സദുബാബ് ആനി ഇന്ദീആകാലൊ രാജെശ് ഹൊ എക്ലൊ എക്സുരൊ പുത്. ആനി ആതാം തർ താജെച് ലഗ്ന് ഥാർലാ. ഇന്ദീആകാൻ സുനെക് ഘാൽപാച്യൊ വസ്തി, ഭാംഗ്രാം ശിംഗ്രാം എകെക് കരൂൻ പയ്ലീഞ്ച് കരുൻ ദവ്രില്യാംൻ ഹുസ്കൊ സൊ നാശില്ലൊച്. സദുബാബാലി തീൻ വർസാഞ്ചി ശിർവിസ് ആസാ അജുൻ. മ്ഹയ്നൊമാൽ പഗാർ യെത്ലൊച്, ത്യാ ഭായ്ര് ബങ്കെൻ ദവ്രില്യാ പൈശാംവെലെം കളന്തർ ആസാച്. ഇന്ദീആകാ തിഗുളസാണെൻ സംവ്സാർ കർപി.” ആയ്കലാം ൻഹംയ്?” ” സാംഗ്സാംഗ് ആയ്കതാം”। ” ഹെം പളയ് ആമി ആമ്ചി ജീൺ ആമ്കാം ജായ് തശി ജഗ്ലിം. ആതാം ദിസ് രാജെശ്- വിന്ദാചെ. താഞ്ചെ ജീണെന്ത് ആമി ആഡ്ഖൾ ജാവ്പ് നാം.” ” ഹയ് ഗൊം ബായെ കൾതാ മ്ഹാകാ.” ” നാം ഒഗീച് എക് സാംഗ്താ ഹാംവ്. ഹ്യാ വയാന്ത് ആമി രിവ്ഹർസ് ഗിയ്രാന്തച് രാവ്പാചെ.” “ആതാം രിടായ്രമെണ്ടാച്യാ ദിസാംനി ഗിയ്രാം ആനി ഖംയ്ചി പഡ്തലി?” ഖെങ്ക്ക് കരുൻ സദുബാബ് ഹാംസ്ലൊ ” പുതാചെം ലഗ്ന് ലാഗി പാവ്ലാം തരീകയ് ആപ്ല്യാ ഗിയ്രാഞ്ചി തൊഖ്ണായ്? പുതാക് ശികയ് തിം തുജി ഗിയ്രാം .” ഖൊഖൊ ഹാംസത് ഇന്ദീആകാൻ സദുബാബാക് കുലായ്ലൊ. ” മാന്യ് ബായെ”.” പളയ് താഞ്ച്യാ ഖംയ്ച്യായ് നിർണയാക് ആമി വിരൊധ് കരപ് നാം. പട്നാം ജാലെം തർ ചുപ്ചാപ് കഡെക് സരപ്…. ” ദൊഗാംയ്നി സുൻ യെത്ഗീർ ജഗ്പാച്യാ ആപ്ല്യാ ജീണെചി ശീം ആഖുൻ ഘെത്ലി.
സാഞ്ചൊ രാജെശ് എഫീസാന്ത്ല്യാംൻ ആയ്ലൊ. ച്യാ നാശ്തൊ ജാലൊ, ഇന്ദീആകാൻ മ്ഹള്ളെം ” ആരെ യെത്യാ ആയ്താരാക് വിന്ദാക് ഫ്രി രാവ് സാംഗ്”. ” കിത്യാക് ഗെ ആഇ?”. ” ആരെ ബാബാ മംഗ്ളസൂത്ര് ആനി സദാം ഘാൽപാചെം കംഗൻ താജെ ആവ്ഡീചെ ഘെവ്പാക് ജായ് ൻഹംയ്?”. ” ഒകെ സാംഗ്താ താകാ ഹാംവ്”. ” ആരെ ആയ്താരാക് സകാളചെഞ്ച് തൊ മ്ഹൺ താകാ” ” ആം ”
ആയ്താരാക് സകാളീഞ്ച് രാജെശ് വചുൻ വിന്ദാക് ഘെവുൻ ആയ്ലൊ. ഇന്ദീആകാൻ സുനെഖാതീർ സ്പെശൽ സാംമ്കൊ മെദുവ്ഡെ ആനി സാംബാരാചൊ ബെത് കെല്ലൊ. ഥൊഡ്യാച് ദിസാംഭിതർ ചൌകൊനി ജാവ്പി ത്യാ ഫാമിലീൻ തുസ്ത് കരത് നാശ്തൊ കെലൊ.” വിന്ദാ, മംഗ്ളസൂത്ര് ആനി തുകാ ദിസ്പട്ടെ, കാമാക് വത്നാം ഘാൽപാക് കംഗൻ ഘെവ്പാക് ആമി തനിഷ്കാന്ത് യാ മുഗൊ?” ” ഹയ് ആഇ” ” തും ദൊനുയ് ഹാതാത് ഭാംഗ്രാചി കാങ്ക്ണാ ഘാൽതലെം കായ് എകാ ഹാതാനം ഘഡ്യാൾ ഘാലുൻ എകാ ഹാതാനം കംഗൻ ഘാൽതലെ തെ സാംഗ്”. “ആഇ എകച് കംഗൻ ബെസ്ട്” ” സ്പഷ്ട് ഉലയ്താം രാഗ് ബി ധർനാകാ ഹാം. ആമ്ചെം ബജെട് ദൊൻ ലാഖാഞ്ചെ. തുകാ ജായ് തസ്ല്യൊ വസ്തി ഘെ.” ” ആഇ,ആവ്ഡലെം മ്ഹാകാ തുഝെം സ്പഷ്ട് ഉലൊവ്പ്. ” സദുബാബ് ഹളുച് ഫുത്ഫുതലൊ “രാജെശ്, ആമി പൈശെ മെജുൻ ദവ്രയാ.” ചൊകൊനി ഫാമിൽ സാത്മജലി ഹാശാന്ത് രംഗ്ലി. വിന്ദാ മാത് ത്യാച് ഖിണാക് ഇന്ദീആകാചെം ഫെൻ ജാലെം സാംമ്കെം, ഹി ആപ്ലി സാസുമാംയ് ൻഹംയ് തർ കാൾജാതലി ഇശ്ടീൺ ജാത്ലി ഹെംയ് താജെ മതീന്ത് ശെർത് ജാലെം.
ദാരാന്തലെം മാപ് ഒലാണ്ഡൂൻ വിന്ദാ ത്യാ ഘർചി ഗൃഹലക്ഷ്മി ജാലെം. പായ്പഡണി ജാവംൻ വിന്ദാൻ ഇന്ദീആകാച്യാ കാൾജാക് ഗന്ധാചൊ ഹാത് ലായ്ലൊ. ഇന്ദീആകാൻ ലഖ്ലഖപി വജ്രാച്യൊ വെഡി, ആനി കംഗൻ സുനെച്യാ ഹാതാത് ദവർലെ. നമസ്കാർ കർപി സുനെക് മൻ, കാളീജ് ഭരുൻ ആശിർവാദ് ദിലെ. “വിന്ദാ, ആതാഞ്ച് തു ഹ്യാ ഘരാന്ത് ആയ്ലാം, നവവധുച്യാ ശിൺഗാരാന്ത് ആസ്തനാഞ്ച് തുകാ ഉതർ ദിതാം, ഹെം ഘർ…ഹൊ സംസാർ…ഹൊ മ്ഹജൊ പുത് ….ഹെം സഗ്ലെം ആയ്ച്യാൻ തുജെഞ്ച്.”. ” ആഇ….” ” ആയ്ക് ഫുഡ്ലെം… പുൺ ശാണ്യാ തും മാത് മ്ഹജെം. ഹാംവ് തുജെം വികെടകീപർ, പുൺ വികെടി രാഖ്പി …ഉഡവ്പി ൻഹംയ്” സുനെനെ മാംയ്ക് ഘട് വെംഗ് മാർലി. സദുബാബാൻ രാജെശാക് കുലായ്ലൊ, “ആരെ പളയ് ആഇ തുജൊ അധികാർ ഊജാർ കർതാ.”. ലജ്ലജുൻ താംമ്ഡെഞ്ച് ജാല്യാ വിന്ദാനയ് മ്ഹള്ളെം,” ഹാംവ്യ് തുകാ ഉതർ ദിതാം, ബാബാക് ആനി തുകാ ത്രാസ് ജാത്ലൊ,തുമ്ചെ മൻ ദുഖ്തലെം അശെം നാംവ് കെന്നാഞ്ച് വാഗ്ചെ നാം.”
കാംയ് മ്ഹയ്ന്യാംഭിതരച് ഹ്യാ ചൌകൊനി ഫാമിലെക് നവി ആങ്ക്രി യെവ്പാചി ലക്ഷണാം വിന്ദാൻ ദാഖയ്ലി. ദുവാളജെവണാം, ഫുലാം ബി ജാംവ്ന് രൂഹി ….ഇന്ദീആകാലി നാത് …പഹിലി ബെടി ധനാചി പെടി ജാംവ്ന് ജന്മാക് ആയ്ലി. ആനി സദുബാബാൻ രിടായ്രമെണ്ട് ഘെത്ലി. കിദ്യാക് തർ …രാജെശാചെ ഭുർഗെപൺ ശിർവിശെകലാഗുൻ താകാ അൺഭവപാക് മെള്ളെ നാശില്ലെ ആതാം നാതീവെളാർ ചാൻസ് സൊഡപ് നാം മ്ഹണൂൻ. രുഹീഫാട്ല്യാംൻ തീൻ വർസാംനി രെയാംശ് ജൽമാക് ആയ്ലൊ. ബാല്വാഡി, പ്രാഥ്മിക്, അശൊ നാത്രാഞ്ച്യൊ ചഡ്ത്യൊ കളാ സുരു ജാല്യൊ. ആനി കെന്നാഞ്ച് ആയ്ദനാങ്ക് ആയ്ദൻ ന ലാഗ്താം ചൽപി ത്യാ ഘരാന്ത് ഇന്ദീആകാച്യാ കാനാന്ത് ഖത്ഖതീത് തെൽ ഒതീല്ലെവരി “തിം” ഉത്രാ പഡ്ലി. പുത് ആനി സുൻ കിദെം ഉലയ്താത് ഥംയ് കെന്നാഞ്ച് ബാരീകസാണെൻ ലക്ഷ് ന ദിവ്പി ഇന്ദീആകാക് ഥർഥരൊ ഹാഡ്പി ഉതർ മ്ഹള്യാർ….. വൃദ്ധാശ്രം…..
ജാൺത്യാംനി കിദെംയ് സാംഗ്ലെ കി ഭുർഗ്യാംനി ഹയ് മ്ഹൺചെ ആനി ഭുർഗ്യാഞ്ചെ കിദെംയ് ആസും …സഗ്ലെഞ്ച് ദൊഗാംയ് ജാൺത്യാംനി മാഥ്യാവർ ഘെവ്ചെം അശെതരെൻ ചൽപി ഘരാന്ത് ഹെം അവ്ചിന്നപൺ ഘഡ്ലെം. വൃദ്ധാശ്രം ഹൊ ആപ്ല്യാ ദൊഗാംയ്ഖാതീരച് ഹെം ജാണുൻ ഇന്ദീആകാൻ ആപ്ലെം കാളീജ് ഘട് കെലെം. ഘർപുരവണെവെളാർ സൂനെക് ദില്ലെം ഉതർ യാദ് കരുൻ തിണെം ആപ്ല്യാ കാൾജാർ ഫാതൊർ ദവ്രലൊ. രാത്ചെ ആപ്ല്യാ കുഡീന്ത് ൻഹിദ്പാക് വത്ഗീർ ഇന്ദീആകാൻ ഹളുച് സദുബാബാല്യാ കാനാംർ ഹി ഗജാൽ ഘാലി.”ആയ്കലാം,ഹാംവ് സാംഗ്താ തെം ഥണ്ഡ്സാണെൻ ആയ്കുൻ ഘെ. ഒഗീച് കിളാഞ്ച് മാർനാകാം ആം” ഇന്ദീആകാലി ഉത്രാം ആയ്കുംൻ തൊ ഫട്ടകൻ ഹാന്ഥ്രുണാചെർ ഊഠുൻ ബസ്ലൊ.” ആയ്ജ് രാജെശ് ആനി വിന്ദാ വൃദ്ധാശ്രം അശെം കിദെം ഊലയ്താലിം. ഘഡ്യെ ആമി ഒൽഡ് ഫർനിചർ ജാല്യാന്ത് , നിരുപയൊഗി ഥാർല്യാത് മ്ഹണൂൻ ചഡ് കരുൻ ആമ്ചി ഭാൽകി ഘരാത്ല്യാംൻ വച്പാചി അശംസ് ദിസ്താ.” ഇന്ദീആകാ ഫടി മാർനാം ഹെം ജാൺപി സദുബാബാൻ തികാ മ്ഹ്-യാംൻ ഒഢ്ലി,” ഇന്ദി , തുവെം ലഗ്നാദിസാ വിന്ദാക് ദില്ലെം ഉതർ ആമി പാള്യാ. വിന്ദാ ആപ്ലെച് ഉതർ മൊഡ്താ തർ മൊഡു.” ” ആതാചം ഹൊ സംസാർ താഞ്ചൊ, താങ്കാ നാകാ തർ വചുയാ ആമിം. പുൺ താങ്കാ ത്രാസ് ദിവ്നയെ ആമിം”. വ്ഹാംവ്തെ ഡൊളെ പുസത് ഇന്ദീആകാ ഉലയ്ലെം.
ദുസ്രെ ദിസാക് സകാളിം സഗ്ലി സഹ്ജതായെൻ വാഗ്ലിം. സദുബാബ് രുഹി ആനി രെയാംശാക് സ്കുൽബസീർ പാവൊവ്പാക് ഗെലൊ. രാജെശ് ആധി വിന്ദാ ,ദൊഗാംയ് ഇന്ദീആകാമ്ഹ്-യാംൻ ആയ്ലി,” ആഇ, യെത്യാ മഹിന്യാഭരാത് ബാബാ ആനി തും വൃദ്ധാശ്രമാന്ത് രാവ്പാചെം.”. ” ലാഗി നാം മരെ തൊ? പൈസ് ആസ്ല്യാർ മായെചെ പാശ് ഇല്ലെ ബെഗീൻ തുട്തലെ.”ഇന്ദീആകാച്യാ സഹ്ജപണാനെ പുത്- സുൻ ചൊർചൊർ ഝാലി. ” നാം പുണ്യാത്” ” ബരെം, ആമി ഫാല്യാഞ്ച് വച്പാചെം കർതാത്, നാമൊ തിത്ലൊ ദി” രാജെശാൻ നാമൊ ബര്യില്ലെം കാഗദ് ആനി വർസാചെ പൈശെ ഫാരീക് കെല്ലി രെശീദ് ഥംയ്ച് ദവ്രലി ആനി ദൊഗാംയ് കാമാക് വച്പാക് ഗെലിം.
ദുസ്രെ ദിസാ ദൻപാരചി ഇന്ദീആകാ ആനി സദുബാബാൻ നാത്രാം ഘരാംൻ പാവ്ചെപയലീഞ്ച് ഘരാചൊ കായ്മചൊ രകാദ് ഘെത്ലൊ.പായാങ്ക് ഹാത് ലാംവ്ന് നമസ്കാർ കർപി പുത് ആനി സുനെക് ” സദാം സുഖി രാവാത് ” അസൊ ആശിർവാദ് ആനി ഭാംഗ്രാച്യൊ വസ്തി ദവ്രില്ലൊ ദബൊ ആനി ബെൻകെച്യൊ രസീദി ദിംവ്ന് ദാരാത് ഉബ്യാ ആശില്യാ ടെക്സീന്ത് വാചുൻ ബസ്ലിം. ചാർ കാൾജാം ഘട്ട് ജാല്ലിം.
വൃദ്ധാശ്രമാന്ത് ദൊഗാംയ് എകാമെകാക് സാംഭാളുൻ ഘെതാലിം,ദിസ് ഹെരാംവാംഗഡാ സഹജ് സൊപ്താലൊ. പുൺ രാത് മാത് നാത്രാഞ്ച്യാ യാദീൻ സൊപുൻ സൊപ്നാശില്ലി. താങ്കാ ആബാ-ആജെചി യാദ് യെംവ്ന് ത്രാസ് ജാവ്ചൊ ൻഹംയ് മ്ഹണൂൻ ഹീച് ദൊഗാംയ് പുത്-സുനെക് ഫൊൻ കർനാശില്ലിം, കെന്നാങ്കെന്നാംയ് വിന്ദാച് താങ്കാ കർതാലെം. ആയ്ജ് ണവ് മ്ഹയ്നെ ജാല്ലെ താങ്കാ പുണ്യാന്ത് യെംവ്ന്. രക്താചി ചൌംഗായ് സൊഡ് ണവ് മ്ഹയ്നെ പൊടാത് വാഡ്യില്ലൊ പുത് ലെഗീജ് ആയ്ലൊ നാം..ഹൊ ഖെദ് ഇന്ദീആകാ ഊദ്കാബരൊബർ ഗിൾതാലെം. എകാമെകാങ്ക് സാംഗാല്യാർ ത്രാസ് ജാത്ലൊ മ്ഹണുൻ ദൊഗാംയ് ൻഹാന്ത്നാം മൻസൊക്ത് രഡ്താലിം .ആനി ദൊള്യാന്ത് ശാബാംവാചൊ ഫെസ് ഗെലൊ ഹെഞ്ച് കാരൺ എകാമെകാക് ദിതാലിം.
അച്കിത് എക് ദിസ് വിന്ദാ ആനി ദൊഗാംയ് നാത്രാം വൃദ്ധാശ്രമാന്ത് ആയ്ലിം…തിഗാംയ്ചീയ് ദശാച് ഗെല്ലി സാംമ്കി. ആംഗഭർ ഒഢ്ണി ഗുഠ്ലാംവൻ ആയില്യാ വിന്ദാൻ ഇന്ദീആകാക് നമസ്കാർ കെലൊ.” സൌഭാഗ്യവതി ഭവ്” സദ്ചൊച് ആശിർവാദ് തിണെം ദിലൊ.ആനി വിന്ദാ തികാ ഘട് വെംഗ് മാരൂൻ രഡ്പാക് ലാഗ്ലെം. ദൊനുയ് നാത്രാം ആബാഞ്ച്യാ ഗള്യാംൻ പഡില്ലിം.” വിന്ദാ, ആഗൊ ജാലാ കിദെം ഗൊ ബായെ?” ഇന്ദീആകാക് ജാപ് രുഹീൻ ദിലി,” ആജ്ജെ പപ്പാ ഗെലൊ ഗെ ആമ്ചൊ.” സദൂബാബാച്യാ പായാംപൊന്ദാ ഫൊണ്ഡ് പഡില്ലെവരി ഝാലൊ.ഇന്ദീആകാൻ തർ ബൊബ് മാർലി സാംമ്കി.” ആമ്കാം ജാൺതെല്യാങ്ക് സൊഡുൻ പാഡ്പഡില്യാ യമാചി നദർ മ്ഹജ്യാ പുതാചെരച് പഡ്ലി.”
” ആഇ ,തുകാ ലഗ്നാദിസാ ദില്ലെം ഉതർ ഹാംവെ ജാണുൻ ബുജൂൻ മൊഡ്ലെം. കാരൺ രാജെശാക് ഫായ്നൽ സ്ടെജീചൊ കെൻസർ ഡിടെക്ട് ജാല്ലൊ.”. ” പുതാക് മ്ഹജ്യാ പാനാ സുപാരെച് സുദ്ധാ വെസൻ നാശില്ലെം, തരി ത്യാ ഹൽകട് ദുവെംസാൻ ഖാലൊച് താകാ. ആനി മ്ഹാകാ പാപ്ണീക് ഹെം സഗ്ളെ കർമഭൊഗ് പളൊവ്പാക് ദവർലാം.” ഇന്ദീആകാ ഫട്ട് ഫട്ട് കരുൻ ആപ്ലെ പൊലെ ആനി കപ്ലാർ ഥാപ്ടാം മാരുൻ ഘെതാലെം. ” ആഇ പുരായ് ലിവ്ഹർ ഗെല്ലെം ഗെ താജെം”. ” ഹാംവ് മ്ഹജെം ദിത്ലെം ആശില്ലെം അർദെം കിംവാ പാവുൺ ലിവ്ഹർ താകാ” ” സഗ്ള്യാക് പാത്ളില്ലൊ ഗെ താജെം ദുവെംസ്. കാംയ്ച് മ്ഹള്യാർ കാംയ്ച് ഉപായ് ആനി നാശില്ലൊ. ഖൂപ് ത്രാസ് ഭൊഗ്ലെ താണെം. തുമ്ച്യാംനി പളൊംവ്ക് ജാവ്ചെംനാം മ്ഹണൂൻ കാൾജാർ ഫാതൊർ ദവ്രൂൻ ആമി തുമ്കാം ഹാംഗാ പാവയ്ലെം. ഹ്യാ നിർണയാന്ത് ഹി തുമ്ചി ധാക്ടുലിം നാത്രാംയ് സാമിൽ ആശില്ലിം.”. ” ആബാ…ആജ്ജെ ആനി പപ്പാൻ ആമ്കാം സാംഗില്ലെം കിം തൊ ദെവാഗെർ ഗെലൊ കിം തുമ്കാം തുമ്ച്യാ ഘരാ ഹാഡ്പാചെം. ആത്താച് യാ ആമിം ആമ്ച്യാ ഘരാ.” രെയാംശാൻ ആജെച്യാ ഗള്യാംൻ ഗള്വെംഗ് ഘാലി.
സദുബാബ് ഫാത്രാചി മുർത് കസൊ ജാംവ്ന് ചിത്താലൊ, ജാചെ ഖാന്ദ്യാവെല്യാംൻ ആപ്ണെ നിമ്ണെ യാത്രെക് വച്പാചെ ചിതീല്ലെം തൊച് ഗെലൊ. ആനി താചൊ ജൽമദാതൊ ഹാംവ് ഉർലാ ഹാംഗാച്. കാൽ പയ്ര് മെരെൻ പുതാകഡെൻ ഹൊ ആമ്ചൊ മ്ഹാതാരപണാന്തലൊ ആധാരവഡ് മ്ഹണൂൻ പളഈല്ലെം, പുൺ ഹാജെഫുഡെ നാത്രാഞ്ചൊ ആധാരവഡ് ജാംവ്ന് ഉർല്യാ തി ജീൺ സൊപവ്പാചി. ” ചൽ ആബാ വചുയാ ആമിം”. “ഹയ്തർ, ഇന്ദി- വിന്ദാ യാ ആമിം ആമ്ച്യാ ഘരാ.”
