ಪಾಟಿಂ ಘುಂವೊನ್ ಪಳಯ್ತಾನಾ ಮ್ಹಜ್ಯಾ ಜಿವಿತಾಂತ್ ಮ್ಹಜ್ಯಾ ವಾಂಟ್ಯಾಕ್ ಆಯಿಲ್ಲೆ ಅವ್ಕಾಸ್ ಹಾಂವೆ ಬರ್ಯಾನ್ ವಾಪಾರ್ಲ್ಯಾತ್ ಮ್ಹಣ್ಚಿ ವ್ಹಡ್ ತೃಪ್ತಿ ಮ್ಹಾಕಾ ಆಸಾ” ಮ್ಹಣಾಲೊ ದೊ| ಜ್ಯೋ ಲೋಬೊ, ಕುಲ್ಶೇಕರ್.
ದೊ| ಲೋಬೊ, ಮಂಗ್ಳಾರಾ, 14 ವೆರ್, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಕೊಂಕ್ಣಿ ಸಂಸ್ಥ್ಯಾಚ್ಯಾ ಮಯ್ನ್ಯಾಳ್ಯಾ ಬೊಲ್ಕಾಂವ್ ಕಾರ್ಯಾವಳಿಂತ್ ಉಲಯ್ತಾಲೊ.
“ಹಾಂವ್ ಮಟ್ವೊ ದೆಕುನ್ ಲ್ಹಾನ್ ಆಸ್ತಾನಾ ಮ್ಹಾಕಾ ಶಾಸ್ತ್ರಿ ಮ್ಹಣ್ ಚಿಡಾಯ್ತಾಲೆ. ಜೈ ಜವಾನ್ – ಜೈ ಕಿಸಾನ್ ನಾರೊ ದಿಲ್ಲ್ಯಾ ಶಾಸ್ತ್ರಿಚೇರ್ ಮ್ಹಾಕಾ ವರ್ತೊ ಅಭಿಮಾನ್ ಆಸ್ಲೊ. ತಾಚ್ಯಾ ಅಕಾಲಿಕ್ ಮರ್ಣಾಚ್ಯಾ ಮಿಸ್ತೆರಾನ್ ಖಂತೀಸ್ಟ್ ಜಾಲ್ಯಾಂ ಪಯ್ಕಿಂ ಹಾಂವ್ಯೀ ಎಕ್ಲೊಂ. ಆನಿ ಹ್ಯಾಚ್ ಕಾರಣಾಕ್ ಲಾಗೊನ್, ವಿದೇಶಾಂಗ್ ಖಾತ್ಯಾಂತ್ ದೆಶಾಭಾಯ್ಲ್ಯಾ ಸೆವೆಚೊ ಅವ್ಕಾಸ್ ಮ್ಹಜ್ಯಾ ವಾಂಟ್ಯಾಕ್ ಯೆತಾನಾ, ಲಂಡನ್ ತಸಲೊ ಜಾಗೊ ಸೊಡ್ನ್ ಹಾಂವೆ ತಾಶ್ಕೆಂಟ್ ವಿಂಚ್ಲೊ. 2004 ವ್ಯಾ ವರ್ಸಾ ಶಾಸ್ತ್ರಿಚಿ ಜಲ್ಮಾಶತಾಬ್ದಿ ಆಸಾ ಮ್ಹಣ್ ಮ್ಹಾಕಾ ಖಬರ್ ಆಸ್ಲಿ ಆನಿ ಹೊ ಅವ್ಕಾಸ್ ತಾಶ್ಕೆಂಟಾಂತ್ ಆಸ್ತಾನಾ ಹಾಂವೆ ಬರ್ಯಾನ್ ವಾಪಾರ್ಲೊ. ಶಾಸ್ತ್ರಿಚ್ಯಾ ನಾಂವಾರ್ ಏಕ್ ವಸ್ತುಸಂಗ್ರಹಾಲಯ್, ಉದ್ಯಾನ್ ಆನಿ ತೋ ಮರಣ್ ಪಾವ್ಲೆಲ್ಯಾ ತಾಶ್ಕೆಂಟಾಂತ್ ಭಾರತೀಯ್ ಸಾಂಸ್ಕೃತಿಕ್ ಕೇಂದ್ರ್ ತಾಚ್ಯಾ ನಾಂವಾರ್ ಬದ್ಲಿಲೆಂ. ಹೆಂ ಮ್ಹಜ್ಯಾ ಜಿವಿತಾಂತ್ಲೆಂ ವ್ಹಡ್ ಸಾಧನ್ ಮ್ಹಣ್ ಹಾಂವ್ ಲೆಕ್ತಾಂ”
“ವ್ಹಡ್ಲೆ ಮನಿಸ್ ಅಶೆಚ್ ವ್ಹಡ್ಲೆ ಜಾಯ್ನಾಂತ್, ತಾಂಚೆಥಂಯ್ ಥೊಡೆ ವಿಶೇಸ್ ಗೂಣ್ ಆಸ್ತಾತ್” ಮ್ಹಣ್ ರಾಜೀವ್ ಗಾಂದಿಚೊ ಉಡಾಸ್ ಕಾಡುನ್ ಲೋಬೊನ್ – ತೀನ್ ಮೂರ್ತಿ ಭವನಾಂತ್ ಎಕಾ ಕಾರ್ಯಕ್ರಮಾಂತ್ ವಿದೇಶಿ ವಿದ್ಯಾರ್ಥಿಂ ಲಾಗಿಂ ಉಲಯಿಲ್ಲ್ಯಾ, ತವಳ್ ದೆಶಾಚೊ ಪ್ರದಾನಿ ಜಾವ್ನಾಸ್ಲೆಲ್ಯಾ ರಾಜೀವ್ ಗಾಂದಿನ್, ಕಾರ್ಯಕ್ರಮಾಂತ್ ವಿದೇಶಿ ವಿದ್ಯಾರ್ಥಿಂನಿ ದಿಲ್ಲೆಂ ತೊಂಡ್ಪಾಶಿ ದೂರ್ ಆಯ್ಕೊನ್, ತಾಂಚ್ಯಾ ಕಲ್ಯಾಣಾ ಖಾತಿರ್ ಕಶೆಂ ಕ್ರಮ್ ಘೆತ್ಲೆಂ ಮ್ಹಳ್ಳೆ ವಿಶ್ಯಾಂತ್ ಸಂಕ್ಷಿಪ್ತ್ ವಿವರ್ ದಿಲೊ. ಸಾಂಗಾತಾಚ್ ಮೊರಿಶಿಯಸ್ ಮೇಯರ್ ಡಿ ಕ್ರೂಜ್ ಮ್ಹಣ್ ಕಳ್ಳ್ಯಾ ಉಪ್ರಾಂತ್ ಪ್ಲಾಜಾ ಥಿಯೆಟರಾಂತ್ ಕಾರ್ಯಕ್ರಮ್ ಮಾಂಡುನ್ ಹಾಡುಂಕ್ ತಾಚೆಂ ‘ನಾಂ’ ಕಶೆಂ ‘ಹಾಂ’ ಜಾವ್ನ್ ಬದ್ಲಿಲೆಂ, ಪಿಟ್ಟಾಸಿ ಆನಿ ವಿದೇಶಿ ದ್ವೇಶಿ ಮ್ಹಣ್ ಸಮಾಜೆಂತ್ ಜೆರಾಲ್ ಅಭಿಪ್ರಾಯ್ ಆಸ್ಲೆಲ್ಯಾ ಗೊದ್ರೇಜ್ ಕಂಪ್ಣೆಚ್ಯಾ ಮ್ಹಾಲಕಾ ಥಾವ್ನ್ ಸಾಂಸ್ಕೃತಿಕ್ ಕಾರ್ಯಕ್ರಮಾಂಕ್ ಮಾತ್ ನಯ್, ವಿದೇಶಿ ವಿದ್ಯಾರ್ಥಿಂಚ್ಯಾ ಶಿಕ್ಪಾಕ್ ಸಯ್ತ್ ಕಶಿ ಕುಮಕ್ ಮೆಳ್ಚೆಪರಿಂ ಕೆಲೆಂ – ಹೆ ವಿಶ್ಯಾಂತ್ ಮಾರ್ಮಿಕ್ ಗಜಾಲಿಂಚಿಂ ದೃಶ್ಟಾಂತಾಂ ದೀವ್ನ್ ಲಗ್ಬಗ್ ಏಕ್ ವೋರ್ ದೊ| ಲೋಬೊನ್, ಬೊಲ್ಕಾಂವ್ ಅರ್ಧ್ಯಾ ವೊರಾಚ್ಯಾ ಉಲವ್ಪಾಚೊ ಸಂಪ್ರದಾಯ್ ಮೊಡುನ್, ಕೊಣಾಕ್ಚ್ ಉಬ್ಗೊಣ್ ಯೇನಾಶೆಂ ಆಪುರ್ಬಾಯೆಚೆಂ ಉಲವ್ಪ್ ಸಾದರ್ ಕೆಲೆಂ.
‘ಬೊಲ್ಕಾಂವ್’ ಕಾರ್ಯಾವಳಿಚೆಂ ಪರಿಕಲ್ಪನ್ ಆನಿ ಸುಂಕಾಣ್ ಸಾಂಬಾಳುನ್ ಆಸ್ಚ್ಯಾ ಎಚ್ಚೆಮ್, ಪೆರ್ನಾಲ್ ಹಾಚ್ಯಾ ಕೊಂಕಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ ಬುಕಾಕ್ 2025 ವ್ಯಾ ವರ್ಸಾಚೊ ರಾಷ್ಟ್ರೀಯ್ ಪಾಂವ್ಡ್ಯಾಚ್ಯೊ ಪ್ರತಿಷ್ಠಿತ್ ಸಾಹಿತ್ಯ ಅಕಾದೆಮಿ ಪುರಸ್ಕಾರ್ ಫಾವೊ ಜಾಲ್ಲ್ಯಾ ಸುವಾಳ್ಯಾರ್ ಬೊಲ್ಕಾಂವ್ ಪಂಗಡ್, ಕೊಂಕ್ಣಿ ಸಂಸ್ಥೊ, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್ ತರ್ಫೆನ್ ಮಾಲ್ಘಡೊ ಸಾಂದೊ ಶ್ರೀ ಆಲನ್ ಸಿ. ಎ. ಪಿರೇರಾ ಆನಿ ಉಲವ್ಪಿ ಜ್ಯೋ ಲೋಬೊ ಹಾಣಿ ಶೊಲ್ ಆನಿ ಫುಲಾಂ ಝೆಲೊ ದೀವ್ನ್ ಮಾನ್ ಕೆಲೊ. ಹ್ಯಾ ವೆಳಿಂ ಅಭಿನಂದನಾಚಿಂ ಉತ್ರಾಂ ಉಲಯಿಲ್ಲ್ಯಾ ಶ್ರೀ ಆಲನ್ ಸಿ. ಎ. ಪಿರೇರಾ ಹಾಣಿ “…ಕೊಂಕಣಿ ಸಾಹಿತ್ಯಾಚೆ ಚರಿತ್ರೆಂತ್ ಸಾಹಿತ್ಯ್ ವಿಮರ್ಶಾಕ್ ರಾಶ್ಟ್ರೀಯ್ ಮಟ್ಟಾರ್ ಪ್ರಶಸ್ತಿ ಮೆಳ್ಲ್ಲಿ ಹಿಚ್ ಪಯ್ಲೆ ಪಾವ್ಟಿಂ. ತಿ ಕೀರ್ತ್ ವಿಮರ್ಶಕ್ ಎಚ್ಚೆಮ್ ಪೆರ್ನಾಲಾಕ್ ಫಾವೊ ಜಾತಾ. ಪೆರ್ನಾಲ್ ತಸಲ್ಯಾ ಲ್ಹಾನ್ ಗಾಂವಾಂತ್ ಉಬ್ಜಾಲ್ಲೆಂ ಹೆಂ ಕಿಟಾಳ್ ಕರ್ನಾಟಕಾಂತ್ ಉಜ್ವಾಡ್ ಫಾಂಕವ್ನ್ ಆಸಾ-ತೆಂ ದೇಶ್ ತಶೆಂ ಅಂತರಾಶ್ಟ್ರೀಯ್ ಮಟ್ಟಾರ್ ಉಜ್ವಾಡ್ ಫಾಂಕವ್ಚಿ ದಿವ್ಟಿ ಜಾವ್ನ್ ಪರ್ಜಳೊಂದಿ…” ಮ್ಹಣ್ ಬರೆಂ ಮಾಗ್ಲೆಂ. ಹ್ಯಾ ವೆಳಿಂ ಆಪ್ಲ್ಯಾ ಕೊಂಕ್ಣಿ ಸರ್ಕಸ್ ಬುಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಲೇಖನಾಂ ವಿಭಾಗಾಂತ್ ಉತ್ತೀಮ್ ಪುಸ್ತಕ್ ಪುರಸ್ಕಾರ್ ಆಪ್ಣಾಯಿಲ್ಲ್ಯಾ ಬೊಲ್ಕಾಂವ್ ಸಾಂದೊ ರೋಶು, ಬಜ್ಪೆ ಹಾಕಾ ಫುಲಾಂ ತುರೊ ದೀವ್ನ್ ದೊ| ಜ್ಯೋ ಲೋಬೊನ್ ಬೊಲ್ಕಾಂವ್ ಪಂಗ್ಡಾ ತರ್ಫೆನ್ ಮಾನ್ ಕೆಲೊ.
ಬೊಲ್ಕಾಂವ್ ಕಾರ್ಯಾವಳಿಚೊ ಮುಕೆಲ್ ಸಲಹಾದಾರ್ ದೊ| ಆಲ್ವಿನ್ ಡೆಸಾ ಹಾಣಿ ಅಡಿಯೊ ಸಂದೇಶಾ ಮುಕಾಂತ್ರ್ ಬೊಲ್ಕಾಂವ್ ರೂವಾರಿ ಎಚ್ಚೆಮಾಕ್ ಬರೆಂ ಮಾಗ್ಲೆಂ.
ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ಪ್ರಾಧ್ಯಾಪಕ್ ಮನೋಜ್ ಫೆರ್ನಾಂದ್ ಹಾಣೆ ಕಾರ್ಯೆಂ ಚಲವ್ನ್ ವೆಲೆಂ ಆನಿ ಎಚ್ಚೆಮಾಚ್ಯಾ ಸಾಹಿತ್ಯಾಚಿ ಸಂಕ್ಷಿಪ್ತ್ ಒಳಕ್ ದಿಲಿ.
ಕೊಂಕ್ಣಿ ಸಂಸ್ಥ್ಯಾಚೊ ಕಾರ್ಯಕ್ರಮ್ ಸಂಚಾಲಕ್ ಪಿಂಟೊ ವಾಮಂಜೂರ್ ಹಾಣಿ ಜ್ಯೋ ಲೋಬೊಕ್ ಯೆವ್ಕಾರ್ ಮಾಗ್ಲೊ, ಸಹಾಯಕಿ ವನಿತಾ ಹಿಣೆ ಸಹಕಾರ್ ದಿಲೊ.
ಕಾರ್ಯವಳ್ ಸುರ್ವಾತ್ಚೆ ಪಯ್ಲೆಂ ಪಾಟ್ಲ್ಯಾ ದಿಸಾಂನಿ ಸಂಸಾರಿ ಪಯ್ಣ್ ಸಂಪವ್ನ್ ಸರ್ಗಿಂ ರಾಜಾಕ್ ಗೆಲ್ಲ್ಯಾ ಸಾಂ. ಲುವಿಸ್ ಶಿಕ್ಪಾ ಸಂಸ್ಥ್ಯಾಂಚೊಂ ರೆಕ್ಟರ್ ಬಾ| ಮೆಲ್ವಿನ್ ಜೋಸೆಫ್ ಪಿಂಟೊ ಹಾಂಚೊ ಉಡಾಸ್ ಕಾಡುನ್, ಮಿನುಟಾಚೆಂ ಮಾವ್ನ್ ಸಾಂಬಾಳುನ್, ತಾಂಕಾ ಬೊಲ್ಕಾಂವ್ ಪಂಗ್ಡಾ ತರ್ಫೆನ್ ಶಾಂತಿ ಮಾಗ್ಲಿ.
ಬೊಲ್ಕಾಂವ್ ಕಾರ್ಯಾವಳಿಕ್ ಹಾಜರ್ ಜಾಲ್ಲ್ಯಾ ಸರ್ವ್ ಸಾಂದ್ಯಾಂಕ್ ಮೊಗಾಚಿ ಕಾಣಿಕ್ ಜಾವ್ನ್ ಜ್ಯೋ ಲೋಬೊ ಹಾಣಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಫಾಯ್ಸ್ ಕೆಲ್ಲೊ ತಾಂಚ್ಯಾ ಆತ್ಮಕಥನಾಚೊ ಬೂಕ್ ” ಏಕ್ ಜಿವಿತ್: ಅವ್ಕಾಸ್ ಅಪರಿಮಿತ್” ಹಸ್ತಾಕ್ಶರ್ ಕರುನ್ ದಿಲೊ.
ಕಾರ್ಯಾವಳಿಕ್ ಪ್ಯಾಲೆಸ್ತೀನಿ ಕವಿ, ಪತ್ರ್ಕರ್ತ್ ನಜ್ವಾನ್ ಡಾರ್ವಿಶ್ ಆನಿ ಬೆಂಗ್ಳುರಾಂತ್ ಎಫ್.ಕೆ.ಸಿ.ಎ. ತಶೆಂ ಹೆರ್ ಸಂಘಟನಾಂಚೊಂ ರೂವಾರಿ ಆನಿ ಪ್ರಮುಕ್ ಸಮಾಜಿಕ್ ಮುಕೆಲಿ ಶ್ರೀ ಚಾರ್ಲ್ಸ್ ಗೋಮ್ಸ್, ಶಿರ್ವಾಂ, ರೊನಾಲ್ಡ್ ಒಲಿವೆರಾ ಪಡುಕೋಣೆ ಆನಿ ಹೆರ್ ಮಾನೆಸ್ತ್ ಹಾಜರ್ ಆಸ್ಲೆ.
