak lagta ani monis zatik piddunk lagta.

Ek har zaticho sorop zoso aple sauzak ghott’tt pill ghalun dourota ani holluhollu taka pottat gheun apli bhuk mittoita toso amchea somazat axil’le kaim zann goribachi kuxllottai aullit dourun tanche kuxllottayer apunn girest zata. He chitr bodlotole zalear kuxllottayechea vaurak yogy mol mellpak zai tachea vaurachi tust zaupak zai. Kamar astona taka sogle torecheo soyi mellunk zai. Tache mon prosn’n dourunk kama voile vatauronn borem asop gorjechem. Oxem jen’na zata ten’na chakromaneachim urbam vaddtta, tanchea kamacho veg vaddtta. Zonn eklean samajik bandiloki pall’li zalear oxea kuxllottayen bhoril’lea monxank ami marg dakhounk xoktole. Yad korat amche zanntteleanchi kriti koxi astali bhukeleak te kam’ ditale mhonnttokoch tache bhukecho prosn kaimocho sutt’ttalo. Iglixint ji ek mhonn asa if you feed a hungry man you feed him once if you teach him how to fish you feed him life time. Hacho orth oso bhukelea monxak jeunn dit zalear ami tachi ek disachi bhuk mittounk xoktat punn ami zor taka nuste dhorpak xikoit tor tachi jivit bhorachi bhuk mittouyeta. Mhonnlear taka nuste marpachi kola xikoun taka pott bhorpachem sadon melloun divp. Hache voilean ami parkhuyeta amchea zanntteleanche vichar kitle progot axil’le te. Aplea borobor heranchey koxem bore zaunk xokta hacho vichar te sodanch kortale. Monxan koxtt tor korunkoch zai koxtta xivai foll mellna hi zori khori gozal tori punn vichar korun koxtt korunk zai. Kuxllottai aslich mhunn zaina ticho yogy vapor korunk zannam zaunk zai. Huxarokai ani koxtt dog ixtta vori asunk zai hatat hat ghalun vaurunk zai ten’nach tachem borem foll hatar poddtta.

Kullxottayechea bollar konnuy zoit mellounk xokta goroz asta ticho yogy toren vapor korpachi. Ek lhan sounnem legit aple kuxllottayen ek-ek kaddi ekhttham-i korun ghontter bandta. Te konna koddlean hi kala xikta kai oso prosn mhaka zaite fautti poddtta. Tachi zapuy bi mhaka soimak barikosannen niallolem mhonnttokoch melltta. Sounneak ghontter bandpak legit soimuch xikoita ani ghontter bandpacheo sogleo vostuy taka soimanuch favo kel’leo asat. Teo apsuk tachea mhoreangot yenat sounneank teo sodun haddcheo poddttat. Ten’nach tacho ghontter toyar zata. Jitlem tem sounnem koxtt gheun apleak zaiteo vostu sodun haddtta tacho ghontter titloch mojbut zaun vot, paus, varem, humvar hanche pasun tachem rokxonn korta. Tochea pilank asro melltta. Monxank legit hi kuxllottai amchea purvozankoddlean mell’lea. Ticho favo toso vapor korun amchi jinn sofoll korum yeta. Halimsora sogleat kxetrant xirvisek gheuchea poilim mulakhoti vellar umedovarachi kuxllottai topasun polloitat. Jea kxetrant umedovarank apnnaun gheuchem asta tea kxetrachem gonean asop gorjenchem tea bhair tea kxetratolem podvi merenochem va totsom’ xikxonn zal’lem asunk zai.

Kaim kxetrant onnbhou axil’lech umedovar nivddottat. Tori legit choddxe veusthapok sadaronnoponnan jea panch kuxllottayer bhor ditat teo oxeo zaun asat.

  • boretoren vheuhar korunk zannam zaup hi poili mukhel kuxllottai.
  • sonkxtta va kamant yeupi addokhlleo aple apunn soddvonk zannam zaup hi dusri kuxllottai.
  • svota mukhar sorun vaurop hi tisri mukhel kuxllottai.
  • sobavant louchikosann asop chouthi kuxllottai.
  • sogleank samballun ekttham-i gheun kary mukhar vhorop pachvi kuxllottai.

Zonn eka monxan voir dil’lea panch mukhel kuxllottayer aplo xek choloilo zalear khoinchyai kxetrant to aplea mona promann zoit melloitolo he nixchit oxem hamv mhonnpak xokta. Ekadream monxak apleat kuxllottai na va apleat kuxllottai komi promannan asa oxem disot zalear bhivpachi goroz na kiteak tor ami kuxllottai konnaikoddlean xikum yeta. Kuxllottai aplea onnbhovantlean legit xikpak melltta. Koslem-i gozalinchem nirikxonn korun legit kuxllottai vaddoum yeta. Nimnne ek gozal sangpak sodta ti mhonnlear aichean tumche oys pois ghoddottlea soglea gozalincher barik nodor dourat kuxllottai apsuk tumkam yeun dostoli ani tumchim kam’mam mona sarki zaunk pautoli.

Leave a Comment

Your email address will not be published.

You may also like

Latest Posts