കുശ്ളടായ് തിഗൊവ്ന് ദവ്രയാ

ദിസാൻ ദീസ് മനീസ് ആപ്ല്യാ വ്യാപാൻ ഇത്ലൊ ഘുസ്പൂൻ വചത് ആസാ താകാ മാത്പൂൺ വിസവ് ഘെവങ്ക് ഫുർസത് നാ മ്ഹൺപാചെം താച്യാ വാഗ്ണ്യാ വയ്ല്യാൻ കൊണെയ് പാർഖും യെതാ. കെന്നാ-കെന്നാ ഘരാ ഭായ്ര് കിതെം ചല്ലാം താചൊ അദ്മാസ് ആമ്കാം യെനാ. ആമി ഭായ്ര് വചൂൻ താചൊ അദ്മാസ് ഘെവ്ചൊ യത്ന് കരിനാത്. ആദിം മനീസ് ജാഗൃത് ആസ്താലൊ ആപ്ല്യാ അയ്സ്-പയ്സ് കിതെം ചല്ലാം ഹാചി വാസ്പൂസ് കർതാലൊ. ഹാചൊ അർഥ് ആദ്ല്യാ തെംപാർ മനീസ് ബെകാർ ആശില്ലൊ അസൊ മാതൂയ് ൻഹയ് ആം. മനീസ് ആദീം കാളാ സാവ്ന് ആപ്ല്യാ കാമാന്ത് ഗുഥില്ലൊച് പൂൺ ത്യാ വെളാർ ആപ്ല്യാക് ഫാവ് തസൊ വെൾ തൊ ദിതാലൊ ആനി ആപ്ല്യൊ ഗർജൊ സിമീത് ദവ്രുൻ തൊ ചൽതാലൊ. ആതാം ആമ്ച്യൊ ഗർജൊ വാഡ്ല്യാത് ആമ്ചെ മദിം സർതി കർപി വാഡില്ല്യാ കാർണാൻ ആപ്ലെ കാം-ധന്ദൊ സാംബാളപാക് കസ്രത് കർചി പഡ്ടാ ഹെം വെഗ്ളെ സാംഗ്പാചി ഗരജ് പഡ്നാ. ആപ്ലി ദീസപ്ട്ടി കാമാം, ഭുർഗ്യാഞ്ചെ ശിക്ഷൺ താഞ്ച്യാ ഫുഡാരാച്യൊ യെവ്ജ്ണ്യൊ ആംഖ്താ മ്ഹൺസർ മൻശാക് നാകാപുരൊ ജാതാ, ആനി അശാ വെളാർ എക് ഗജാൽ ഭൊവ്ച് ജാണവ്താ തി മ്ഹണ്ല്യാർ ആമ്ചെ ജാണ്ടെ അശെ പരിസ്ഥിതീന്ത്ല്യാൻ കശെ ഗെലെ ആസ്തലെ കായ് ? താംണി കശെ തരെൻ യൊവ്ജ്ണ്യൊ ആഖില്ല്യൊ കായ് ? ഹാലീംസരാം ചഡ്ശെ ഗൊംയ്കാർ ‘ഹം ദൊ ഹമാരെ ദൊ’ ഘൊശ്വാക്യാ പ്രമാൺ സിമീത് ഘരാബൊ ദവ്രതാ തരി ലെഗീത് ആമ്ച്യാ കപ്ലാർ സദാഞ്ച് ആട്യൊ. ആമ്ച്യാ ജാണ്ട്യാങ്ക് സ തെ ആഠ് ഭുർഗിം ആസ്താലി, ആതാം സാർക്യൊ സൂഖ് സൊയി തർ ബിൽകുൽ നാശില്ല്യൊ പൂൺ താണിം ആപ്ല്യാ ഭുർഗ്യാങ്ക് കാംയ്ച് ഉണെ പഡൂങ്ക് ദിവങ്ക് നാശില്ലെം ആപ്ലെ ഐപ്തി പ്രമാൺ വാഡയ്ല്ലെ. അശെ അനെക് പ്രസ്ന് വർതമാൻ കാളാന്ത് ജിയെത്ല്യാ തുജെ മ്ഹജെ സാർക്യാ സാമാന്യ് മൻശാക് പഡും യെതാ. ഭൊവ് ഥൊഡെ മനീസ് ആസാത് ജെ ആപ്ല്യാ ദീസപ്ട്ട്യാ വാവ്രാചി ആംഖ്ണി കരുൻ ചിന്ത്നാ വിരയ്ത് വാവൂരതാത്. ഹെ ബാബ്തീത് ബായ്ല് മൻശെചി തൊഖ്ണായ് കർചീച് പഡ്ടലി തി ദാദ്ല്യാ പരസ് ചഡ് സൊംശീക് ജാല്ല്യാൻ കസ്ലീയ് ആഡ്ഖൾ പയ്സാവപാചെം സാമ്ർഥ്യ് തിചെ ലാഗി ആസാ. ജൺ എകാ ദാദ്ല്യാച്യാ ജൈതാ ഫാട്ല്യാൻ ബായ്ലെൻ ദില്ലൊ പാലവ് ആനി തിണെ കെല്ലൊ ത്യാഗ് ആസ്താ മ്ഹണ്ല്യാർ അതിതായ് ജാവ്ചി ൻഹയ്.

മൻശാൻ സദാഞ്ച് വെളാചെ ബന്ധൻ പാളൂങ്ക് ജായ് ഹി ഗജാൽ ഖരി പൂൺ പായാങ്ക് രൊദാം ബാന്ദൂൻ ൻഹയ് ആം. ഫാട്ലിം കാംയ് വർസാം ഹാംവ് പളയ്താ ആമി മനീസ് ധാംവ്-ധാംവ് കർതാത്. സഗ്ലെ എകെച് മാള്യെചെ മണി ജാല്ലെ വരി വാഗ്താത്, സഗ്ല്യാഞ്ച്യൊ അഡ്ചണി ലെഗീത് എക് സാർക്യൊച്. ആമ്ചി ധാംവ്പളി ജീൺ പളയ്തകച് ‘ഫുർസത്’ ഹെം ഉതർ മൻശാച്യാ ശബ്ദകൊശാന്ത്ല്യാൻ ഗളൂൻ പഡ്ലാം അസൊ മ്ഹജൊ തരി സമജ് ജാല്ലൊ ആസാ. ഹാചെർ ഉപായ് കൊണെ സൊദപ് ? ആമീച് ൻഹയ് ? പൂൺ തസൊ ഉപായ് സൊദൂങ്ക് ആമ്കാം അപെസ് ആയ്ലെ മ്ഹൂൺ ഘഡ്യെ അച്കിത് ബ്രെക് ലാഗില്ലെ വരി ജീൺ ഥാംബ്ലി, ഉസന്ത് ഘെവങ്ക് സൈമാൻ ആമ്കാം വെൾ ദിലൊ, ധാംവ്പി മനീസ് ഘരാന്ത് ബസൂൻ രാവ്ലെ. മൻശാച്യാ ഹാതൂൻ ചുകൊ ജാതാല്യൊ ആനി താചി ദഖൽ ഘെവ്ചി മ്ഹൂൺ സൈമാൻ ആപ്ലൊ ഇംഗ്ളൊ ദാഖയ്ലൊ കായ് കിതെം? അശെയ് വിചാർ തുമ്ച്യായ് മനാന്ത് ആയ്ലെ ബഗർ രാവ്ചെ നാത്. ജായ്തെ ജണാഞ്ച്യാ മനാന്ത് ആയ്ല്യായ് ആസത്. ‘ജീവ് ആസ്ല്യാർ ഭീക് മാഗൂൻ ഖായ്ന്’ ഹെ മ്ഹണീചൊ സാർകൊ ബരൊ അർഥ് ആമ്കാം ഹ്യാ ധാമി വെളാർ കള്ളൊ ഹാതൂന്ത് ദുബാവ് നാ. ഭലായ്കെചി ജത്നായ് ഘെവ്പ്, ഥൊഡൊ വെൾ സ്വതാ ഖാതീർ കാഡപ് കിത്ലൊ ഗർജെചൊ ഹെം ആമി ആയ്ജ് ജാണാം ജാവങ്ക് പാവ്ലെ. ഫുർസത് ആപ്സൂക് മെൾനാ തി ജണഎക്ല്യാൻ ആപ്ലെം ദിസാപ്ത്രക് സാംബാളൂൻ കാഡ്ചീച് പഡ്ടലി ആപ്ണാലെ കുശ്ളടായെൻ ഹെ സാധ്യ് ജാവംയെതാ അശെം മ്ഹാകാ തരി ദിസ്താ.

സൈമാന്ത് ജ്യൊ ബര്യൊൻ വായ്ട് ഘഡ്ണൂകൊ ഘഡ്ടാത് താങ്കാം ആഡാവ്പി അസൊ കൊൺ അജൂൻ മെരെൻ ജൽമാക് യെവങ്ക് നാ. ആയ്ലെം ജാല്യാർ തെ സൈമൂച് ആസ്തലെ അശെം ഹാംവ് മാന്താ. രാജ് ദർബാർ നാ ജാവ്ന് ലൊകാഞ്ചെ സർകാർ ആയ്ലെ സഗ്ലെ കിതെം ന്യായാൻ ജാവ്ചെം അശി ആസ്ത് ബാൾഗൂൻ മനീസ് വാവ്രാക് ലാഗ്ലെ ഖരെ, പൂൺ ന്യായാൻ സഗ്ലി കാംമാം ജാതാത് വ്ഹയ് ? വചത് ഥംയ് അന്യായാചെം സാമ്രാജ്യ് പാത്ളില്ലെം ദിശ്ടി പഡ്ടാ ഹാതൂന്ത് ധ്യെയ്വാദി ആനി സൊംശീക് മനീസ് ലെഗീത് ഭർഡൂൻ വതാ. കായ്ദ്യാചി പർവാ നാ കർപി മനീസ് ജൈതീവന്ത് ജാവ്ന് മിർവങ്ക് ലാഗ്താ, താഞ്ചെ ലാഗി പയ്സൊ യെതാ ആനി തെ വ്ഹഡ്ലെ ദുഡ്വാകാർ ജാവങ്ക് പാവ്താ ജാല്യാർ ഗരീബ് ഫാടിം പഡത് രാവ്താ ഹി വാസ്തവതായ് ജാവ്ന് ആസാ, ഗീരെസ്ത് ആനി ഗരീബ് ഹാഞ്ചെ മദ്ലി ഖളി കെന്നാച് ഭരുൻ യെനാ. ജൻഹിതാഞ്ചെ കാര്യ് കർപി ഫാടിം പഡൂങ്ക് ലാഗ്ലെ മ്ഹണ്ടകച് സമാജാന്ത് അസ്ഥീരതാ വാഡൂങ്ക് ലാഗ്താ, മൻശാം-മൻശാം മദിം ദുസ്വാസ് തയാർ ജാതാ ആനി എക് പൊക്ളി നിർമാൺ ജാതാ താന്തൂത് ഫാഫ്ശില്ലെ മനീസ് മാർഗ് ഭട്കതാത് ആനി താഞ്ചെ ഭിതർ തശെഞ്ച് ഭായ്ര് വായ്ട് വൃത്തി വാഡ്പാക് ലാഗ്താ ജാചൊ പരിണാം അന്യായ്, സൊശൺ, ലുട്പാട്, അത്യാചാരാ സാർക്യൊ ഗജാലി ഫൊഫാവ്പാക് ലാഗ്താ ആനി മനീസ് ജാതീക് പിഡൂങ്ക് ലാഗ്താ.

എക് ഹാർ ജാതീചൊ സൊരൊപ് ജസൊ ആപ്ലെ സാവ്ജാക് ഘട്ട് പീൾ ഘാലൂൻ ദവ്രതാ ആനി ഹളുഹളു താകാ പൊടാത് ഘെവ്ന് ആപ്ലി ഭൂക് മിടയ്താ തസൊ ആമ്ച്യാ സമാജാത് ആശില്ലെ കാംയ് ജാൺ ഗരീബാചി കുശ്ളടായ് ആവ്ളീത് ദവ്രൂൻ താഞ്ചെ കുശ്ളടായെർ ആപൂൺ ഗിരെസ്ത് ജാതാ. ഹെ ചിത്ര് ബദ്ലതലെ ജാല്യാർ കുശ്ളടായെച്യാ വാവ്രാക് യൊഗ്യ് മൊൽ മെൾപാക് ജായ് താച്യാ വാവ്രാചി തുസ്ത് ജാവ്പാക് ജായ്. കാമാർ ആസ്തനാ താകാ സഗ്ലെ തരെച്യൊ സൊയി മെളൂങ്ക് ജായ്. താചെ മൻ പ്രസ്ന്ന് ദവ്രൂങ്ക് കാമാ വയ്ലെ വാതാവ്രൺ ബരെം ആസപ് ഗർജെചെം. അശെം ജെന്നാ ജാതാ തെന്നാ ചാക്രമാന്യാചിം ഉർബാം വാഡ്ടാ, താഞ്ച്യാ കാമാചൊ വെഗ് വാഡ്ടാ. ജൺ എക്ല്യാൻ സാമാജീക് ബാന്ദിലകി പാൾലി ജാല്യാർ അശ്യാ കുശ്ളടായെൻ ഭരില്ല്യാ മൻശാങ്ക് ആമി മാർഗ് ദാഖൊവങ്ക് ശക്തലെ. യാദ് കരാത് ആമ്ചെ ജാണ്ടെല്യാഞ്ചി കൃതി കശി ആസ്താലി ഭുകെല്യാക് തെ കാം ദിതാലെ മ്ഹണ്ടകച് താചെ ഭുകെചൊ പ്രസ്ന് കായ്മചൊ സുട്ടാലൊ. ഇഗ്ലിശീന്ത് ജി എക് മ്ഹൺ ആസാ if you feed a hungry man you feed him once if you teach him how to fish you feed him life time. ഹാചൊ അർഥ് അസൊ ഭുകെല്യാ മൻശാക് ജെവ്ണ് ദിത് ജാല്യാർ ആമി താചി എക് ദിസാചി ഭൂക് മിടൊവങ്ക് ശക്താത് പൂൺ ആമി ജർ താകാ നുസ്തെ ധർപാക് ശികയ്ത് തർ താചി ജിവീത് ഭരാചി ഭൂക് മിടൊവ്യെതാ. മ്ഹണ്ല്യാർ താകാ നുസ്തെ മാർപാചി കലാ ശികൊവ്ന് താകാ പൊട് ഭർപാചെം സാദൻ മെളൊവ്ന് ദിവ്പ്. ഹാചെ വയ്ല്യാൻ ആമി പാർഖൂയെതാ ആമ്ച്യാ ജാണ്ടെല്യാഞ്ചെ വിചാർ കിത്ലെ പ്രഗത് ആശില്ലെ തെ. ആപ്ല്യാ ബരൊബർ ഹെരാഞ്ചെയ് കശെം ബരെ ജാവങ്ക് ശക്താ ഹാചൊ വിചാർ തെ സദാഞ്ച് കർതാലെ. മൻശാൻ കശ്ട് തർ കരുങ്കച് ജായ് കശ്ടാ ശിവായ് ഫൾ മെൾനാ ഹി ജരി ഖരി ഗജാൽ തരി പൂൺ വിചാർ കരൂൻ കശ്ട് കരൂങ്ക് ജായ്. കുശ്ളടായ് ആസ്ലീച് മ്ഹൂൺ ജായ്നാ തിചൊ യൊഗ്യ് വാപർ കരൂങ്ക് ജാണാം ജാവങ്ക് ജായ്. ഹുശാരകായ് ആനി കശ്ട് ദൊഗ് ഇശ്ടാ വരി ആസൂങ്ക് ജായ് ഹാതാത് ഹാത് ഘാലൂൻ വാവ്രൂങ്ക് ജായ് തെന്നാച് താചെം ബരെം ഫൾ ഹാതാർ പഡ്ടാ.

കുൾശടായെച്യാ ബളാർ കൊണൂയ് ജൈത് മെളൊവങ്ക് ശക്താ ഗരജ് ആസ്താ തിചൊ യൊഗ്യ് തരെൻ വാപർ കർപാചി. എക് ൽഹാൻ സവ്ണെം ലെഗീത് ആപ്ലെ കുശ്ളടായെൻ എക്-എക് കാഡി എഖ്ഠാംയ് കരൂൻ ഘൊണ്ടെർ ബാന്ദ്താ. തെ കൊണാ കഡ്ല്യാൻ ഹി കാലാ ശിക്താ കായ് അസൊ പ്രസ്ന് മ്ഹാകാ ജായ്തെ ഫാവ്ടി പഡ്ടാ. താചി ജാപൂയ് ബി മ്ഹാകാ സൈമാക് ബാരീകസാണെൻ നിയാളലെം മ്ഹണ്ടകച് മെൾടാ. സവ്ണ്യാക് ഘൊണ്ടെർ ബാന്ദ്പാക് ലെഗീത് സൈമൂച് ശികയ്താ ആനി ഘൊണ്ടെർ ബാന്ദ്പാച്യൊ സഗ്ല്യൊ വസ്തൂയ് താകാ സൈമാനൂച് ഫാവൊ കെല്ല്യൊ ആസാത്. ത്യൊ ആപ്സൂക് താച്യാ മ്ഹര്യാംഗത് യെനാത് സവ്ണ്യാങ്ക് ത്യൊ സൊദൂൻ ഹാഡ്ച്യൊ പഡ്ടാത്. തെന്നാച് താചൊ ഘൊണ്ടെർ തയാർ ജാതാ. ജിത്ലെം തെം സവ്ണെം കശ്ട് ഘെവ്ന് ആപ്ല്യാക് ജായ്ത്യൊ വസ്തു സൊദൂൻ ഹാഡ്ടാ താചൊ ഘൊണ്ടെർ തിത്ലൊച് മജ്ബൂത് ജാവ്ന് വൊത്, പാവ്സ്, വാരെം, ഹുംവാർ ഹാഞ്ചെ പാസൂൻ താചെം രക്ഷൺ കർതാ. തച്യാ പിലാങ്ക് ആസ്രൊ മെൾടാ. മൻശാങ്ക് ലെഗീത് ഹി കുശ്ളടായ് ആമ്ച്യാ പൂർവജാങ്കഡ്ല്യാൻ മെൾല്യാ. തിചൊ ഫാവൊ തസൊ വാപർ കരൂൻ ആമ്ചി ജീൺ സഫൾ കരും യെതാ. ഹാലീംസരാ സഗ്ല്യാത് ക്ഷെത്രാന്ത് ശിർവിസെക് ഘെവ്ച്യാ പയ്ലിം മുലാഖതി വെളാർ ഉമെദവാരാചി കുശ്ളടായ് തപാസൂൻ പളയ്താത്. ജ്യാ ക്ഷെത്രാന്ത് ഉമെദവാരാങ്ക് ആപ്ണാവൻ ഘെവ്ചെം ആസ്താ ത്യാ ക്ഷെത്രാചെം ജ്ഞാൻ ആസപ് ഗർജെഞ്ചെം ത്യാ ഭായ്ര് ത്യാ ക്ഷെത്രാതലെം പദ്വി മെരെനചെം വാ തത്സം ശിക്ഷൺ ജാല്ലെം ആസൂങ്ക് ജായ്.

കാംയ് ക്ഷെത്രാന്ത് അൺഭവ് ആശില്ലെച് ഉമെദവാർ നിവ്ഡടാത്. തരി ലെഗീത് ചഡ്ശെ വെവ്സ്ഥാപക് സാദാരണപണാൻ ജ്യാ പാഞ്ച് കുശ്ളടായെർ ഭർ ദിതാത് ത്യൊ അശ്യൊ ജാവ്ന് ആസാത്.

• ബരെതരെൻ വ്ഹെവ്ഹാർ കരൂങ്ക് ജാണാം ജാവ്പ് ഹി പയ്ലി മുഖെൽ കുശ്ളടായ്.
• സങ്ക്ശ്ടാ വാ കാമാന്ത് യെവ്പി ആഡഖ്ള്യൊ ആപ്ലെ ആപൂൺ സൊഡ്വങ്ക് ജാണാം ജാവ്പ് ഹി ദുസ്രി കുശ്ളടായ്.
• സ്വതാ മുഖാർ സരൂൻ വാവ്രപ് ഹി തിസ്രി മുഖെൽ കുശ്ളടായ്.
• സബാവാന്ത് ലവ്ചീകസാൺ ആസപ് ചവ്ഥി കുശ്ളടായ്.
• സഗ്ല്യാങ്ക് സാംബാളൂൻ എക്ഠാംയ് ഘെവ്ന് കാര്യ് മുഖാർ വ്ഹരപ് പാച്വി കുശ്ളടായ്.

ജൺ എകാ മൻശാൻ വയ്ര് ദില്ല്യാ പാഞ്ച് മുഖെൽ കുശ്ളടായെർ ആപ്ലൊ ശെക് ചലയ്ലൊ ജാല്യാർ ഖംയ്ച്യായ് ക്ഷെത്രാന്ത് തൊ ആപ്ല്യാ മനാ പ്രമാൺ ജൈത് മെളയ്തലൊ ഹെ നിശ്ചിത് അശെം ഹാംവ് മ്ഹൺപാക് ശക്താ. എകാദ്ര്യാം മൻശാക് ആപ്ല്യാത് കുശ്ളടായ് നാ വാ ആപ്ല്യാത് കുശ്ളടായ് കമി പ്രമാണാൻ ആസാ അശെം ദിസത് ജാല്യാർ ഭിവ്പാചി ഗരജ് നാ കിത്യാക് തർ ആമി കുശ്ളടായ് കൊണായ്കഡ്ല്യാൻ ശികും യെതാ. കുശ്ളടായ് ആപ്ല്യാ അൺഭവാന്ത്ല്യാൻ ലെഗീത് ശിക്പാക് മെൾടാ. കസ്ലെംയ് ഗജാലിഞ്ചെം നിരീക്ഷൺ കരൂൻ ലെഗീത് കുശ്ളടായ് വാഡൊവം യെതാ. നിമ്ണെ എക് ഗജാൽ സാംഗ്പാക് സൊദ്താ തി മ്ഹണ്ല്യാർ ആയ്ച്യാൻ തുമ്ചെ അയ്സ് പയ്സ് ഘഡട്ല്യാ സഗ്ല്യാ ഗജാലിഞ്ചെർ ബാരീക് നദർ ദവ്രാത് കുശ്ളടായ് ആപ്സൂക് തുമ്കാം യെവ്ന് ദസ്തലി ആനി തുമ്ചിം കാംമാം മനാ സാർകി ജാവങ്ക് പാവ്തലി.

**