त्या सांजेर
धांवच्या जरल्याक धरुंक
माजार मेजाक उडताना
लांप्यांव लकोन अर्सो फुटल्लो
त्या रातीं
लांप्यावाचो उज्वाड
एकदम मुक्त जावन व्हाळताना
अल्तारी कुडांत भरून वोमतोंचो प्रकास!
ल्हान ल्हान पिसोळ्यांक पिशें कर्चो उल्लास!!
त्या पर्जळांत…
मज्या पोक्रिपणाचा खेळान, कोपो उसळोन घायेल्ल्या
वोणोदिचे मातिये कण मोतियां परीं हासचे दिसताना…
जेजुचा पवित्र काळजाचा पायनेला पाटल्यान
कोवयिल्ल्या रामा चुडेतिचा खुर्सा भोंवतीं
फेसताचा तोर्णां परीं सुंर्गारून रावल्लो
गयर उज्वाडाक दिसानातल्लो गयरेम
मुक्त प्रकासांत धलोन हासताना…
तेर्सा वेळार हांव हासलों
केदनांय हासनातल्ली गंभीर म्हजी मांय सयत
तडवानासतां कुसक कर्न हासताना
बाब हासलो
मागण्यावेळिंय बिडियो बांदून आसल्लें
बाय व्हडल्यान हासलें
दट्टूय हासलो
मामाचा वर्साचा मिसाक
आपवंक आयिल्ली मामीय हासली
मसक प्रकासांत कुसकाल्लीं मुसकरां
आज फुलल्लीं, हासतालीं.
खुर्सार उमकाळचो क्रीसत
आनी बगलेंत दुखी मातेचा मुखमळार
हास्याचो प्रकास पर्जळताना
वांजेलांतले सब्द सयत
उग्ते जावन हासचेपरीं दिसले!
ह्या हास्यान व्हडल्यान गायलेली कंतीग
अंजांक जागंवन हासवंक लागली!
सकडां हासलीं बेश्टें बेश्टें
विचित्र संतोसान
मुक्त उज्वाडांत पर्जळच्या त्या कूडांत
मेंदू मंद कर्चीं धांपणीं
तुटोन फुटोन गेल्ल्येपरीं!
