ഭാരതീയ് ഭൂസേനാന്ത് (ആർമി) ചൊവിസ് വർസാം സെവാ സൊംപയ്താനാ സുബെദാർ ജാല്ല്യാ മ്ഹാകാ ഫുഡെം ഭഡ്തി ലാബ്ചൊ അവ്കാസ് നാ ദെകുൻ നിവൃത്ത് ജാംവ്ക് ആദേശ് യെതാനാ ഹാംവ് ഖണ്ഡിത് ജാവ്ന് നിരാശെൻ ഗൾ‍ല്ലൊം. ദോൻ കാരണാം മ്ഹജ്യെ തക്ലെക് ആപ്ടല്ലിം ആനി മ്ഹജൊ ഫുഡാർ ചിന്തപ് ദെസ്വാടുങ്ക് പാവ്ലലിം. പയ്ലെം കാരൺ ദൊഗാം ഭുഗ്ര്യാം സവെം പതിണെക് സാംബാൾതാനാ മ്ഹജ്യാ സാംബാളാ ഥാവ്ന് ചഡ് ഉരൊംവ്ക് മ്ഹാകാ ജാംവ്ക് നാത്‍ല്ലെം ആനി ത്യെ വർവിം സ്വന്ത് ഘർ ബാന്ദ്ചെം വാ ഘെംവ്ചെം സപൺ കാൾകെഞ്ച് ജാവ്ന് ഉർ‍ല്ലെം, ബെജാരായ് ദിവ്ന്.
ദുസ്രെം കാരൺ ഭുഗ്ര്യാഞ്ച്യാ ഉഞ്ച്ല്യാ ശിക്പാക് ആധാർ ജാംവ്ക് ജാതാ തിത്ലിം വർസാം സെവാ ദിംവ്ക് ചഡിത് ഭഡ്തെങ്ക് അവ്കാസ് ജൊഡുങ്ക് ആനി ദെണെം ജാവ്ന് ലാബ്ച്യാ ഗവ്രവ് അധികാരി (ഹൊനൊരരി) ഭഡ്തി സവെം സർവ് സവ്ലത്യൊ ദൊഡ്ത്യാൻ ആപ്ണാംവ്ക് ഹാംവെം അർപില്ലി നിഷ്ടാ ആനി കെല്ലൊ വാവ്ര് അധ്ര്യാർ‍ച് തുട്‍ല്ലൊ. ത്യാ ബരാബർ നിവൃത്ത് കാൾ തൃപ്തെൻ ജിയെംവ്ചെം ചിന്തപ് ഫുട്‍ല്ലെം.
ഗവ്രവ് അധികാരി ജാല്ലൊം തർ നിവൃത്ത് വേതൻ (പെൻശൻ) പഞ്ച്വിസ് ഹജാരാം ബദ്ലാക് ചാളിസ് ഹജാരാങ്ക് ഉഡ്തെം, ഉണ്യെ ദരിർ മെൾചി വിസ്കി സ ബൊത്ലി ഥാവ്ന് ധാ ബൊത്ലിങ്ക് പാവ്തി ആനി ക്യൂ ചുക്തി!
മ്ഹാകാ ദുസ്രി വാട് നാത്‍ല്ലി, മിലിട്രി ഫർമാൺ ആവ്ചിത് യെതാ ആനി ഘട് ചിഡ്കതാ ജാല്ല്യാൻ ഹാംവെം മൻ ഘട് കെലെം, ഹദ്ര്യാന്ത്ലെ ദഡ്ദഡെ ഥാംബയ്ലെ. ത്യാ പർമാണെഞ്ച് സെവാ സൊംപൊംവ്ചൊ ആദേശ് സ്വികാരുൻ, നിവൃത്ത് വേതനാക് ബ്യാങ്ക് വിവർ പാടൊവ്ന് ആനി സർവ് വിഭാഗാം ഥാവ്ന് ആക്ഷേപ് നാ മ്ഹൺച്യാക് ദസ്കത് ഘെവ്ന് (ഓഔഅ) ഹാംവെം പൊട്ലി ബാന്ദുങ്ക് ധർലി. ഹാംഗാ എകാ വാക്മൂലാൻ സർവ് വിഭാഗാം ബാബ്തിം ഉചാർലെം തരി മിലിട്രിന്ത് “ആക്ഷേപ് നാ” ദസ്കത് ഘെംവ്ക് ഏക് മഹിനൊ പുണി ധാംവുങ്ക് പഡ്താ, ഭിക് മാഗ്ച്യെ ബരിം.
ത്യെ ഘഡ്ബഡെന്ത് ഏക് ഖന്ത് മാത്ര് മ്ഹജ്യാ മെന്ദ്വാക് ബുരാക് കാഡ്താലി: നിവൃത്ത് ജാവ്ന് രാംവ്ചെം ഖംയ് മ്ഹള്ള്യെ വിശിം. ബജാൽ മ്ഹാൽഗഡ്യാഞ്ച്യാ ഘരാ വ്ഹഡ്ലൊ ഭാവ്, പതിൺ-ഭുഗ്ര്യാം സവെം ജിയെതാലൊ ആനി മാഡാ-മാഡിയാഞ്ചെം തൊട് സാംബാൾതാലൊ. ഹാംവെം ഹക്കാൻ ഥംയ് രാവ്യെതെം തരി പതിൺ-ഭുഗ്ര്യാം സംഗിം തെം ഘർ തിസ്ര്യാ വർഗാചെം ബിഡാർ ജാംവ്ചി ഭിരാന്ത് ആസ്ലല്യാൻ വിംഗഡ് രാംവ്ചി ഗർജ് ആസ്ലി.
ത്യാ തെകിത് മ്ഹജി പതിൺ-ഭുഗ്ര്യാം സവെം ആപ്ല്യാ ഘരാച് രാവ്താലി, ഗർജൊ സുധാർസിതാലി ആനി പ്രായെസ്ത് ആവയ്-ബാപായ്ക് ആധാർ ജാതാലി. പൂൺ മ്ഹാകാ ഖായാം ഥംയ് രാവുങ്ക് ഖുശിനാത്‍ല്ലി!
ദെകുൻ മിലിട്രി സാണ്ഡുൻ മംഗ്ളുർ പാവ്‍ല്ലൊ ഹാംവ് മ്ഹജ്യാ വസ്തുഞ്ചി പേട് ആനി പൊട്ലി വ്ഹാവൊവ്ന് പതിണെ സംഗിം ജിയെംവ്ക് ഗെലൊം തരി ദോൻ ദിസാനിഞ്ച് ഭൊംവാരിം ബിഡാരാഞ്ച്യെ സൊദ്നെക് ലാഗ്ലൊം. ആമ്കാം ചിഡ്കുൻ ജിയെംവ്ക് ൽഹാൻശെം ബിഡാർ പാവ്താ തരി ഹായ്‍സ്കൂലാന്ത് ശിക്ച്യാ ദൊഗാം ഭുഗ്ര്യാങ്ക് സമാധാനാൻ ജിയെംവ്ക് തിക്കെ ഇസ്കൾ ഘരാചി ഗർജ് ആസ്‍ല്ലി ജാല്ല്യാൻ സൊദ്നാം ഭാരിച് കഷ്ടാഞ്ചിം ജാല്ലിം ദോൻ കാരണാംനി: പയ്ല്യാൻ, ബരിം ബിഡാരാം വാ ഘരാം ഭർതി ജാല്ലിം, മംഗ്ളുരാന്ത് കാമാം ധർലല്യാ ഭായ്ല്യാ ലൊകാ വർവിം. ദുസ്ര്യാൻ, ബിഡാരാഞ്ചെം ഭാഡെം തക്ലെ വയ്ര് ആസ്ലെം!
എക്യെ കുശിൻ മായ്-മാംവ് ആമ്കാം ആപ്ണാ സംഗിം ജിയെംവ്ക് വത്തായ് കർതാലിം ആനി ആന്യെക്യെ കുശിൻ പതിൺ-ഭുർഗിം സയ് ഘാലുൻ ബദ്ലാവൺ നെഗാർതാലിം. പൂൺ ഹാംവ് ഫുഡ്ലെം ചിന്ത്താലൊം, പതിണെചിം ഭാംവ്ഡാം ഫുഡെം ആയ്ല്യാർ, രാവുങ്ക് ൻഹയ് തരി ഘർ-ജാഗൊ വാണ്ടെ കരുൻ വികുങ്ക് പ്രയത്ന് കെല്യാർ ആമ്ചി ഗത് തിക്കെ പാഡാരി ജാംവ്ചൊ സംഭവ് ആസ്ലൊ.
മ്ഹജെം മൻ ചിന്ത്താലെം ദോൻ വാടാങ്ക് വിഞ്ച്താലെം-സ്വന്ത് ജാഗൊ ഘെവ്ന് സൊബിത് ഘർ ബാന്ദുൻ ഫുഡ്ലി ജിണി സാർചി വാ പൊട്ലി സുടൊവ്ന് പാപാരി ജാംവ്ച്യാ ബദ്ലാക് ൽഹാൻശെം ബിഡാർ ഭാഡ്യാക് ഘെംവ്ചി.
വ്ഹയ് മിലിട്രി സാണ്ഡ്താനാ മെള്ളലി പൊട്ലി ഥൊഡ്യാച് ലാകാഞ്ചി ആതാം സർകാരി ബ്യാങ്കാന്ത് പാഞ്ച് വർസാം ആവ്ദെക് (ഈആ) ഘാല്ല്യാൻ തീൻ മഹിന്യാങ്ക് ഏക് പാവ്ടിം വാഡ് മ്ഹജ്യാ പെൻശനാക് മൊടി കർതാലി, ഖർചാക് വാട് ജാതാലി. സ്വന്ത് ജാഗൊ ആനി ഘർ ആശെല്യാർ പൊട്ലി ഖണ്ഡിത് മായാഗ് ജാതലി, ഖർചാക് മെൾചി വാഡ് രാവ്തലി, ഉൾടെം ഥൊഡെം പെൻശൻ ബ്യാങ്കാച്യാ രിണാക് വെതലെം. ആതാം സദ്ദ്യാക് ൽഹാൻശെം ബിഡാർ ഭാഡ്യാക് ഘെവ്ന്, ഭുഗ്ര്യാഞ്ച്യാ ശിക്പാക് ജതൻ ദിവ്ന് സാദ്യാ പാംവ്ഡ്യാർ ജിയെംവ്ചെഞ്ച് വാജ്ബി മ്ഹൺ ചിന്ത്ലെം ഹാംവെം, സ്വന്ത് ജാഗൊ ആനി സൊബിത് ഘർ ഭുർഗിം ഉദ്യൊഗ് ധർലല്യാ ഉപ്രാന്ത്‍ച് മ്ഹൺ.
ആനി ഹ്യാ ചിന്ത്പാക് പതിണെൻ സയ് ഘാൽതാനാ ഹാംവെം സൊദ്നാം ചലയ്ലിം, ഏക് പ്രമുക് ഇരാദൊ ദിഷ്ടി ഹുജ്രിം ലകൊവ്ന്: മ്ഹാകാ ജൽമാചൊ ഗാംവ് ബജാൽ സാണ്ഡുങ്ക് ഖണ്ഡിത് ഖുശി നാത്‍ല്ലി!
ആബ്ളെ! ഹ്യെ സാദ്യെ ആശെച്യെ ഖുശെക് പഡീൽ ഗാംവാന്ത് ഘർ ആസ്ചി പതിൺ ആനി ദരബസ്ത് ബസ്സാഞ്ചി സവ്ലതായ് വാപർചിം ഭുർഗിം ആഡ് രാവ്താനാ, കെങ്കാർച്യാ ഉത്രാംനി അസമാധാൻ ഉസയ്താനാ ഏക് അജാപ് ഘഡ്ലെം, ഹ്യെ കാണിയെക് വാട് ദിവ്ന്. പഡീൽ മാംവാഡ്യാ ഹാംവ് എക്യെ സകാളിം ആൾശി പെട്യാ ബരിം ലൊളുൻ ആസ്താനാ മ്ഹാകാ സൊദുൻ ദോഗ് മാനെസ്ത് ആയ്ലെ. മ്ഹജി വളക് ഖാത്രി കരുൻ, തും സ്വതന്ത്ര് ജിയെംവ്ക് ബിഡാർ സൊദ്തായ് ഖംയ്, ബജാൽ സൊഡുങ്ക് ഇൻകാർ കർതായ് ഖംയ്, തെം ആയ്കുൻ ആമി തുകാ സൊദുൻ ആയ്ല്യാംവ്, തും ആമ്കാം ഉപ്കാർ കർതലൊയ് മ്ഹൺ” മ്ഹണാലെം.
ഹാംവ് ഖണ്ഡിത് ഘുസ്പഡ്ലൊം. “ബിഡാർ ജായ് മ്ഹാകാ പൂൺ ഉപ്കാർ ജാതാ തുമ്കാം, ഹെം മ്ഹാകാ സമ്ജനാ” മ്ഹൺ ഉചാർതാനാ തെ ഹാസ്ലെ. “ഭാരതാച്യെ ഗഡിർ ദെശാക് രാക്‍ല്ലൊ വീർ‍പുത്ര് തും ദെകുൻ ആമ്ച്യാ ബജാൽ ഗഡിർ എകാ തൊടാക് രാകുങ്ക് ആമി വിനന്തി കർതാംവ്” മ്ഹണാലെ. ആനി ഹാംവ് “മ്ഹള്യാർ?” മ്ഹൺ ആജാപ്താനാ, “ബജാൽ ഗുഡ്യാ തെവ്ശിം ആമ്ച്യാ മ്ഹാൽഗഡ്യാഞ്ചി സുവാത് പളെംവ്ക്” മ്ഹൺ വിവരിലെം.
മ്ഹള്യാർ തെ കെനഡാ വാവുർതാലെ, ഹാംഗാ ആവയ്-ബാപുയ് അന്തർലല്യാൻ ഘർ-തോട് പൺഗിൽ പഡ്‍ല്ലെം. ബരൊ ആദായ് ആസ്ച്യാ താങ്കാം മ്ഹാൽഗഡ്യാഞ്ച്യാ ഉഗ്ഡാസാക് താഞ്ചി സുവാത് സാംബാൾചി ആശാ ആസ്ലി!
ഹാംവ് ഒപ്ലൊം, സ്വതന്ത്ര് ബിഡാർ-തോട് ആനി ജിവാൾ ദവർച്യാക് സാംബാൾ മ്ഹൺതാനാ ഉഡ്ലൊം. “ഹാം-ഹൂം” മ്ഹൺ പതിൺ ഒപ്ലി, ബായ്ക്-സ്കൂടർ ഘെവ്യാം മ്ഹൺതാനാ ഭുർഗിംയ് ഒപ്ലിം, ദെകുൻ ഫുഡ്ല്യാ ആയ്താരാ ആമി തെവ്ശിൻ ഗെല്യാംവ്. ബസ്സാം മാർഗാ ഥാവ്ന് ഭാരിച് മുകാർ, മാത്യെച്യെ വാടെൻ എക്ദം ഭിതർ, പൂൺ വ്ഹഡ്ലെം തോട്-സൊബിത് ഘർ-ആളാഞ്ച്യാ ബിഡാരാ സവെം. മിലിട്രിന്ത് ശെംബർ-ദൊൻശിം ജവാനാങ്ക് സാംബാള്ളല്യാ മ്ഹാകാ ഹാംഗാ ധാ-പന്ദ്രാ ആളാം കർനാ കാം കരൊംവ്ക്, താങ്കാം ആനി ഘർ-തൊടാക് സുരക്ഷാ ദിംവ്ക് ആനി ഗർജ് പഡ്ല്യാർ ഘരാ ഭിതർലി ബന്ദുക് വാപരുങ്ക്. ഹാംവ് ഒപ്താനാ തെ ഉല്ലാസ്ലെ!
എകാ ഹഫ്ത്യാ ഭിതർ മ്ഹാകാ ജവാബ്ദാരി ദിംവ്ചിം ദസ്താവെജാം മംഗ്ളുർ ഡിസി, സബ് രിജിസ്ട്രാർ ആനി ബജാൽ പഞ്ചായതാന്ത് ഉത്രാവ്ന് ആനി മ്ഹജ്യാ ആധാർ കാർഡാചി, വൾകെ പത്രാചി ആനി തസ്വിരെചി പ്രതി ഘെവ്ന് തെ വ്ഹഡാ ആനന്ദാൻ മ്ഹാകാ വേംഗ് മാരുൻ ആനി ഘർച്യാ സാലാന്ത് ആവയ്-ബാപായ്ച്യെ തസ്വിരെ ഹുജ്രിം ദുഖാം ഗളൊവ്ന് തെ പാടിം ചല്ലെ. ആവ്ചിത് താണിം കെല്ലൊ ഉപ്കാർ നിയാളുൻ, ഹാംവ്‍യി രഡ്ലൊം.
ആനി മ്ഹജ്യാ കുട്മാച്യാ മനോഭാവാക് തൃപ്തി ലകൊവ്ന് ആനി ജവാബ്ദാരി ദില്ല്യാ കെനഡാഗാരാഞ്ച്യെ പാത്യെണെക് അലങ്കാർ പാടൊവ്ന് തോട് സാംബാളുങ്ക് ലാഗ്ലൊം. ത്യാ വെളാ ജൽമല്ല്യാ എകാ വിശിഷ്ട് ഘഡിതാൻ.
സുർവാത് ജാവ്ന് താഞ്ച്യെ മജതെൻ ഘർ-തോട് നിതൾ ആനി സൊബിത് കെലെം, ഘരാ പാട്ല്യാ ഗൊട്യാന്ത് പൊസുങ്ക് ഗൊർവാം ഹാഡ്ലിം ആനി ഘർ രാകുങ്ക് ദോൻ സുണ്യാ പിലാം പൊസ്ലിം-ഏക് പെടൊ ആന്യെക് കൊൽഗെം. തശെഞ്ച് ഘുഡ് ഭരുങ്ക് കുങ്ക്ഡാം ആനി ഉന്ദ്രാങ്ക് ധാംവ്ഡാംവ്ക് മാജ്രാങ്ക് ആരായ്താനാ സർവ് ദിശാംനി തൃപ്തി ഭൊഗ്ലി. സദാം സകാളിം വെഗിം ഉടുൻ ഹാംവ് തൊടാന്ത് ഭൊംവ്ഡി മാരിലാഗ്ലൊം ആനി ആളാഞ്ച്യാ വാവ്രാചി പരിഗത് പളെലാഗ്ലൊം. ത്യെ പാത്യെണെൻ തൊടാന്ത് വാവുർലല്യാ ബരിച് ഹിത്ലാന്ത്ലി രാന്ദ്വയ്-വ്ഹാളാന്ത്ലി മാസ്ളി ഹാഡുൻ ദിതാലെ ആനി ഭുർഗിം മംഗ്ളുർ ഥാവ്ന് മാസ്-ലാഡു ഹാഡ്താലിം.
വർസാം ഉബ്താനാ വ്ഹഡ് ജാല്ലിം സുണിം മ്ഹജെ രാക്വലി ജാവ്ന് തൊടാന്ത് ഭൊംവ്താനാ ആനി ഹാംവ് ആളാഞ്ച്യെ ജാഗ്വണെ വിരൊധ് ബൊല്യാം-തൊഡാം സർശിം ഘുംവ്താനാ എകാ സകാളിം എകാ ബാക്കാരാ പയ്സ് ഏക് സരൊപ് ജിഡെം ഫുലൊവ്ന് ഖൊഞ്ച് മാരുങ്ക് ആയ്തൊ ജാലൊ. ആകാന്തുൻ ഹാംവ് പാടിം സർതാനാ മ്ഹജൊ പൊസ്കൊ ആഡ് യെവ്ന് ഘൊങ്കുങ്ക് ലാഗ്ലൊ. പൂൺ സരൊപ് നീട് ജാവ്ന് ഹിസ്സ് കർതാനാ പൊസ്കൊ ഉഡ്ലൊ ആനി താകാ ചാബുൻ ഹാലയ്ലാഗ്ലൊ. സർപാൻ ഖൊഞ്ച് മാർലിച്, ദോൻ പാവ്ടിം ആനി തിസ്ര്യെ പാവ്ടിം മാർതാനാ പൊസ്കൊ ആഡ് പഡ്ലൊ!
ആംഗ്ണാന്ത്ല്യാ വൊഡ്താന്ത് ഹാംവെം പൊസ്ക്യാചൊ ഫൊണ്ഡ് ബാന്ദ്ലൊ, ഉഗ്ഡാസാക് ഗുലൊബാ ഝാഡ് ലായ്ലെം.
