ബാങ്ക്

‘പിടി, ഏയ് പിടി, കിതെംരെ തുകാ ഭാസ് യേനാംഗി? കിത്ലെ ദീസ്ഥാവ്ന് സാംഗ്താം തൊ ദൾദിർ ബാങ്ക് മൊജ്യാ ദൊള്യാം മുക്ലൊ കാഡ് മ്ഹൺ. പൂൺ തുജ്യാ കാനാങ്ക് സിസെം ഭർലാ, സാംഗ്ല്ലെം കാനാക് വചനാ.’

“ബാബാ… തെം… തൊ… മാം ആയ്കനാ. താകാ കിത്യാക്ഗീ ഹ്യാ ബാങ്കാചെർ എകാ രിതിചി വോഡ്. കാഡ്താം മ്ഹൺതനാ വചൊൻ താചെർ വൊമ്തൊച് നിദ്താ.”

‘നിദനാസ്താം കിതെം? താകാ ആതാം ഏലെഡ് ഒഞ്ജി മർൽ, എൽപെഡ് ഒഞ്ജി മർൽ. ആവ്ക് കാവ്ള്യാചെം മാഗൊൻ ഘെവ്ന് ആയ്ലാ. ഫൊണ്ഡാക് വെചെ ദീസ് ജാലെ തരി ബൂദ് ബസൊങ്ക്  നാ. പളെ… സാംഗ് മ്ഹാകാ തുകാ ഹാംവെം സാംഗ്ല്ലെം നാട്വതാഗീ നാ. പളെരേ…… തും തരീ ദൊളെ സൊഡ്ന് പളെ. കൊരൊഡാഞ്ചൊ ബംഗ്ലൊ, ലാകാംനി ഫർനിചർ ഘാല്യാത്  ഇണ്ടിരിയർ ഡെകൊരേശൻ പളയില്ലൊ മൊനൊ ജാതാ. ആസ്പാസ്ച്യാ ഗാംവാംനി അസലൊ ആന്യെക് ബംഗ്ലൊ മെൾചൊനാ. അസല്യാ ഹ്യാ രാവ്ളെരാക് ഹൊ ബാങ്ക് കിതെം കാളൊ തിബൊയെരെ, ഭുർഗ്യാപണാഥാവ്ന് ഹൊ ബാങ്ക് പളെവ്ന് പളെവ്ന് ഥക്ലാം താചിം വ്ഹഡ്വികായ് ആയ്കൊൻ ആയ്കൊൻ കെപ്പൊ ജാലാം.’

“സാംഗ്രേ ആസാഗീ ഹാകാ യേക് നാജൂകായ്? വ്ഹഡാ മൊണാ ഫാത്രാ തിത്ലൊ ജഡ്. കിതെം ഹാകാ മാൺകാം മൊതിയാം ബസയ്ല്യാന്ത്ഗീ? വാ ജാണാരി സുതാര്യാൻ ഡിസൈൻ കാന്തൈലാം? എക്ല്യാക് ഹാലംവ്ക് ജാൈനാത്ലെം ഹെം ഖഡാപ്, ഉക്ലുങ്ക് ജാല്ലൊ തർ കാഡ്ന് പാഗൊരാഭായ്ര് ഉഡൈതൊം.” രൊയ്സ് രാഗാൻ ബൊബാട്താനാ പെദ്രാം പുതാചെം വ്ഹഡ്പൺ ആയ്കൊനീ ആയ്കനാത്ലെപരിം ബാങ്കാർ നിദൊൻ വയ്ര് ജളാരിങ്ക് പാരൊത് കർച്യെ പാലിക് പളെതാലൊ.

പിടിക് കിതെം കർചെം മ്ഹള്ളെഞ്ച് കളൊങ്ക് നാ. വിശെവ് ഘെംവ്ച്യാ പെദ്രാമാസർശിൻ യേവ്ന് “മാമാ…… ഊട്” മ്ഹണാലൊ. പെദ്രാമാക് പിടിക് പളെവ്ന് ഹാസൊങ്ക് ആയ്ലെം. പിടിക് ഹ്യാ ഘരാന്ത് ജാംവ്ചെം ദിസ്താലെം. പ്രായെസ്ത് ബാപയ്ക് ദുഡ്വാദിക് പുതാൻ ആനി താച്യാ കുട്മാൻ പളെംവ്ചി ആനി ചലംവ്ചി രീത് ഉട്താം ബസ്താനാ താകാ ഖെണ്ഡുൻ ഉലൊംവ്ചെം, പർകി, ഗത് നാത്ലൊ, ഭികാരി തശെം ചലംവ്ചെം പിടിക് ബരെം ദിസനാത്ലെം. പൂൺ… ഭിർമൊത് തൊ കിതെം കർതലൊ? തൊ ഏക് സാംബാളാചൊ മനിസ്. ദീസ് വചചെ ജാല്യാർ അസലെം അന്നാഡ്പൺ പളെവ്ന്യി പളെനാത്ലെപരിം ജിയെല്യാർ മാത്ര് ദീസ് കാഡുങ്ക് സാധ്യ് മ്ഹള്ളെം കൊഡു സത് തൊ ബരെഞ്ച് ജാണാ ആസ്ലൊ.

“മാമാ… ഊട് ത്യാ ഖാടിയെർ ബസ്. ഹൊ ബാങ്ക് ഘരാന്ത്ലൊ ഹ്യാ രാതിഭിതർ ഭായ്ര് ഘാലിജെ മ്ഹൺ ബാബാൻ താകിദ് ദില്യാ.”

“കിത്യാക്രേ… തൊ ബാങ്ക് കിതെം നാച്താഗീ? ഉഡ്താഗീ? വാ തുജ്യാ ബാബാച്യാ ദൊള്യാങ്ക് തൊപ്താ? തെം അസൊം പിടി, ഹ്യാ ബാങ്കാചി കാണി തുകാ കളിത് ആസാംഗീ നാ? നാ തർ സാംഗ്താം ആയ്ക്…”

മൊജൊ ആജൊ ഭാരി ബരൊ ബാന്ധ്പി. താണെ ബാന്ദ്ല്ലെം ബാന്ധപ്, ത്യാ ബാന്ദ്പാന്ത് ആസാ തി നാജൂകായ് പളെവ്ന് ലോക് ശാഭാസ്കി ദിതാലൊ. മൊജ്യാ ആജ്യാച്യാ എകീൻപണാക് ആനി താച്യാ കാമാക് മെച്വൊൻ അപ്പു ശെടിൻ മൊജ്യാ ആജ്യാക് ദില്ലി കാണിക് ഹൊ ബാങ്ക്. ബാങ്ക് സാധാർണാചൊ ൻഹയ് ബീടി പാംയാഞ്ചൊ ആനി സാഗ്വൊണിച്യാ ഫൊള്യാചൊ. ആപ്ല്യാച് രുകാഡാന്ത്, അചാര്യാക് സാംഗൊൻ ശെട്ടിൻ കരൈല്ലൊ ബാങ്ക് ഹൊ.

മൊജൊ ആജൊ മൊജ്യാ ഗാംവാന്ത് ഇത്ല്യാ മാനാചൊ ആനി മര്യാദെചൊ മനിസ്കീ ജാകു പർബുലു മള്യാർ ഹെർ ജാതിച്യാങ്ക്യി ജായ് ജാല്ലൊ മനിസ്. ആമ്ച്യാ ഫിർഗജെന്തീ തൊ യേക് നാംവാഡ്ദിക് മാനായ്, ഭാരീ ബരൊ മേസ്ത്. കിത്ലിം വ്ഹഡ് വ്ഹഡ് ബാന്ധ്പാം താണെ ബാന്ദ്ലിം്ല ജാണാംയ്? ആതാഞ്ച്യെപരി സിമെണ്ട് ആനി രെംവെന്ത് ബാന്ദ്ചിം ൻഹയ്, തിം സഗ്ളിം ഗോഡ്, ചുനൊ, മാതി ആനി അണ്ട്ൽകായ് ഘാൽൻ കുസയില്ല്യാ ഭർസാപാന്ത് ബാന്ദ്ല്ല്യൊ വൊൺതി ചിര്യാ ഫാത്രാച്യാകീ ഘട്മുട്. താച്യാ കാമാക് മെച്വൊൻ സബാർ വസ്തു മെൾല്ല്യൊ തരീ ഹ്യാ ബാങ്കാതസ്ലി ദുസ്രി മെളൊങ്ക് നാ. പളെ… തീൻ തക്ല്യൊ ജാല്യൊ തരീ ആനികീ യേക് സുവെചൊ ബുരാക് നാ. ആനികീ ശെംബൊർ വർസാം ഗെല്യാരീ കിതെഞ്ച് ജാംവ്ചൊ നാ.

പെദ്രാബാക് ആജ് ബാങ്കാചി വ്ഹഡ്വിക് സാംഗ്ചൊ സന്ദർബ് മെൾചൊ ദെകുൻ ഭാരി ഉമെദിൻ സാംഗുൻ ആസ്താനാ, രൊയ്സ് ആയ്ലൊച്ച്. “യേക് പാവ്ടി ബന്ധ് കർ തുജെം പെംപാരെം. തുജെം ഹെം പുരാൺ ആയ്കൊൻ ആയ്കൊൻ കാൻ കെപ്പെ ജാല്യാത്. ഏയ്, തും കിതെംരേ ഭെര്യാപരിം പളെത്ത് ആസായ്? വച്രേ തൊ കാഡ്ന് ഭായ്ര് ഉഡയ്.”

`ഉഡയ്’ മ്ഹൺതാനാ പെദ്രാമാക് മൊസ്തു ദുക്ലെം കിത്യാക് തൊ ബാങ്ക് മള്യാർ താകാ വ്ഹർതൊ മോഗ്…..

“പുതാ….. കിത്യാക്രേ പിശെം പാംഗുർതാത്? ജാണാംയെരേ ഹ്യാ ബാങ്കാർ കിത്ലി ബരിം കാമാം ജാല്യാന്ത്, ഹ്യാ ബാങ്കാർ പഡ്ല്ലൊ രോസ് കൊൾസെ കൊൾസെ ജാതിത്. കിത്ലെ ജൺ നൊവ്രെ, വ്ഹക്ലൊ രൊസാക് ബസ്ല്യാത്. കിത്ലെശ്യൊ കുഡി… സാസ്ണാച്യാ ഘരാ ഹാചെർ നിദൊൻ ഗെല്യാത്… തുകാ കിത്യാക് ഹ്യാ ബാങ്കാചെർ ദ്വേശ്. കെദളാ പളെല്യാരീ ഹ്യാ ബാങ്കാക് പളെവ്ന് രാഗാൻ പെട്തായ് ആനി ഥുക്തായ്? ഹാണെ തുകാ കിതെം അന്യായ് കെലാ സാംഗ്?”

“ഥുങ്ക്ചെം? താങ്ക്ല്ലെം ജാല്യാർ ഫൊഡ്ന് ഉജ്യാന്ത് ലാസ്തൊം. തുകാ ഝഡ്ച്യാക് കിത്യാക് സമ്ജനാ? ഹൊ ബാങ്ക് കിത്ലെം ഉണെപൺ ഹാഡ്താ ജാണായ്? പോർ ആയില്ലെ മൊജെ ഈശ്ട് ഹ്യാ ബാങ്കാക് പളെവ്ന് കിത്ലെം തമാശെ കർതാലെ മള്ളെം തുകാ കളിത് ആസാ? ഹൊ കിതെം മഹാൻ മൻശ്യാച്യാ ഉഗ്ഡാസാചൊ കുർഹുഗി? തുകാ പ്രായ് ഗാഡ്വാചി ജാലി ആനികീ ബാരികായ് കിതെം മള്ളിച് കളിത് നാ.”

പുതാചെം ചിന്താപ് ബാപയ്ക് ഹാലംവ്ക് ലാഗ്ലെം. “പുതാ… ഹാംവ് തുജ്യെ കിത്ലൊ ശിക്പിയി ൻഹയ് ബുദ്വന്തീ ൻഹയ്. മൊജ്യാ ജിവിതാന്ത് മെൾല്ല്യാ സുഖാച്യെ ഫൊളിയെചി മാത്ര് രൂച് സാംഗൊങ്ക് ജാണാം. പളെ… ഹ്യാ ബംഗ്ല്യാന്ത് കൊണാകീ, ഭായ്ല്യാഞ്ച്യെ നദ്രെക് പഡൊങ്ക് അസാധ്യ് ജാല്ലെം ആന്യെക് രാവ്ളെർ മ്ഹാകാ തുവെം തയാർ കരുൻ ദിലാംയ്. ഹാന്തും യെംവ്ചൊ വെചൊ മ്ഹള്ളൊ കൊണീ നാം. ദെകുൻ ആസൊന്ദി. ഹാംവ് ആസ്താം വരേഗ് ഹ്യാച് തുവെം മ്ഹാകാ തയാർ കെല്ല്യാ രാവ്ളെരാന്ത് ആസൊന്ദി. കിത്യാക് ഹൊ മൊജ്യാ ആജ്യാച്യാ ഉഗ്ഡാസാചൊ. ബാപായ്ക് ഹാംവെം ഉതാർ ദിലാം ഹൊ സാംബാൾതാം മ്ഹൺ. ഹെം മാൽഘഡ്യാഞ്ചെം ദായ്ജ്, മാൽഘഡ്യാ പുതാക്ച് ഹി ആസ്ത് മെളജെ മള്ളി താചി ആശാ ആസ്ലി. ദെകുൻ ഹെം ആപ്ണാംവ്ചെം ഭാഗ് മ്ഹാകാ ഫാവൊ ജാലെം.”

“ഓഹോഹോ.. ഹൊ ബാങ്ക് മൈസൂർച്യാ രായ് ഘരാണ്യാന്ത്ലൊ. സന്തതിഥാവ്ന് സന്തതിക് യെംവ്ചെം മാൺകാം മൊതിയാഞ്ചെം സിംഹാസൻ!”

പുതാചെം തെം മാത്യാവയ്ലെം ഉലൊവ്ണെം പെദ്രാമാക് ആഡൂക് ലാഗ്ലെം ജാല്യാരീ പുതാക് മ്ഹാൽഘഡ്യാഞ്ചെം ബരെപൺ കളിത് കരിജെ മ്ഹള്ളി ആപേക്ഷാ ആനികീ വാഡ്ലി.

“പുതാ… തും ബാങ്കാവിശ്യാന്ത് ഉലൈനാംയ്. തുജ്യാച് മാൽഘഡ്യാങ്ക് അക്മാൻ കർതായ്. ബാങ്ക് മ്ഹൺ കീൾ കരിനാകാ. ഹാചൊ മഹത്വ് കള്ള്യാർ ഖണ്ഡിത് തും ഹൊ സാംബാൾതലൊയ്.”

“ആഹാഹാ… ഹൊ ബാങ്ക്… പർനൊ നാകാരി ബാങ്ക്! ഹാകാ മഹത്വ്? പിടി, തും കിതെം പളെതായ്? കാഡ്രേ തൊ മൊജ്യാ ദൊള്യാം ഭായ്ര് കർ.”

“രൊയ്സ്… നാകാ പുതാ, ആയ്ക്”

“നാ… തൊ മൊജ്യാ ഘരാന്ത് ആസൊങ്ക്ച് നജൊ. കാഡിനാ ജാല്യാർ ആജ് രാതിക് പെട്രൊൽ ഘാൽൻ ലാസാം്ത!”

ആതാം പെദ്രാം ഏക് അന്ത്യ് ദീംവ്ക് ആയ്തൊ ജാലൊ. “നാകാ പുതാ…തിത്ലെം മഹാൻ കാം ഹാതിം ഘെനാകാ. തുകാ ഹൊ ആസൊങ്ക് നജൊമൂ? ബാങ്കാഖാതിർ ആമി മാസാം ഖാംവ്ചിം നാകാ. പിടി, തും ഹൊ ബാങ്ക് വ്ഹർ. ഖണ്ഡിത് ഹ്യാ ബാങ്കാന്ത് ആസ്ലിം ബെസാംവാം തുജി ജിണി ബദ്ലിതെലിം.”

പിടികീ ത്യാ ബാങ്കാചെർ വോഡ്. ജായ് മണൊങ്ക് ഭിരാന്ത്, ആതാം പെദ്രാമാൻച് ഹാത് ഉക്ലുൻ ദിതാനാ താകാ മൊസ്തു സന്തൊസ് ജാലൊ.

“കിത്യാക്രേ പളെതായ്? വ്ഹർ വ്ഹർ തുജെം ദാർ കസെം ഉഗഡ്താ പളെയാം” നഞ്ജി വൊങ്കുൻ ഗെലൊ. പെദ്രാമാൻ മൊഗാൻ തൊ ബാങ്ക് പുസ്ലൊ, താച്യാ ത്യാ സായ് മാണ്ഡ്ല്യാ ദൊള്യാംനി ദുകാം ദെംവ്ലി, ദൊഗാംനി മെളൊൻ ബാങ്ക് ഭായ്ര് വ്ഹർതാനാ പെദ്രാമാക് ആപ്ലെം മാസ്ച് വോഡ്ന് വ്ഹർച്യെപരിം ഭൊഗ്ലെം.

***

“ഡാഡാ, മ്ഹാകാ ബൈക് ജാൈ.” P.U.C. ചെം മേട് ചഡ്ച്യാ സോഹനാചെം ഡിമാണ്ഡ് ബാപയ് രൊയ്സാലാഗിം. ആനികീ ഖാഡ് മിശി സാർകി നാ, ഡ്രൈവിംഗ് ലൈസൻസ് മെളൊങ്ക് നാ. ആപ്ലൊ പൂത് ആനികീ മൈനർ മള്ളെം ധ്യാൻ രൊയ്സ്സാക് നാ. ആജ്കാൽ ആപ്ണാച്യാ ഇശ്ടാഞ്ച്യാ ഭുർഗ്യാംനി അസലിം വാഹനാം ഘെവ്ന് രസ്തെ മെജ്തനാ ആപ്ല്യാ പുതാൻ കിത്യാക് സൊഡുങ്ക് നജൊ മള്ളൊ വാദ്. സാംഗാതാച് ശാലിനിക് പുതാൻ വിചാർലെലെ ഘഡിയെച് മെളജെ മള്ളി ആശാ. ദെകുൻ പുതാൻ വിചാർലെലെം തവൾച് ദീജയ് മള്ളെം ചിന്താപ്. ദെകുൻ പുതാൻ കെദാളാരീ കിതെംയ് വിചാർചെം ആവയ് സാംഗാതാ ആസ്താനാ. കിത്യാക് തവൾ തി വസ്ത് ഖണ്ഡിത് മെൾതാലി.

രൊയ്സ് നാംവാഡ്ദിക് കൊണ്ട്രെക്ടർ താചെം നശീബ് ബരെം ആസ്ലെം. മാതി ആപ്ഡില്യാരീ ഭാംഗാർ ജാംവ്ചെ ദീസ് ദെകുൻ താചെം നാംവ് ആനി വാവ്ര് ഭരാൻ വാഡ്ലൊ, ഥൊഡ്യാച് വർസാംനി കൊരൊഡ്പതി ജാലൊ, താചൊ വ്യവഹാർ വാഡ്താനാ അംഗലാപ് ചഡ്ലൊ. സവ്കാസ് ബാപായ്ന് ശികയില്ലെം എകീൻപൺ, പ്രാമാണികതാ, സത് ആനി നീത് താചെഥാവ്ന് ഫൊൾൻ ധാംവ്ലി. സ്വാർതി തൊ ജാലൊ. താച്യാ ആശെച്യാ ദര്യാന്ത് ഉചാംബളായെചെം വാദാൾ ഉട്ലെം. ഹൊർബൊസാചി ഗഡ് മിക്വാലി. മൻശ്യാപൺ മെലെം, ദുഡ്വാചൊ രാക്കൊസ് ഘർജാലൊ.

***

സോഹനാക് ബൈക് ബുക്ക് കർതാനാ ആജൊ, പുതാച്യാ ഹ്യാ കുർഡ്യാ മൊഗാക് കാവ്ജെലൊ. ആവൈച്യാ ദുദാചി രൂച് ചാക്ല്ലെ തെ വോണ്ട്.. സിഗ്രെടിചൊ ധുംവൊർ സൊഡുൻ താംബ്ഡ്യാ രംഗാഥാവ്ന് കാള്യാ രംഗാക് പർതല്ലെ. ആജൊ നാത്വാലാഗിം ചാർ ഗജാലി കരുങ്ക് ആംവ്ഡെതാലൊ തരീ നാതു ആജ്യാക് പളെവ്ന്യി പളെനാത്ല്യാപരിം കർതാലൊ. ഉലൊ കെല്യാരീ “ആയ്ക് മൊജെ ശിമ്ജെ” മണൊൻ വെതാലൊ.

ഹാംഗാ ഥംയ് ജാംവ്ചിം അവ്ഗഡാം ആയ്കൊൻ പെദ്രാമാക് പയ്ലിച് ഭിരാന്ത്. നാത്വാക് ആജൊ പാംയാപന്ദ്ലെം കസ്താൾ ജാല്യാരീ ആജ്യാക് ആപ്ലെം ദായ്ജ് മുകാർസുഞ്ചൊ ഭിയാളൊ ഹൊ നാതു മള്ളൊ അബിമാൻ. ആപ്ലി സന്തത് ആനി കുടം ബാന്ദുൻ ഹാഡ്ചൊ ഗാഞ്ച് ഹൊ നാതു മള്ളൊ ഗൌരവ്.

പൂൺ… നാതു ഹ്യാ പിക്യാ കെസാഞ്ച്യാ ആജ്യാചി സാവ്ളി ലെഗുൻ കാണ്ഠാൾതാലൊ. ദുഡു ആനി ഗ്രേസ്ത്കായെച്യാ ഗർവാൻ പെദ്രാമാഗെലെം ദെവാസ്പൺ സണസ് ഖാംവ്ക് ലാഗ്ലെം. ഹൊ മാതാരൊ സഗ്ളൊ ദീസ് തെം ഹെം നൊവെനാം, മാഗ്ണിം, തേർസ് കർതാലൊ. ഉരുല്ലിം തെഗാം സാന്താ ഖുർസാചി കുരു ലെഗുൻ കാഡിനാത്ലിം.

പാദ്രി സെർമാംവ് സാംഗ്താനാ മിജാസ്കി ദാകൊംവ്ക് മിസാക് വെതാലിം. താഞ്ച്യെ ഗർജെ ആനി മർജെച്യാ മൻശ്യാംലാഗിം ഉലവ്ന് പാടിം യെതാലിം. സാംഗാതാ ബസൊൻ ജെംവ്ചെം. ഖാംവ്ചെം നാത്ല്ലെഞ്ച്. ആപാപ്ല്യാ വെളാപർമാണെ മെജാർ മാണ്ഡുൻ ദവർലെലെം ഖാതാലിം.

പെദ്രാമാക് കാമാച്യാ ചെഡ്വാൻ ദില്ലെം തെഞ്ച് താച്യാ മർജെചെം ജെവാൺ. ഭിർമത്! ഹ്യാ ദിസാംനി പെദ്രാമാക് ഖാംവ്ചി ജബ്ബൊർ ആശാ. താന്തുംയീ ഗൊഡ്സെം മള്യാർ ജീവ്. ബാജ്ല്ലെം മാസ്, മാസ്ളി ഖാംവ്ക് ജീബ് ആംവ്ഡെതാലി. ചെഡ്വാലാഗിം ലജ് സാണ്ഡുൻ വിചാർല്യാരീ ദീനാത്ലെം. ശുഗർ യെതാ, ബി.പി. ചഡ്താ അശെം മണൊൻ ചാപ്പെ, ആൾനി ദീവ്ന് സതയ്താലെം. പയ്ലെം ഥാവ്ന് ഖെല്ലൊ ജീവ് ആതാം തൊണ്ഡ്ഭർ ഉലൊംവ്കീ നാ. പൊട്ഭത് ഖാംവ്കീ നാ. പെദ്രാം ചിന്ത്താലൊ: `മൊജ്യാ ദൊള്യാ മുക്ലിം മൊർതാത്, ഹാംവ് കിത്യാക് മൊരനാ.’

***

ബൈക് ഹാതാക് മെൾതച് സോഹനാൻ ഭുംയ് സൊഡ്ലി. വാര്യാർ ഉബ്ലൊ, കെദളാ കൊലെജിക് വെതാ കെദളാ ഘരാ യെതാ? ഖംയ് ആസ്താ? ഖംയ് വെതാ? ഖബർ നാ. ആയില്ലൊച് വേൾ, താണെ ഘാല്ലൊച് താൾ. പെദ്രാമാക് ഘർചിം മൻശ്യാം പരത് ഘരാഭിതർ യെതാ പര്യാന്ത് നീദ് നാ. ഉഗ്ത്യാ ജനെലാഥാവ്ന് ഗേടിക്ച് പളെതാ. കിത്യാക് തൊ താഞ്ചൊ മോഗ് കർതാ.

“പിടി, ബാങ്ക് സാർകൊ ആസാമൂ? ഭുർഗ്യാന്ഥാവ്ന് സാംബാൾ. സരി കൊയ്തി ഘെവ്ന് ഘായ് കർതിത്” പിടി ഘരാ ഭിതർ രിഗ്താനാ പെദ്രാമാചെം സദാഞ്ചെം രജാർ. ആപ്ല്യാ മൊഗാച്യാ മൻശ്യാഥാവ്ന് പയ്സ് ജാല്ലെം ദൂക് താചെം.

പിടിക് കളിത് ആസാം പെദ്രാമാക് ത്യാ ബാങ്കാചെർ ആസ്ല്ലൊ മോഗ് ആനി വോഡ് ദെകുൻ…

‘ആബാ, ഭിയെനാകാ ബാങ്ക് സുരക്ഷിത് ആസാ…” പുതാക് ആനി സുനെക് ഹെം ആയ്കാതാനാ ഉജൊ പെട്താലൊ. ‘മ്ഹാതാര്യാക് ബാങ്കാചി ഗിരാന്ത് ലാഗ്ല്യാ. മെല്യാർ പെടെസംഗിം ബാങ്കീ ഫൊണ്ഡാന്ത് ദവര്യാം, നാ തർ ഉടൊൻ യേംവ്ക് ആസാ.” പൂത് ആനി സുൻ കിത്ലെം ഉലൈല്യാരീ പെദ്രാമാക് മാത്ര് ബാങ്കാക് വിസ്രൊങ്ക് ജാംവ്ക്ച് നാ.

രൊയ്സ് ആതാം സാഞ്ജ് ജാതാനാ താംബ്ഡൊ ജാതാലൊ. പിയൊണെം ചഡ്താനാ പെദ്രാം ഭിയെലൊ, പിയൊണെം നാത്ലെം കുടം താചെം. താചൊ ആജൊ, ബാപയ് ഗാംവ്ചൊ ലുവാദ് ജാവ്ന് ലൊകാചി സെവാ കരുൻ പിയൊണെം ആസ്ച്യാ ലൊകാക് സാർകെ വാടെക് പർതില്ലെ മാനായ്. മതായസാഗെലെം മാൻ, മര്യാദെചെം ഘരാണെം. പയ്ലൊ ആമി സൊരൊ പിയെതാംവ്. ഉപ്രാന്ത് സൊരൊ ആമ്കാം പിയെതാ. പൂൺ… ആജ് ആപ്ണാചെം കുടം ആമാൽ ഘെവ്ന് ബസ്തനാ പെദ്രാമാക് തഡ്വനാ…

‘പുതാ… നാകാരേ ആമാലാച്യാ ചിക്ലാന്ത് പഡനാകാ. ശാലിനി ഘൊവാക് ബൂദ് സാംഗ്ചി സൊഡ്ന് തുവെംയ് ഗ്ലാസ് ഘെത്ലായ്?”

“രൊയ്സ്… മ്ഹതാര്യാചെ കർകരെ സുരു ജാലെ. ബര്യാൻ സാംഗ്താം ഭിതർ വച്, നാ തർ…” ഉട്ലെഞ്ച്ച്. പിയെവ്ന് ബിണ്ഡാം സാർകെ ജാല്ലെ ദൊളെ, ആഡ് പഡ്ചി ജീബ്, നിയന്ത്രൺ ചുക്ല്ലെ കുഡിചി ആവസ്താ പളെവ്ന് പെദ്രാം ഗെലൊ.

ഫെബ്രെർ 14 താരിക്. വെലെണ്ടൈൻസ് ഡേ. ആജ് സോഹൻ ഗെലൊ ഹീരോബരി. ആവയ് ആനി ബാപയ്ച്യാ പാകെട് മനിൻ ബൊൽസ് ദാട് ജാല്ലെ. ആവയ് പുതാക് ഝുജാക് ദാഡ്ച്യാ സൊജെരാപരിം ദാഡ്താനാ ആജൊ ജനെലാന്ത്ല്യാൻ തിൾതാലൊ.

***

ദൻപാർ പർതാലൊ, ഭുംയ്ക് കാളൊക് ദാടെലൊ. ഗെല്ലൊ നാതു ആനികീ യേംവ്ക് നാ. ആജ്യാക് ഭിരാന്ത്. ഗെടിർ ആസ്ല്ലി ദീശ്ട് പാടിം കാഡുങ്ക് നാകാ. സുൻ പിക്നികാക് ഗെലാം. പുതാചി ഖബർ നാ. ഭായ്ര് ഭിതർ ഗെലൊ. ഹെരാംനി പളൈല്യാർ ബചാവി നാ.

ഫോൻ വാജൊങ്ക് ലാഗ്ലെം. കാമാച്യാ ചെഡ്വാൻ ഉകുല്ലെം. കുഡ്കെ കുഡ്കെ ഉത്രാംനി ഉലൈതാന കാംയ് സമ്ജൊങ്ക് നാ. രൊയ്സാചൊ മൊബൈൽ നംബർ ദിലൊ.

“കിതെം ജാലെംഗൊ മാഗ്ഗി? കിത്യാക് രഡ്തായ്?” “ആബാ… സോഹൻ ബാബാക് എക്സിഡെണ്ട് ജാവ്ന് …തൊ..”… പെദ്രാബ് ഥംയ്ച് ബസ്ലൊ. താച്യാ ദൊള്യാങ്ക് കാളൊക് ആയ്ലൊ. ഥൊഡ്യാ വെളാൻ വാഹനാം യേംവ്ക് ലാഗ്ലിം. ലൊകാചി ഖാതഡ് ജാലി. മ്ഹാതാരൊ പെദ്രാം പളെത് ആസ്ലൊ. രൊയ്സ് സഗ്ളൊച് ഗൾല്ലൊ. ഇശ്ടാംനി ഹാഡ്ന് താകാ സൊഫാർ ബസൈലൊ. ഥൊഡ്യാ വെളാൻ സുൻ ആയ്ലെം. ഹാച്യാ ദൊള്യാംനി ദുകാഞ്ച് നാന്ത് മ്ഹൺ ചിന്ത്ല്യാ താകാ ആതാം തെം രഡ്താനാ… “തുജ്യാ പുതാചെം ഖുനിഗാർൻ” മ്ഹൺ സാംഗ്യാം തശെം ഭൊഗ്ലെം. “ആതാം അംബുലെൻസ് യെതെലെം. ‘ബാങ്ക്’ ഖംയ് ആസാ?” എക്ലൊ വിചാർതാലൊ. സൊദുങ്ക് ലാഗ്ലെ. ഖംയ് ആസാ? കൊണാഗെർ ആസാ?

സെജാർച്യാ ഹെർ ജാതിച്യാംനി ദീംവ്ക് ഇൻകാർ കെലെം. മെല്ലെ കുഡിക് ദവരുങ്ക് ഹിന്ദു ലോക് തയാർ നാത്ലെ. ക്രിസ്താംവാംഗെർ ആജ്കാൽ ബാങ്ക്ച് നാന്ത്. മൊലാധിക് സോഫാ കദെലാം മാത്ര് സൊഭ്താലിം.

പെദ്രാം പളെതാലൊ. താകാ ആപ്ല്യാ ആജ്യാച്യാ ബാങ്കാചൊ ഉഗ്ഡാസ് ആൈലൊ. കിത്ലെശെ നൊവ്രെ ആനി ഹൊക്ലൊ രൊസാക് ബസൊൻ കുട്മാ ജിവിത് ബാന്ദുൻ ആസാത്. കിത്ലെശ്യൊ മെല്ല്യൊ കുഡി ത്യാച് ബാങ്കാർ തേൽ രോസ് ആനി ഹള്ളെച്യാ ൻഹാണിയെന്ത് ൻഹാവ്ന് സാസ്ണാച്യാ ഘരാ പാവ്ല്യാത്. കിത്ല്ലെശ്യാ മർണാ പെടാങ്ക് ഹ്യാ ബാങ്കാൻ വിശെവ് ദീംവ്ക് നാ. പൂൺ മൊജ്യാ പുതാക് തൊ കീൾ ജാലൊ. ഹാംവ് താന്തും നിദൊൻ വചൊങ്ക് ആശെല്ലൊം. പൂൺ… “തുകാ ചന്ദനാചൊ ബാങ്ക് ഹാഡ്ന് ധാഡ്താം മള്ള്യാ മൊജ്യാ പുതാക് ദെവാൻ കസലി ശിരാണ്ട് മാർലി? കസലൊ നിർബാഗി ഹാംവ്! മൊജൊ പൂത് മൊജെം മരൺ ആശെല്ലൊ. പൂൺ ഹാംവ് ആജ് മൊജ്യാ രഗ്താച്യാ പിപ്ര്യാങ്ക് ധാഡ്താം” പെദ്രാം മനാന്ത്ച് ജാല്ലിം ഘഡിതാം ചിന്ത്താലൊ.

ബാങ്കാക് ഗെല്ലെ സർവ് രിത്യാ ഹാതാംനി പാടിം യെതാനാ… “പിടീ വച്രേ പുതാ… തുമ്ചൊ തൊ ബാങ്ക് ഹാഡ്” മൺതാനാ ശാലിനി ആനി രൊയ്സ് ഉസ്കെവ്ന് ഉസ്കെവ്ന് രഡൊങ്ക് ലാഗ്ലിം.