ബാരാ വരാഞ്ച്യാ കഠിൺ വൊതാചൊ ഘാം പുസുൻ ചെംബാന്ത് ആസ്‍ല്ല്യാ ഉദ്കാൻ ഹാംവെം മ്ഹജി താൻ ഭാഗയ്ലി. ചെംബു സകയ്ല് ദവർതാനാ ലിനാബായ് ഘരാ ഥാവ്ന് ബാന്ദുൻ ഹാഡ്‍ല്ലി ഭുതി ഉഗ്തി കർൻ, മ്ഹാകാ രാകുൻ ആസ്‍ല്ലി. പൂൺ ഹെം ആമ്ചെം സദാഞ്ചെം ൻഹയ് ആസ്ലെം. ബാരാ വരാം ഉപ്രാന്ത് ദിസാചെം കാം സൊംപൊവ്ന് ഹാംവെം ഘരാച് ജെവ്ണാക് വെചെം ആസ്ലെം.
ആജ് കിത്യാക് ബായ് ഹാംഗാ ഗാദ്യാക് ആയ്ലാം മ്ഹൺ ഹാംവെം താകാ വിചാർച്യെ പയ്ലെഞ്ച്, ബായെൻ മ്ഹാകാ ഏക് രംഗാൾ എന്വലൊപാന്ത്ലെം ഏക് കാർഡ് കാഡ്ന് ദാകയ്ലെം. പൂൺ തെം വാചുങ്ക് മാത്ര്, ജെവ്ണാ ഉപ്രാന്ത് മ്ഹൺ ഹാത് ഭാശെൻ മ്ഹാകാ താണെം ഹിശാരൊ കെലൊ. ‘ജായ്ത്’ മ്ഹൺ ഹാംവെംയ് മ്ഹജെം ജെംവ്ചെം കാര്യെം സൊംപയ്ലെം.
സൊബിത് ഫുലാഞ്ചെം ആംഗ്ലെം ൻഹെസ്‍ല്ലെം മ്ഹജെം മൊഗാചെം ലിനാബായ്, മ്ഹാകാ ഏക് ഭയ്ണ് തശിച് ഏക് ആവയ് ജാവ്നാസ്ലെം. പപ്പാ സർ‍ല്ല്യാ ഉപ്രാന്ത് മമ്മാൻ ഖാട്‍ച് ധർ‍ല്ലി. കിത്ലിം വക്താം കെല്യാർ‍യി തി അസ്വസ്ത്‍ച് ഖട്ല്യാർ പഡുൻ ആസ്‍ല്ലി. ബായെക് മ്ഹജെർ ആനി മ്ഹാകാ ബായെചെർ വിശേസ് മോഗ് ആസ്ലൊ. പൂൺ പപ്പാ സർ‍ല്ല്യാ ഉപ്രാന്ത് താച്യാ തൊണ്ഡാർ ഹാസൊ നപംയ്ച് ജാല്ലൊ. തെം ഹാസുങ്ക് വിസർലെംഗീ കിതെം മ്ഹൺ ഹാംവെം ഥൊഡെ പാവ്ടിം ചിന്ത്ചെം ആസ്ലെം. പൂൺ ആജ് മാത്ര് താച്യാ തൊണ്ഡാർ ഹാംവെം ഹാസൊ പളയ്ലൊ. താചെം ഫുലാഞ്ചെം സൊബിത് ആംഗ്ലെം ആനി ബാന്ദ്‍ല്ല്യൊ ദോൻ പാന്തിയൊ ബായെചെം വിശേസ് ആകർഷൺ ജാവ്നാസ്ലെം. മ്ഹജി ദീശ്ട് താച്യാ കാനാർ പഡ്ലി.
ആജ് ബായെൻ കാനാചെം ഘാല്ലെം! ഖണ്ഡിത് ജാവ്ന് ആജ് കിതെംഗി ബരെം ആയ്കുങ്ക് ആസാ മ്ഹള്ളെ ആശെൻ ഹാംവെം ജെവൺ ജാതാ തിത്ലെ വെഗിം ഗിള്ളെം.
തുമ്ച്യെ ബരിഞ്ച് എകാ ബര്യാ ക്രിസ്താംവ് കുട്മാന്ത് ഹാംവ് ജൽമല്ലൊം. ആമി സാഗൊളെഗാർ. ദിസാക് ശെതാന്ത് വചുൻ ഗാദെ ബെസായ് കർൻ ആമി ആമ്ചൊ ദിസ്പഡ്തൊ ഗ്രാസ് ജൊഡ്താല്യാംവ്. പൂൺ ദുർ‍ദൈവാൻ ആമ്ചൊ പപ്പാ കെങ്ക്രെച്യെ പിഡെക് വളഗ് ജാവ്ന്, ആമ്കാം അനാഥ് കർൻ പാഞ്ച് വർസാ ആദിം സംസാരാക് അന്തർലൊ. മമ്മാക് തിച്യാ ജിവിതാന്ത് ആവ്ര് ആയില്ല്യെ ബരിം ഭൊഗ്ലെം. തിണെം ജിയെംവ്ചി ഹുമെദ്‍ച് സാണ്ഡ്ലി. അസല്യെ കഠിൺ പരിസ്ഥിതെന്ത് തിചി ഭലായ്കി ഭിഗ്ഡലി ആനി തി വള്വള്ളി. പപ്പാ സർതാനാ മ്ഹജി പി.യു.സി ജാല്ലി മാത്ര് ആനി ബായെചെം ബി.കൊം. ദിസാക് ഗാദെ ബെസായ്ചെം കാം കർൻ, ദൊൻപാരാം ജെവ്ന്, ബായെ സംഗി ഘർചെം കാം തിർസുൻ സാഞ്ജെർ നായ്ട്-കാലെജിന്ത് മ്ഹജെം ഉഞ്ച്ലെം ശികപ് മുകാരുൻ ഹാംവെം സനദ് ആപ്ണായ്ലി.
ഡിഗ്രി മെൾ‍ല്ല്യാ ഉപ്രാന്ത് പർഗാംവാക് വെചി അലൊചൻ ഹാംവെം കെല്ലി. പൂൺ ഘരാ കൊൺ‍യി ദാദ്ലൊ മനിസ് നാത്‍ല്ല്യാൻ ഹാംവെം ഹെം ചിന്തപ് കുശിക് ദവർലെം. ആനി ദുസ്രൊ കസലൊച് പര്യായ് മ്ഹാകാ നാത്‍ല്ലൊ. കുട്മാദാരാംനി ലെഗുൻ ആമ്ചി കസലിച് പർവാ കെലി നാ. ക്ലിപ്പി ബാപ്പുൻ സയ്ത് ഹുസ്കൊ ദാകയ്ലൊനാ!
ശഹരാ ഥാവ്ന് പയ്സ് ആമ്ചൊ ഗാംവ് ആസ്‍ല്ല്യാൻ ആധുനികരണാചൊ പ്രഭാവ് ആമ്ചെർ തിത്ലൊ പഡുങ്ക് നാത്‍ല്ലൊ. ഏക് സാദി ജിണി ജിയെവ്ന്, ദെവാ തും പാവ് മ്ഹണുൻ, താണെം ദില്ല്യെ പികാവളിക് അർഗാം ദിവ്ന് ആമി പാട്ലിം പാഞ്ച് വർസാം സാർലിം. ബായെക് കാജാരാക് ഭർതി പഞ്ച്വിസ് വർസാഞ്ചി പ്രായ് ജാല്ലി… താചെം ഹാതാന്ത് ആസ്‍ല്ലെം പത്ര് കാംയ് താച്യെ സയ്രികെക് പുണി ൻഹയ് മൂ? ഹാംവെം അന്ദാജ് കെലൊ.
പൂൺ മ്ഹജൊ അന്ദാജ് ചുക്ലൊ. തെം പത്ര് ജസിന്താ ബായെച്യാ കാജാരാചെം പത്ര് ജാവ്നാസ്ലെം. ജസിന്താ ബായ് പപ്പാച്യാ നിമാണ്യാ ഭാവാചി ക്ലിപ്പി ബാപ്പുചി എക്ലിച് ധുവ്.
ക്ലിപ്പി ബാപ്പുൻ ധാ വർസാം ദുബായ് കാം കർൻ ആനി മാഗിർ മംഗ്ളുരാന്ത് ലുഗ്ടാഞ്ചി ആംഗഡ് ഘാൽൻ ബരൊ ദുഡു കമയില്ലൊ. പൂൺ പപ്പാ സർ‍ല്ല്യാ ഉപ്രാന്ത് ആമ്ചെം നാതെം തൊ വിസർലൊ. മമ്മി ആസ്പത്രെന്ത് ആസ്‍ല്ല്യാ വെളാർ സയ്ത് തൊ മമ്മാക് ഭെടുങ്ക് ആയ്ലൊ നാ. തർ‍യി ആജ് പൊസ്ടാം മുകാന്ത്ര് ആപ്ല്യെ ധുവെച്യാ കാജാരാചെം ആപൊവ്ണെം ദില്ല്യാൻ ആമ്കാം ലാഗിം യെംവ്ക് ഏക് അവ്കാസ് മെള്ളൊ.
നിരാസ്പണാൻ ഭർ‍ല്ല്യാ ആമ്ച്യാ ഹ്യാ ജിവിതാന്ത് കാജാരാചൊ ഹൊ സംഭ്രം സന്തൊസാചി ഏക് ബരി ഖബർ‍ച് സയ്. ഘരാ യെവ്ന് ഹാത് പാംയ് ധുവ്ന് ഹാംവെം കാജാരാചി താരിക് ആനി ഹൊൽ ഖംയ്സർ ആസാഗി മ്ഹൺ പത്ര്യാൻ ഏക് പാവ്ടിം വാച്ലെം. ആബ്ബാ! കാജാർ യെംവ്ച്യാ ഹഫ്ത്യാന്ത്‍ച് മംഗ്ളുർച്യാ എകാ ഫായ്വ്-സ്ടാർ ഹൊടെലാന്ത് ആസ്‍ല്ലെം. ഫകത് കാജാരാക് മാത്ര് ആപൊവ്ണെം ആസ്‍ല്ലെം, രൊസാക് ൻഹയ്. മമ്മാക് ബായെൻ കാജാരാചി ഖബർ എദൊൾ‍ച് ദില്ലി. തെദ്നാഞ്ച് മ്ഹജ്യാ മൊബായ്ലാർ ഏക് കൊൽ ആയ്ലെം. ജസിന്താ ബായെചെം നാംവ് താചെർ ഝൾകലെം.
“ല്യാൻസി തുകാ മ്ഹജ്യാ കാജാരാചെം ഇന്വിടെശൻ മെള്ളെംമൂ?”, ഹാംവെം താകാ ഉല്ലാസ് പാടൊംവ്ച്യാ പയ്ലെഞ്ച് താണെം സുരു കെലെം. “തുവെം ഏക് ബരൊ സൂട് ഘാൽൻ യേജെ ആനി ലിനാക് ഏക് ബരൊ സ്കർട് ആനി ടൊപ് ശിവൊംവ്ക് സാംഗ്” താണെം മുകാർലെം. “ആണ്ടിക് ഹാഡ്ചി കാംയ് ഗർജ് നാ” അശെം ഫർമാവ്ന് താണെം കൊൽ കട് കെലെം. മ്ഹാകാ ഉലൊംവ്ക് ഏക് അവ്കാസ് സയ്ത് ദിംവ്ക് നാ.
ഹാംവ് മ്ഹജ്യാച് ചിന്ത്നാംനി മഗ്ന് ജാലൊം. ആയ്ലെവാർ ആമ്ച്യാ മംഗ്ളുരാന്ത് ആനി ഗാംവാംനി സയ്ത് സംഭ്രമാചി ഗദ്ദളായ് വ്ഹഡാ മാപാൻ വാഡത് ആനി ചഡത് ആസാ. പൊർ‍ച് വിൽഫി ആങ്കലാച്യാ പുതാച്യാ കുമ്ഗാരാക് താണിം അഡേജ് ലാകാം വയ്ര് ഖർച് കെല്ലൊ ഖംയ്.
സകയ്ല്യാ ഹിത്ലാന്ത് പഞ്ച്വിസ് വർസാം പയ്ലെം, ലൊകാം ഹുജിർ ദുബ്ളികായ്, വിദേയ്പൺ ആനി നിസ്കൾപണാചി ശാശ്വത് ആംഗൊവ്ണ് കെല്ല്യെ സി| ലെതിസിയാൻ വ്ഹഡാ ദബാജാൻ ആപ്ലൊ ജുബ്ലെവ് സംബ്രമ്ലൊ. ഹെം കരുങ്ക് തിച്യാ കുട്മാദാരാങ്ക് സുമാർ ചാർ ലാകാഞ്ചൊ ഖർച് ബസ്ലൊ.
ആപ്ല്യെ ഒഡ്ദിചി തയാരായ് കർതല്യാ, മ്ഹജ്യാ സഹപാടി ലൊരെൻസാക് ചഡ് ആഡംബരാം കരിനാസ്താനാ ഉണ്യാ ഖർചാർ ആപ്ലെം കാര്യെം അചരൺ കർചെം മ്ഹൺ താണെം സെമിനരിന്ത് ആസ്താനാച് നിർധാർ കെല്ലൊ.
“തും ആമ്ചൊ എക്ലൊച് പൂത് നെയെ രെ! പാദ്രി ജാംവ്ചെം ഭാഗ് സക്ഡാങ്ക് ഫാവൊ ജായ്നാ…. ആയില്ല്യാ സയ്ര്യാങ്ക് സുധാർസിജെ നെ!” മ്ഹണുൻ താചെം കാര്യെം കാജാരാ ബരിച് എക്ദം ഗഡ്ദ് കെല്ലെം. ബെല്യാ ശഹരാന്ത് ദുബ്ളൊ ജൽമല്ല്യാ ആനി കാല്വാരിർ വിൺഗൊ ജാല്ല്യാ ജെജുചി സാക്സ് ദിംവ്ക് ഭായ്ര് സർ‍ല്ലൊ ലൊരെൻസ് ആപ്ല്യാ ആവയ് ബാപയ്ച്യെ മർജെ മുകാർ മൊനൊച് ഉർലൊ. സെമിനരിന്ത് ആപുൺ ‘ദെവാക് ആനി ലൊകാക് മെച്വതാ തസലി സാദി ജിണി ജിയെവ്ന്, ഗാലെലിയാച്യൊ വാടൊ ചമ്കല്ല്യാ ത്യാ നജാരെത്‍ഗാർ ജെജുക് സാക്സ് ദിതലൊം’ മ്ഹള്ളെം താചെം സൊപൺ, ത്യാച് ദിസാ ശൊലാഞ്ച്യാ രാശിംനി, ഫുലാഞ്ച്യാ തുര്യാംനി ദുഡ്വാഞ്ച്യാ കാടാംനി ആനി ആയരാച്യാ ഭാരാൻ സപൺ‍ച് ജാവ്ന് ഉർലെം.
“തും മ്ഹജൊ ക്ലാസ്‍മേട് ആനി ബരൊ ഇശ്ട് ജാല്ല്യാൻ ഹാംവെം തുകാ സാംഗ്ചെം” മ്ഹജ്യെ പാടിർ ഹാത് ദവർൻ താചിം ഭൊഗ്ണാം മമ്മാക് പളെംവ്ക് ആയില്ല്യാ വെളാർ താണെം മ്ഹാകാ ഉചാർ‍ല്ലിം.
നിജായ്കി ആമ്ച്യാ സംഭ്രമാങ്ക് ആസ്ചി തി സർബരായ്, ത്യൊ ലാംബ് ദീഗ് സെരെമനി, മാൻ പത്രാർ ലിക്‍ല്ലി തിം ജഡായെചിം ഹൊഗൊൾസുഞ്ചിം ഉത്രാം, ആമ്ചി രീത് നീത് കിത്ലി ബദ്ലല്യാ! ഇഗർജെന്ത് ജൊഡ്ച്യാ സാക്രാമെന്താ പ്രാസ് ചഡ് മഹത്വ് ഭായ്ര് സാലാന്ത് ജാംവ്ച്യാ കാര്യാക് ആമി ദിതാംവ് ൻഹയ്‍ഗി? ആമിച് ജൊഡ്ചെം ആനി ആമിച് മൊഡ്ചെം. ആമ്ചെം കാര്യെം സംഭ്രമുങ്ക് എകാ ഗരിബ് കുട്മാക് കുമൊക് കെല്യാർ കശെം ജായ്ത്? ഹാംവെം ആപ്ണാ ഇത്ല്യാക്‍ച് ചിന്ത്ലെം.
പൂൺ സൂട് ഘെംവ്ക് ആനി ബായെക് വസ്തുർ ശിംവൊംവ്ചെ തിത്ലി ഗത് ആമ്ചി നാത്‍ല്ലി. ഹ്യാ കാളാർ ഗാദെ ബെസായ് കെല്ല്യാക് കിതെം മൊൽ?
ജസിന്താ ബായെചെം ഡിമാണ്ഡ്സ് ആയ്കുൻ മമ്മാൻ തിചെം ഭാംഗാർ വികുൻ, മെൾ‍ല്ല്യാ പയ്ശ്യാഞ്ചെം വസ്തുർ ഹാഡുങ്ക് ആമ്കാം സാംഗ്‍ല്ലെം. ദുസ്രൊ കസലൊയ് ഉപാവ് നാത്‍ല്ല്യാൻ ആമ്കാം തശെഞ്ച് കരിജെ പഡ്ലെം.
കാജാരാ ദിസാ, രെസ്പെരാച്യാ മിസാക് ലിനാ ബായെ സംഗി എക്സ്‍പ്രെസ് ബസ്സാർ ബസുൻ ആമി മംഗ്ളുർ പാവ്ല്യാംവ്. ധാ വരാർ രെസ്പെരാചെം മീസ് തർ‍യി ജസിന്താ ബായ് ഖംയ്സർ‍യ് മ്ഹാകാ ദിസ്ലെം നാ. ബാപ്പു ആനി ആണ്ടി ഫൊടൊഗ്രാഫരാ ലാഗിം ഉലയ്താനാ താണിം ആമ്കാം ദെക്ലെം. പൂൺ ആപുൺ ബിജി ആസ്‍ല്ല്യെ ബരിം തിം കരിലാഗ്ലിം.
സവയ് ധാ വരാർ എകാ അലങ്കൃത് ധവ്യെ ഗാഡിയെർ ജസിന്താ ബായ് കാജാരാചെം ആംഗ്ലെം ൻഹെസുൻ ആയ്ലെം. അശെം ആയില്ലെം ജസിന്താ ബായ് ഇഗർജെന്ത് മിസാക് വെച്യാ ബദ്ലാക് ഫൊടൊഗ്രാഫരാങ്ക് ആപ്ണാക് ദാകയ് ലാഗ്ലെം. സുമാർ ഏക് ഡജൻ തസ്വിര്യൊ കാഡ്‍ല്ല്യാ ഉപ്രാന്ത്‍ച് ബായ് ഇഗർജെ ഭിതർ രിഗ്ലെം.
മിസാ വെളാർ ഹൊകൽ നവ്ര്യാചെം ഗമൻ മീസ് ഭെടൊംവ്ച്യാ യാജകാ പ്രാസ് ഫൊടൊഗ്രാഫരാം ഥംയ് ചഡ് കെന്ദ്രിത് ആസ്‍ല്ലെം. മീസ് ജാല്ലെ തക്ഷൺ ആമി ത്യാ ഫായ്വ് സ്ടാർ ഹൊടെലാക് പാവ്ല്യാംവ്. ബായെക് ശുഭാശയ് പാടൊംവ്ക് നാംവാഡ്ദിക് ഉദ്യമി ആനി ഹെർ ലോക് ആയില്ലൊ. നാച്പാ ഉപ്രാന്ത് ബായെൻ സാഡൊ ൻഹെസുങ്ക് സയ്ത് ഇൻകാർ കെലൊ. ജെവ്ണാക് സബാർ നമുന്യാചെം ജെവൺ ആസ്‍ല്ലെം. വെജ് ആനി നൊൻ വെജാന്ത്‍ച് ഡജനാം വയ്ര് ഖാംവ്ക് ആസ്‍ല്ലെം. മാഗിർ ചായ്നിസ് കാംവ്ടർ ആനി ബിരിയാനി കാംവ്ടർ മ്ഹണുൻ ജെവ്ണാചി രാസ്‍ച് രാസ്. ഹെം സക്കഡ് പളെവ്ന് ഹാംവ് അജാപ്ലൊം.
ബാപ്പു ആനി ആണ്ടി, തശെഞ്ച് ജസിന്താ ബായ് ആമ്കാം പളെവ്ന് വളക് നാത്‍ല്ല്യെ ബരിം കരിലാഗ്ലിം. ആമ്ചെം ജെവൺ ജാല്ലെഞ്ച് ആമി ഥംയ് ഥാവ്ന് നികള്ള്യാംവ്.
***
എകാ ഹപ്ത്യാ ഉപ്രാന്ത് ഹാംവ് മംഗ്ളുരാക് യെതാനാ ഹാംവെം ബാപ്പുഗെർ വെചി ആലൊചൻ കെലി. ഹാംവ് ബാപ്പുഗെർ വെതാനാ ജസിന്താ ബായ് ആനി ക്ലിപ്പി ബാപ്പു എകാ വകിലാ സംഗി ഡൈവൊർസാക് അർജി തയാർ കർൻ ആസ്‍ല്ലിം…
തൊ സംഭ്രം, തി ഗദ്ദളായ്, തെം ആഡംബർ… എകാച് ഹപ്ത്യാ ഭിതർ അർഥ് ഹീൻ ജാവ്ന് സക്കഡ് കാബാർ ജാല്ലെം!
